He talaʻofa maʻongoʻonga ia!

Fai ʻe ʻEletā Sapele Faʻalongo Jr.

Fitungofulu Fakaʻēlia

Ne fakahoko e talanoá ʻi ha ngaahi taʻu kimuʻa fekauʻaki mo ha tamai mo hono foha lahi fika faá ʻi ha fāmili ne fānau ʻe toko valu. ʻOku ʻikai angamaheni ke tokolahi peheni e fānau ʻi he ngaahi fāmili Haʻamoá. Ne mavahe atu e fohá mei Haʻamoa ki Nuʻusila ʻi he konga kimuʻa ʻo e 90 tupú, ʻa e fonua ʻo e ngaahi konga ʻao lalahi hinehiná. Naʻá ne toki mali foʻou pē peá ne maau ke hoko atu e moʻuí ki he fonua muli ʻa ia ne lahi fau ai e ngaahi faingamālié.

ʻI he kamata nofo atu ʻa e fohá ni mo hono uaifí, ʻa ia ne ʻikai ko ha mēmipa ʻo e Siasí, ke langa hona fāmilí ʻi Nuʻu Silá, ne na ʻalu ki he lotú ʻi ha uooti fakalotofonua.

Ne ʻofa e tamaí ki hono fohá ʻa ia naʻá ne tokoni lahi ʻi hono tauhi e fāmilí lolotonga ʻene ʻi Haʻamoá peá ne loto ke vakaiʻi hono fohá. ʻUluakí, naʻá ne loto ke fetuʻutaki mo ia; fakahaaʻi ange ʻa e lahi ʻene ʻofa ʻiate kinauá fakatoloua. Naʻá ne fie ʻilo pe ʻoku fēfē hona fāmilí mo vakai pe kuo fanongo nai hono uaifí ki he pōpoaki ʻo e ongoongolelei kuo fakafoki maí.

Uá, naʻá ne loto ke fakamanatu kiate ia ʻa e mahuʻinga ʻo e fetuʻutaki mo hono fāmili ʻi Haʻamoá, kae pehē foki ki hono ngaahi tokoua mo e tuofāfine ʻa ia kuo nau maʻu fāmili ʻi he ngaahi fonua mulí.

Ne meiliʻi e ngaahi tohi ʻosi taipe ʻa e tamaí ki hono fohá; ʻa ia ne ʻi ai e ngaahi faleʻi mo e ngaahi fakamanatu ko ʻení:

Moʻui mateaki ki he ongoongolelei ʻo Sīsū Kalaisí, ʻa e ʻAlo moʻui ʻo e ʻOtua Moʻuí, ʻoua naʻá ke mavahe mei he ongoongoleleí.
Fakapapauʻi ke ke ʻalu ki hoʻo pīsopé, ka ʻi ai haʻo ngaahi fiemaʻu, ha faleʻi pe ngaahi meʻa kehe, ʻalu kiate ia pea ʻoua naʻa toe toloi.
Kau atu péa ke longomoʻui ʻi he uōtí peá ke feohi mo e kau mēmipa ʻo e uōtí. Ko e uōtí ko ho fāmilí ia, moʻui mateaki ki ho fāmili ko iá, ʻoua naʻá ke siʻaki e fāmilí.
ʻOua naʻá ke mamata pē, ka ke kau he niʻihi ʻoku poupou mo muimui ki he ngaahi faleʻi ʻa e kau takí.
Totongi vahehongofulu kakato, pea ʻe hoko kiate koe e ngaahi tāpuaki ʻo e ʻatamai matala mo potó, nonga ʻo e lotó, mo ha ngaahi meʻa feʻunga ke ke moʻui fakafalala ai kiate koe pē, ke ke fiefia ai ʻi he moʻui fakamatelié ni mo e maama kahaʻú.
Manatuʻi e ngaahi meʻa ne akonekina ai koe ʻi hoʻo kei ʻi ʻapí, ʻa e ngaahi efiafi fakafāmilí, lotu maʻu peé, fekumi ki he finangalo ʻo e ʻEikí ʻo fakafou ʻi he ako folofola fakaʻahó, ʻalu ki he sākalamēnití mo e ngaahi fakataha ʻa e Siasí mo tauhi e sāpaté ke māʻoniʻoni.
ʻOfa mo ke faitotonu ki ho uaifí, faʻa kātakiʻi ia ʻi heʻene feinga ke ʻiloʻi e pōpoaki ʻo e ongoongolelei kuo fakafoki maí. ʻOku mahuʻinga ʻaupito ke mahino mo ne ʻiloʻi maʻana ʻa e ʻuhinga ʻo e ongoongoleleí, pea fai ʻene fili pe ʻaʻaná. Ka ke kātaki ʻo fakahoko atu ʻeku ʻofá kiate ia.

Ko e fakalūkufua ʻo e pōpoaki ʻa e tamaí ko e, ‘ʻOua naʻá ke liʻaki e ongoongoleleí, pe te ke siʻaki ho fāmilí’.

Naʻe fakamanatu mai ʻe he fakakaukau ʻo e fie maʻu ʻa e tamai Haʻamoá maʻa hono fohá ke moʻui līʻoa ki he ongoongoleleí ʻa e ngaahi fakakaukau ʻa e ʻAposetolo ko Paulá ki hono foha fakalaumālie ko Tīmoté, ke ne manatuʻi e ngaahi meʻa ne akonekina ai ia ʻi heʻene kei talavoú:

“ʻOua naʻa manukiʻi hoʻo kei siʻí ʻe ha taha; ka ke ʻi he kakai tuí ko e fakaʻilonga, ʻi he lea, mo e ʻulungaanga, mo e ʻofa, mo e faianga, mo e tui, mo e māʻoniʻoni. . . . Pea ko e ngaahi meʻa ko ia kuó ke fanongo ʻiate au ʻi he ʻao ʻo e kau fakamoʻoni toko lahí, ke ke tuku ia ki he kau tangata angatonú, ke nau faʻa fai ke akonekina foki ʻa e niʻihi kehé.”¹

Ne ʻikai fuoloa mei hono tali tauʻatāina ʻe he uaifi ʻo e fohá e pōpoaki ʻo e ongoongolelei kuo fakafoki maí, naʻá ne kau ki he siasí, papitaiso pea hilifakinima ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne sila mo hono husepānití ʻi he temipalé. Ne ʻikai fuoloa mei ai, ne uiuiʻi e fohá ko ha pīsope ʻi honau uōtí, pea kimui ange hili hono tukuangé, ne ui ia ko ha tokoni palesiteni fakasiteiki.

Ne hokosia e taimi ke foki ai honau fāmilí ki Haʻamoá. Ne toe uiuiʻi ai e fohá ko ha pīsope ko hono tuʻo uá ia; pea ʻokú ne lolotonga hoko ko ha palesiteni fakasiteiki he taimí ni. ʻOkú ne faʻa vahevahe maʻu pē ʻi heʻenau ngaahi fakataha fakafāmilí e ngaahi pōpoaki ʻo e ngaahi tohi ne taipeʻi ʻe heʻene tamai ʻofeiná, ʻa ia kuó ne pekia ʻo hoko atu ki he tafaʻaki ʻe taha ʻo e veilí.

Ne ongo moʻoni kia Tīmote e ngaahi fakamatala ʻa e ʻAposetolo ko Paulá ʻo kau ki he ngaahi ʻaho fakaʻosí pea mo e mahuʻinga ʻo e folofolá ko ha fakahinohino ki hono maluʻi ʻo e tangatá mo hono maʻu ʻo e fakamoʻuí, ʻo hangē ko e ngaahi tohi fakamanatu ʻa e tamai ko ʻení ki hono fohá: “. . . kuó ke ʻilo fakapapau ʻeku akonakí, mo e anga ʻo ʻeku moʻuí, mo hoku lotó, mo e tuí, mo e kātaki fuoloá, . . . ka ke tuʻu maʻu pē ʻa koe ʻi he ngaahi meʻa ʻa ia kuo akonekina ai koé, pea kuó ke ʻilo pau ki ai, ʻo ke ʻilo ʻa ia kuó ke maʻu ia mei ai; Koeʻuhi ʻoku talu hoʻo kei siʻí, naʻá ke ʻilo ʻa e ngaahi tohi māʻoniʻoní, ʻa ia ʻoku faʻa fakapoto koe ki he fakamoʻuí ʻi he tui ʻa ia ʻoku ʻia Kalaisi Sīsū. ʻOku foaki mai ʻa e Tohitapu kotoa pē ʻi he fakamānava ʻa e ʻOtuá, pea ʻoku ʻaonga ia ki he akonaki, mo e valoki, mo e fakatonutonu, mo e fakapoto ki he māʻoniʻoní: Koeʻuhí ke haohaoa ʻa e tangata ʻo e ʻOtuá, pea kakato hono teuteu ki he ngaahi ngāue lelei kotoa pē.²

Ne fakamanatu mai ʻe hotau palōfita ʻofeiná, Palesiteni Lāsolo M. Nalesoni, ʻa e palōfita ʻa e ʻEikí, ʻe ʻomi ʻe he tui mo e talangofua ki he ngaahi fekau ʻa e ʻEikí ha maluʻi: “Akoʻi ange ʻa e tui ke ʻiloʻi ʻe ʻomi ʻe he talangofua ki he ngaahi fekau ʻa e ʻOtuá ha maluʻi fakaesino mo fakalaumālie. Pea manatuʻi, ʻoku tuʻu mateuteu mai e kau ʻāngelo māʻoniʻoní ʻa e ʻOtua ke tokoniʻi kitautolu. Kuo fakahā ʻe he ʻEikí: “Te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu.” He talaʻofa maʻongoʻonga ia! Te Ne faitokonia kitautolu mo ʻEne kau ʻāngeló he taimi ʻoku tau faivelenga aí.³

ʻOku ou ʻilo ʻe hanga ʻe heʻetau muimui he faleʻi ʻa e kau palōfita kimuʻá mo e onopōní pea mo e ngaahi tautapa ʻa ha tamai māʻoniʻoni ʻo tauhi kitautolu ʻi he hala ʻo e fuakavá.