Haʻu, ʻo Muimui ʻIate Au
ʻOku tau maʻu fēfē nai ʻa e ngaahi mālohi ʻo e langí?
ʻOku tau ako ʻi he Tokāteline mo e Ngaahi Fuakava 121:36 “ʻoku ʻikai lava ke mapuleʻi pe ngāue ʻaki ʻa e ngaahi mālohi ʻo e langí kae ngata pē ʻi he ngaahi founga ʻo e māʻoniʻoní.” ʻOku ʻomi ʻe he veesi 40 mo e 41 ha ngaahi sīpinga ʻo e ngaahi tefitoʻi moʻoni māʻoniʻoní. ʻE tokoniʻi kitautolu ʻe heʻetau ako ke moʻui ʻaki e ngaahi tefitoʻi moʻoni ko ʻení ke tau maʻu ʻa e ngaahi mālohi ʻo e langí ki he ngaahi tapa kotoa pē ʻo ʻetau moʻuí.
ʻOku ʻuhinga ki he hā ʻa e kātaki fuoloá?
Ko e ʻuhinga ʻe taha ʻo e kātaki fuoloá ko e malava ko ia ke kātaki ʻi he ʻofá, ʻo aʻu ai pē ki he taimi ʻoku tau ongoʻi tuenoa, mamahi, pe loto-foʻi aí. ʻOkú ke ʻiloʻi nai ha niʻihi kehe ko ha ngaahi sīpinga ʻo e kātaki fuoloá? Te ke lava fēfē nai ʻo muimui ʻi heʻenau sīpingá?
Te u fakahaaʻi fēfē nai ʻa e angamaluú?
Ko e konga ʻo e angamaluú ko hono fakatokangaʻi e lavameʻa ʻa e niʻihi kehé.1 ʻOku ʻi ai nai ha taha ʻi hoʻo moʻuí te ke lava ʻo talamonū ki ai pe fakahīkihikiʻi fakamātoato?
ʻOku ou fakahaaʻi fakamātoato nai ʻeku ʻofá?
ʻOku moʻoni ʻa e ʻofa fakalangí. Te ke fakatupulaki fēfē nai ha ʻofa moʻoni ange ki he kakai ʻoku mou feohí? ʻOku akoʻi ʻe he vahe 6 ʻo e Malangaʻaki ʻEku Ongoongoleleí ʻa e founga ke fakatupulaki ai e ngaahi ʻulungaanga faka-Kalaisí mo lisi ha ngaahi potufolofola te ke lava ʻo ako fekauʻaki mo e ʻofá.2