Fakaʻilekitulōnika Pē: Kakai Lalahi Kei Talavoú
Founga ʻOku Tāpuekina Ai ʻe he Temipalé ʻEmau Moʻui Fakaʻahó
Naʻe fuʻu femoʻuekina ʻeku moʻuí, ka naʻá ku ʻiloʻi ʻe faitāpuekina au mo hoku fāmilí ʻi hono fakamuʻomuʻa ʻa e temipalé.
Laʻitā ne fakatātaaʻi ʻe ha kau mōtolo
ʻOku ou ʻofa ʻi he temipalé. ʻOkú ou maʻu maʻu pē.
Ko e meʻa ʻoku ou saiʻia taha ai ʻi he temipalé ko e founga ʻokú ne fakamālohia ʻa e ʻofá ʻi hoku vā mo hoku uaifí, ko homa vā mo ʻema fānau ʻe toko onó, pea mo e ongoʻi nonga fakalūkufua ʻi homau ʻapí. Kuó u aʻusia moʻoni e mālohi ʻoku maʻu mei hono fakahoko mo fakaʻapaʻapaʻi e ngaahi fuakava toputapu ʻo e temipalé pea mo e hūfangaʻanga ʻoku ʻomi ʻe he ngaahi fale māʻoniʻoni ko ʻení kiate kitautolu mei he ngaahi ʻahiʻahi mo e taʻemanonga ʻo e māmaní.
ʻI heʻema mali mo hoku uaifí ʻi he Temipale Tokyo Japan he taʻu ʻe 10 kuohilí, ne ma fokotuʻu ha taumuʻa ke ma ō fakataha ki he temipalé tuʻo taha he māhina. Kae hili pē ha taimi nounou mei ai, naʻe uiuiʻi au ʻe he kau palesitenisī ʻo e Temipale Tōkioó ke u hoko ko ha tokotaha ngāue temipale ʻi he Falaite kotoa pē.
Naʻá ku fiefia ke u lava ʻo tokoni, ka naʻe kiʻi femoʻuekina foki ʻa e moʻuí he taimi ko iá. Ko hoku taʻu fakaʻosi ia ʻi he ʻunivēsití, pea naʻe faingataʻa ke fakapotupotutatau ʻa e akó mo ʻeku ngāue fakataimi ʻi ha kautaha laó, ko ʻema fononga fakamāhina fakataha ki he temipalé, pea mo ha sifi ngāue temipale he Falaite kotoa pē.
ʻI he lotolotonga ʻo e vahaʻa taimi mātuʻaki femoʻuekiná ni, naʻá ma aleaʻi ia ʻi he faʻa lotu ko ha husepāniti mo e uaifi, pea naʻá ma fakakaukau te ma fakamuʻomuʻa maʻu pē ʻa e temipalé ʻi heʻema moʻuí. Naʻá ma ʻiloʻi ʻe faingataʻa he taimi ʻe niʻihi, ka naʻá ma loto ke fakamālohia homa vā fetuʻutakí pea fakaafeʻi mai e ngaahi tāpuakí mo e nonga ki homa ʻapí.
ʻI he ngaahi feilaulau ko ʻeni ke ngāue ʻi he temipalé, naʻá ku fakatokangaʻi moʻoni ai ʻa e lelei lahi ʻoku fakahoko ʻe he temipalé ʻi heʻeku moʻuí. ʻOku tokoniʻi kitautolu ʻe he temipalé ke tau tupulaki fakalaumālie ʻi ha ngaahi founga makehe, pea ʻoku taʻemafakatataua ʻa e ngaahi tāpuaki ʻoku tau fakaafeʻi ki hotau ngaahi ʻapí ʻi heʻetau tuku ha taimi ke tau ō ai ki aí.
Naʻe fakamamafaʻi ʻe Palesiteni Lāsolo M. Nalesoni ʻi he ngaahi taʻu kimuí ni maí ʻa e mahuʻinga ʻo e temipalé ʻi heʻetau moʻuí: “ʻOku fakautuutu pē ʻoho ʻa e filí, pea fakalalahi hono mālohí mo kehekehe. ʻOku toe fakautuutu ange ʻa e fie maʻu ke tau ʻalu maʻu pē ki he temipalé. ʻOku ou kole atu ke mou tuku ha taimi ke mou vakai fakalelei ai ki he anga hono fakaʻaongaʻi ho taimí. Fakaʻaongaʻi lelei ho taimí koeʻuhí ko ho kahaʻú mo ho fāmilí. … ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fie maʻu ʻi hoʻo feilaulau ke tokoni mo moihū ʻi Hono temipalé.”1
ʻI heʻema fakahoko e ngaahi feilaulau ke ʻalu maʻu pē ki he temipalé, kuo hokohoko atu hono faitāpuekina au mo hoku fāmilí ʻe he ʻEikí ʻaki e ngaahi mana ko ʻení.
Kuó u ʻiloʻi ʻoku fakamamafaʻi ʻe hotau kau palōfitá mo e kau ʻaposetoló ʻa e mahuʻinga ʻo e temipalé ʻi heʻetau moʻuí koeʻuhí ʻoku nau ʻiloʻi e ngaahi tāpuaki ʻoku foaki mai ʻe he ʻEikí kiate kitautolu ʻi heʻetau hū ʻi Hono fale māʻoniʻoní, ko ha ngaahi tāpuaki ʻe toki lava pē ke tau maʻu ʻo fakafou ʻi he ngaahi ouau ʻo e temipalé. ʻE tokoni e toutou ʻaʻahi ki aí—pe, kapau ʻoku ʻikai ke tau lava ʻo ʻaʻahi ki ai, kae tauhi ʻetau ngaahi fuakavá mo feinga ke moʻui taau ke maʻu ha lekomeni temipale2—ke tau tupulaki fakalaumālie mo maʻu ha nonga, ʻo aʻu pē ki he taimi ʻoku fakautuutu ai e moveuveu ʻa e māmaní.
ʻOku ou houngaʻia ʻi he ngaahi fuakava kuó u fakahokó mo e founga ʻoku tokoniʻi ai au ʻe he temipalé ke u ongoʻi ofi ki he ʻEikí. Pea ʻoku tautautefito ʻeku houngaʻiá ʻi he mālohi fakalaumālie kuo ʻomi ʻe he temipalé ki hoku vā fetuʻutaki mo hoku fāmilí pea ki homau ʻapí. ʻI hoʻo fakamuʻomuʻa e temipalé ʻi hoʻo moʻuí mo faifeinga ke “taau ki he ʻEikí,”3 te ke aʻusia ʻa e fiefia mo e ngaahi mana kuo talaʻofa mai ʻe he palōfitá kiate kitautolú.