Ngaahi Peesi Fakalotofonuá
Ko e Feituʻu Nai ʻEni ʻOku ou Fie ʻI Aí?
ʻI heʻeku taʻu 17, naʻe pau ke u fakaʻuli mo ha kau mēmipa ʻe niʻihi hoku fāmilí mei ʻOkalani, Kalefōnia ki Potilani, ʻOlikoni ke kumi mo fakahaofi ha meʻalele ne kaihaʻasi . . . mo ha pēpē ʻilamutu ne mole. Naʻe fakailifia mo fakamafasia ʻa e fonongá, ka naʻa mau ʻamanaki lelei mo lotu maʻu pē.
Ne fakafou ʻi ha ngaahi ʻaloʻofa ongongofua mei ha Tamai Hēvani ʻofa, ʻa hono lava ke mau fakahaofi ʻa e meʻalelé mo hoku ʻilamutu kei pēpeé, ʻa ia, ʻi he mana, naʻá na malu mo sai pē.
Naʻe ngāue pē ʻa e meʻalelé, ka naʻe moveuveu. Naʻá ku fuʻu fiefia ke fakamaʻa ia, ke teuteuʻi ia ki heʻemau fakaʻuli fokí, ka ko ʻeku fakakaukau atu kia kinautolu naʻa nau ngaohikovia ʻemau meʻalelé—mo e faʻahinga moʻui moveuveu ʻoku nau maʻú—ne hoko ia ke u tangi ai ʻi he feifeitamaki. Naʻe faingataʻa kiate au ke u mahinoʻi pe ʻoku anga fēfē he lava ha taha ʻo fakahoko ha ngaahi meʻa vale pehē ki heʻenau ngaahi moʻuí mo e koloa e kakai kehé. Naʻá ne fakatupu ha loto-mamahi lahi ʻiate au.
Naʻe ʻikai ke u kei tatali ke u foki ki Kalefōnia. Naʻá ku ʻiloʻi ʻoku mau hanganaki atu ki ha fakaʻuli lōloa.
ʻI he taimi naʻa mau mateuteu ai ke mau fakaʻulí, naʻe tōmui . . . pea fakapōʻuli. ʻI heʻemau toe foki ki he halá, ne fonu hoku ʻatamaí ʻi he ngaahi fakakaukau ʻo ʻemau folaú. Naʻá ku fakakaukau ki he ngaahi founga kotoa ne tokoniʻi ai kimautolu ʻe he Tamai Hēvaní. Ne u fakakaukau ki heʻemau ngaahi tautapa kotoa kiate Iá ʻi heʻemau fononga ki Potilaní pea mo ʻemau fakahaaʻi kotoa ʻemau houngaʻia ʻi heʻemau fononga fokí.
ʻI he lolotonga ʻeku fakakaukau loto ki he ngaahi meʻá ni, ne u mamata ki ha maama ngingila, naʻe tuʻu ʻo māʻolunga ange ʻi he fakapoʻuli ʻo e ʻulu ʻakaú, ʻo kiʻi mamaʻo siʻi atu mei he hala puleʻanga ne u ʻi aí. Ne kamata ke fonu hoku lotó ʻi he fiefia ʻi heʻeku fakakaukau atu pe ko e hā nai e maama ko ʻení. Hili ha ngaahi miniti siʻi, ʻi heʻemau toe ofi atú, naʻá ku fakatokangaʻi naʻe ʻikai ko ha toe meʻa kae pau pē ko e Temipale Portland Oregon!
ʻI heʻeku fiefia lahí naʻá ku talaange ki hoku fāmilí te mau mavahe mei he hala puleʻangá—ke kumi e temipale ko iá. Naʻe pau ke u sio ki ai! Naʻe holi hoku laumālié ke u tuʻu ʻi he ngaahi kelekele ʻo e temipalé, ke maʻu hono fakaʻofoʻofá pea mo vahevahe e aʻusia ko ʻení mo hoku fāmilí.
ʻI heʻeku hū atu he ʻulu ʻakaú, naʻe lava ke u mamata ki he māmá ʻo hangē naʻe ʻi he fakaʻosinga ia ʻo ha tānolo lōloa ʻo e fakapoʻulí. Naʻe fonu hoku lotó ʻi he fiefia mo e fakatuʻamelie.
ʻI heʻemau fakaofi atu ki he temipalé, ne mau fakatokangaʻi atu e ngataʻanga ʻo e halá (cul-de-sac) ki muʻa siʻi pē he matapā ʻo e temipalé, ʻa ia naʻe tau ai ha ngaahi kā. ʻI he loto-fiefia, ne u fakasio holo ha founga ke fakaʻuli ai ki he loto temipalé.
Fakafokifā pē, ne u ongoʻi e mamahi ʻi hoku lotó ʻi heʻeku ʻiloʻi naʻe ʻikai ngata pē ʻi he tāpuni ʻa e ngaahi ʻā ʻo e temipalé . . . naʻe loka foki ia.
Ne vave ʻeku ʻilo ha feituʻu ke tau fakataha mo e ʻū kā kehé, pea ʻi he miniti hono hokó, naʻá ku tuʻu ʻi he ʻā ukameá—ʻo piki maʻu ki ai mo tangi—ʻi heʻeku vakai atu ki he fakaʻofoʻofa ʻo e fale fakaʻeiʻeiki mo toputapu ko iá.
Ne hoko ʻa e fakakaukau ko ia ke lokaʻi au mei he ngaahi matapā ʻo e Langí ko ha meʻa moʻoni kiate au ʻi he momeniti ko iá.
Ne fonu ʻeku fakakaukaú ʻi ha ngaahi fehuʻi he pō ko iá:
-
Ko e feituʻu eni ʻoku ou fie ʻi ai ʻi heʻeku aʻu ki hēvaní?
-
ʻOku ou loto ke lokaʻi au ʻi tuʻa? Ke u tangi koeʻuhí ʻoku ʻikai ke u lava ʻo hū ki loto?
-
ʻE sio mai nai ha taha ki heʻeku tangí ʻo ongoʻi fakaʻofaʻia feʻunga ke fakahū atu au?
-
Ko e hā ʻeku meʻa ʻe fakahoko ke fakapapauʻi ʻe ʻikai hoko eni kia au ʻi heʻeku aʻu ki he ʻā ʻi hēvaní?
Naʻá ku tangi ʻo aʻu ki heʻemau foki ki he halá, peá u toe tangi lahi ange.
Naʻe fuʻu mālohi ʻa e ola ʻo e pō ko iá. ʻI he hokohoko atu ʻeku fakaʻulí, naʻá ku toutou fakakaukau loto ki he lahi ʻo e ngaahi ongo ne u maʻu ʻi he pō ko iá. Naʻá ne fakamālohia ʻeku holi ke fai lelei angé—ke u toe lelei ange—ke foaki hoku lotó kiate Ia pea ngāue mālohi ke muimui ʻi he sīpinga ʻa hoku Fakamoʻuí, ʻa Sīsū Kalaisi.
Naʻe kamata ke u hiva ʻi heʻeku fakaʻulí. ʻI heʻeku hivá, naʻe kamata ke fonu hoku lotó ʻi ha nonga mo e fiemālie. Naʻá ku ʻilo ko ʻeku aʻusia ko ʻení te ne ʻomai ha hiva foʻou kiate au . . . ko ha hiva naʻá ku fakakakato lolotonga e fakaʻuli ko iá. Ko ha hiva te ne langaki mo ueʻi fakalaumālie. Ko ha hiva fekauʻaki mo e temipalé. Ko ʻeku hiva temipalé.
Ko e foʻi hivá ʻeni:
Naʻá ku ʻalu ke sio ki he temipalé.
Ne fakaofo ke mamata ki ai,
ko ha meʻa fakaofo ʻoku toputapu mo fakalangi.
ʻI hoku lotó, ne u fanongo ki ha fanafana
naʻe lea leʻo siʻi ʻaupito,
ʻo pehē, “Sio ki loto ʻo vakai pe ko e hā te ke maʻú.”
Ko e feituʻu nai ʻeni ʻoku ou fie ʻi aí?
ʻI tuʻa ʻo sio ki loto?
ʻOku ʻikai tonu ʻa e ongo ko ʻení kiate au.
ʻOku ou fie ʻi loto he ngaahi holisí,
ko e konga ʻo e meʻa ʻoku ou sio ki aí
ʻI heʻeku tuʻu he ʻaá he pō ko iá
ʻo sio ki loto ki ha meʻa naʻe lahi ange
ʻi he maka māpelé, ʻākilotoa ʻaki ʻEne ʻofá
Ne haʻu ha fehuʻi ki heʻeku fakakaukaú
ne teʻeki ai ke u fakakaukau ki ai kimuʻa,
Fēfē kapau ko e puleʻanga eni ʻi ʻolungá?
ʻOku ou fie hoko ko ha konga
ʻo e fiefia taʻengata ko iá
ʻoku palōmesi ʻi he puleʻanga ʻo ʻetau Tamaí.
Ka ʻo kapau ʻoku ʻikai ke u mateuteu he taimí ni
ke maʻu ʻa e tāpuaki kuo tukú,
ʻE ʻikai ke u toe maʻu ʻa e melino ko iá mei ha toe meʻa.