Ngaahi Peesi Fakalotofonuá
Lea ʻa e Kau Lea ʻi he ʻAho ʻo e Kau Fokotuʻu Lotú ki he ʻUouangataha ʻi he Ngaahi Puleʻangáʼ mo e Anga ʻene Felāveʻi ki he Angaʻofá
ʻI he hoko atu ʻo ha tukufakaholo ʻo e fepōtalanoaʻaki ʻi he ngaahi tui fakalotu kehekehe ʻi ʻAtelaite, Saute ʻAositelēliá, naʻe fakataha ai ha kau fakafofonga mei he ngaahi tui fakalotu ʻe nima ʻi he kamataʻanga ʻo e taʻu ní ke vahevahe ha ngaahi fakakaukau ki he ako ne fakahoko ʻe honau niʻihi ne nau fokotuʻu ʻenau ngaahi tui fakalotú, fekauʻaki mo e uouangataha ʻi he ngaahi puleʻangá pea mo e founga ʻoku felāveʻi ai ʻa e feongoongoí ki he angaʻofá.
Naʻe houngaʻia ʻa Leini Lousou, ko ha fakafofonga maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ki he faingamālie ke ne kau atu ki aí.
Naʻá ne pehē, “ʻOku tākiekina kimautolu ʻe homau ngaahi kaungāmeʻa ʻAmatia Mosilemí. Ko ha monū maʻu pē ke fakaafeʻi ke kau ʻi he feinga hokohoko ke fakamālohia ʻa e ngaahi vā fetuʻutaki ʻi hotau koló pea mo e ngaahi tui fakalotu kehekehe ʻoku kau maí.”
Ko e fakatahá naʻe fakahoko ia ʻi he fakaafe ʻa e Kautaha ʻAmatia Mosilemi ʻo ʻAositelēliá (Ahmadiyya Muslim Association of Australia), Kolo ʻo Saute ʻAositelēliá (South Australia Community), ʻa ia ne fokotuʻutuʻu mo tokangaʻi ʻe honau kau mēmipá ʻa e “ʻAho ʻo e Kau Fokotuʻu Lotú” (Religious Foundersʼ Day) ʻi honau Noa Mosikí ʻi Mōfeti Veili, ʻa ia kuo nau faʻa fakahoko ʻi he ngaahi taʻu lahi.
Naʻe fakahaaʻi ʻe Salimi Sōketi, ko e Sekelitali ʻAmatia Mosilemi ki he Feongoongoí mo e Lotu Fakatahatahá, ko e taumuʻa ʻo e ngaahi polokalamá ni ke fakatupulaki ʻa e femahinoʻakí mo e fefakaʻapaʻapaʻakí.
Naʻe lea ʻa Misa Lousou fakataha mo Sūtiti Singi, Sōsaieti Siiki ʻo Saute ʻAositelēliá (Sikh Society of SA); Lasenita Panitei, Palesiteni ʻo e Vahe ʻo e Visiva Hinitū Palaisetí ʻi Saute ʻAositelēliá (SA Chapter of Vishva Hindu Parishad); mo Toketā Loni Houniki, Fakataha Alēlea ʻo e Kau Kalisitiane mo e Kau Siu ʻAositelēliá (Australian Council of Christians and Jews); pea mo e lea tukú meia Faliiti Pasiua, Palesiteni ʻo e Kautaha ʻAmatia Moslemi ʻi he Kolo Saute ʻAositelēliá (Ahmadiyya Muslim Associationʻs SA Community).
Naʻe fakamatalaʻi ʻe he tokotaha lea takitaha ʻenau ngaahi tefitoʻi tui mahuʻingá, ʻo tāfataha ʻi he ngaahi tokāteline tataú. Ko e meʻa naʻe uouangataha lahi tahá ko e tui tatau ʻoku tau fehokotaki fakalaumālie kotoa pē pea ʻoku ʻi ai hotau fatongia ke fetauhiʻaki.
Naʻe pehē ʻe ʻIunipa Mēsā, ʻa ia naʻá ne tataki ʻa e polokalamá, “Ko ha sīpinga fakaʻofoʻofa ʻo e melinó ʻa e haʻu fakataha ʻo e ngaahi tui fakalotu ʻe nimá.”
Naʻe tokolahi ʻa e kau atu ʻa e kau mēmipa ʻo e koló ki he fakatahaʻangá. Naʻe pehē ʻe Leimoni C. Filipe, Pīsope ʻo e Uooti Hepi Velí (kāingalotu) ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “ʻOku ou tui ko e faʻahinga polokalama ko ʻení ko e ngaahi sīpinga fakaʻofoʻofa ia ʻo e meʻa ʻe lava ke aʻusia ke fakatupulaki ʻa e ʻofá, fakaʻapaʻapá mo e feongoongoi ʻi heʻetau ngaahi tui fakalotu kehekehé . . . ʻI heʻetau tui fakalotú, ʻoku tau fakaʻapaʻapaʻi ʻa e ngaahi tui fakalotu kotoa pē pea ʻiloʻi ʻa e lelei ʻoku tau foaki ki he kolo lahi angé.”
Naʻe tātukuʻaki ʻa e efiafi fakaʻofoʻofá ʻaki ha kai efiafi ifo, ʻo e meʻakai tuʻufonua ʻo e Hahake Lotolotó ʻa ia ne teuteuʻi lelei ʻe he kau mēmipa ʻo e Kautaha ʻAmatia Mosilemí maʻa ʻenau kau fakaafé.