Fakaʻilekitulōnika Pē: Ngaahi Tefitoʻi Moʻoni ʻo e Ngāue Fakaetauhí
Ngaahi Founga ʻe 9 ke Hoko ai ha Faikehekehe Lahi: Ko Hono Tanumaki ha Ongo ʻo e Kau Maí ʻi he Siasí
ʻOku tau kau kotoa ʻi hono ʻai ʻa e lotú ko ha feituʻu fakalatá.
Ko hono talitali lelei e niʻihi kehé, fakakau mai kinautolu, mo tokoni ke nau ʻiloʻi ʻoku nau kau maí, ko ha ngaahi founga mahuʻinga kotoa ia ʻoku tau fepoupouʻaki ai ʻi he hala ʻo e fuakavá kae lava ke fakamoʻui kitautolu ʻe he Fakamoʻuí (vakai Hepelū 12:12–13; 3 Nīfai 18:22–23, 32). Ko e hoko ko ia ʻo uouangatahá ko ha konga mahuʻinga foki ia ʻo hono langa hake ʻo Saioné (vakai 4 Nīfai 1:15–17; Tokāteline mo e Ngaahi Fuakava 38:24–27; Mōsese 7:18–19).
Neongo pe ʻokú ke foʻou ki he Siasí, toki hiki pē ki ha uooti foʻou, pe fuoloa hoʻo ʻi ha uooti, ko ha founga ʻeni ʻe hiva te tau lava ai ʻo ʻai e lotú ko ha feituʻu fakalata ʻoku kau ki ai e tokotaha kotoa pē.
Kapau ʻOkú Ke Foʻou ki he Uōtí
-
ʻAlu ki he ngaahi fakatahá mo e ngaahi ʻekitivitií. Hangē ko e angamahení, ʻoku tau maʻu ha ngaahi kaungāmeʻa ʻi heʻetau feohi mo e kakai kehé mo feinga ke maheni mo kinautolú. Vave ki he ngaahi fakatahaʻanga mo e ngaahi ʻekitivitī ʻa e Siasí ʻi ha ngaahi miniti siʻi kimuʻa pe nofo he tukú ke feʻiloaki mo ha kakai foʻou. Te ke lava foki ʻo hiki ho hingoá ke tokoni ʻi he taimi ʻoku fie maʻu aí. Ko ha ngaahi founga faingofua ʻeni ke lalanga ʻaki ha ngaahi vā fetuʻutaki ʻe lava ʻo hoko ko ha ngaahi feohi fakakaungāmeʻa.
-
Fekumi ki he ngaahi mālohingá. Fakahaaʻi ki he kakaí pea mo fakafoʻituitui ʻa e ngaahi mālohinga ʻokú ke vakai ki ai ʻi ho uooti foʻoú, kau takí, mo e koló. ʻOua te ke fakakaukau pē ki he feituʻu fakaʻofoʻofa naʻá ke mavahe mei aí, ka ke feinga ke ʻilo e meʻa lelei fekauʻaki mo ho uooti foʻoú pea talanoa kau ki he niʻihi ne mou fetaulaki he ʻaho ní. ʻEke ki he niʻihi kehé ha fakamatala mo ha ngaahi fakakaukau fekauʻaki mo e meʻa ke faí, feituʻu ke fakatau mei aí, mo e founga ke maʻu ai ha toketā nifo lelei pe feituʻu ke kai aí. Fakakaukau ke mou ō fakataha ki ha niʻihi ʻo e ngaahi feituʻu ʻoku mou talanoaʻí.
-
Fakakaumeʻa ki ha kakai foʻou. ʻOua naʻá ke mahalo ko e kakai ʻoku tangutu ʻi ho tafaʻakí he Lautohi Faka-Sāpaté ne fuoloa ʻenau ʻi aí. Fakakaukau ʻoku nau haʻu foʻou foki, pea ʻoku nau tatali atu ke ke tokoni ange ke nau ongoʻi lata ʻi he uōtí. Fakafeʻiloaki ange koe peá ke fie ʻilo kiate kinautolu, tatau ai pē pe ko e hā hono fuoloa ʻenau ʻi aí. Pea toe fakahoko ia ʻi he uike ka hoko maí mo e uike hono hokó.
-
Faʻa kātaki. Faʻa kātaki ʻiate koe pea mo e niʻihi kehé lolotonga hoʻo feinga ke langa ha vā fakakaungāmeʻá. Kapau ʻoku ʻikai fie ʻalu atu e tokotaha ʻokú ke fakaafeʻi ke mo maʻu meʻatokoni efiafí, kole ki ha tokotaha kehe. Kapau ʻe ʻosi atu ha māhina ʻoku ʻikai te ke maʻu ha uiuiʻi, toe talanoa mo e kau taki fakauōtí fekauʻaki mo e founga te ke lava ai ʻo tokoní.
Kapau Kuo Fuoloa Hoʻo ʻi he Uōtí
-
Lotu fekauʻaki mo e feituʻu ke ke tangutu aí. Mahalo he ʻikai te ke ongoʻi maʻu pē ʻokú ke fie tangutu mo ha taha ʻoku ʻikai te ke ʻiloʻi, ka ʻi hoʻo aʻu atu ki ha fakatahaʻanga ʻa e Siasí, loto-fiemālie ke kiʻi taimi ʻi he matapaá ʻo lotua ha fakahinohino pe ko hai te ke tangutu mo iá. Pea ngāue leva ʻo fakatatau ki he ngaahi ueʻi ʻa e laumālié ke ke maheni lelei ange mo e niʻihi kehé.
-
Fehuʻi pe ʻe founga fēfē haʻo ngāue fakaetauhi ki he niʻihi kehé. ʻAi ke ʻilo ʻe he kau taki fakauōtí ʻokú ke loto-fiemālie ke maheni mo ha taha foʻou pea ʻokú ke loto-fiemālie ke tokoni ʻi he taimi ʻoku fie maʻu ai ʻe he niʻihi kehé ha kaungāmeʻá. Ko e taha ʻo e ngaahi founga lelei taha ki hono fokotuʻu ha vā fakakaungāmeʻá ko hono tokoniʻi e niʻihi kehé mo ako ke tokangaʻi moʻoni kinautolu. Lotu ke ke ʻiloʻi e meʻa te ke lava ʻo fai ke tokoniʻi ai e niʻihi kehé ke nau ongoʻi lata mo ʻofaʻi, ʻo tatau ai pē pe ko e hā e fuoloa ʻenau ʻi he uōtí.
-
Ako ki hono vahevahe ʻo e ʻofá. Ko hono fokotuʻu ko ia ha ʻātakai ʻoku ongoʻi ai he niʻihi kehé ʻoku nau kau ki aí ko ha fakahaaʻi ia ʻo e manavaʻofá—ʻa e ʻofa haohaoa ko ia ʻa Kalaisi ʻoku tau feinga ke fakatupulakí. Ka ʻoku ʻikai ke tau maʻu tatau kotoa ʻa e taukei pe tōʻonga ko ia ke fakahoko ʻakí. Kapau ʻoku ʻikai fakanatula pē hoʻo tokoni ki he niʻihi kehé, kumi ha ngaahi founga ʻoku ʻikai fuʻu faingataʻá ke fakatupulaki ai ha vā fakakaungāmeʻa mo e niʻihi kehé, hangē ko hano fakaafeʻi ha kaungāmeʻa hono tolu ke kau atu ʻi he pōtalanoá pe ʻevá pe fakaafeʻi kinautolu ki he ngaahi ʻekitivitī te ke ʻalu ki aí.
Kapau ko ha Taki Fakauooti Koe
-
Fakafeʻiloaki ʻi he matapaá. Tuʻu he veʻe matapā ʻo e falelotú (pe ʻai ha kāingalotu kehe ʻo e uōtí ke nau fai ia) ʻo fakasio e kakai ne toki kau pe hiki foʻou atú. Feinga ke ke maheni mo kinautolu mo ʻeke ʻenau fakamatala fetuʻutakí; te ke lava foki ʻo kole ange ke ʻai hanau laʻitā te ke lava ʻo vahevahe mo e kau taki kehe ʻo e uōtí. Kapau ʻoku faʻa lahi ha ngaahi hiki foʻou atu ki homou uōtí, fakakaukau ke ngaohi ha fanga kiʻi kato lanu fakaʻofoʻofa ʻoku ʻi ai e fakamatala ʻa e uōtí mo ha kiʻi meʻa lelei ke ʻave ki ha taha foʻou. Fakaafeʻi e kāingalotu kotoa ʻo e uōtí ke nau fakasio e fanga kiʻi kato lanu fakaʻofoʻofa ko iá pea feinga ke talitali lelei ha taha ʻokú ne pukepuke.
-
Fokotuʻu ia ko ha ngāue fakauooti. Fakakaukau ke fokotuʻu e anga fakakaumeʻá mo e fakakau maí ko ha taumuʻa fakauooti. Talanoa fakataha ʻi he ngaahi fakataha fakakōlomú mo e fakakalasí fekauʻaki mo e founga ke tokoniʻi ai e niʻihi kehé ke nau ongoʻi ʻoku tokangaekina kinautolu. Fakakau ha fakamanatu ʻi he ngaahi fetuʻutaki ʻa e uōtí pe ngaahi papa fanongonongó.