Kau ʻĀngelo ʻi he Temipalé
Naʻá ku hohaʻa naʻa hanga ʻe hoku tuʻunga tailiilí ʻo tohoakiʻi e tokanga ʻa e niʻihi kehé ʻi he temipalé—kae ʻoua kuó u fanongo ki ha ngaahi lea fakafiemālie ʻa ha ongomeʻa mali.
Tā ʻo e Temipale Uasingatoni D.C. naʻe fakahoko ʻe Candace Read
Ko e temipalé ʻa e feituʻu nonga mo lōngonoa taha ʻi he māmaní, ko ia? Mahalo ʻoku ʻikai ko ha taha hangē ko aú, ʻoku fokoutua he Tourette’s syndrome. ʻOku fakatupu ʻe he tuʻunga fakaʻofa ko ʻení ke u fakahoko maʻu pē ha ngaahi feʻunuʻaki mo ha longoaʻa ʻoku ʻikai keu loto ki ai. ʻE lava ʻe heʻeku Tourette ʻo ʻai e kakaí ke nau ongoʻi taʻefiemālie ʻi he taimi ʻoku ou ofi ai kiate kinautolu ʻi ha feituʻu lōngonoa.
Lolotonga haʻaku sēsini ʻenitaumeni ʻi he Temipale Washington D.C. ʻi ha ʻaho ʻe taha, naʻá ku hohaʻa naʻa ʻoku ou fakahohaʻasi pe tohoakiʻi e tokanga ʻa e niʻihi kehé. ʻOku fie maʻu kotoa ʻeku tokangá ke mapuleʻi ʻeku tōʻongá (tics-tōʻonga ʻikai ke u lava ʻo mapuleʻi), ʻa ia ʻokú ne taʻofi au mei haʻaku tokanga ki ha toe meʻa kehe. Ko ia, ʻi heʻeku feinga ke tokanga taha ki he ʻenitaumení, naʻe ʻikai ke u lava ʻo mapuleʻi kakato ʻeku tōʻongá (tics), neongo naʻá ku fakahoko hoku lelei tahá. Naʻá ku ongoʻi faingataʻaʻia ʻo lahi ange ʻi he tuʻunga angamahení lolotonga e sēsiní.
Hili iá, ʻi heʻeku mavahe mei he loki silesitialé, ne u ongoʻi ha leʻo fakafiemālie ʻi hoku tuʻá ʻokú ne pehē mai, “Kātaki ʻo toe foki mai. Kātaki ʻo hokohoko atu hoʻo haʻu ki he temipalé.”
Naʻe ongo mai e leʻó mei ha ongomeʻa mali naʻá na fakatokangaʻi ʻeku faingataʻaʻiá. Naʻá na fie maʻu ke fakapapauʻi mai naʻe talitali lelei maʻu pē au ʻi he temipalé, ʻo tatau ai pē pe ko e hā e longoaʻa pe ngaahi meʻa naʻá ku fakahokó. Naʻe ʻai ʻe heʻena ngaahi leá ke u ongoʻi naʻe talitali lelei mo fie maʻu au ʻo hangē pē ko ha toe taha kehé.
ʻI heʻena fāʻofua kiate aú, naʻe tāpuekina au ʻe he Laumālie Māʻoniʻoní ʻaki ʻa e nonga mo e fiefia. Naʻe ʻomi ʻe he ʻOtuá ha ʻaloʻofa ongongofua kiate au ʻi he tatau ʻo e ongo ʻāngelo ko iá, ʻa ia naʻá na fakafiemālieʻi au mo fakahā mai ʻokú Ne tokanga mai. Koeʻuhí ko kinaua, naʻá ku ongoʻi ʻa e melino, nonga, mo e lōngonoa naʻá ku fakaʻamu ke u ongoʻi ʻi he temipalé ʻi he ʻaho ko iá.
Naʻe pehē ʻe ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻikai haʻu kotoa e kau ʻāngeló mei he tafaʻaki ʻe taha ʻo e veilí. “ʻOku tau lue holo mo talanoa mo ha niʻihi ʻo kinautolu—ʻi heni, ʻi he taimí ni pea ʻi he ʻaho kotoa pē.”1
Te tau lava kotoa ʻo hoko ko ha kau ʻāngelo kiate kinautolu ʻoku tau feohí ʻi heʻetau fakahaaʻi ʻa e “ʻofa mo e tokanga ki he fānau [ʻa e ʻOtuá].”2