Ngaahi Peesi Fakalotofonuá
Fekumi ki hono Halá ʻi he Houngaʻia mo e Tui
Ne laka hake ʻi he taʻu ʻe 30 ʻa e fakaʻānaua ʻa Afulua Tuivaiti, ʻo e Uooti Pesenga 6 ʻo e Siteiki Pesenga Haʻamoá, ke ʻi ai ha ʻaho te ne foki ai ki he ako māʻolungá, ke fakakakato ʻa e ako naʻe ʻikai ke ne maʻú . . . pea mahalo ke toe hoko atu ki he ʻunivēsití. Ka naʻe ʻikai ke ne ʻilo pē ʻe anga fēfē.
ʻI he taimi ní kuo ʻi ai ha fāmili ke tokangaʻi, ʻikai fuʻu lahi ha paʻanga hū mai pea lahi mo e ngaahi fatongia ʻi he siasí mo e koló, naʻe kamata ke ongoʻi ʻe Afulua kuo tōmui ke ne toe feinga ke ako pea mahalo ʻe ʻikai pē malava. Ka, naʻe talaange ʻe ha ongomātuʻa faifekau fekauʻaki mo e polokalama PathwayConnect ʻoku fakalele ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ko e PathwayConnect ko ha polokalama totongi maʻamaʻa, semesitā ako ʻe 4 ʻokú ne teuteuʻi e kau akó ke kamata ha mataʻitohi mei he ʻunivēsití, ʻa ia te nau lava leva ʻo fakahoko ia ʻi he ʻinitanetí mo e ʻUnivēsiti Pilikihami ʻIongí (BYU). ʻOku ʻatā fakaemāmani lahi ʻa e polokalamá pea poupouʻi ia fakafou ʻi he Siasí fakataha mo ʻetau ngaahi kalasi moʻui fakafalala pē kiate kitá.
ʻI he taimi ne ako ai ʻa Afulua fekauʻaki mo e PathwayConnect, naʻá ne maʻu ha ʻamanaki lelei, ʻi heʻene fifili pe ʻe toe hoko koā ʻene fakaʻānaua ke akó, pea naʻe toe kau mai leva mo ha ongomātuʻa faifekau kehe. Naʻe fakamatala ʻe Afulua, “Naʻe fakafeʻiloaki au ʻe ʻEletā mo Sisitā ʻApoti ki he Pathways pea loto ha ongomātuʻa faifekau ʻe taha ke na totongi [ʻeku totongi akó]. Ko ha toki tāpuaki moʻoni eni!
“ʻA e founga [kuo] tali he Tamai Hēvaní ʻeku ngaahi lotú, kiate au ko ha mana ia.”
Naʻe fakamoʻoni leva ʻa Afulua he taimi pē ko iá ke kau pea ʻikai fuoloa kuo ʻalu ki heʻene fuofua kalasí, ʻa ia naʻe kiʻi fakalotosiʻi.
ʻOkú ne pehē, “Ko ʻeku semesitā ʻuluakí, naʻá ku manavasiʻi mo ilifia koeʻuhí he naʻe ʻikai ke u lea faka-Pilitānia lelei, ka ʻi he taimí ni ʻi heʻene semesitā hono tolú, kuó ne sītuʻa lelei mei he palopalema ko iá. “ʻOku fakalakalaka [ʻeku lea faka-Pilitāniá] pea ʻoku ʻikai ke u toe ilifia. ʻIkai ngata aí, naʻe ʻikai pē ke u teitei tuenoa. Naʻá ku maʻu ha poupou mei heʻeku kau taki siasí, faiakó, mo e kau kaungāakó,” ʻoku pehē ʻe Afulua.
ʻOkú ne houngaʻia ʻaupito kia Sisitā Hō Sini, uaifi ʻo e palesiteni fakamisiona ʻApia Haʻamoá, mo e kau faifekau ʻi he ʻōfisi fakasiteikí ʻa ia naʻa nau tokoni kiate ia, tautautefito ki heʻene ngaahi fiemaʻu fakatekinolosiá, pea mo ʻene pīsopé, Lautua Faʻaofo mo hono uaifi ko Apú, ʻa ia ʻokú na kei hoko atu hono poupouʻi ia ʻi heʻene feingá.
ʻOkú ne pehē, “Tānaki atu ki aí, ʻoku ʻalu pē ke u ofi ange ki he ʻEikí. Kuo fakamālohia ʻe he [aʻusia ko ʻení] ʻeku fakamoʻoní.”
Ko ha fakamoʻoni ia kuó ne fakalotolahiʻi mo langaki hake ia lolotonga e fonongá ʻo aʻu mai ki he taimí ni, ʻa ia naʻe ʻikai ke faingofua maʻu pē. ʻOku tokangaʻi ʻe Afulua ʻene faʻē taʻu 85 mo hono mokopuna tangata ʻoku māhina 5, ʻa ia—ʻi hono tānaki atu ki heʻene ngaahi ngāue fakaʻapi kehé—ʻokú ne femoʻuekina ʻaupito ki ai he ʻaho kotoa pē. ʻOkú ne pehē, “ʻOku ou toki lava pē ʻo ako ʻi he poʻulí” pea ʻokú ne faʻa fai pehē ʻi he taimi lahi kae ʻoua kuo toki tō ʻo mohe.
Ka ʻokú ne vilitaki atu pē.
ʻI ha toe ʻa e semesitā ʻe taha ʻi he PathwayConnect, ʻoku fakapapauʻi ai ʻe Afulua ke hoko atu ki he polokalama ʻo e mataʻitohi ʻi BYU pea ʻokú ne fakakaukauʻi ha ngaahi fili ʻe niʻihi ki he sitepu hoko ko iá.
ʻOkú ne pehē, “ʻOku ou saiʻia ʻaupito ʻi he Founga Talitali Kakaí mo e Takimamatá.” ʻOku ou tui ʻe malava ia ʻo hoko ko ha pisinisi lelei ʻaupito kiate au ha ʻaho.” Ko hono moʻoní, kuo ʻosi tuku ʻe Afulua ha paʻanga ki ha pisinisi ʻi he kahaʻú, “ka ʻoku ou toe fakakaukau foki ke ako ki hono Fakaʻaongaʻi ʻo e Moʻui Leleí (Applied Health).”
ʻOku kei toe pē taimi ke ne toki fili ai e mēsia te ne akó, ka kuo ʻosi mahino kia Afulua e meʻa ʻe taha. “ʻOku ou maʻu e tui ki he ʻEiki ko Sīsū Kalaisí. ʻOkú ne tali ʻeku ngaahi lotú mo tataki au ʻi he hala ʻoku totonú.”
Kuo fakalotoʻi ʻe he tui ʻa Afulua ki he ʻOtuá, mo ʻene tukupā ki heʻene ngaahi taumuʻá ke ne maʻu ha tui ʻiate ia pē. Okú ne pehē, “ʻE ʻi ai maʻu pē ha ngaahi faingataʻa ʻi he fonongá, ka te u feinga maʻu pē ke ikunaʻi kinautolu mo fakalotolahiʻi au ke u feinga lahi ange koeʻuhí ke u lava ʻo fakahoko ʻeku palaní.”