Ko Hono Fakafeʻiloaki ʻo e Temipalé ki Hotau Ngaahi Kaungāmeʻá

Fai ʻe Myriam Vega

ʻOku nofo ʻa e tokotaha naʻá ne faʻú ʻi Kiupeki, Kānata.

Naʻá ku ongoʻi ʻa e fuʻu fiefia lahi ʻi he taimi naʻá ku ʻalu ai mo ha toko ua ʻo hoku ngaahi kaungāmeʻá ki he ʻoupeni hausi ʻa e temipalé.

ʻI he taimi naʻe toe fakatapui ai ʻa e Temipale Montreal Quebec hili hano fakaleleiʻi lahi ʻi he 2015, naʻe fokotuʻutuʻu ha ngaahi ʻoupeni hausi ʻe homau kau taki fakalotofonuá. Ko e taimi lelei taha ia ke fakaafeʻi ai e ngaahi kaungāmeʻá ke nau omi ʻo mamata ʻi he temipalé.

Naʻá ku fakakaukau leva ki ha ongo kaungāmeʻa lelei mei he kolisí naʻá na ʻosi ʻeke mai ʻo kau ki he Siasí mo e ngaahi meʻa ʻoku ou tui ki aí. ʻI he kuohilí, naʻá na fakatou loto fiemālie ke na omi ki he houalotu sākalamēnití ʻi he taimi Kilisimasí. Naʻá ku fakaafeʻi foki kinaua ki heʻeku malí ʻi he taʻu ʻe ua kimuʻá. Ko ha faingamālie ia ke fakamatalaʻi ange ai kiate kinaua ʻa e ʻuhinga te na lava ange ai ki he maʻu meʻa tokoni talitalí kae ʻikai ki he ouau silá ʻi he temipalé.¹

Neongo ne u ʻosi talanoa mo kinaua fekauʻaki mo e Siasí kimuʻa, ka naʻá ku kiʻi momou ke fakaafeʻi kinaua. Naʻá ku manavasiʻi naʻa faifai peá u ʻi ha tūkunga taʻefiemālie kapau ʻe ʻikai ke na tali. Fāifai, peá u maʻu ʻa e loto-toʻa peá u fehuʻi ange ʻi he telefoní kiate kinaua: “ʻOkú mo fie mamata nai ʻi he feituʻu naʻá ku mali aí? ʻOku fakaava ʻa e temipalé ki he kakaí ke takimamataʻi ai kinautolu. Kapau ʻokú mo saiʻia ai, te tau lava ʻo ō fakataha.”

Naʻe vave ʻaupito ʻa e talí mei he ongo meʻá ni “ʻIo! ʻOku ou saiʻia ai.”

Naʻe alu ange ʻa e taha ʻo hoku ongo kaungāmeʻá mo ʻene fānau e toko ua, pea haʻu a e toko taha ko eé mo hono malí. Ko ha aʻusia fakangalongataʻa ia kiate au. Naʻá ku ongoʻi ha fuʻu fiefia lahi ʻi heʻeku lava ʻo vahevahe mo kinautolu ʻeku ʻofa ki he temipalé.

Naʻe fakamanatu mai ʻe ʻEletā Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene lea ʻi he konifelenisi lahi ʻo ʻOkatopa 2020: “ʻOku tohiʻi ʻi tuʻa ʻi he temipale kotoa pē ʻo e Siasí ʻa e ngaahi foʻi lea fakaʻofoʻofa ko e ʻMāʻoniʻoni ki he ʻEikí.’ Ko e temipalé ko e fale ia ʻo e ʻEikí mo ha maluʻanga mei he māmaní. ʻOku kāpui ʻe Hono Laumālié ʻa kinautolu ʻoku nau moihū ʻi he ngaahi fale toputapu ko iá. ʻOkú Ne fokotuʻu ʻa e ngaahi tuʻunga pau ke tau hū ai ko ʻEne kau fakaafé.”²

ʻOku hoko ʻa e temipalé ko ha ungaʻanga mei he ngaahi kovi ʻo e māmaní. ʻI heʻeku manatuʻi iá, ʻoku mahino leva kiate au ʻa e ʻuhinga kuo pau ai ke moʻui ʻaki ʻe kinautolu ʻoku hū ki aí ʻa e ngaahi akonaki ʻa e ʻEikí ʻa ia ʻoku hā ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko hono moʻoní, ʻoku fakaafeʻi ʻa e tokotaha kotoa pē ke ne aʻusia ʻa e fiefia ʻi hono fakahoko ʻo e ngaahi fuakava toputapu mo e ʻOtuá. Ka koeʻuhí ke tau lava ʻo fakahoko iá, kuo pau ke tau feau ʻa e ngaahi fiemaʻu kuó Ne fokotuʻu ke tau feʻunga ai ke maʻu ha lekomení. Ko e meʻa pē ia ʻatautolu takitaha ke tau fili pe te tau muimui ki Heʻene ngaahi fonó.

Ko e taimi ʻoku tau fakamatalaʻi ai ki hotau ngaahi kaungāmeʻá ʻa e faikehekehe ʻo ha temipale mo ha falelotú, te tau lava pē ʻo talaange ʻeni kiate kinautolu:

Ko e temipalé ko e fale ia ʻo e ʻOtuá. Ko ha feituʻu melino ia ʻe lava ke fakahoko ai ʻe he kāingalotu faivelenga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní e ngaahi palōmesi toputapu ki he ʻOtuá te nau moʻui ʻo fakatatau mo ʻEne ngaahi fekaú. Ko ha feituʻu ia te tau ako lahi ange ai fekauʻaki mo ʻetau taumuʻa ʻi he moʻuí pea lava ke silaʻi fakataha ai ʻa e ngaahi fāmilí ki he taʻengatá. Te tau lava ʻo fakahoko ʻi he temipalé ʻa e ngaahi ouau ʻo e ongoongoleleí, hangē ko e papitaisó, maʻa ʻetau ngaahi kui naʻe ʻikai hanau faingamālie ke maʻu kinautolu ʻi heʻenau kei moʻuí.
Ko e ngaahi falelotú ʻa e ngaahi feituʻu ʻoku talitali lelei mo fakataha ai ʻa e kāingalotú ʻi he Sāpaté ke ako fekauʻaki mo e Tamai Hēvaní mo Sīsū Kalaisi pea mo maʻu ʻa e sākalamēnití. ʻOku tau fakaʻaongaʻi ʻa e ngaahi ʻapisiasí ʻi he lolotonga ʻo e uiké ki he ngaahi ʻekitivitī fakasōsialé pe sipotí. ʻOku talitali lelei maʻu pē ʻa e kau ʻaʻahí ʻi hotau ngaahi falelotú, ʻi he Sāpaté mo e lolotonga ʻo e uiké.

ʻE lava ke tokoni hono vahevahe ʻetau ngaahi fakamoʻoní mo hotau ngaahi kaungāmeʻá fekauʻaki mo e ʻuhinga ʻo e temipalé kiate kitautolú ke nau ongoʻi ʻa e Laumālié. Te ne fakamoʻoniʻi kiate kinautolu ʻa e māʻoniʻoni ʻo e feituʻú ni.

ʻOku ou fakaʻapaʻapaʻi mo fakahoungaʻi moʻoni ʻa e temipalé. ʻI heʻeku ʻalu ki aí, ʻoku ou ongoʻi ʻoku ou maʻu ha fakakaukau lahi ange ki heʻeku moʻuí. Te u lava ʻo kiʻi holomui mei he ngaahi faingataʻa ʻoku ou fehangahangai mo iá pea maʻu ha fakakaukau mahino ki he meʻa ʻoku totonu ke tukutaha ki ai ʻeku tokangá fakaʻahó. ʻOku ou ongoʻi ofi ange ki he ʻOtuá mo hoku Fakamoʻui ko Sīsū Kalaisí kae pehē foki ki he kau mēmipa hoku fāmilí, ʻi he lolotongá mo e kuohilí fakatouʻosi.

Ko Sisitā mo Brother Vega ʻi muʻa ʻi he temipalé ʻi he ʻaho naʻá na sila aí.

Ko ʻeku ngaahi ʻaʻahi manakoa taha ki he temipalé ʻa e ʻaʻahi ko ia mo hoku husepānití. ʻOku fakamālohia ʻetau ʻofá ʻi heʻetau manatuʻi e ngaahi fuakava ne tau fakahoko mo ʻetau Tamai Hēvaní pea mo e niʻihi kehé ʻi hono silaʻi kitautolu ki taimi mo e kotoa ʻo e taʻengatá .