Itulau i le lotoifale
Ua Valaaulia e Elder Yamashita Tagata o le Ekalesia ia Umia e Le Aunoa se Pepa Faataga o le Malumalu
Faamalosiauina o le avea ai ma soo faamaoni ma le tapuai i le malumalu, pe a mafai ai.
“Ia umia pea lava se pepa faataga o le malumalu,” le saunoaga a Elder Kazuhiko Yamashita.
“Pe ua e saunia e alu i le malumalu pe a tuumamaina tapu, ona o le faama’i oti o le KOVITI-19?” o lana fesili lea. “Pe ua uma le aoga o lau pepa faataga o le malumalu?”
“O’u uso e ma tuafafine pele, tatou te manaomia ona umia pea lava pea se pepa faataga o le malumalu o loo aoga, tusa lava pe o tapunia le tele o malumalu i lenei taimi tulaga ese ona o le faama’i oti o le KOVITI-19. O le umia o se pepa faataga o le malumalu o se tasi o auala e mafai ona tatou faaali atu ai lo tatou alolofa i le Alii. O se tasi o auala tatou te mulimulita’ia ai le poloaiga sili, “E te alofa atu i lou Alii lou Atua ma lou loto atoa, ma lou agaga atoa, ma lou manatu atoa” (Mataio 2:37).
“E mafai ona tatou faaali atu lo tatou agavaa i le Alii e ala i le umia o se pepa faataga aoga o le malumalu. O le umia o se pepa faataga o le malumalu o loo aoga, o se mea e le masuia ma le taua mo i tatou taitoatasi.
“Afai ua uma le aoga o lau pepa faataga o le malumalu, valaau loa lava i lou epikopo mo se faatalanoaga mo lou pepa faataga o le malumalu. Ia faaauau pea ona umia se pepa faataga aoga o le malumalu. Talu ona ou mauaina o’u lava faaeega paia i le Malumalu o Tokyo i Iapani, sa ou tausia pea lava pea se pepa faataga o aoga o le malumalu. O se faamanuiaga sili ma se meaalofa mai le Atua.
“Tane, ma tamā, faamolemole ia faia ni fuafuaga e ave a outou ava ma fanau i le malumalu.
“Afai e le o i ai sou pepa faataga o aoga o le malumalu, ia amata loa ona tapenapena i le taimi nei. Faamolemole alu i lou epikopo ma o le a fesoasoani o ia ia te oe. Tatou o faatasi i le maota o le Alii.
“Ua uunaia i tatou e le Alii ia faateleina lo tatou faatuatua. Ua ia fetalai mai ia i tatou taitoatasi: “Ia outou faatulaga tatau outou lava, ia saunia mea manaomia uma, ma faatu se fale ... o le Atua.” Ua Ia tuuina mai ia i tatou mafuaaga e fausia ai se fale o le Atua ma ua ta’u mai ia i tatou le ala e saunia ai i tatou lava ina ia aoaoina i totonu i le malumalu.
“Ia saunia i tatou faaleagaga, faalemafaufau, ma faaletino ina ia aoaoina i totonu o le malumalu. (Tagai Mataupu Faavae ma Feagaiga 88:119–126.)
“Manatua, o le laasaga muamua o le umiaina lea o se pepa faataga o aoga o le malumalu (PFM).”
E toatele Tagata o le Au Paia o Aso e Gata Ai i le salafa o le Eria o le Pasefika, o loo umia ma le faamaoni se pepa faataga o le malumalu. E eseese o latou tulaga, ae ua latou faatuatua uma i lo tatou Tama Faalelagi ma Lona Alo o Iesu Keriso.
E toalua ni sui o le Ekalesia, o se tasi mai Niu Sila ma se tasi mai Samoa, ua faasoa mai o la’ua manatu e uiga i faamanuiaga o le i ai o se pepa faataga o le malumalu.
Melanie Riwai-Couch, Niu Sila: “O le i ai o se pepa faataga o le malumalu o se faamanatu itiiti ae taua o feagaiga ua ou osia, o lo’u naunautaiga e tausi poloaiga ma ia i ai se filifili e le mafai ona motusia ma la’u fanau ma lo’u aiga.”
Aleni Fuatimau, Samoa: “O le pepa faataga o le malumalu e pei o se ki mo a’u e tatala ai faitotoa o le malumalu e ulufale atu i ai ma auai ai i le faatinoga o sauniga aupito sili ona paia o loo faatautaia ai iina. O le umiaina o se pepa faataga o le malumalu e faamanatu mai ai ia te au na feagaiga sa ou osia ma le Tama Faalelagi ma o se faamanatu foi mo au ia ou agavaa mo le perisitua lea na tuuina mai e le Ali ia te au.”