O Se Malamalama Atoatoa o le Faamoemoe

Saunia e Elder Jeffrey R. Holland

O Le Korama a Aposetolo e Toasefululua

Ona ua toe faamautu mai e le Toefuataiga le upumoni faalefaavae faapea e galue le Atua i lenei lalolagi, e mafai ona tatou faamoemoe, e tatau ona tatou faamoemoe, tusa lava pe tatou te fetaiai ma mea e ono le gafataulimaina.

Ia Oketopa talu ai, na valaaulia ai i tatou e Peresitene Russell M. Nelson e vaavaai atu i luma i le konafesi lenei ia Aperila 2020 e ala ia i tatou taitoatasi i o tatou lava auala e toe tepa ai i tua ma vaaia le aao maoae o le Atua i le toefuataiina mai o le talalelei a Iesu Keriso. Sa matuai mamafa ia i ma’ua ma Sister Holland lena valaaulia faaperofeta. Sa ma vaai faalemafaufau ia i ma’ua lava faapea o loo ma ola i le popofou o le vaitau o le 1800, vaavaai atu i talitonuga faalelotu o lena aso. I lena faatulagana faalemafaufau, sa matou fesili ai ia i matou lava, “O le a se mea o misi iinei? O le a se mea ma te moomoo ma’imau pe a na ma maua? O le a se mea o ma faamoemoe o le a saunia e le Atua e tali mai ai i o ma moomooga faaleagaga?”

Ia, mo se mea e tasi, sa ma iloa ai o le lua seneturi talu ai, semanu ma te faamoemoe ma le naunautai mo le toefuataiga o se manatu faavae e sili atu ona moni a le Atua nai lo le tele na maua e tagata i lena taimi, na natia e pei ona foliga e tele ina Ona faia ai i tua atu o seneturi o talitonuga sese ma le malamalama sese. I le faaaogaina o se fasifuaitau mai ia William Ellery Channing, o se failotu lauiloa i na ona po, semanu ma te sailia le “uiga faamatua o le Atua,” lea na manatu Channing “o le uluai aoaoga faavae sili lea o le faaKerisiano.”¹ O lena aoaoga faavae semanu e aloaia ai le Atua o se Tama i le Lagi e manatu alofa, nai lo o se faamasino ‘ina’inā e tolaulau maia faamasinoga maua’i po o se pule o le fanua ua le o i ai, o sē sa punouai i mataupu faalelalolagi ae ua popona i se isi mea i le atulaulau.

Ioe, o o ma faamoemoega i le 1820 o le sailia o le Atua o loo fetalai mai ma taitaia faalauaitele i le taimi nei e pei ona Ia faia i le taimi ua mavae, o se Tama moni, i le tulaga sili ona alofa o lena upu. E mautinoa lava semanu e le o Ia o se tagata e faasausili, tuufaitalia e pule malosi, o le e muai filifilia ni nai tagata mo le faaolataga ona tuu atu lea i e o totoe o le fanauga a tagata ia malaia. E leai, o ia o lē o ana taga uma, e ala i le tautinoga paia, e faia “mo le manuia o le lalolagi; ona ua alofa o ia i le lalolagi”² ma i latou uma o e nonofo ai. O lena alofa o Lana mafuaaga tupito lea mo le auina mai o Iesu Keriso, Lona Alo Pele, i le lalolagi.³

I le ta’ua ai o Iesu, pe ana faapea o ma ola ai i na uluai tausaga o le seneturi 19, semanu ma te iloaina ma le atugaluga ma le popole tele o masalosaloga e uiga i le moni o le soifuaga o le Faaola ma le Toetu ua amata ona i ai tosinaga tele i atunuu Kerisiano. O le mea lea, semanu ma te faamoemoe mo se faamaoniga e oo mai i le lalolagi atoa e faamautu ai le molimau faatusi paia e faapea o Iesu o le Keriso, o le Alo moni o le Atua, le Alefa ma le Omeka, ma na o Ia lava le Faaola o le a iloa e lenei lalolagi. Semanu o se tasi o o ma’ua faamoemoega aupito taua ia aumaia foi i luma isi faamaoniga faatusi paia, o se mea e mafai ona fau ai se isi molimau ia Iesu Keriso, e faalauteleina ma faaleleia ai lo ma’ua iloa o Lona soifua mai faavavega, o Lana misiona ofoofogia, taulaga togiola, ma le Toetu mamalu. O le mea moni o sea pepa o faamatalaga o le “amiotonu [na auina] mai i lalo mai le lagi, ma le upumoni [na auina atu] i fafo mai le eleele.”⁴

O le matauina o le lalolagi Kerisiano i na ona po, semanu ma te faamoemoe e saili se tasi na faatagaina e le Atua i le pule moni o le perisitua e mafai ona papatisoina i ma’ua, faaee mai le meaalofa o le Agaga Paia, ma tuuina mai sauniga o le talalelei e tatau ai mo le faaeaga. I le 1820, semanu ma te faamoemoe e vaai o faataunuu ia folafolaga mamana a Isaia, Mika, ma isi perofeta anamua e faatatau i le toefoi mai o le maota mamalu o le Alii.⁵ Semanu ma te sagisagi fiafia e vaai i le mamalu o malumalu paia na toe faatutuina, faatasi ai ma le Agaga, o sauniga, o le mana, ma le pule e a’oa’o atu ai upumoni e faavavau, faamalolo manu’a patino, ma fusia faatasi aiga e faavavau. Semanu ou te suea i soo se mea ma mea uma ia maua se tasi e i ai le pule e fai mai ia te a’u ma si a’u pele o Patricia, o le ma faaipoipoga i sea nofoaga ua faamaufaailogaina mo le olaga nei ma le faavavau atoa, ma le le toe faalogo atu lava pe tau ta’u mai ia i ma’ua le fetuu faatalutalua “seia tatala oulua e le oti.” Ou te iloa “e tele maota e nonofo ai i le fale o lo [tatou] Tama,”⁶ ae peitai, i sa’u lava tala, afai ou te laki tele e maua se tasi o na mau maota, atonu e le telē atu ia te a’u nai lo o se faasee pala pe afai matou te le o faatasi ma Pat ma le ma fanau e maua ai lena tofi. Ma mo ma augatama, o nisi o i latou o e sa soifua ma ua maliliu anamua, e aunoa ma le faalogo i le suafa o Iesu Keriso, semanu ma te faamoemoe mo lena manatu faavae amiotonu ma le alofa mutimutivale faaletusi paia ia toefuatai mai—o le faiga o le ofoina atu e e o soifua ia sauniga faaola mo o latou aiga ua maliliu.⁷ E leai se isi faiga e mafai ona ou mafaufauina e faaalia ai ma le matagofie tele se popolega o se Atua alofa mo tagata uma o Ana fanau i le lalolagi tusa lava pe o anafea sa soifua ai pe o fea foi na maliliu ai.

Ia, o la ma lisi o faamoemoega o le 1820 e mafai ona alu pea lava, ae atonu o le savali aupito taua o le Toefuataiga e faapea, ia ‘aua ne’i lē taulau na faamoemoega. Na amata i le Vao Paia ma faaauau pea lava e oo mai i lenei taimi, o nei naunauga na amata ona tino moni mai ma avea ai, e pei ona sa a’oa’o mai e le Aposetolo o Paulo ma isi, o taula moni o le agaga, e le matosina ma ua mausali.⁸ O le mea sa na ona faamoemoe i ai ua avea nei ma talafaasolopito.

O lea la, o le mea lea e tatau ai ona toe tepa i tua i le 200 tausaga o le agalelei o le Atua i le lalolagi. Ae faapefea le ma vaai i luma? O loo i ai lava o ma faamoemoega e le’i faataunuuina lava. E oo lava i lenei taimi o tatou talanoa ai, o loo tatou tau i se taua “ua manaomia uma ai tagata” e faasaga i le COVID-19, o se faamanatu paia e mafai e se vairasi⁹ e faa-1,000 lona itiiti ifo i lo le ninii o se oneone¹⁰ ona aveina le lalolagi atoa ma tamaoaiga i le lalolagi atoa i o latou tulivae. Tatou te tatalo mo i latou ua maliliu ē pele ia i latou i lenei mala i aso nei, faapea foi ma i latou o e ua aafia po o lamatia i le taimi nei. E mautinoa lava lo tatou tatalo mo i latou o loo tuuina atu se tausiga matagofie tau le soifua maloloina. Pe a tatou manumalo ai i lenei mea—ma o le a tatou [manumalo]—tau ina ia tatou tuuto tutusa atu i le faasaolotoina o le lalolagi mai le vairasi o le fiaaai, faasaolotoina o tuaoi ma malo mai le vairasi o le mativa. Tau ina tatou faamoemoe mo a’oga o loo aoaoina ai tamaiti a’oga—ia le fefefe ne’i tafanaina i latou—ma mo le meaalofa o le faaaloalo patino mo fanau taitasi a le Atua, ia le faasi’ugutua i soo se tulaga o le lanu, ituaiga, po o se faiga faailogalanu ona o le lotu. A faapuupuuina nei mea uma o lo ma faamoemoe pea lea mo se tuuto sili atu i poloaiga sili e lua: ia alolofa i le Atua e ala i le tausisia o Lana apoapoaiga ma ia alolofa i o tatou tuaoi e ala i le faailoa atu o le agalelei ma le agaalofa, onosai ma le lotofaamagalo.¹¹ O nei poloaiga paia sili e lua, o loo i ai pea—ma e faavavau ma o le a tumau pea—na pau lo ma faamoemoega moni mo le tuuina atu ia tatou fanau o se lalolagi sili atu nai lo le lalolagi ua latou iloa nei.¹²

E faaopoopo atu i le mauaina o nei manaoga i le lalolagi, e toatele o i ai i lenei aofia e i ai ni faamoemoega patino loloto: faamoemoe mo se faaipoipoga ia faaleleia, po o nisi taimi e na ona faamoemoe mo se faaipoipoga, faamoemoe mo se vaisu ia faatoilaloina; faamoemoe mo se atalii/afafine ua se ia toe foi mai, faamoemoe mo se tiga faaletino ma faalelagona o le mau ituaiga ia muta. Ona ua toe faamautu mai e le Toefuataiga le upumoni faalefaavae faapea e galue le Atua i lenei lalolagi, e mafai ona tatou faamoemoe, e tatau ona tatou faamoemoe, tusa lava pe tatou te fetaiai ma mea e ono le gafataulimaina. O le uiga lea o le mau ina ua mafai e Aperaamo ona faamoemoe i se mea na ono le mafai ona tupu¹³—o lona uiga, sa mafai ona talitonu o ia e ui lava i mafuaaga uma ia lē talitonu ai—faapea e mafai e i la’ua ma Sarai ona fanauina se tamaitiiti ina ua foliga mai e matua le mafai lava. O lea, ou te fesili ai, “afai o le tele na’ua o o tatou faamoemoega o le 1820 sa mafai ona amata ona faataunuuina i se emo mai o le malamalama i le lagi i se tama itiiti na tootuli i se pupu laau i matu o le setete o Niu Ioka, aisea la tatou te le faamoemoe ai i manaoga amiotonu ma faanaunauga faaKeriso ia taliina ofoofogia, ma faavavega e le Atua o i ai le faamoemoega uma?” E ao ina tatou talitonu uma o mea tatou te mananao ai i le amiotonu e mafai ona i ai se aso, se ala, e avea ai mo tatou.

Uso e ma tuafafine, ua tatou iloa nisi o vaivaiga faaletonu i le popofou o le seneturi 19. E le gata i lea, ua tatou iloa foi se mea e uiga i faaletonu faalelotu i nei aso o loo tuua ai pea ē fia aai ma le faamoemoe o nisi e lei faataunuuina. Ua tatou iloa o na gaulemalie eseese ua taitai ese atu ai nisi mai faapotopotoga faalelotu masani. Ua tatou iloa foi, e pei ona tusia e se tasi tusitala lē fiafia, e faapea “e toatele taitai faalelotu [o na ona po] e foliga sa matua le malamalama” i le taulimaina o lea ituaiga o tulaga faiifo, sa avea ma a latou tali “se meaai suavaia, o se ituaiga lotu e manatu ifo ai tagata o la e lelei, e pupū tele ai i mea e lē taua, e faaupu ai ma le faaeteete mea e leaga ia logomalie [po o nisi foi taimi] o talavalea e le musuia”¹⁴—ma o nei mea uma sa faia i se taimi na matua manaomia ai e le lalolagi ni mea e sili atu, o le taimi ua alagatatau ai mo tupulaga faia’e le anoanoai o mea, ma i ona po o Iesu sa Ia ofoina mai le anoanoai o mea. I le avea ai ma soo o Keriso, e mafai ona tatou tutula’i i luga a’e o na Isaraelu anamua o e na ōi fai mai, “Ua mamago o matou ivi, ma ua leai so matou faamoemoe.”¹⁵ E moni, afai e iu ina leai so tatou faamoemoe, ua tatou le maua la a tatou toe ‘oa faaiu tumau. O luga tonu lava o le faitotoa o seoli lea na tusia ai e Dante se lapataiga i ē uma e malaga e ui atu i lana Divina Commedia: “Ia lafoai uma le faamoemoe,” na ia fai mai ai, “outou o e ulufale mai iinei.”¹⁶ E moni, pe a mou atu le faamoemoe, o le mea o totoe ia i tatou o le sasao o le afi mumu matamataita o seoli i ona itu uma.

O lea la, a tuta’ia ua leai se faamoemoe ma, pei ona fai mai le viiga “ua toilalo isi fesoasoani ma ua sola foi le filemu,”¹⁷ o loo i ai faatasi ma isi o o tatou uiga faaleatua e sili ona tatau ai lenei meaalofa taua o le faamoemoe e soofaatasi pea i lo tatou faatuatua i le Atua ma lo tatou alofa mama i isi.

I lenei tausaga o le faamanatuina o le luaselau tausaga, pe a tatou toe tepa i tua e vaavaai atu i mea uma ua tatou maua ma olioli i le iloa ai o le tele na’ua o faamoemoega ua faataunuuina, ou te toe ta’ua ai le manatu o se tamaitai faifeautalai matagofie ua foi mai, o le na fai mai ia i matou i Johannesburg i na o ni nai masina talu ai, “[Tatou] te lei o mai i lenei mamao, ia tau na ona oo mai i lenei mamao.”¹⁸

I le toefaaupuina o se tasi o saunoaga sili ona musuia faalaeiau ua tusia i tusitusiga paia, ou te faapea atu ai faatasi ma le perofeta o Nifae ma lena tuafafine talavou:

“O’u uso e [ma tuafafine] pele, [ona ua maua e outou nei uluai fua o le Toefuataiga], ou te fesili atu, po ua faia ea mea uma? Faauta, ou te fai atu ia te outou, E leai. …

“… E tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. … Afai o le a outou faia[,] … ua fetalai mai ai le Tama: O le a outou maua le ola e faavavau.”¹⁹

Ou te faafetai, o’u uso e ma tuafafine, mo mea uma ua tuuina mai ia i tatou i lenei tisipenisione faaiu ma le aupito sili, o le tisipenisione o le talalelei toefuataiina a Iesu Keriso. O meaalofa ma faamanuiaga ua tafe mai lena talalelei o mea uma ia e taua ia te a’u—mea uma—i se taumafaiga la e faafetai atu i lo’u Tama i le Lagi mo ia mea, ua ia te a’u ni “folafolaga e tausia, ma ni maila e savalia ae ou te le’i moe, ma ni maila e savalia ae ou te le’i moe.”²⁰ Tau ina ia fetaomi atu i luma ma le alofa i o tatou loto, ma savavali i le “atoatoa o le faamoemoe,”²¹ lea e faamalamalamaina le ala o faanaunauga paia ua tatou i ai nei mo le 200 tausaga. Ou te molimau atu o le a tumu le lumanai i vavega ma taumasuasua i faamanuiaga e pei ona sa i ai i le tuanai. Ua ia i tatou mafuaaga uma e faamoemoe ai mo faamanuiaga e sili atu nai lo na faamanuiaga ua uma ona tatou maua aua o le galuega lenei a le Atua Silisiliese, o le Ekalesia lenei o faaaliga faifaipea, ma o le talalelei lenei a Keriso o le alofa tunoa ma le agalelei lē faatuaoia. Ou te molimau atu ai i nei upumoni uma ma le tele o isi mea i le suafa o Iesu Keriso, amene.