2021
Ngaahi Temipalé, Ko e Hingoa ʻo e Siasí, mo Hono Fakakau ʻo e Niʻihi Kehé
ʻOkatopa 2021

Maʻá e Ngaahi Mātuʻá

Ngaahi Temipalé, Ko e Hingoa ʻo e Siasí, mo Hono Fakakau ʻo e Niʻihi Kehé

young adults together in church

Siʻi Ngaahi Mātuʻa,

Te ke lava ʻo ako ʻi he kaveinga ko ʻení fekauʻaki mo hono fakaʻaongaʻi e hingoa totonu ʻo e Siasí, mahuʻinga ʻo e ngaahi temipalé, mo hono fakakau ʻo e niʻihi kehé. Te ke lava ʻo fakaʻaongaʻi e ngaahi fakamatala ko ʻení mo e ngaahi fakakaukau ʻi laló ke kamata ha fepōtalanoaʻaki mo ho fāmilí fekauʻaki mo e ngaahi meʻa te tau lava ʻo fakahoko ke tau fakalakalaka ai ʻi he hala ʻo e fuakavá.

Fealēleaʻaki ʻi he Ongoongoleleí

ʻE Ui Peheʻi ʻA Hoku Siasí

ʻOku lea ʻa Palesiteni Henry B. Eyring fekauʻaki mo e ʻuhinga ʻoku tau fakaʻaongaʻi ai ʻa e hingoa kakato ʻo e Siasí pea mo e ngaahi tāpuaki ʻoku tau maʻu ʻi heʻetau fakahoko iá (vakai, peesi 6). Te mou lava ʻo lau fakafāmili e fakamatalá ni pea aleaʻi e founga ʻoku hoko ai hono fakaʻaongaʻi e hingoa kakato ʻo e Siasí ko ha founga ke vahevahe ai ʻetau fakamoʻoní.

Ko e Temipalé

Fakaʻaongaʻi ʻa e ngaahi fakamatala ʻi he peesi 10–17 mo e ngaahi talanoa ʻi he makasini Friend ke tokoni ki homou fāmilí ke nau ako fekauʻaki mo e temipalé. Fakakaukau ke fehuʻi ki hoʻo fānaú pe ko e hā ʻene ʻuhinga kiate kinautolu ʻa e temipalé. Fakaʻaongaʻi ʻa e ngaahi maʻuʻanga tokoni ʻa e Siasí ke tokoni atu ʻi hono tali ha faʻahinga fehuʻi pē ʻoku nau maʻu fekauʻaki mo e temipalé.

Fakakau maí

Kapau ʻoku ʻi ai haʻo fānau lalahi ange ʻoku nau aʻusia ʻa e femanakoʻaki ʻa e tangata mo e tangata pe fefine mo e fefiné pe ʻi ai hanau ngaahi kaungāmeʻa ʻoku nau fakahoko ia, lau fakataha ʻa e fakamatala ʻi he peesi 20. Hili iá pea aleaʻi ʻa e founga te ke lava ai ʻo tokoniʻi hoʻo fānaú pe ngaahi kaungāmeʻá ke nau ongoʻi ʻoku nau kau lahi ange pea mo e founga te ke lava ai ʻo vahevahe ʻa e ʻofa ʻa e ʻOtuá kiate kinautolú.

Ngaahi fakakaukau ʻi he Haʻu, ʻo Muimui ʻIate Aú

Vakai, peesi 26–29.

Fiefia Fakafāmili ʻi he Haʻu, ʻo Muimui ʻIate Aú

Ko e Mafatukituki ʻo e Faingataʻá

Tokāteline mo e Ngaahi Fuakava 122:5–9

  1. Tānaki ha ngaahi meʻa mamafa, hangē ko ha ngaahi foʻi maka pe ngaahi tohi lalahi.

  2. ʻAi ke tangutu takai fuopotopoto ʻa e tokotaha kotoa pē.

  3. Fakaʻaliʻali ha fakatātā ʻo Siosefa Sāmita ʻi he Fale Fakapōpula Lipetií.

  4. Lau ʻa e Tokāteline mo e Ngaahi Fuakava 122:5–7.

  5. Tuku ha foʻi maka ʻe taha ʻi lotomālie ʻi he siakalé ki he faingataʻa takitaha ʻoku lave ki ai ʻi he ngaahi veesi ko ʻení,

  6. ʻAi ke tānaki atu ʻe he mēmipa takitaha ʻo e fāmilí ha foʻi maka ʻe taha ki he fokotuʻungá ke ne fakafofongaʻi ha faingataʻa kuo nau foua.

  7. Lau ʻa e Tokāteline mo e Ngaahi Fuakava 122:8–9.

  8. Ko hai kuó ne ongoʻi ʻa e mamahi ʻo e ngaahi faingataʻa kotoa ko ʻení? Fakakaukauloto ki he ongo te ke maʻu ʻi hono fataki kotoa kinautolú.

Fealēleaʻakí: Ko e hā ha ngaahi founga ʻoku mahino, tokoniʻi, mo liliu ai ʻe he ʻEikí hotau ngaahi ʻahiʻahí ke hoko ko ha ngaahi aʻusia “ʻe hoko ia ʻo ʻaonga kiate [kitautolu]”? (Tokāteline mo e Ngaahi Fuakava 122:7).

Hūfangaʻanga Mei he Afaá

Tokāteline mo e Ngaahi Fuakava 115

ʻAhiʻahi fakahoko ʻa e ʻekitivitī ko ʻení ke akoʻi e founga ʻoku ʻomi ai kiate kitautolu ʻe he tānaki fakataha ko ia ʻo e Kāingalotú ʻa e mālohí mo e maluʻí.

  1. Lau fakataha ʻa e Tokāteline mo e Ngaahi Fuakava 115:6: “Pea ke hoko ʻa e tānaki fakataha ki he fonua ko Saioné, pea ki hono ngaahi siteikí, ko ha maluʻanga, pea ko ha ungaʻanga mei he afaá, pea mei he houhaú ʻo ka lilingi kakato atu ia ki he māmaní hono kotoa.

  2. Vilohi ha seti taisi (fanga kiʻi foʻi meʻa lulu) pe ʻai ha mēmipa ʻo e fāmilí ke ne fakakaukau ki ha mataʻifika ʻi he vahaʻa ʻo e 1 ki he 10.

  3. Kapau ko e mataʻifika taʻetauhoa, fakahingoa ha meʻa te ne maluʻi koe mei ha matangi fakatuʻasino (hangē ko e: fakamalú, koté, falé).

  4. Kapau ko e mataʻifika tauhoa, fakahingoa ha meʻa te ne maluʻi koe mei ha afā fakalaumālie (hangē ko e: folofolá, lotú, talangofuá, hotau ngaahi fāmilí).

  5. Taufetongi ʻi hono fakakaukauʻi e ngaahi talí.

  6. Kapau ʻoku ʻi ai haʻo fānau lalahi ange, te mou lava ʻo aleaʻi e ʻuhinga ʻo Saioné mei he Fakahinohino ki he Ngaahi Folofolá: “Loto-maʻá” (Tokāteline mo e Ngaahi Fuakava 97:21). ʻOku maluʻi fēfē nai kitautolu ʻe heʻetau tānaki fakataha mo e loto maʻá?

Fealēleaʻakí: Ko e hā ha niʻihi ʻo e ngaahi matangi fakatuʻasino mo fakalaumālie ʻoku tau fehangahangai mo iá? Te tau tānaki fakataha fēfē nai ʻia Kalaisí? Te tau lava fēfē nai ʻo “tuʻu hake pea ulo atu”? Tokāteline mo e Ngaahi Fuakava 115:5).