Savali Faaleautaitai i le Eria
Filifili e Filifili
I le faagasologa o ō tatou olaga tatou te feagai ma le tele o luitau ma tauiviga i aso uma. O nisi o ni mea ua masani ai e pei o le umi na tu i le laina o taavale. O nisi e matuia tele atu ma e ono aafia ai lo tatou manuia faaletino, faalelagona, ma faaleagaga.
Mo le tele o tausaga sa ou galue ai o se polōfesa o le soifua maloloina faalemafaufau a o o’u auauna ai foi i valaauga eseese faaleta’ita’i i le Ekalesia. A o o’u taumafai e faaaoga mataupu faavae o le talalelei i lo’u atamai faapolōfesa, sa ou iloa ai filifiliga nei e fa e matuā fesoasoani tele pe a tatou feagai ma faigata, pe tetelē po o le itiiti. E lē gata i lea, o nei filifiliga e mafai ona fesoasoani ia i tatou e atiina a’e ai le ola tutoatasi faalelagona ma faaleagaga lea o le a fesoasoani ia i tatou e ō mai i lo tatou Faaola o Iesu Keriso ma maua ai le faamamāina, faamalologa, ma le mana faamalosia o Lana Togiola i o tatou olaga.
1. Filifili Lau Tali o Ou Tulaga
O le tele o taimi tatou te faatagaina mea e tutupu i o tatou olaga e fuafua i ai taunuuga o o tatou olaga. E faigofie ona tatou lē fiafia i mea e tutupu ia i tatou, o le tele o ia mea e matuā lē mafai ona oo i ai la tatou pule, e pei o le tau, po o le faiaina o le au taaalo e sili ona tatou fiafia i ai, ma sili atu ona ogaoga, o faalavelave e oo i o tatou olaga po o i latou tatou te alolofa i ai. Ae e mafai ona tatou filifili tatou te fiafia, e oo lava i le olioli e ui lava i ia ituaiga o puapuaga. E lē na o ni mafaufauga lelei po o le lē amanaiaina o luitau. Ae e sau mai le faalatalata atili atu lea ia Iesu Keriso.
Sa faamalamalama mai e Peresitene Russell M. Nelson, “E mafai ona maua e le au paia le fiafia i lalo o soo se tulaga. E mafai ona tatou lagona le olioli e tusa lava pe lē o lelei le aso, se vaiaso, po o se tausaga . . .
“O le olioli o loo tatou lagonaina e itiiti lava se mea e faatatau i tulaga o ō tatou olaga a’o mea uma o loo faatatau i le taulaiga o ō tatou olaga.
“Afai o le taulaiga o tatou olaga e i le fuafuaga o le faaolataga a le Atua . . . ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma.”1
2. Filifili e Faia
Ina ua tatou fananau mai, sa tatou mauaina meaalofa matagofie ma tāua e lua. O le muamua o lo tatou tino faaletino. O le meaalofa lona lua o le faitalia, po o le agavaa e filifili ai i le lelei ma le leaga. O se meafaigaluega mamana lea e foia ai le lē mautonu, atuatuvale, faanoanoa, ma le popole i o tatou olaga. Ae e tatau ona tatou faaaogaina ma le atamai.
O le faaaogaina o lou faitalia e valaaulia ai le Agaga Paia ma le mana faamalosi’au o le Togiola a Iesu Keriso i lou olaga ma aumaia ai le faamalologa.
Ou te fia fautuaina atu se faatinoga faigofie e mafai ona aumaia ai aafiaga mamana i lou olaga. Ia faailoa ma le loto tatalo ia luitau autu o lou olaga. Ona faitau lea pe matamata i le konafesi e sili ona lata mai. Tusi i lalo se fautuaga se tasi pe lua mai saunoaga taitasi e te manatu e ono fesoasoani. Toe faatulaga le lisi lenei o mea e mafai ona e faia mai le silisili ona fesoasoani i le pito i luga e oo i lalo i mea e ono mafai ona fesoasoani. O lea la ua e saunia se lisi o faatinoga.
Ona e agai lea i luma, ma le manatu tonu i ai, e faatino nei fautuaga se tasi pe lua i le taimi. A maea ona e faataunuuina ia vaega ona e agai lea i le isi tasi pe lua o mea o i lau lisi ma faasolo ai lava faapena. I nisi itu, e lē afaina moni lava po o le a le mea e te filifili e faia mai i lenei lisi. O le faaaogaina o lou faitalia e ala i le faatinoga e aumaia ai faamanuiaga maoae faaleagaga ma o le a faamalosia ai lou faatuatua.
Na aoao mai Elder David A. Bednar, o le Korama a Aposetolo e Toasefululua, faapea, “O le faatuatua ia Keriso e taitai atu ai i galuega amiotonu, lea e faateleina ai lo tatou agavaa ma le mana faaleagaga. O le malamalamaaga faapea o le faatuatua o se mataupu faavae o galuega ma le mana, e musuia ai i tatou e faaaoga lo tatou faitalia ina ia ogatasi ma upu moni o le talalelei, lea e valaaulia ai mana o le faaolataga ma le faamalosiauga o le Togiola a le Faaola i o tatou olaga, e faalauteleina ai le mana i totonu o i tatou lea e avea ai i tatou ma pule ia i tatou lava, ma ua taua i le valaauliaina o musumusuga e ala i le ole atu, saili atu, ma le tu’itu’i atu.”2
3. Filifili e Faamalositino
O ō tatou tino o malumalu e nonofo ai o tatou agaga, ae nofo ai foi le agaga o le Atua pe a tatou agavaa. O le tausia lelei o ō tatou tino e mafai ona faamanuia ai i tatou faaletino, faaleagaga, ma faalelagona. Ua faateleina lava le faailoa mai e suesuega faafomai faapea o faamalositino e aafia ai le fatu gaoioi tele faifaipea ia e faaminoi ai musele tetele o ō tatou tino (vae ma lima ia lava ai le siitia o le tātā o ō tatou fatu) ia oo i le 30 minute i le aso, faalima i le vaiaso i ni auala faafiafia, e mafai ona aogā i le puleaina o le loto vaivai, popole, ma le atuatuvale. E aogā foi i lo tatou soifua maloloina faaletino ma faaleagaga ma mafai ona faalautele atu ai le lelei ma le umi o ō tatou olaga.
E moni, e eseese lava tulaga faaletagata taitoatasi, ma e tatau ona e saili i fautuaga atamai faafomai a o le’i auai i se polokalama faamalositino. Ae o le tele o tagata e mafai lava ona faia se mea, e oo lava i le tulai ese mai se nofoa ae alu e sāvalivali i soo se taimi ma le mamao e mafai.
4. Filifili e Salamo
E le o faigata uma, luitau, faafitauli, po o ma’i i o tatou olaga e oo mai ona o le agasala. O le tele lava e oo mai ona o loo tatou ola ai i se lalolagi pa’ū, faaletino. O nisi foi e oo mai ona o agasala ma sesē o isi. Ae e mafai lava ona tatou filifilia le olioli nai loo le faanoanoa. O se tasi o auala sili ona lelei ma sili ona mautinoa e lagona ai le olioli moni, e tusa lava po o ā o tatou tulaga, o le salamo i aso taitasi.
Na faamalamalama mai e Peresitene Russell M. Nelson le uiga o le salamo moni. “Pe a fetalai mai Iesu ia te oe ma a’u ia ‘salamo,’ o loo Ia valaauliaina i tatou ia sui o tatou mafaufau, lo tatou iloa, o tatou agaga—e oo lava i le auala tatou te mānava ai . O loo Ia talosagaina i tatou ia sui le ala tatou te alolofa atu ai, mafaufau ai, auauna atu ai, faaalu ai o tatou taimi, taulimaina ai a tatou avā, aoao atu ai a tatou fanau, ma le tausiga o ō tatou tino.”
E lē gata i lea, “E leai se mea e sili atu ona saoloto ai, sili atu ona malualii, pe sili atu ona tāua i lo tatou alualu i luma faaletagata lava ia nai loo se taulaiga masani i aso taitasi i le salamo. O le salamo e lē o se mea e faatasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso . . .
“A tatou filifili e salamo ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu ae faaleagaga ma maua le olioli—le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!”
Na toe saunoa mai foi Peresitene Nelson, “O le salamo o le ki lea e aloese ai mai le faanoanoa ua mafua mai i mailei a le tiapolo.”3
E lē gata i lea, afai ua tatou salamo moni lava ma faamagaloina i o tatou sesē ma agasala ua mavae, ona tatau lea ona tatou agai i luma, tuuese, ma tanumia pea i latou. O le toe eliina i luga o agasala tuai e le o se auala e lagona ai le filemu ma le fiafia i o tatou olaga.
Molimau
Ou te tuuina atu la’u molimau patino, e faavae i lo’u lava aafiaga ma aafiaga o le toatele o isi, o lo tatou Faaola ma le Togiola o Iesu Keriso e silafia ma alofa ia i tatou taitoatasi ma finagalo ia tatou fiafia ma maua le olioli i o tatou olaga, e tusa lava pe i ai luitau, tauiviga ma faigata Na te silafia o loo tatou faafeagai. A tatou faaaoga le faatuatua ia te Ia, liliu ia te Ia i aso taitasi i le salamo ma le agaga tatalo, faaaoga ma le atamai lo tatou faitalia, ma faamalositino o tatou tino ma mafaufau ma agaga, e mafai ona tatou maua le olioli ma le filemu lea e na o le mana faamamā, faamalolo, ma le faamalosi’au o Lana Togiola e mafai ona oo mai ai.