Ngaahi Peesi Fakalotofonuá
Ko e Moʻoni Fekauʻaki mo e Ako Pathway
Ne ngata pe ako ʻa Lātū Vailahi Katá ʻi heʻene taʻu hivá. Neongo naʻá ne ʻamanaki lelei ke toe foki ki he akó, ka ʻi heʻene fuʻu lahi angé, ne fakaʻau ke toe siʻi ange e ʻamanaki te ne toe maʻu ha faingamālie akó.
Hili ha ngaahi taʻu lahi mei ai, ne fakakaukau ʻa Lātū ke kau ʻi ha taha ʻo e ngaahi kalasi foʻou Moʻui Fakafalala pē Kiate Kita ʻa e Siasí: Ko Hono Kamataʻi mo Fakatupulaki ʻEku Pisinisí. Naʻá ne pehē, “naʻá ku ngāue mālohi ke fakakakato ʻeku ngaahi ngāue fakaakó,” pea naʻe hanga ʻe heʻene maʻu tohi fakamoʻoni ako ʻi he kalasi ko iá ʻo tafunaki ha loto-holi ke ako lahi ange. “Naʻá ku fakakaukau ʻo pehē, kapau ʻoku peheni e akó, ʻoku ou loto ke ʻahiʻahiʻi ia.”
ʻIkai fuoloa mei ai, ne fakafēʻiloaki ange ʻe he husepāniti ʻo Lātuú, Seteone Kata—ko ha tokoni pīsope ʻi he Uooti Avondale ʻi he Siteiki ʻOkalani Nuʻusila Waterview ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—ha faingamālie ki he PathwayConnect mo poupouʻi ke ne kau ki ai.
Ne iku faingataʻa ʻaupito e hala fononga ʻo e Pathway kia Lātū, kae tautautefito ki he ʻuluaki semesitaá. “Naʻe ʻikai ke u poto he lea faka-Pilitāniá he taimi ko iá, ʻo makehe mei he lea mālō e leleí mo e fēfē haké, mo e fanga kiʻi lea peheé.” Naʻá ne pehē ne ngali fakamā mo fakatupu loto-siʻi ʻene fakahoko ha lēsoni ki he kau akó ʻi he lea faka-pilitāniá.
Pea, koeʻuhí ko e taʻu ʻeni ʻe 22 ʻene mavahe mei he akó, ne faingataʻa ke mahino kia Lātū e ngaahi naunau ʻo e kalasi Pathway. Naʻá ne fie maʻu tokoni.
Naʻe pehē ʻe Lātū, “Naʻá ku tangi mo tautapa maʻu pē ki he Tamai Hēvaní . . . ke ʻomi ha loto-lahi ke u hokohoko atu pē,” ka naʻe ʻikai ko ʻene taumuʻá pē ʻa ʻene feinga ʻi he akó. “Naʻá ku loto ke u fakahaaʻi ki ha taha pē ʻokú ma tuʻunga tatau ʻoku malava pē meʻa kotoa.”
Ne tali ʻene lotú ʻo fakafou ʻi ha fanga kiʻi mana iiki. ʻUluakí, naʻá ne maʻu ha loto-toʻa ke fehangahangai mo e ongoʻi mā ʻi he lea fakapilitānia ki hono kaungāakó pea fakaʻaongaʻi ia ko ha meʻa ke ne fakaʻaiʻai ia ke ngāue mālohi ange. Ne hoko foki mo hono husepānití ko ha tāpuaki fungani lolotonga e taimi ko ʻení. Naʻá ne tokangaʻi ha konga lahi ʻo e ngaahi fatongia fakaʻapi mo fakafāmili ʻo Lātuú koeʻuhí kae lava ke ne toutou vakaiʻi ʻene ngaahi naunau fakaakó ki he lahi naʻá ne fie maʻu ke toki mahino ai kiate iá.
Ne ʻikai lahi e taimi mohe ʻa Lātuú lolotonga e taʻu ʻo ʻene ʻi he Pathway, tautautefito ki he taimi naʻá ne maʻu ai ha ngaahi ngāue fakaako mo ha fanga kiʻi sivi iiki ke fakahokó, ka naʻá ne ako ke maʻu e tuí mo falala ki he Tamai Hēvaní.
ʻOkú ne pehē, “ʻOku ou fiefia naʻá ku fanongo ki he ueʻi ʻa e Laumālie Māʻoniʻoní ʻi heʻene talamai ke ʻoua naʻá ku foʻí.” Kapau naʻá ne foʻi ai, ne ʻikai ke ne mei aʻusia e ngaahi tāpuaki lahi kuó ne maʻú koeʻuhi ko ʻene lavameʻa kāfakafa ʻi he Pathway.
ʻI Siulai ʻo e 2017, naʻe fakaʻosi ako ai ʻa Lātū mei he PathwayConnect—ʻaki ha GPA ko e 4.0! Naʻá ne tohi kole hū leva ki he polokalama mataʻi tohi ʻo e ʻUnivēsiti Pilikihami ʻIongi—ʻAitahoó pea naʻá ne ongoʻi houngaʻia moʻoni ʻi hono tali ʻene kolé ʻi ha ngaahi houa siʻi pē mei ai. Hili e ngaahi taʻu lahi ko ʻení, kuo faifaiangé pea malava ke hoko atu ʻene akó.
Ne māhina pē ʻe 6 (semesitā ʻe 2) pea kakato ʻene fakaʻilonga Administrative Assistant, pea ʻi he ʻaho ua ʻo Siulai 2019, naʻá ne hoko ko e fuofua tokotaha Nuʻusila ke fakaʻosi ako mei BYU ʻAitahō mo ha Online Associates Degree. Naʻá ne ako ki he Applied Science ʻi he Administration and Office Manager, peá ne maʻu fakalāngilangi māʻolunga ai.
“Kuo liliu ʻo lelei ange e ngaahi meʻa ʻi heʻeku moʻuí koeʻuhí ko ʻeku fili ke u akó. Ko ha tāpuaki maʻongoʻonga ia ki hoku fāmilí mo au foki.” ʻOku mahulu e houngaʻia ʻa Lātuú ʻi heʻene malava ke ʻalu mo e ʻilo foʻou ʻokú ne maʻú ki ha feituʻu pē, ʻo kau ai mo e moʻui ka hokó.
Ka ʻoku teʻeki ʻosi ʻene akó. ʻOku lolotonga ako ʻa Lātū ke maʻu hono Bachelor of Science ʻi he Applied Management ʻo fakatefito ʻi he Administrative Assistant mo e Laó. Ko ʻene taumuʻá ke maʻu hono mataʻitohi toketaá (PhD) ʻi he Laó pea hoko ko ha fakamaau.
Koeʻuhí ko e tūkunga masivesiva naʻá ne ʻi aí, ʻoku ʻofeina ʻe Lātū ha taha pē ʻokú ne pehē ʻe malava ke lavameʻa ʻi he akó. ʻOkú ne pehē, “Kapau ʻoku ou lavaʻi ia, te ke lava foki ia ʻe koe. ʻOku maʻamaʻa mo faingofua ke te kau ki he Pathway, ka te ne tataki koe ki ha ngaahi faingamālie lahi.
ʻOku ou ʻilo ʻe ala faingataʻa e akó ʻi ha ngaahi taimi, ka ko hono fuá ʻoku melie! ʻOku taʻemafakamatalaʻi e tāpuaki ʻo e akó—maʻau, mo ho fāmilí pea mo e sosaietí foki. ʻOku ʻikai teitei ʻi ai ha taimi ʻe tōmui ai ke ke ako. ʻOku ou palōmesi atu he ʻikai te ke teitei fakaʻiseʻisa ai.