Elder Adeyinka A. Ojediran

Fitugafulu o le Pulega Aoao

O le konafesi aoao ia Aperila 2020 o “se faaiuga o le vaiaso e le mafaagaloina” mo Elder Adeyinka A. Ojediran.

Sa lagolagoina le sa liliu mai i le Ekalesia e avea o se Fitugafulu Pulega Aoao—o se uluai tamaalii o le Au Paia o Aso e Gata Ai o Nigeria ma Aferika i Sisifo. O lona lotofaafetai lofituina ma lona olioli na faateleina atili ina ua fofoga mai e Peresitene Russell M. Nelson o le a fausia le malumalu lona tolu o Nigeria i le Aai o Benin.

“Ou te le’i faamoemoeina lena mea,” na saunoa ai Elder Ojedrian, ma se ataata lapoa. “O le faalogo atu o saunoa mai lo tatou perofeta i se isi malumalu o le a fausia i Nigeria, sa o se mea matua matagofie tele. Ia te au lava ia, o se faamautuuga ua taalise le alu o le galuega a le Alii. E tofu uma i tatou ma le mau mea e fai e saunia ai fanau a le Atua mo le Afio Mai Faalua o Lona Alo.”

Na soifua mai i Ibadan, Nigeria, i le aso 5 Aperila, 1967, ia Amos Adeniyi ma Caroline Anike Ojediran, na maua muamua e Adeyinka Ayodeji Ojediran se faailoga o le tagata malaga i le Iunivesite o Ilorin i le 1991, ma mulimuli ane maua lona tikeri o le matuaofaiva i pulega tau pisinisi mai le Iunivesite o Tekinolosi i Ladoke Akintola. Sa ia tulitulimatagauina se faiva i mea tautupe ma le pulega o pisinisi o se polofesa faatausitusi faapitoa. Sa faigaluega o ia o se pule o mea tautupe faapisinisi mo le Shell Nigeria a o lei valaauina e avea o se Pulega Aoao.

E tolu tausaga talu ona uma lona papatisoga, sa ia feiloai ai ia Olufunmilayo Omolola Akinbebije i se siva. Na iu ina amata ona tafafao faamasani i la’ua, ae ona e eseese aai sa faigaluega ai, o lona uiga “sa na o le telefoni sa ma fesootai ai.”

Sa mulimuli ane faaipoipo i la’ua i Nigeria i le 1998 ma sa faamauina i le Malumalu i Johannesburg Aferika i Saute i le aso 14 Novema 2002. E toatasi le alo tamaitai o le au Ojedirans.

E faafetai Elder Ojediran mo valaauga uma a le Ekalesia na ia maua, talu ona auai ai i le Ekalesia i le 1990 ina ua 23 ona tausaga. O ona tofiga taitasi faalelotu na fesoasoani ia te ia e tuputupu ae ai ma sa ia maua ai avanoa paia e fesoasoani ai i isi e atiina ae i o latou foi valaauga ma tiute.

O Elder Ojediran, sa auauna atu o se Fitugafulu Eria i le taimi o lona valaauina, sa avea foi o se fesoasoani i se au peresitene o se misiona, peresitene o le siteki, fesoasoanin i se au peresitene o le siteki, epikopo, fesoasoani i se au epikopo, ma se peresitene o le paranesi.