Гэртээ аюулгүй цуглах нь
Бид хөшигний хоёр талд Израилыг цуглуулах урьд өмнө байгаагүй онцгой боломжтой билээ.
Бидний хайрт бошиглогч, ерөнхийлөгч Рассэлл М.Нэлсон, бид тараагдсан Израилыг цуглуулахад тусалж, Есүс Христийн Хоёр дахь ирэлтэд дэлхийг бэлтгэх онцгой үүрэг хариуцлагатайг онцолсон билээ.1 Бидний сүнсний Эцэг Өөрийн хүүхдүүдийг гэртээ аюулгүй цуглаасай гэж хүсдэг.
Хүүхдүүдээ тэнгэрлэг гэртээ аюулгүй цуглуулах гэсэн Тэнгэрлэг Эцэгийн маань төлөвлөгөө нь дэлхийн амжилт, нийгмийн давхарга, боловсрол, арьсны өнгө, эсвэл хүйс дээр үндэслэгдээгүй. Эцгийн төлөвлөгөө нь зөв шударга байх, зарлигуудыг нь дагах, ариун нандин ёслолуудыг хүлээн авах, гэрээнүүдээ хүндэтгэх зэрэгт үндэслэгддэг.2
Бид бүгд ах эгч дүүс бөгөөд “Бурханд бүгд адил” гэсэн тэнгэрлэг сургаал энэхүү цуглуулах агуу ажлын үндэс суурь болдог юм. Энэ сургаал эдийн засаг, арьс өнгөөр ялгаатай хүмүүсийг сайн сайхан амьдраасай гэж чин сэтгэлээсээ хүсдэг хүмүүсийн үзэлтэй нийцдэг. Бид ийм хичээл зүтгэлийг сайшаан дэмжиж, үүнд нэгддэг. Түүнчлэн бид Бурханы бүх хүүхдийг Түүнд ирж, Түүний сайн мэдээгээр дамжин ирэх мөнхийн адислалуудыг хүлээн аваасай гэж хүсдэг.3 Сургаал ба Гэрээний эхэнд Их Эзэн “Холын хүмүүс та нар анхаарагтун; мөн тэнгис далайн арлууд дээрх та нар хамтдаа дуулагтун”4 хэмээн тунхагласан.
Сургаал ба Гэрээний хамгийн эхний шүлэгт “тэнгис далайн арлууд” дээрх хүмүүсийг дурдсан нь надад таалагддаг. Би тэнгис далайн арлуудад үйлчлэх, амьдрах гурван онцгой дуудлагатай байсан. Эхлээд би Британийн арлуудад залуу номлогчоор, дараа нь Филиппиний арлуудад шинэхэн ерөнхий эрх мэдэлтнээр, үүний дараа олон Полинезийн арлыг багтаасан Номхон далайн арлуудад бүсийн ерөнхийлөгчөөр үйлчилсэн.
Энэ гурван бүс Есүс Христийн сэргээгдсэн сайн мэдээнд итгэгчдийг амжилттай цуглуулсан байв. Номлогчид Британийн арлуудад анх 1837 онд иржээ. Энэ нь Мосе “умардын нутгаас арван овгийг удирдан мөн дэлхийн дөрвөн зүгээс Израилыг цуглуулах түлхүүрүүдийг”5 сэргээсэн тэрхүү Көртландын ариун сүмийг Иосеф Смит онцгойлон адисалснаас нэг жилийн дараа болсон. Британийн арлууд дахь эхэн үеийн амжилтууд ер бусын юм. 1851 он гэхэд Сүмийн гишүүдийн талаас илүү нь Британийн арлуудад дахь баптисм хүртэж хөрвөгдсөн хүмүүс байлаа.6
1961 онд ахлагч Гордон Б.Хинкли Филиппиний арлуудад зочилж, бүрэн цагийн номлогчийн ажлыг эхлүүлжээ. Тухайн үед ердөө ганцхан филиппин Мелкизедек санваартан байв. Гайхалтай нь, өнөөдөр Филиппиний арлуудад 850 мянган Сүмийн гишүүн байгаа билээ. Би филиппинчүүдийг хүндэлдэг. Тэд Аврагчийг чин сэтгэлээсээ, гуйвшгүй хайрладаг.
Полинезийн арлууд дээрх номлогчийн ажил олон нийтэд тийм ч их танигдаагүй байх. 1844 онд Аддисон Праттыг одоогийн Францын Полинези руу илгээснээр үүний эхлэл тавигдсан юм.7 Олон полинези хүн аль хэдийн мөнхийн гэр бүлд итгэж, Есүс Христийг өөрсдийн Аврагчаар хүлээн зөвшөөрсөн байв. Өнөөдөр Полинезийн арлууд дээрх полинези хүмүүсийн бараг 25 хувь нь Сүмийн гишүүн юм.8
Би өмнө нь Тахитигийн алслагдсан арал дээрх 17 настай, 7 дахь үеийн гишүүн охины яриаг сонссон. Тэр охин Сүмийн эхэн үеийн гишүүдийг Солт Лэйкийн хөндийд ирэхээс хоёр жилийн өмнө9 буюу 1845 онд Тубуайд хөрвөгдсөн өвөг дээдэстээ талархан, хүндлэл үзүүлж байв.
Сайн мэдээний захиасыг хүлээн авч, хариулах тогтсон хугацаа, цаг үе бүх хүнд байдаг гэдгийг манай сургаал тодорхой заадаг. Эдгээр жишээ нь илүү агуу үйлийн нэгээхэн хэсэг юм. Ерөнхийлөгч Нэлсон “Израилын цугларалт бол өнөө цагт энэ дэлхий дээрх хамгийн агуу сорилт бэрхшээл, … учир шалтгаан, … үйл хэрэг”10 гэж байнга онцолдог.
Есүс Христийн Сүм сэргээгдэхээс өмнө, тэр дундаа Мормоны Ном гарч ирж, бошиглогч Иосеф Смитэд илчлэлт, санваарын түлхүүрүүд өгөгдөх хүртэл “Израилын цугларалтын” талаарх ойлголт дутуу дулимаг, хязгаарлагдмал байв.11
“Израил” гэх өвөрмөц нэрийг Иаковт өгчээ.12 Энэ нь Исаак, Иаковаар дамжсан Абрахамын үр удмыг төлөөлдөг болсон юм. Эцэг Абрахамд өгсөн анхны амлалт болон гэрээ Абрахам 2:9–10 дээр байдаг бөгөөд үүнд:
“Мөн би чамаас агуу үндэстнийг бий болгох болно …
Мөн чиний нэрээр дамжуулан би [бүх үндэстнийг] адислах болно; учир нь энэ Сайн мэдээг хүлээн авах болгон нь чиний нэрээр дуудагддаг байх болно, мөн чиний үр удам хэмээн тооцогддог байх болно, мөн босож зогсоод, тэдний эцгийн хувьд, чамайг магтан дуулах болно” гэсэн байдаг.
Мөнх бус байдлын өмнөх оршихуйд Тэнгэр дэх зөвлөгөөний үеэр авралын төлөвлөгөөний талаар ярилцаж, үүнийг дэмжжээ. Энэ нь дэлхийн үүслээс өмнө тогтоосон тодорхой хуулиуд болон санваарын ёслолуудыг багтаадаг бөгөөд цугларалтад суурилагдсан байдаг.13 Үүнд мөн сонгох эрхийн тухай нэн чухал зарчим агуулагддаг.
Саул, Давид, Соломон зэрэг хүчирхэг хүмүүсийн хаанчлал хэдэн зуун жил үргэлжилсний дараа Израил хуваагдсан. Иудагийн овог болон Бенжамины овгийн нэг хэсэг нь Иудагийн хаант улс болжээ. Үлдсэн арван овог нь Израилын хаант улс болсон.14 200 жилийн турш ийнхүү тусдаа байсны дараа, МЭӨ 721 онд буюу Ассирийн хаан Израилын арван овгийг олзлон авч явахад Израилын анхны тараалт тохиосон байна.15 Хожим нь тэд хойд улс орнууд руу явсан.16
МЭӨ 600 онд буюу Мормоны Номын эхэнд эцэг Лихай хэсэг бүлэг израилчуудыг Америк тив рүү дагуулан явжээ. Нэг хэсэг нь байсны хувьд Лихай Израилын тараалтыг ойлгож байлаа. Түүний үгийг Нифай дурдахдаа, Израилын угсаа “мөчрүүд нь хугаран бүх дэлхийн гадаргуугаар тараагдах тэр, чидуны модтой адилтгам байх буюу”17 гэсэн байдаг.
Мормоны Номд гардаг Шинэ дэлхий гэх нутаг дахь нифайчууд болон леменчүүдийн түүх ойролцоогоор МЭ 400 онд төгсдөг. Эцэг Лихайн үр удам Америк тив даяар тархсан.18
Энэ талаар Мормон 3 Нифай 5:20 дээр “Би бол Мормон, мөн Лихайн шууд удам билээ. Тэрбээр эцэг өвгөдийг маань Иерусалимын нутгаас гарган [авчирсан тул] Бурханаа мөн өөрийн Аврагч Есүс Христийг алдаршуулах шалтгаан надад буй”19 хэмээн тодорхой гэгч дүрсэлжээ.
Израилын он тооллын түүхэн дэх хамгийн чухал үйл явдлууд бол бидний Их Эзэн, Аврагч Есүс Христийн төрөлт, захиас, тохинуулал болон номлол юм.20
Аврагчийн мөнхийн нөлөө бүхий үхэл болон Амилалтын дараа МЭ 70-аас 135 оны хооронд, Ромын дарлал, хавчлагын улмаас еврейчүүд дэлхий даяар тархсан нь олны мэдэх Иудагийн хоёр дахь тараалт билээ.
Ерөнхийлөгч Нэлсон “Мормоны Номын ирэлт нь Их Эзэн гэрээний хүүхдүүдээ цуглуулж эхэлсний тэмдэг юм”21 гэж заасан. Тиймээс Бурханы бэлэг, хүчээр бошиглогч Иосеф Смитийн орчуулсан Мормоны Номыг Лихайн үр удамд төдийгүй тараагдсан Израилд мөн Израилын овогт өргүүлсэн харийнханд зориулсан байдаг. 1 Нифай 22-ын гарчиг хэсэгт “Израил газар дэлхийн гадаргуугаар нэг энгүй тараагдах болно—Харийнхан эцсийн өдрүүдэд сайн мэдээгээр Израилыг асран тэжээх болно” гэсэн байдаг. Мормоны Номын эхний хуудаснаас уг номын нэг зорилго нь “Есүс бол Христ хэмээн Иудей болон харийнханд итгүүлэх” гэдгийг уншиж болно. Сэргээлт болон Мормоны Номын ачаар “Израилын цугларалтын” тухай ойлголт илүү өргөн цар хүрээтэй болсон.22
Есүс Христийн сайн мэдээг хүлээн зөвшөөрсөн хүмүүс удам угсаанаасаа хамаарахгүйгээр, цугларсан Израилын нэг хэсэг болно.23 Тэрхүү цугларалт ба олон ариун сүмийг барьж мөн барихаар зарласан байгаа нь бидэнд Эцэгийн төлөвлөгөөний дагуу, хөшигний хоёр талд Израилыг цуглуулах урьд өмнө байгаагүй онцгой боломжийг олгож байна.
Ерөнхийлөгч Спэнсэр В.Кимбалл: “Израилын цугларалт нь үнэн сүмд нэгдэх, тэдний үнэн Бурханы тухай мэдлэгт ирэх гэсэн хоёр зүйлээс бүрддэг. … Тиймээс сэргээгдсэн сайн мэдээг хүлээн авч, Их Эзэнийг амьдардаг газрынхаа улс үндэстнүүдийн гэгээнтнүүдтэй хамт өөрсдийн хэл дээр шүтэн бишрэхийг эрэлхийлж байгаа аливаа хүн Израилын цугларалтын хуулиудыг дагадаг төдийгүй хожмын өдрүүдэд гэгээнтнүүдэд амласан бүх адислалыг өвлөж авдаг юм.”24
“Израилын цугларалт одоо хөрвөлттэй холбоотой.”25
Есүс Христийн Хожмын Үеийн Гэгээнтнүүдийн Сүмийн гишүүдэд Их Эзэний гэрээний адислалуудын бүрэн байдлыг хүлээн авахын тулд хайрлах, хуваалцах, урих, Израилыг цуглуулах агуу боломж байгаа нь тодорхой харагдаж байна. Энэ нь Африк, Европ, Өмнөд ба Хойд Америк, Ази, Австрали болон тэнгис далайн арлуудын хүмүүст хамаатай. “Учир нь үнэхээр Их Эзэний дуу хоолой бүх хүмүүнд хандсан болой.”26 “Энэхүү цугларалт дэлхийн улс үндэстнүүд дэх гэгээнтнүүдийн цуглаанд зөв шударга хүмүүс цуглах хүртэл үргэлжлэх болно.”27
Цугларалтын талаар ерөнхийлөгч Рассэлл М.Нэлсоноос илүү шулуухан ярьдаг хүн байхгүй. Тэрээр “Ямар ч үед, хөшигний аль ч талд байх хэн нэгэнд туслах ямар нэгэн ажлыг хийхэд буюу Бурхантай нэн чухал гэрээнүүдийг байгуулж, баптисмын болон ариун сүмийн нэн чухал ёслолуудыг хүлээн авахаар нэг алхам урагшлахдаа та нар Израилыг цуглуулахад тусалж байгаа хэрэг юм. Энэ бол ийм л энгийн зүйл”28 гэжээ.
Одоо Сүм ямар болсон бэ? Намайг 1960 онд номлолд үйлчилж эхэлснээс хойших 62 жилийн хугацаанд, бошиглогчийн дуудлагын дагуу үйлчилж буй бүрэн цагийн номлогчийн тоо 7683-аас 62544 болж нэмэгджээ. Номлолын тоо 58-аас 411 болж өссөн байна. Гишүүдийн тоо ойролцоогоор 1.7 сая байсан бол одоо 17 сая болсон.
Ковид-19 цар тахал бидний сайн мэдээг хуваалцах зарим боломжид хэсэг хугацаанд нөлөөлсөн. Энэ нь мөн цугларалтыг ихээхэн хурдасгах шинэ технологийг ашиглах туршлагыг өгсөн юм. Тараагдсан Израилыг цуглуулахын тулд гишүүд, номлогчид одоо илүү их хүчин чармайлт гаргаж байгаад бид талархаж байна. Өсөлт хөгжил хаа сайгүй, ялангуяа Өмнөд Америк болон Африк тивд үргэлжлэн явагдсаар байна. Түүнчлэн бид дэлхий даяарх олон хүн номлолын үйлчлэлийг нэмэгдүүлэх тухай ерөнхийлөгч Нэлсоны хүчирхэг урилгыг хүлээн авсанд талархаж байна. Гэсэн хэдий ч Сүмийн гишүүд бидний хайрлах, хуваалцах, урих амлалт улам илүү сайжрах боломжтой.
Энэхүү номлогчийн ажлын нэг чухал хэсэг бол гишүүд чиглүүлэгч гэрлийн жишээ29 болж амьдрах явдал юм.30 Бид нуугдаж болохгүй. Бидний Христийнхтэй адил сайхан сэтгэл, зөв шударга байдал, аз жаргал, бүх хүнийг чин сэтгэлээсээ хайрлах үлгэр жишээ бусдыг чиглүүлэх гэрлийг төдийгүй Есүс Христийн сэргээгдсэн сайн мэдээний аврал, өргөмжлөлийн ёслолуудад аюулгүй боомт байдаг гэдгийг тэдэнд ойлгуулна.
Есүс Христийн сайн мэдээг хуваалцсанаар гайхалтай адислалууд ирдгийг ойлгоорой. Судруудад баяр хөөр, нүглүүдийн өршөөл, уруу таталтаас хамгаалах хамгаалалт, Бурханы дэмжигч хүчний талаар гардаг.31 Энэ мөнх бус амьдралын цаадхыг эргэцүүлснээр бид “харанхуйд байгаа болон нас барагсдын сүнснүүдийн агуу дэлхийд нүглийн боолчлол дор буй”32 хүмүүстэй сайн мэдээг хуваалцахад бэлтгэгдсэн байх болно.
Израилыг цуглуулахад туслах тухай Их Эзэний болон бидний хайрт бошиглогчийн өгсөн гайхалтай зөвлөмжийг бид хувиараа болон хамтдаа хэрхэн хүлээн авахаа бүх хүүхэд, залуу эрэгтэй, залуу эмэгтэй, гэр бүл, чуулга, Халамжийн нийгэмлэг, ангийг нягталж үзээсэй хэмээн би өнөөдөр онцгойлон залбирч байна.
Бид сонгох эрхийг хүндэтгэдэг. Бурхангүйн үзэл зонхилсон энэ нийгэмд олон хүн Израилын цугларалтад хариу үзүүлэхгүй, оролцохгүй байх болно. Гэхдээ олон хүн оролцоно. Их Эзэн Өөрийнх нь сайн мэдээг хүлээн авсан хүмүүсийг бусдад Бурхан руу ирэхэд нь туслах чиглүүлэгч гэрлийн жишээ болохоор яаравчлан зүтгэнэ гэж найддаг. Үүний ачаар дэлхий даяарх ах, эгч, дүүс маань Есүс Христийн сэргээгдсэн сайн мэдээний тэнгэрлэг адислал, ёслолуудыг хүртэж, гэртээ аюулгүй цуглуулагдана.
Би Есүс Христийн болон Тэнгэр дэх Эцэгийн бидэнд зориулсан төлөвлөгөөний бурханлаг байдлыг төлөөлөгчийн хувьд баттай бөгөөд тодорхой гэрчилж байна. Есүс Христийн нэрээр, амен.