O se Haka ma le Tusi a Mamona

Saunia e Elder Hyrum Dansie

I le amataga o le 2022, sa tofia a’u i le eria a Waikato, i Huntly Niu Sila. Pe tusa ai ma se tausaga atoa talu ona ou i ai i la’u misiona i le taimi lea, ma sa talosagaina a’u e aoao la’u soa, o Elder Kafalava, o se faifeautalai fou lava i le misiona.

I se tasi aso, sa manao se tagata faato’ā liliu mai e suafa ia Uso Tegu e matou te faia le galuega faafaifeautalai. Ou te lē iloa tele Uso Tegu i lena taimi, vagana ai e faato’ā auai o ia i le Ekalesia i le fa masina talu ai ma e fiafia tele i le Tusi a Mamona. Sa leai ni a ma fonotaga faatulagaina i lena aso, o lea na ma filifili ai ma te tu’itu’i i faitotoa.

Sa matou maua le ala i le fale o se tasi tagata, o se tagata Maori. Sa ia tatala le faitotoa, ma sa ou manatu e pei e foliga . . . ese mai. Ae sa amata ona matou talanoa atu ia te ia, ma o le mea e sili ai sa ia talanoa mai ia i matou.

Sa ia faapea mai ia i matou e lē talitonu o ia i le Atua. “Ou te talitonu i galugaluleo ma alaleo,” o lana tala lea ona ia faaali mai lea ia i matou o ni mea eseese fai musika sa ia vaneina ma nonoa faatasi i se ituaiga o asoa.

Ina ua mavae sina taimi sa ou loto vaivai, ma ou mafaufau, “Sole, e leai ma se aogā.” Ae na faaauau pea ona talanoa Elder Kafalava i le tamaloa i le faitotoa a o tu latalata ane i ai Uso Tegu, o loo ia uuina se kopi o le Tusi a Mamona.

Na faafuasei lava, na ou mauaina se uuna’iga malosi lava e fai le haka mo le tamaloa lenei. “Fai i ai le haka?” sa ou ata ia te a’u lava ia. “E leai ou te lē taitai ona ou faia lena mea!” Ae sa lē mafai ona ou tetee atu i le uuna’iga, o lea na ou fai atu ai i le tamaloa, “Ei. Faamata e afaina pe a ou faia le haka mo oe?”

Ina ua mavae sina faalotolotolua, sa malie le tamaloa. “Ia ua lelei la. Alu i ai, Uso. Ioe!”

“Ae ou te le i faia lenei haka mo oe,” o la’u tala lea, “se i o’u ta’u atua ia te oe le uiga.” Sa ou faamalamalama atu o le matou haka lea o le misiona, e faamanatu maia ia i matou le mafuaaga e ala ai ona matou tala’ia le talalelei. E faamatalaina faifeautalai o ni fitafita o le malamalama, e puipuia e le mana o le Atua a o matou faasoa atu le sāvali paia o le ola e faavavau.

Ina ua uma ona ou taulotoina i lona faaliliuga faaperetania, sa ou alo loa i ai . . . ma o lea na ou i ai, na o a’u lava i luga o lena faapaologa—o se alii pa’epa’e mai le Aai o Sate Leki, Iutā—o loo uumau ma le naunauta’i le vateatea ma toso mai i lalo i lo’u fatafata a o o’u faatinoina le haka o le matou misiona mo se tagata ese Maori.

Ou te mautinoa sa taumate tuaoi po o le ā le mea lea e tupu. Sa fou tele Elder Kafalava e na te lē iloa ai le haka lea, o lea sa ia tuuina mai ai lana lagolagosua faalelagona, ae a o faaauau pea ona tu’i o’u ogavae ma ou pese, sa ou vaai atu ia Uso Tegu ua uu lana Tusi a Mamona i luma—ma ese lava le faaloloa atu o lona lima, faasasao i luma—agai i le tamaloa i le faitotoa.

Sa ou vaai atu i le ma tagata faato’ā liliu mai, ma ou mafaufau, “O le a lau mea lena e fai? Ua e faaleagaina la’u haka.” Ona ou maitauina ai lea o le maofa o le tamaloa o loo i le faitotoa, e lē ona o a’u, ae ona o le Tusi a Mamona.

Ma e moni lava, ina ua uma la’u haka, sa tusi le lima o le tamaloa ma fai mai, “Ia, o le a lenei tusi?” Ma sa amata loa ona tuuina atu le molimau mamana a Uso Tegu. Sa ia talanoa e uiga i le pogisa sauā sa matuā ufitia ai o ia muamua ma sa oo ina ia mafaufau ai e pule i lona lava ola. Sa ia talanoa e uiga i le taimi tāua ina ua talosaga atu se uo i le aoga pe manao e feiloai ma faifeautalai.

Sa faaali le faafetai o Uso Tegu mo ia faifeautalai, ae na fai mai o le Tusi a Mamona—lea sa ia uuina pea i ona luma—lea na taitaia moni lava o ia i le malamalama. Sa ia molimau atu o le Tusi a Mamona sa taliina ana fesili uma taitasi, ma na aumaia ia te ia le filemu . . . “Na laveaiina lo’u ola!”

I lona maofa ai, sa faaloloa atu i luma le lima o le tamaloa o loo i le faitotoa ma fesili, “E mafai ona ou tago i ai?” Ona, faatasi ai ma lona lima i luga o lona faavaa, i se uiga ese lava, na amata ona tatalo le tamaloa i luga o le Tusi a Mamona.

Sa matou tuua le kopi ia te ia, ma a o matou o ese atu i le taavale, sa ou maofa i le uiga ese o lenei aso. Afai e leai lava se isi taunuuga o lenei feiloaiga, o le mea sili lava o le maua ai o se tusitusiga maoa’e i le tusi talaaga!

Ina ua matou toe asia o ia i le vaiaso mulimuli ane, sa valaau mai le tamaloa ia i matou, “Ei, e i ai la’u fesili mo outou uso: E faapefea ona ou papatiso?”

Sa matuā faate’ia a’u. O le mea na tupu, sa faitau atoa e le tamaloa le tusi a Alema, ma sa tele ina talanoa Alema e uiga i le papatisoga. Ma o lea, “Ua ou manao ou te papatiso,” o lana tala lea, “ma ou te manao e te papatisoina a’u.”

Ou te mafaufau ma le ofo tele i lena aafiaga. O i matou sa na o ni meafaigaluega i aao o le Atua, sa mulimuli i uunaiga a le Agaga Paia e ō ma tu’itu’i se faitotoa, e tatala o matou gutu, ma faia le haka mo le tamaloa.

O le tali, sa musuia o ia e faitau le Tusi a Mamona ma sa liliu ai i le talalelei a Iesu Keriso. O le Tusi a Mamona o le faaliua moni lea. O le mea lea e tupu ai le faatuatua.

Sa papatisoina le tamaloa i le faitotoa i le lua masina mulimuli ane. Na maua e ia lata mai nei le Perisitua Arona. O se molimau lea ia te a’u o le liuaina o se vavega.