ʻOku Talitali Lelei Kimoutolu ki he Makasini ko ʻEní
Ngaahi Tāpuaki ʻo e Ngāue Fakatemipalé mo e Hisitōlia Fakafāmilí
Ko Brother mo Sisitā Prebble mo ʻena fānaú mo honau ngaahi malí ʻi he Temipale Sydney Australia ke silaʻi hona ʻofefine siʻisiʻi tahá.
ʻOlungá: faitā ʻa Sally Crosbie
Kuó u aʻusia ha ngaahi tāpuaki lahi ʻi heʻeku moʻuí ʻi heʻeku kau ki he ngāue fakatemipalé mo e hisitōlia fakafāmilí pea kuó u fakamoʻoniʻi foki ʻi he moʻui ʻa e niʻihi kehé, ʻoku ʻikai teitei fuʻu tōmui ke maʻu ʻa e ngaahi tāpuaki ko ʻení maʻá e kau mēmipa moʻui mo pekia ʻo e fāmilí.
Naʻe pehē ʻe ʻEletā Dale G. Renlund ʻi he konifelenisi lahi ʻo ʻEpeleli 2018: “ʻI he taimi ʻoku tuʻutuʻuni ai ʻe he ʻOtuá ke tau fai ha meʻá, ʻokú ne faʻa fokotuʻutuʻu ha ngaahi taumuʻa lahi. Ko e hisitōlia fakafāmilí mo e ngāue fakatemipalé ʻoku ʻikai maʻá e kakai pekiá pē ka ʻokú ne toe tāpuakiʻi foki mo e kakai moʻuí.” Naʻe fakamatala leva ʻa Elder Renlund ki ha ngaahi tāpuaki lahi, kau ai ʻa e ngaahi tāpuaki faifakamoʻuí, ʻa ia ʻe lava ke maʻu ʻe hotau ngaahi fāmilí ʻi heʻetau kau ʻi he ngāue fakatemipalé mo e hisitōlia fakafāmilí (vakai, “Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Liahona, Mē 2018, 46–47).
ʻI he makasini ko ʻení, ʻoku ou vahevahe ai mo ha kāingalotu tokolahi ʻo e Siasí ʻa e founga kuo tāpuekina ai kitautolu ʻe he Tamai Hēvaní ʻo fakafou ʻi he ngāue fakatemipalé (vakai, peesi 12, 14, 16, 30, mo e 46). ʻOku tau tali ha ngaahi fehuʻi kehekehe, hangē ko ʻení “Te u teuteu fēfē nai ʻi heʻeku fuofua ʻalu ki he temipalé?” “Te u talanoa fēfē nai ki hoku ngaahi kaungāmeʻá fekauʻaki mo e temipalé?” pea ʻi heʻeku fakamatalá, “Te tau tauhi fēfē nai ʻa e temipalé ke ofi kiate kitautolu neongo ʻa ʻene mamaʻó?”
Te tau lava kotoa ʻo aʻusia ʻa e ngaahi tāpuaki faifakamoʻuí ʻi heʻetau moʻuí, ʻo tatau ai pē pe ko e hā hotau ngaahi faingataʻaʻiá, ʻi heʻetau feinga ʻi ha feituʻu pē te tau lava ʻo kau ai ʻi he ngāue fakatemipalé mo e hisitōlia fakafāmilí. ʻOku fakafou ʻi heʻetau ngaahi feinga fakafoʻituituí, neongo pe ko e hā hono siʻisiʻi ʻetau ʻiloʻi kinautolú, ka te tau lava kotoa pē ʻo tokoni ke ʻai ke toe lahi ange ʻa e ngāue ʻa e ʻEikí ʻi hono huhuʻi hotau kau pekiá mo fakamālohia hotau ngaahi fāmilí.
Fakaʻapaʻapa atu,
Lisa Prebble
Siteiki Devonport Australia