Ko e Mahino mo Fakakau Hotau Kāinga LGBT
ʻOku nofo ʻa e tokotaha naʻá ne faʻú ʻi ʻIutā, USA.
Te tau lava kotoa ʻo tokoni ke fakatahatahaʻi hotau ngaahi uōtí mo e tukui koló.
ʻI he ngaahi ʻuluaki māhina siʻi hili hono ui au ko ha pīsopé, naʻá ku ʻohovale ʻi he omi ha mātuʻa kehekehe ʻe tolu ʻi hoku uōtí ʻo talamai kiate au ʻoku ʻi ai haʻanau fānau ʻoku nau pehē ʻoku fetokangaʻaki e tangata mo e tangatá pe liliu tangata e fefiné pe liliu fefine e tangatá. ʻI he meʻa takitaha ne hokó, naʻe fakahaaʻi ʻe he mātuʻá ʻenau ʻofa moʻoni ki heʻenau fānaú fakataha mo ha ngaahi tuʻunga kehekehe ʻo e hohaʻá he ʻikai malava ke kau atu ʻenau fānaú ʻi he uōtí.
Naʻe faifai pē pea vahevahe mai ʻe ha ngaahi fāmili kehe kiate au ha fakamatala tatau, pea naʻá ku fakatokangaʻi neongo naʻe ʻikai ke u fuʻu maheni mo e ngaahi aʻusia ko ʻení, ka ʻi heʻeku hoko ko e pīsopé, ne u maʻu ha faingamālie ke tokoniʻi kotoa e kāingalotu ʻi hoku uōtí ke langaki ha kolo uouangataha ange, ʻo tatau ai pē pe ko e hā e meʻa ne nau aʻusiá.
Naʻe vave ʻeku fakatokangaʻi ko ʻete hoko ko ha pīsope lelei angé, naʻe fie maʻu ke u loto fiemālie ke u feinga ke mahino kiate au ʻa e ngaahi aʻusia ʻa e kāingalotu ʻoku pehē ko e LGBT kinautolu mo honau ngaahi fāmilí. Ko ia, ʻi he ngaahi fepōtalanoaʻaki ongo mo tauʻatāiná, ʻahiʻahí mo e fehalaākí, lahi ʻo e akó, pea mo e falala ki he ʻEikí ke maʻu ha mahinó, ne u ako ai ha meʻa lahi fekauʻaki mo e founga te u lava ai ʻo fakahoko ha poupou lahi ange ki he kāingalotú ʻi he ngaahi tūkunga ko ʻení ʻi heʻenau feinga ke haʻu kia Kalaisí.
Naʻe fakaʻā hoku matá ki he fiemaʻu ʻa e uouangatahá mo e mahinó, pea naʻá ku ako ha ngaahi lēsoni ʻe niʻihi naʻa nau tokoniʻi au ʻi heʻeku hoko ko e pīsopé ke u maʻu ha faʻahinga ongo fekauʻaki mo hotau kāinga LGBT kotoa pē. ʻOku ou fakatauange ko e taimi ʻe lau ai ʻe he kau takí mo e niʻihi kehé ʻa e meʻa ne u akó, te nau maʻu ha ngaahi fakakaukau ʻaonga ki honau ngaahi tūkungá.
Lēsoni 1: Muimui ʻi he Kau ʻAposetolo Moʻuí
Naʻe vave ʻeku ʻiloʻi hono mahuʻinga ke u alāanga mo e ngaahi akonaki fakaeʻaposetolo fakamuimuitaha fekauʻaki mo e tefitó.
Ko ha foʻi moʻoni fakaʻofoʻofa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku tataki kitautolu ʻe he kau ʻaposetolo mo e kau palōfita moʻuí (vakai, Tokāteline mo e Ngaahi Fuakava 1:30). Pea kiate au, ʻoku ʻuhinga ʻa e foʻi lea moʻuí ki heʻetau maʻu ha fakahinohino ʻi hotau kuongá ki he founga hono fakaʻaongaʻi ʻo e ongoongoleleí ki he ngaahi fiemaʻu hotau kuongá. Ko ia ai, kapau te tau fakafalala pē ki he lea fakafonua ʻo e kuohilí, ʻe lava ke mole meiate kitautolu ha fakahinohino fakaʻofoʻofa mo mahuʻinga ʻoku ʻomi ʻe he ʻEikí ʻo fakafou mai ʻi hotau kau palōfita lolotongá.
Ko e maʻuʻanga tokoni ʻe taha naʻá ne tokoniʻi au ke toe vakaiʻi e ngaahi akonaki fakaeʻaposetolo kimuí ni maí ko e konga Tokoni ki he Moʻuí ʻi he uepisaiti ʻa e Siasí, tautautefito ki he ngaahi peesi ʻoku ui ko e “Fetokangaʻaki ʻa e Tangata mo e Tangata pe Fefine mo e Fefiné” mo e “Liliu Fefine ʻa e Tangatá pe Liliu Tangata ʻa e Fefiné.” ʻOku kau ʻa e ngaahi meʻá ni ʻi ha ngaahi fakamatala ʻe niʻihi naʻe makehe kiate au:
-
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “Mahalo ko e kamataʻangá pē ʻa e faikehekehe ʻoku tau maʻu he taimí ni ʻi he Siasí. Ko hono moʻoní, ʻoku ou tui te tau mamata ki ha faikehekehe lahi ange. … Ka ko e foʻi moʻoniʻi meʻa ko ia ʻe lava ke ʻomi ʻe he kakaí ha ngaahi meʻafoaki mo ha ngaahi fakakaukau kehekehe, pea mo e ngaahi aʻusia mo e puipuituʻa mo e ngaahi pole kehekehe lahi ʻoku fehangahangai mo e kakaí, te nau fakahaaʻi mai ai ʻa e meʻa ʻoku mahuʻinga moʻoni ʻi he ongoongolelei ʻo Kalaisí. Pea ko e konga lahi ʻo e toengá, mahalo ne ako ʻi ha vahaʻataimi, ʻa ia ʻoku lahi ange ʻene hoko ko ha anga fakafonuá ʻi heʻene hoko ko ha tokāteliné, pea ʻe lava pē ke mole, pea te tau lava leva ʻo ako moʻoni ke hoko ko ha kau ākonga.”1
-
Naʻe fakahoko ʻe ʻEletā Quentin L. Cook ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakaafe ke “takimuʻa ʻi hono fakahaaʻi ʻo e ʻofá, manavaʻofá, mo e tokoní. ʻOua naʻa tau ʻai ke ʻikai fakakau pe taʻe-fakaʻapaʻapaʻi ʻe he fāmilí ʻa kinautolu ʻoku fili ha tōʻonga moʻui kehe ko ha ola ʻo ʻenau ngaahi ongo fekauʻaki mo honau tuʻunga tangata pe fefiné.”2
Ke poupouʻi hoku uōtí ke ako ʻa e ngaahi akonaki fakaeʻaposetolo fakamuimuitaha ʻi he tefito ko ʻení, naʻa mau fakaʻatā ai ha taha ʻo ʻemau ngaahi lēsoni fakatahataha ʻo e Sāpate hono nimá ke aleaʻi ai e founga ʻe toe lelei ange ai ʻemau muimui ki he ngaahi fakahinohinó. Naʻe hoko e lēsoni ko iá ko ha aʻusia ʻaonga, ongo, mo langaki moʻui moʻoni.
Lēsoni 2: Fili ʻa e Tuí Kae ʻIkai Ko e Ilifiá
ʻE lava ke fakailifia ʻa e meʻa ʻoku ʻikai ke nau maheni mo iá. ʻI heʻeku hoko ko ha pīsope foʻoú, naʻe faingataʻa ke u ala atu ʻo tokoni ki ha mēmipa ʻi hoku uōtí naʻe pehē ʻoku fetokangaʻaki ha tangata mo ha tangata mo fie maʻu ha tokoni fakalaumālie. Naʻe faingataʻa ke tataki ha ngaahi fealēleaʻaki fekauʻaki mo e tefitó ni pea mo faleʻi e mātuʻa ʻa e toʻu tupu ʻoku nau fefaʻuhi mo honau tuʻunga totonú.
Ne haʻu ki heʻeku fakakaukaú ha ongo mālohi ʻo e loto hohaʻá:
“Fēfē nai kapau te u lea ʻaki e meʻa ʻoku halá?”
“Fēfē nai kapau ʻe fuʻu faingataʻa ke liliu ʻeku fakakaukaú pe fuʻu tōtuʻa?”
“ʻOku feʻunga nai ʻeku ʻiló ke u tokoni?”
Lolotonga ʻeku fakakaukau ʻi ha ʻaho ʻe taha ki heʻeku ilifiá, naʻe tohoakiʻi ʻeku fakakaukaú ke ako ʻa e ngaahi potufolofola naʻe lave ki he ilifiá. Naʻá ku ongoʻi nonga ʻi heʻeku laú, “ʻOku hanga ʻe he ʻofa haohaoá ʻo tekeʻi ki tuʻa ʻa e ilifia kotoa pē” (Molonai 8:16), pea “ʻoku ʻikai ha manavahē ʻi he ʻofá; ka ʻoku tekeʻi atu ʻa e manavaheé ʻe he ʻofa haohaoá” (1 Sione 4:18).
Naʻe tokoniʻi au ʻe he ngaahi moʻoni ko iá ke u manatuʻi kapau te u ngāue ʻi he ʻofa moʻoni, te u lava ʻo maʻu ha loto falala ʻi hono maʻu ha fakahinohino mo ha tokoni mei he ʻEikí.
Te u lava ʻo fakamoʻoni ko e taimi naʻá ku loto fiemālie mo loto fakatōkilalo feʻunga ai ke muimui ki he ngaahi ueʻi ʻa e Laumālie Māʻoniʻoní, naʻa mo e taimi naʻá ku ongoʻi taʻefeʻunga ai ʻi ha ngaahi tūkunga ʻoku ʻikai ke u maheni mo iá, ne u aʻusia ʻa e talaʻofa ko ia ʻe hanga ʻe he ʻOtuá ʻo “liliu ʻa e ngaahi meʻa vaivaí ko e mālohi” (ʻEta 12:27).
Lēsoni 3: Fakaʻaongaʻi ʻa e Ngaahi Founga Faingofuá—maʻá e Kau Takí
ʻI heʻeku fekumi ki ha faleʻi mei he ngaahi maʻuʻanga tokoni faivelenga fekauʻaki mo e tefito ko ʻení, naʻá ku ʻilo ai ha fanga kiʻi tokoni ʻaonga naʻá ne tākiekina lelei au ʻi heʻeku malava ko ia ko ha pīsopé ke langaki ha kolo ʻo e kau maí. ʻI hoʻo falala ki he Laumālié, mahalo te ke fie liliu ha niʻihi ʻo e ngaahi fokotuʻu ko ʻení ke feau e ngaahi fiemaʻu ʻo e ngaahi tūkunga homou uōtí:
-
Tokoni ki he niʻihi fakafoʻituitui ʻoku maheni mo e ngaahi palopalema LGBT ke tokoni atu ke ke ako pea mahino ʻenau ngaahi fakakaukaú. ʻE lava ke kau heni hoʻo palesiteni fakasiteikí, fakataha alēlea fakauōtí, kau pīsope kehe ʻi homou feituʻú, ngaahi kaungāmeʻa falalaʻanga, mo e kāingalotu ʻi ho uōtí ʻoku ʻiloʻi ko e LGBT mo honau ngaahi fāmilí. ʻE lava foki ke ʻomi ʻe he peesi uepisaiti “Fetokangaʻaki ʻa e Tangata mo e Tangata pe Fefine mo e Fefiné” (ChurchofJesusChrist.org/topics/gay) ha fakahinohino. ʻOku lahi fau e ngaahi tokoni ʻoku nau ʻākilotoa kitautolú, pea ʻoku ʻikai ha taha ʻiate kitautolu ʻe tuenoa ʻi hono fakahoko hotau ngaahi uiuiʻí.
-
Vahevahe hoʻo fakamoʻoní ʻi he loto fakatōkilalo, pea tatau pē mo e ʻoua te ke manavasiʻi ke fehuʻi fekauʻaki mo e ngaahi meʻa ʻoku ʻikai mahino kakato kiate koé. ʻOku tau fakahoko ha tokoni ʻo aʻu pē ki heʻetau loto fiemālie ke fakafanongo mo akó.
-
ʻOua naʻá ke manavasiʻi ke kole fakamolemole kapau naʻá ke lea ʻaki pe fakahoko ha meʻa ʻoku fakamamahi, neongo kapau naʻe ʻikai ke ke ʻuhinga pehē. ʻOku langaki ʻe he feveitokaiʻakí ʻa e falalá.
-
Kapau ʻoku fakahoko ʻe ha kaungāmeʻa pe mēmipa ʻo e uōtí ha ngaahi fakamatala taʻeʻaonga pe fakamamahi fekauʻaki mo e niʻihi fakafoʻituitui LGBT, fakakaukau ki he founga lelei taha ke tali ʻakí. Ko e taimi lahi ʻoku maʻu e ngaahi fakamatalá ni mei he taʻetaukeí pea ʻoku ʻikai fakataumuʻa ia ke taʻe-fakaʻapaʻapaʻi. ʻE lava ke tokoni hono fakahoko ʻo e fakahinohino fakatāutahá.
-
Tokanga ke fenāpasi hoʻo lea ki he fānau kotoa ʻa e ʻOtuá mo hoʻo ngaahi fuakavá mo e uiuiʻí, ʻo tatau ai pē pe ko hai ʻokú ke talanoa mo iá.
-
ʻI he taimi ʻoku vahevahe ai ʻe he kāingalotu ʻo e uōtí ʻenau ngaahi aʻusiá, ʻoku mātuʻaki pelepelengesi ʻaupito ia. ʻOua ʻe vahevahe ʻenau fakamatala fakatāutahá taʻe-maʻu ha ngofua.
-
Manatuʻi ʻoku ʻikai tatau e meʻa ʻoku ongoʻi ʻe ha taha mo e founga ʻoku nau fili ke tali ʻaki e ngaahi ongo ko iá. ʻOku fakamatalaʻi ʻe ha ʻēsei ʻo e Ngaahi Tefito ʻo e Ongoongoleleí ʻo pehē: “ʻOku fakafaikehekeheʻi ʻe he Siasí ʻa e fetokangaʻaki ʻa e tangata mo e tangatá pe fefine mo e fefiné pea mo e tōʻonga fakahomosekisualé. ʻE lava e kakai ʻoku fetokangaʻaki ʻa e tangata mo e tangatá pe fefine mo e fefiné pe ʻoku ʻiloa ko e kau fakafāfiné (gay), kau fakatangatá (lesbian) pe fakatou tangata mo fefiné (bisexual), ʻo fakahoko mo tauhi e ngaahi fuakava mo e ʻOtuá pea nau kau kakato mo taau atu ki he Siasí. ʻOku ʻikai ko ha angahala ʻa hono ui kita ʻokú te fakafāfiné, fakatangata pe fakatou tokanga ki he tangata mo e fefiné (bisexual), pe fetokangaʻaki ʻa e tangata mo e tangata pe fefine mo e fefiné, pea ʻoku ʻikai taʻofi ai ha taha ia mei heʻenau kau atu ki he Siasí, maʻu ha uiuiʻi pe hū ki he temipalé.”3
-
Tokanga ke ʻoua naʻá ke fakangatangata ʻa e ngaahi faingamālie ʻo e kāingalotú ke tokoní kapau ʻoku nau ʻiloʻi ʻoku nau fakafāfine pe liliu fefine e tangatá pe liliu tangata ʻa e fefiné. ʻOku maʻu ʻe he kāingalotu homou uōtí kotoa ha ngaahi aʻusia mo ha ngaahi fakakaukau makehe ʻe lava ke ʻaonga ki homou uōtí. Hangē foki ko e akonaki ʻa ʻEletā Kulisitofasoní, “Ko ha taha ʻoku muimui ki he … ngaahi tuʻunga ʻulungaangá, [ʻa e] ngaahi akonaki ʻo e ongoongolelei ʻo Kalaisí, neongo ʻene fefaʻuhi mo e femanakoʻaki fakahomosekisualé—ʻoku ʻikai ha ʻuhinga ia ke ne taʻelava ai ʻo kau kakato mai, ke ne taʻe hoko ko ha mēmipa kakato ʻo e Siasí pea maʻu fatongia mo malanga pea hū ʻi he temipalé ʻo ngāue ai, pea ko e ngaahi faingamālie mo e ngaahi tāpuaki kotoa pē ʻe lava ke maʻu mei he memipasipi ʻi he Siasí, ʻe ʻatā ia maʻana.”4
Hokohoko Atu e Akó mo e ʻOfá
Talu mei hono ui au ko ha pīsopé, kuó u tui mālohi ʻoku maʻu ʻe hotau kāingá takitaha ha tokoni fakaʻofoʻofa mo makehe ke fakahoko ki he ongoongolelei ʻo Sīsū Kalaisí, ki hotau tukui koló, pea ki heʻetau moʻui fakafoʻituituí. Pea neongo pe ko e hā hotau fatongia ʻi he uōtí, ka ko ha fatongia mo ha faingamālie mohu tāpuekina ia ke langaki hake ha kolo uouangataha ange ʻaki e fekumi ke ʻofa lahi ange, mahino, mo poupouʻi hotau kāinga fakalaumālie kotoa pē.
Hangē ko e fakamoʻoni ʻa Palesiteni Jean B. Bingham, ko e Palesiteni Lahi ʻo e Fineʻofá: “Kapau ʻe tauʻatāina hoʻo fakakaukaú pea mo ho lotó, te ke ʻilo ha ngaahi meʻa lahi ʻoku fakaʻofoʻofa fekauʻaki mo e kakaí naʻe ʻikai ke ke ʻamanaki ki ai. ʻI hoʻo aʻusia, mamata, pea mo fakaava ho lotó ki he kakai kehé, te ke ʻiloʻi ʻoku tau kau kotoa pē.”5