Ko e Tokotaha Tā Piano Māʻongoʻongá
Lolotonga ʻeku lāungá, ne haʻu ki hoku ʻatamaí ha kiʻi fakakaukau faingofua kae mālohi ʻo fakalahi ai ʻeku loto houngaʻiá.
Tā ʻo e tokotaha faʻu tohí naʻe fakahoko ʻe Annika Burkhardt
ʻOku ʻi ai ha meʻa fakafiefia fekauʻaki mo e tangutu ʻi ha sea, nima ʻi he ngaahi kī ʻaivolī ʻo e pianó, ʻo tatali ki hoʻo fakaʻilongá mei he tangata faihivá. Ko e tokoniʻi ha tahá ʻa e ngaahi meʻa ʻoku ou manako taha aí, ka ʻoku ʻikai ko ha meʻa ia ʻoku fakatokangaʻi. Ko e taimi ʻe niʻihi ʻoku haʻu hoku loto-hīkisiá, pea ʻoku ou loto ke fakahaaʻi ʻe ha taha ʻeku ngaahi ngāué.
Ko kimautolu ʻa e kau tā-pianó ʻoku mau tokoniʻi ʻa e kau hivá, tauhi ʻa e taimí, mo fokotuʻutuʻu ʻa e ngaahi faʻahí mo e ongo ʻo e hivá. ʻI he taimi ʻe niʻihi, ʻoku mau akoʻi e ngaahi fehalaaki ʻa e kau hivá. Naʻa mau ngāue ʻi ha ngaahi houa lahi kimuʻa pea mo e hili ʻa e ako hivá. Ko e taimi ʻe niʻihi ʻoku tōmui ʻemau faʻa maʻu ʻa e hivá ka ʻoku tomuʻa fie maʻu ke mau ako ia.
Lolotonga ha taimi faingataʻa, naʻá ku fefaʻuhi mo e ngaahi ongo ko ʻení. Naʻá ku ongoʻi naʻe ʻikai ha taha ʻe houngaʻia ʻi heʻeku ngāué. Ne u tūʻulutui ʻi hoku veʻe mohengá ʻi ha pō ʻe taha ke fakahā ki he Tamai Hēvaní.
Naʻe kamata ʻeku lotú ʻaki hono fakahā e meʻa kotoa pē naʻá ku fakahokó kae ʻikai ke u fakamālōʻia. Naʻe ʻikai ke u fuʻu fie maʻu fēfē, ka naʻá ku fie maʻu ha meʻa. Naʻá ku talaange kiate Ia naʻá ku ongoʻi liʻekina.
Lolotonga ʻeku lāungá, naʻe fanafana mai e Laumālié ha fakakaukau ki hoku ʻatamaí naʻá ne liliu kakato ʻeku fakakaukaú.
Naʻe tuku ʻeku lotú ʻi heʻeku vakai fakafokifā ki he tūkunga ne u ʻi aí ʻi ha maama kehe. Naʻe kamata ke u fakamatalaʻi ʻeku ngaahi lāungá, mo fakakaukau kiate kinautolu fekauʻaki mo e hoko ʻa e Tamai Hēvaní ko e tokotaha tā-pianó. Naʻá ku ʻohovale mo loto fakatōkilalo ʻi heʻeku fakakaukau atu ki he ʻikai ke tau fakatokangaʻi ʻa e lahi ʻo ʻEne tokoniʻi kitautolú, fakalahi mai ki heʻetau moʻuí, fakatonutonu ʻetau ngaahi fehalaākí, pea “ʻikai tulemohe pe mohe” ( Saame 121:4) koeʻuhí ko kitautolu. ʻOku tau fakaafeʻi fakamuimui nai Ia kae ʻuluaki ʻamanaki atu kiate Ia?
Hili e aʻusia ko iá, ne kamata ke u fakamālō kiate Ia ʻi Heʻene tokoniʻi lelei au ʻi heʻeku moʻuí. Ko e meʻa kotoa pē ʻoku ou aʻu ki aí ʻoku tupu ia meiate Ia mo Hono ʻAló. Ko ha fakakaukau makehe ia! Naʻe ʻikai ke ne valokiʻi au ʻi heʻeku ngaahi ongó pe ko ʻeku lāungá. Ka naʻá Ne fili ke akoʻi au. Naʻá Ne akoʻi mai ha founga kehe ke u mamata ai kiate Ia mo e niʻihi kehé.
Ko e fakaʻofa tahá ʻa e taimi ʻoku ou tō ai ki he faingataʻá, ʻoku ou manatuʻi ʻeku Tokotaha Tā Piano Maʻongoʻongá—ʻa e Tokotaha ʻoku ou ako ki aí mo e Tokotaha ʻoku fie maʻu ke u fakamālōʻiá. Naʻe akoʻi au ʻe he Tamai Hēvaní ke u fakahoungaʻi Ia ʻi ha founga kehe mei ha toe founga kuó u maʻu, ke u vakai kiate kinautolu ʻoku mau feohí ʻi he loto houngaʻia, ke maʻu ha loto houngaʻia lahi ange, mo manatuʻi e folofola ʻa Hono ʻAló: “Kuó u haʻu au ke nau maʻu ʻa e moʻuí, pea ke nau maʻu ia ʻo lahi ʻaupito” (Sione10:10)..