ʻOku Faitāpuekina ʻe he Ngāue Fakatemipalé ʻa e Kakai Kotoa pē, Moʻuí mo e Kau Pekiá
ʻOku nofo ʻa e tokotaha faʻu tohí ʻi Gauteng, Saute ʻAfilika.
ʻI he 2018, naʻá ku fokotuʻu ha taumuʻa ke maʻu ha lekomeni temipale. Hili ha taʻu ʻe taha mei ai, naʻá ku sila mo e fefine naʻá ma teu malí ʻi he temipalé ki hono kotoa ʻo e taʻengatá.
Temipale Johannesburg South Africa
Toʻohemá: faitaaʻi ʻe Fernando Bragança
ʻI he taimi naʻe fanongonongo ai ʻi hoku koló ʻa e ngaahi ʻaʻahi ki he temipalé, naʻá ku ʻalu ki ai. Neongo naʻe teʻeki ke u lava ʻo hū ki he temipalé, ka naʻá ku faʻa luelue ʻi he kelekele ʻo e temipalé. Naʻá ku lotua ki he Tamai Hēvaní ʻo fakahaaʻi ʻa ʻeku ngaahi holi lahi tahá ke u hū ʻi ha ʻaho ʻi he temipalé. Ko e niʻihi ʻo e ngaahi ʻaʻahi ko ʻení naʻe miniti pē ʻe 10, ka naʻe ongo moʻoni ia ki hoku laumālié.
ʻI ha efiafi momoko mo ʻuhoʻuha ʻe taha, ne u aʻu tōmui ai ki he temipalé. Neongo naʻe tāpuni e kelekele ʻo e temipalé, ka naʻe fakaʻatā au ʻe he leʻo ʻo e temipalé ʻi ha kiʻi taimi siʻi ʻi he kelekelé. Naʻá ku maʻu ha tatau ʻo e lotu fakatapui ʻo e temipalé. Naʻe ueʻi au ke u lau ia.
Ne fonu hoku lotó ʻi he ngaahi ongo [ʻo e nonga, fiemālie mo e houngaʻia] ʻi heʻeku lau ʻa e ngaahi lea ko ʻení: “ʻAloʻofa muʻa ʻo fanafana atu ʻa e fiemālié ki Ho kakaí ʻi he mālohi ʻo Ho Laumālié ʻi he taimi ʻoku nau omi ai ki heni mo ha loto mafasia ke fekumi ki ha fakahinohino ʻi honau ngaahi faingataʻaʻiá. ʻAloʻofa muʻa ʻo fakafiemālieʻi mo poupouʻi kinautolu ʻi heʻenau omi ʻi he ngaahi taimi ʻo e mamahí. ʻAloʻofa muʻa ʻo ʻoange kiate kinautolu ʻa e loto-toʻa, fakahinohino, mo e tui, ʻi he taimi ʻoku nau tānaki fakataha ai, ki ha hūfangaʻanga, mei he moveuveu ʻo e māmaní. ʻAloʻofa muʻa ke Ke fakapapauʻi ange kiate kinautolu ʻa Hoʻo moʻoní mo Ho faka-ʻOtuá, pea mo hono moʻoni mo hono faka-ʻOtua ʻo Ho ʻAlo kuo toetuʻú.”1
Naʻá ku ʻiloʻi he taimi ko iá ko ʻeku ʻaʻahi ki he kelekele ʻo e temipalé naʻe mahuʻinga ia ki he ʻEikí, neongo naʻe ʻikai ke u ʻi loto ʻi he temipalé.
Ko ʻEku Taumuʻá ke ʻI Ai
Naʻe kamata ʻeku fakaʻamu ke u ʻalu ki he temipalé ʻi ha pongipongi ʻe taha ʻi Tīsema 2018. Naʻá ku tangutu ʻi hoku mohengá ʻo lau ha lea ʻi he konifelenisi lahi ʻo ʻEpeleli 1999 ʻa ia naʻe fakahoko ʻe ʻEletā Richard G. Scott (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne lea kau ki he mahuʻinga ʻo e moʻui taau ke hū ʻi he temipalé. Naʻá ne pehē ko e temipalé “ko ha feituʻu ʻo e nonga, fakaumiuminoa, mo e ueʻi fakalaumālie. ʻE hanga ʻe hoʻo ʻalu maʻu pē [ki aí] ʻo fakatupulaki hoʻo moʻuí ʻaki ha taumuʻa ʻoku maʻongoʻonga angé.” Naʻá ne hoko atu ke tānaki atu e fakamatala fakaʻofoʻofa ko ʻení: “ʻAlu ki he temipalé. ʻOkú ke ʻiloʻi ko e meʻa totonu ia ke fakahokó. Fakahoko ia ʻi he taimí ni.”2
Naʻá ku fakaʻilongaʻi ʻa e potufolofola ko ʻení, vakaiʻi ʻeku tohi māhina fakasiteiki ʻo e 2019, peá u fakatokangaʻi naʻe fakataimi-tēpileʻi hoku koló ke ʻaʻahi ki he Temipale Johannesburg South Africa ʻi he Falaite hono ua kotoa pē ʻo e māhiná. Naʻá ku fokotuʻu ha taumuʻa ke u ʻalu tuʻo taha he māhina ki he kelekele ʻo e temipalé mo hoku koló pe ko au toko taha pē, neongo naʻe teʻeki ai ke u maʻu ha lekomeni temipale.
Taau ke Hū
ʻI he konga kimuʻa ʻo Sānualí, naʻá ku talanoa ai mo ʻeku palesiteni fakakoló fekauʻaki mo hono maʻu ʻo ha lekomení pea aʻu ʻo hū ʻi he temipalé. Naʻá ku vēkeveke ke aʻusia ʻa e taumuʻa ko ʻení.
Naʻá ku maʻu ha lekomeni fakangatangata ʻi ʻAokosi, pea lava ke u ʻaʻahi ki he faiʻanga papitaisó mo e toʻu tupu ʻi hoku koló. Naʻe papitaiso au maʻa ʻeku ongo faʻētangatá mo e kui tangata ʻi he tafaʻaki ʻeku faʻeé. Naʻe kamata foki ke u kau atu ki he kalasi teuteu ki he temipalé ʻi heʻeku hanganaki atu ke maʻu hoku ʻenitaumení. Pea aʻu ʻo hokohoko atu ʻeku ʻaʻahi ki he temipalé mo kau atu ki he papitaisó.
Faifai, pea aʻu ki he ʻaho 2 ʻo Nōvema 2019, naʻá ku hū ki he temipalé mo hoku kaumeʻa ne ma teu malí, peá ma hū atu ko e husepāniti mo e uaifi, ʻo silaʻi fakataha ki taimi mo e taʻengatá. He ʻikai lava ʻe ha lea ʻo fakahaaʻi ʻa e laumālie naʻe ʻi he fakataha maʻongoʻongá ni. Naʻe hokohoko atu ʻeku ʻalu mo hoku uaifí ki he temipalé. Ne ma maʻu ha ngaahi aʻusia mahuʻinga mo toputapu ʻo aʻu ki he tāpuni fakaemāmani lahi ʻo e temipalé ʻi he 2020 koeʻuhí ko e COVID-19.
Sisitā mo Brother Mncwabe (ʻi lotó) ʻi he ʻaho ʻo ʻena silá, mo e kau mēmipa ʻo e fāmilí.
ʻI ʻOlungá: Laʻi tā ‘i he angalelei ʻa e fāmili Mncwabe
Ko e Temipalé ʻOku Maʻá e Tokotaha Kotoa Pē
ʻOku ʻikai kau ʻa e tokoua ʻo ʻeku faʻeé ki he Siasí, ka naʻá ne haʻu ki he temipalé ki heʻema silá. Hili iá, naʻá ne vahevahe ha meʻa naʻá ne aʻusia hili ʻene ʻaʻahi ki he kelekele ʻo e temipalé. Naʻá ne misi naʻe toe ʻi he temipalé ʻi heʻema silá, ka ʻi he taimi ko ʻení naʻe ʻi ai kotoa e kau mēmipa hoku fāmilí (kau ai e niʻihi ne u fakahoko ki ai e papitaisó). Naʻá ne pehē, “Naʻe ʻi ai foki mo hoʻo faʻeé,” “ka naʻá ne kei pehē mai pē, ʻʻOku ʻikai ke u lava ʻo sio ki hoku fohá. Ko e hā ʻoku ʻikai ke u lava ai ʻo sio ki hoku fohá?’”
Naʻá ku tangi ʻi he hili ʻeku fanongo ki he meʻá ni, pea naʻá ku ʻiloʻi e ʻuhinga naʻe ʻikai lava ai ʻeku faʻeé ʻo sio mai kiate aú. Naʻá ne pekia ʻi he 2002, pea naʻá ku fakatoloi hono fakahoko ʻene ngaahi ouaú maʻana ʻi he temipalé. Naʻá ku fakapapau ke fakahoko ʻeni ʻi he vave tahá. Ne ʻikai fuoloa kuó u maʻu ha faingamālie ke fakahoko hono papitaisó mo lea ʻaki hono hingoa kakató ʻi heʻeku papitaiso ʻa e finemui naʻá ne fakafofongaʻi ʻeku faʻē kuo pekiá.
ʻOku ou maʻu ha fakamoʻoni mālohi ko e temipalé ko e fale ia ʻo e ʻOtuá. Te tau lava ʻo maʻu Hono mālohí ʻi heʻetau ʻi aí. ʻOku ou toe ʻiloʻi foki ʻoku foaki ʻe he temipalé ha ngaahi tāpuaki ki he fānau kotoa ʻa e ʻOtuá, ʻo tatau ai pē pe ʻoku moʻui pe mate.