Ngaahi Peesi Fakalotofonuá
Fānauʻi ʻi ha Mātuʻa Lelei
ʻI he kotoa ʻo e ngaahi lēsoni kuo akoʻi mai ʻe heʻeku mātuʻá ʻi he kotoa ʻeku moʻuí, ko ʻena sīpingá kuó ne akoʻi lahi taha aú.
Ko ʻeku faʻeé, Linitā ʻOpekiteingi, ko ha fefine mālohi mo ʻatamaiʻia ʻaupito ia pea ʻokú ne tataki homau fāmilí ʻi he māʻoniʻoni.
Kuo fakapapauʻi ʻe heʻeku faʻeé ʻi ha ngaahi taʻu lahi ʻoku fakataha mai homau fāmilí he pongipongi mo e pō kotoa ki he lotu fakafāmilí. Kuo akonekina au ʻe he moʻui līʻoa fakaʻaho ko ʻeni ki he ʻOtuá ke u tafoki kiate Ia ʻi he ngaahi meʻa kotoa pē, koeʻuhí ko e meʻa ia kuo mau fai maʻu peé. Kuó ne akoʻi au ʻokú Ne fanongo mo Ne ʻofaʻi au. ʻOku fakaafeʻi ʻe heʻemau lotu fakaʻahó e Laumālié ki homau ʻapí mo tokoni ke mau maʻu ha ʻaho lelei.
Fakamālō ki he faivelenga mo e tui ʻeku faʻeé, ko e lotú ʻoku ʻikai ko ha meʻa ia ʻe fie maʻu ke toe fakamanatu mai ke u fai, ko ha tōʻonga moʻui māʻoniʻoni ia te u manatuʻi maʻu pē ʻo aʻu ki haʻaku matuʻotuʻa pea kuó u houngaʻia ʻaupito ai.
ʻOku ou manatuʻi maʻu pē e foʻi hiva palaimeli, ‘Lotu ʻa ha Kiʻi Tamasiʻí’ ʻi heʻeku fakakaukau ki heʻeku faʻeé.
‘Lotu ʻokú ne ʻi ai. Lea, ʻoku fanongo mai’.
Ko ha tokāteline faingofua ʻeni ʻoku ou ʻilo ʻoku moʻoni. Naʻe akoʻi mai foki ʻe heʻemau faʻeé e lotú ʻi heʻene ngaahi leá, ka ko ʻene ngaahi ngāué naʻá ne fakatōkakano e ngaahi lēsoní.
Kuo manako maʻu pē ʻeku tamaí, Hilopo ʻOpekiteingi, he ngāue tokoní. ʻOkú ne fakasio maʻu pē he feituʻu kotoa ʻoku ʻalu aí ha kakai ʻoku nau fie maʻu tokoni peá ne alanima atu leva ʻo tokoniʻi kinautolu.
ʻI hono ʻaho fāʻeleʻí he taʻu kuoʻosí, naʻá ne loto ke foaki ha ngaahi meʻaʻofa kae ʻikai ke ne maʻu mai. Naʻá ne loto ke ʻave ha ngaahi meʻaʻofa ki ha kau tangata tukuhausia ne nau nofo he veʻehalá. ʻI he pō ko iá, ne mau ō ai ki ha falekai ʻo maʻu meʻatokoni efiafi. ʻI he ʻosi ʻemau maʻu meʻatokoni he falekaí, naʻá ne fakatokangaʻi atu ha ongo tangata matuʻotuʻa ne na maʻu meʻatokoni ai peá ne totongi fakapulipuli ʻena meʻakaí. ʻOku ou sio maʻu pē ki heʻene fai pehení he taimi kotoa pē.
ʻI heʻeku hoko ko ha tokotaha ʻoku mā mo faingataʻa ke u talanoa ki he kakai foʻoú, kuo fakahaaʻi mai ʻe he sīpinga ʻeku tamaí e fiefia ʻoku maʻu ʻi he ngāue tokoni taʻesiokitá. Ne ʻikai mei feʻunga ia kapau ne talamai ʻataʻatā pē ki ha tokotaha mā hangē ko aú ke u ngāue tokoni; naʻe fie maʻu ia ke fakahaaʻi mai ʻi he sīpinga mo e aʻusia pea ko e meʻa ia ne fai ʻe Tetí.
ʻOku hanga ʻe he himi ‘Kuó U Fai ha Leleí?’ ʻo fakamanatu mai ʻeku Tetí, tautautefito ki he foʻi laine fakaʻosí,
‘ʻOkú Ne finangalo ki he faileleí, Ko e ʻofa ke tāpuakí . . .’
ʻOku lolotonga māmālohi ʻeku tamaí he Siasí he taimí ni ka ʻi he taimi kotoa pē ʻoku foaki taʻesiokita ai, ʻoku ou ʻiloʻi ʻene fiefiá. ʻOku ou ʻilo ʻokú ne ongoʻi e Laumālié; ʻoku ou lava ʻo vakai ki ai ʻi hono fofongá. ʻOku ou sio ki he ʻofa lahi ʻokú ne maʻu ki he kakai ʻoku nau feohí pea ʻoku ou ʻioʻi ʻe hanga ʻe he ʻofa ko iá, pea mo e laumālie ʻokú ne ongoʻi ʻi heʻene ngāue tokoní, ʻo fakafoki ia ha ʻaho ki he ongoongoleleí.
ʻI he taimi ʻoku tau muimui ai he sīpinga ʻo hotau Fakamoʻuí mo fai ʻa ia naʻá Ne faí, ʻoku lava ke toe fakamoʻoniʻi lahi ange ai ʻe he Laumālié kiate kitautolu ʻa hono moʻoní. ʻOku ou houngaʻia ko ha faʻē ʻofa mo ha tamai kuó na akoʻi mai ke u lotu mo ngāue tokoni ʻo fakafou ʻi heʻena ngaahi sīpingá.