2020
O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga
Me 2020
14:11

O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga

Saunia e Elder Quentin L. Cook

O Le Korama a Aposetolo e Toasefululua

O faaaliga faifai pea ua maua ma o loo maua pea e ala mai i auala ua faavaeina e le Alii.

O le asō o le a ou lauga atu ai i faaaliga faifai pea i perofeta ma faaaliga faifai pea faaletagata lava ia e taiala ai o tatou olaga.

O nisi taimi tatou te maua ai faaaliga e tusa lava pe tatou te le iloaina ia faamoemoega o le Alii. A o le’i valaauina Elder Jeffrey R. Holland e avea ma se Aposetolo ia Iuni o le 1994, sa ou maua se aafiaga faafaaaliga matagofie o le a valaauina o ia. Sa avea a’u ma se sui lisone ma sa leai se mafuaaga o le a ou maua ai lena malamalama. Ae sa avea i ma’ua ma ni soa a o avea ma faifeautalai talavou i Egelani i le amataga o le vaitau 1960, ma ou te alofa tele mo ia. Sa ou manatu i lea aafiaga o se alofa mutimutivale agamalu mo a’u. I nai tausaga talu ai nei, sa ou mafaufau ai pe sa sauniaina a’u e le Alii ia avea ma se soa laitiiti i le Toasefululua i se soa maoae faafaifeautalai sa avea ma a’u soa laitiiti a o avea ma’ua ma ni faifeautalai talavou.1 O nisi taimi ou te lapataia ai faifeautalai talavou ia agalelei i a latou soa laiti ona latou te le iloa lava le taimi e ono avea ai i latou ma a latou soa sinia.

E i ai sa’u molimau mausali o lenei Ekalesia toefuataiina o loo taitaia e lo tatou Faaola, o Iesu Keriso. E silafia e Ia po o ai e valaauina e avea ma Ana Aposetolo ma po o le a foi le faasologa e valaau ai i latou. E silafia foi e Ia le auala e saunia ai Ana Aposetolo sinia e avea ma perofeta ma Peresitene o le Ekalesia.

Ua faamanuiaina i tatou i lenei taeao e faalogo atu i lo tatou perofeta pele, Peresitene Russell M. Nelson, na fofogaina se folafolaga loloto o le faamanatuina o le lua seneturi i le lalolagi e faatatau i le Toefuataiga o le atoatoaga o le talalelei a Iesu Keriso.2 O lenei tautinoga mamana a Peresitene Nelson ua faamanino mai ai e faapea o le Ekalesia a Iesu Keriso ma lona tupuaga, ola, ma le ala e agai i ai mo le lumanai ua taula atoa i le mataupu faavae o faaaliga faifai pea. O le folafolaga fou ua fai ma faatusa o fesootaiga a se Tama alofa i Lana fanau.

I se aso ua leva atu, sa faailoa mai ai e Peresitene Spencer W. Kimball ni lagona ia o loo ia te a’u i le asō. Na ia ta’ua: “E ui lava i mea uma … ae e tatau ona sili atu lo tatou agaga faafetai i le aso [mo] ona o le tatalaina mai pea o le lagi, ma o le Ekalesia toefuataiina a Iesu Keriso ua faavaeina i luga o le papa o faaaliga. E moni lava o faaaliga faifai pea o le toto ola lea o le talalelei a le Alii ma le Faaola soifua o Iesu Keriso.”3

Na muai vaai le perofeta o Enoka i aso ua tatou ola ai nei. Sa faailoa atu e le Alii ia Enoka le amioleaga tele o le a matua salalau ma valoia mai “puapuaga e tele” o le a tutupu. Ae ui i lea, sa folafola mai e le Alii, “ae o lo’u nuu o le a Ou faasaoina.”4 “Ma o le a Ou auina atu i lalo mai le lagi le amiotonu; ma o le a Ou auina atu le upumoni i fafo mai le eleele, e molimau atu i la’u Toatasi na Fanaua.”5

Sa a’oa’o mai Peresitene Ezra Taft Benson ma le mana tele e faapea o le Tusi a Mamona, le ma’a’au’au o le tatou tapuaiga, na sau i fafo mai le eleele i le faataunuuga o le fetalaiga a le Alii ia Enoka. O le Tama ma le Alo ma agelu ma perofeta na faaali atu i le Perofeta o Iosefa Samita na “faatonuina e le lagi e toefuatai mai mana e tatau ai i le malo.”6

Na maua e le Perofeta o Iosefa Samita lea faaaliga ma lea faaaliga. O nisi [o ia faaaliga] ua uma ona talanoaina i lenei konafesi. E tele faaaliga na maua e le Perofeta o Iosefa ua faasaoina mo i tatou i totonu o le Mataupu Faavae ma Feagaiga. O tusitusiga faavae uma o le Ekalesia o loo i ai le mafaufau ma le finagalo o le Alii mo i tatou i lenei tisipenisione mulimuli.7

E faaopoopo atu i nei tusitusiga paia faavae maoae, ua faamanuiaina i tatou i faaaliga faifai pea i perofeta soifua. O perofeta o “sui tofia o le Alii, ua faatagaina e saunoa mo Ia.”8

O nisi faaaliga e matua ma’eu le taua, ma o isi e faaleleia ai lo tatou malamalama i upumoni paia taua ma maua ai le taiala mo o tatou aso.9

Tatou te matua faafetai tele mo le faaaliga ia Peresitene Spencer W. Kimball na faasafua atu ai le perisitua ma faamanuiaga o le malumalu i alii agavaa uma o le Ekalesia i le aso 8 o Iuni, 1978.10

Ua ou auauna faatasi ma le toatele o le Toasefululua sa i ai ma auai i le taimi na maua ai lena faaaliga taua. Sa faamautu mai e i latou taitoatasi, i talanoaga patino, le taitaiga mamana faaleagaga ma le autasi na latou oo i ai ma Peresitene Kimball. E toatele na fai mai o le faaaliga pito sili lea ona mamana na latou mauaina talu mai lena taimi.11

O i matou o loo auauna atu i le taimi nei i le Korama a Aposetolo e Toasefululua ua faamanuiaina i o matou aso a o oo mai faaaliga taua e ala mai i perofeta o i ai nei.12 Ua avea Peresitene Russell M. Nelson ma se sui tofia o le Alii aemaise e faatatau i faaaliga e fesoasoani ai i aiga ia fausia ni malutaga o le faatuatua i o latou fale, faapotopoto Isaraelu ua faataapeapeina i itu uma e lua o le veli, ma faamanuia tagata ua maua faaeega paia i mataupu tau i sauniga paia o le malumalu.

Ina ua faasilasila mai suiga taua ina ia faamanuia ai o tatou aiga i le konafesi aoao ia Oketopa 2018, ou te molimau atu “i fonotaga a le Aufono a le Au Peresitene Sili ma le Korama a Aposetolo e Toasefululua i totonu o le malumalu, … i le mavae ai ona aioi atu o lo tatou perofeta pele i le Alii mo se faaaliga … , sa maua ai se faamautinoaga mamana e uso uma.”13

I lena taimi, o isi faaaliga e fesootai i sauniga paia o le malumalu na mauaina ae sa le’i faasilasilaina pe faatinoina.14 O lenei taiala sa amatalia i faaaliga faaperofeta patino ia Peresitene Russell M. Nelson ma faamautinoaga agamalu ma mamana ia i latou e auai i le faagasologa. Sa faaauai patino e Peresitene Nelson ia tuafafine o loo pulefaamalumalu i faalapotopotoga a le Aualofa, Tamaitai Talavou, ma le Peraimeri. O le taiala faaiu, i totonu o le malumalu, i le Au Peresitene Sili ma le Korama a Aposetolo e Toasefululua sa matua faaleagaga ma mamana. Sa iloa e i matou taitoatasi sa matou mauaina le mafaufau, finagalo, ma le siufofoga o le Alii.15

Ou te tautino atu ma le paia atoa o faaaliga faifai pea ua maua ma o loo maua pea e ala mai i auala ua faavaeina e le Alii. Ou te molimau atu o le folafolaga fou na fofogaina e Peresitene Nelson i lenei taeao o se faaaliga e manuia ai tagata uma.

Matou te Tuu Atu se Valaaulia i Tagata Uma ia Taumamafa i le La’o’ai o le Alii

Matou te tautino atu foi lo matou naunautaiga faamaoni ina ia toe faatasia ma i latou o ē o loo tauivi ma a latou molimau, ua le toaaga, pe ua aveesea foi o latou suafa mai faamaumauga a le Ekalesia. Matou te mananao ia taumamafa faatasi ma outou, “i afioga a Keriso,” i le la’o’ai o le Alii, ia a’oa’o i mea e tatau ona faia e i tatou uma.16 Matou te manaomia outou! E manaomia outou e le Ekalesia! E manaomia outou e le Alii! O le matou tatalo faamaoni ia outou auai faatasi ma i matou i tapuaiga i le Faaola o le lalolagi. Matou te iloa o nisi o outou atonu na faatiga i ai, agaleagaina, po o isi amioga e le FaaKeriso. Matou te iloa foi o nisi o loo i ai ni luitau i lo latou faatuatua atonu e le o talisapaiaina atoatoa, malamalama i ai, pe foiaina foi.

O nisi o o tatou tagata sili ona faamaoni ma faatuatua ua mafatia i se luitau i lo latou faatuatua mo se vaitau. Ou te fiafia i le tala moni ia W. W. Phelps, o le na tuua le Ekalesia ma molimau e faasagatau i le Perofeta o Iosefa Samita i se fale faamasino i Misuri. Ina ua salamo, sa ia tusi atu ia Iosefa, “Ua ou iloa le tulaga ua ou i ai, ua e iloaina, ma ua silafia e le Atua, ma ou te manao ia laveaiina a’u pe afai e fesoasoani mai a’u uo ia te a’u.”17 Sa faamagalo o ia e Iosefa, ma toe faafaigaluegaina o ia, ma tusi atu i ai ma le agaalofa, “O uo sa i ai muamua ua toe uo foi i le faaiuga.”18

Uso e ma tuafafine, po o a lava ou tulaga, faamolemole ia iloa o le a toe talileleia e le Ekalesia ma ona tagata oe!

Faaaliga Faaletagata Lava Ia e Taialaina ai o Tatou Olaga

O loo avanoa faaaliga faaletagata lava ia i tagata uma e saili atu ma le lotomaualalo i le taitaiga mai le Alii. E taua foi e pei o faaaliga faaperofeta. O faaaliga faaleagaga faaletagata lava ia mai le Agaga Paia ua mauaina ai e le faitau miliona le molimau e manaomia ina ia papatisoina ai ma faamauina o ni tagata o Le Ekalesia a Iesu Keriso o le Au Paia o Aso e Gata Ai.

O faaaliga faaletagata lava ia o le faamanuiaga loloto lea e maua pe a maea le papatisoga i le taimi e “faapaiaina [ai tatou] i le taliaina o le Agaga Paia.”19 Ou te manatua se faaaliga faaleagaga faapitoa ina ua 15 o’u tausaga. Sa saili atu e lo’u uso pele se taitaiga mai le Alii pe faapefea ona tali atu i lo ma tamā pele, sa le manao e auauna atu lo’u uso i se misiona. Sa ou tatalo foi ma se faamoemoega faamaoni ma maua ai se faaaliga faaletagata lava ia o le moni a’ia’i o le talalelei.

O le matafaioi a le Agaga Paia

O faaaliga faaletagata lava ia e fua i upumoni faaleagaga e maua mai le Agaga Paia.20 O le Agaga Paia o le na te faaali mai ma molimau mai i upumoni uma, aemaise le moni o le Faaola. A aunoa ma le Agaga Paia, e le mafai ona tatou iloa moni o Iesu o le Keriso. O lana matafaioi taua tele o le molimau mai lea i le Tama ma le Alo ma o La faalagiga ma lo La mamalu.

E mafai e le Agaga Paia ona faatosinaina tagata uma i se ala mamana.21 O lenei faatosinaga o le a le tumau vagana ua papatisoina se tasi ma mauaina le meaalofa o le Agaga Paia. E avea foi le Agaga Paia ma se sui e faamama [i tatou] i le faagasologa o le salamo ma le faamagaloga.

E fesootai mai le Agaga i auala ofoofogia. Na faaaoga e le Alii lenei faamatalaga matagofie:

“O le a ou faaali atu ia te oe i lou mafaufau ma lou loto i le Agaga Paia, e oo atu ia te oe ma o le a tumau i lou loto.

O lenei, faauta, o le agaga lenei o faaaliga.”22

E ui o ona aafiaga e mafai ona matua mamana tele, ae tele lava ina sau filemu o se leo filemu ma itiiti.23 Ua aofia i tusitusiga paia le tele o faataitaiga o le auala e faatosinaina ai e le Agaga o tatou mafaufau, e aofia ai le fetalai mai o le fielmu i o tatou mafaufau,24 afio i o tatou mafaufau,25 faamalamalamaina o o tatou mafaufau,26 po o se leo i o tatou mafaufau.27

O nisi o mataupu faavae e sauniaina i tatou e maua faaaliga ua aofia ai:

  • Tatalo mo le taitaiga faaleagaga. I le faaaloalo ma le lotomaualalo e manaomia ai ona tatou saili atu ma ole atu28 ma ia onosai ma usitai.29

  • Saunia mo musumusuga. O lenei mea e manaomia ai lo tatou ogatasi ma a’oa’oga a le Alii ma ia tausisi i Ana poloaiga.

  • Taumafa ma le agavaa i le faamanatuga. A tatou faia lenei mea, ua tatou molimau atu ma osifeagaiga ma le Atua tatou te ave i o tatou luga le suafa o Lona Alo Paia ma e tatou te manatua pea o Ia ma tausi i Ana poloaiga.

O nei mataupu faavae e sauniaina i tatou ia maua, iloa, ma mulimuli i uunaiga ma le taitaiga a le Agaga Paia. Ua aofia i lenei mea ia “mea filemu … e maua ai le olioli [ma le] … ola e faavavau.”30

O le a matua faaleleia a tatou sauniuniga faaleagaga pe a tatou suesue e le aunoa i tusitusiga paia ma upumoni o le talalelei ma mafaufau loloto i o tatou mafaufau le taitaiga tatou te sailia. Ae manatua ina ia onosai ma faalagolago i le taimi a le Alii. O le taitaiga e aumai e se Alii silisili ese pe a Ia “filifili ma le loto i ai e a’oa’o i tatou.”31

Faaaliga i o Tatou Valaauga ma Tofiga

O le a tuuina mai foi e le Agaga Paia faaaliga i o tatou valaauga ma tofiga. I lo’u aafiaga, o le taitaiga faaleagaga taua e tele ina oo mai pe a tatou taumafai e faamanuia isi i le faataunuuina o o tatou tiutetauave.

Ou te manatua a o avea ma se epikopo talavou le mauaina o se valaau faapopoleina mai se ulugalii ae toeitiiti pu’e la’u vaalele mo se fonotaga faapisinisi. Sa ou aioi atu i le Alii a o le’i taunuu mai i la’ua ia iloa pe faapefea ona ou faamanuiaina i la’ua. Sa faaali mai ia te a’u le natura o le faafitauli ma le tali e tatau ona ou avatu i ai. O lena taitaiga faafaaaliga na faatagaina a’u e faataunuu ia tiutetauave paia o lo’u valaauga o se epikopo e ui i se taimi itiiti sa avanoa ai. Ua tausoa uma foi e epikopo i le lalolagi atoa nei ituaiga o aafiaga e tasi faatasi ma a’u. I le avea ai ma se peresitene o le siteki, e le gata sa ou mauaina faaaliga taua ae sa maua foi ni faasa’oga patino ia na manaomia e faataunuu ai faamoemoega o le Alii.

Ou te faamautinoa atu ia te outou o le taitaiga faafaaaliga e mafai ona maua e i tatou taitoatasi pe a tatou galulue ma le lotomaualalo i le tovine a le Alii. O le tele o la tatou taitaiga e sau mai le Agaga Paia. O nisi taimi ma mo nisi o faamoemoega, e sau sa’o mai le Alii. Ou te molimau patino atu e moni lenei mea. O le taitaiga mo le Ekalesia atoa, e oo mai i le Peresitene ma le perofeta o le Ekalesia.

I le avea ai ma Aposetolo o onapo nei, ua matou maua le avanoa e galulue ma faimalaga faatasi ai ma lo tatou perofeta o i ai nei, Peresitene Nelson. Ou te toefaaupu atu le mea sa saunoa i ai Uilifoti Uitilafi e uiga i le Perofeta o Iosefa Samita; e tutusa lona moni ia Peresitene Nelson. Ua ou vaai “i galuega a le Agaga o le Atua ia te ia, atoa ai ma faaaliga a Iesu Keriso ia te ia ma le faataunuuina o na faaaliga.”32

O la’u aioiga faamaulalo i le asō ia taitoatasi i tatou ma saili i faaaliga faifai pea e taiala ai o tatou olaga ma mulimuli i le Agaga a o tatou tapuai atu i le Atua le Tama i le suafa o lo tatou Faaola, o Iesu Keriso, o lē ou te molimau atu ai i le suafa o Iesu Keriso, amene.

Faamatalaga

  1. I le 1960 ina ua tuuitiitia mai tausaga mo auaunaga faafaifeautalai mo alii talavou mai le 20 i le 19 le matutua, o a’u se tasi o le au 20 mulimuli; o Elder Jeffrey R. Holland o se tasi o le au uluai 19 tausaga le matutua.

  2. “O Le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi, “Faalogo ia te Ia,” Liahona, Me 2020, 91. O lenei folafolaga ua i ai faatasi ma isi folafolaga e lima ua fofogaina i lenei tisipenisione e le Au Peresitene Sili ma le Korama a Aposetolo e Toasefululua.

  3. Aoaoga a Peresitene o le Ekalesia: Spencer W. Kimball (2006), 243; tagai foi i le Mataio 16:13–19.

  4. Mose 7:61.

  5. Mose 7:62. Sa faaauau ona fetalai le Alii, “Ma o le a ou faia ia oo atu i le lalolagi atoa faapei o se lolo le amiotonu ma le upumoni, e faapotopoto mai ai e ua ou filifilia mai i itu e fa o le lalolagi” (Mose 7:62; tagai foi i le Salamo 85:11).

  6. Ezra Taft Benson, “O Le Mea Alofa o Faaaliga o Ona Po Nei,” Liahona, Ian. 1987, 81.

  7. Tagai i le Ezra Taft Benson, “O Le Mea Alofa o Faaaliga o Ona Po Nei,” 80.

  8. Hugh B. Brown, “Joseph Smith among the Prophets” (Sixteenth Annual Joseph Smith Memorial Sermon, Logan Institute of Religion, Dec. 7, 1958), 7.

  9. Tagai i le Hugh B. Brown, “Joseph Smith among the Prophets,” 7. I tulaga uma lava, o faaaliga e ogatasi ma le afioga a le Atua na tuuina mai i perofeta na muamua atu.

  10. Tagai i le Folafolaga Aloaia 2; tagai foi i le 2 Nifae 26:33. O le faaaliga na faatinoina ai le aoaoga faavae o loo aumai i le Tusi a Mamona e faapea “ua tutusa tagata uma i le Atua,” e aofia ai le “uliuli pe paʼepaʼe, e pologa pe saoloto, o tane ma fafine” (2 Nifae 26:33). O lenei faaaliga ofoofogia sa mauaina ma faamaoniaina i le potu aluga paia o le Malumalu o Sate Leki e le Aufono a le Au Peresitene Sili ma le Korama a Aposetolo e Toasefululua.

  11. E toatele Aposetolo na faailoa mai o lea faaaliga sa matua mamana ma paia tele lea o le a le lava soo se upu e faaaoga e faamatalaina ai ma, i nisi auala, o le a faaitiitia ai le natura loloto ma le mamana o le faaaliga.

  12. Tagai i le “O Le Aiga: O Se Folafolaga i le Lalolagi,” Liahona, Me 2017, 145. Sa fofogaina lenei folafolaga e Peresitene Gordon B. Hinckley, i le Sauniga Aoao a le Aualofa sa faia i le aso 23 o Setema, 1995 i le Aai o Sate Leki, Iuta. Tagai foi i le Thomas S. Monson, “Susu Mai Ia ma Maliu Mai i le Konafesi,” Liahona, Nov. 2012, 4–5. Sa faasilasila atu ai e Peresitene Monson mea e manaomia mo le tuuitiitia o tausaga mo le auaunaga faafaifeautalai.

  13. Quentin L. Cook, “Liuaina Loloto ma Tumau i le Tama Faalelagi ma le Alii o Iesu Keriso,” Liahona, Nov. 2018, 11.

  14. O faaaliga e fesootai i sauniga paia o le malumalu na faatinoina i malumalu uma i le amataga o le aso 1 Ianuari, 2019. E taua le malamalama o auiliiliga patino e uiga i sauniga o le malumalu e na o totonu o le malumalu e talanoaina ai. Peitai, e a’oa’o atu mataupu faavae. Sa a’oa’o mai ma le matagofie e Elder David A. Bednar le taua o feagaiga ma sauniga o le malumalu ma le auala e “tafe mai le mana o le Amio Atua i o tatou olaga” e ala mai i ia sauniga ma feagaiga (“Ia Fausia Lenei Fale mo Lo’u Igoa,” Liahona, Me 2020, 86).

  15. O lenei faagasologa ma fonotaga na faia i totonu o le Malumalu o Sate Leki ia Ianuari, Fepuari, Mati, ma Aperila 2018. O le faaaliga mulimuli i le Au Peresitene Sili ma le Korama a le Toasefululua sa faia i le aso 26 o Aperila, 2018.

  16. Tagai i le 2 Nifae 32:3.

  17. Au Paia: O Le Tala o le Ekalesia a Iesu Keriso o le Au Paia i Aso e Gata Ai,, vol. 1, O Le Tagavai o le Upumoni, 1815–1846 (2018), 418.

  18. Au Paia, 1:418.

  19. 3 Nifae 27:20.

  20. O le Agaga Paia o se tasi o le Aiga Atua (tagai i le 1 Ioane 5:7; Mataupu Faavae ma Feagaiga 20:28). E i ai ia te ia se tino o agaga i le faatusa ma foliga o se tagata (tagai i le Mataupu Faavae ma Feagaiga 130:22). O Lana faatosinaga e mafai ona i ai i soo se mea. E tasi o Ia i faamoemoega ma lo tatou Tama Faalelagi ma Iesu Keriso, lo tatou Faaola.

  21. Mo se malamalama faʻapitoa o le Malamalama o Keriso ma le eseesega i le va o le Malamalama o Keriso ma le Agaga Paia, tagai i le 2 Nifae 32; Mataupu Faavae ma Feagaiga 88:7, 11–13; “Malamalama o Keriso,” Bible Dictionary. Tagai foi i le, Boyd K. Packer, “O Le Malamalama o Keriso,” Liahona, Ape. 2005, 8–14.

  22. Mataupu Faavae ma Feagaiga 8:2–3.

  23. Tagai i le Helamana 5:30; Mataupu Faavae ma Feagaiga 85:6.

  24. Tagai i le Mataupu Faavae ma Feagaiga 6:23.

  25. Tagai i le Mataupu Faavae ma Feagaiga 128:1.

  26. Tagai i le Mataupu Faavae ma Feagaiga 11:13.

  27. Tagai i le Enosa 1:10.

  28. Tagai i le Mataio 7:7–8.

  29. Tagai i le Mosaea 3:19.

  30. Mataupu Faavae ma Feagaiga 42:61.

  31. Neal A. Maxwell, All These Things Shall Give Thee Experience (2007), 31.

  32. Uilifoti Uitilafi, i le Aoaoga a Peresitene o le Ekalesia: Iosefa Samita (2007), 283.