“Ko e Fakaafe ʻa e Fakamoʻuí ke Vahevahe ʻEne Māmá,” Liahona, Siulai 2023.
ʻOku Talitali Lelei Kimoutolu ki he Makasini ko ʻEní
Ko e Fakaafe ʻa e Fakamoʻuí ke Vahevahe ʻEne Māmá
ʻI he Hala ki ʻEmeasí, tā fakatātā ʻa Wendy B. Keller, ʻi he angalelei ʻa e Havenlight
Kimuʻa pea hāʻele hake ʻa e Kalaisi kuo toetuʻú ki he langí, naʻá Ne fakaafeʻi ʻEne kau ʻAposetolo ʻi he Fuakava Foʻoú ke nau hoko ko ha fakamoʻoni kiate Ia “ki he ngataʻanga ʻo māmaní” (Ngāue 1:8). ʻI hono ueʻi e kau ʻAposetoló ʻe he fatongia ko ʻení, “naʻe ʻikai tuku ʻenau ako mo ʻenau malanga ʻaki ʻa Sīsū Kalaisí” (Ngāue 5:42).
ʻOku fakamatala ʻa ʻEletā Kuenitini L. Kuki, ko ha ʻAposetolo ʻi onopooni ʻi heʻene tohi he makasini ko ʻení, ki he founga te tau lava ai ʻo vahevahe ʻa e ongoongolelei ʻa e Fakamoʻuí neongo ʻetau taʻefeʻungá. ʻOkú ne tohi ʻo pehē, “ʻI heʻetau moʻui ʻaki ʻa e ongoongoleleí, ʻofa mo tokoni ki he niʻihi kehé, tuʻu ʻaliʻaliaki ʻi he fehangahangai mo e ʻahiʻahí mo e fakatangá, pea fakamoʻoni ʻi he leá mo e ngāué, te tau tohoakiʻi mai ai ʻa e niʻihi kehé kia Sīsū Kalaisi” (peesi 4).
ʻI heʻetau ʻunuʻunu ofi ki he Fakamoʻuí, ʻoku tau malanga ai ʻo fakafou ʻi he fakamoʻoní mo e faʻifaʻitakiʻangá. Te Ne ʻi hotau lotolotongá, hangē ko ʻeku fakamatala ʻi he makasini ko ʻení, ʻo kapau te tau tauhi ʻetau ngaahi fuakavá mo fekumi ki Heʻene faleʻí ʻi he ngaahi lea ʻa e kau palōfitá (vakai, peesi 40).
ʻI heʻetau ako e ngaahi ngāue fakafaifekau ʻa e Kau ʻAposetoló ʻi he Haʻu, ʻo Muimui ʻIate Au he māhina ní, tau fakakaukau muʻa ki hotau fatongia mo e uiuiʻi ke vahevahe e maama ʻa e Fakamoʻuí mo kinautolu ʻoku tau feohí. Naʻe hāʻele hake ʻa Kalaisi ki he langí ʻi he kuonga muʻá, ka ʻi heʻetau tautapa kiate Ia ke “tau nonofo” (Luke 24:29) ʻi he ʻaho ní, te Ne ʻaʻeva mo kitautolu ʻi he foʻi laka kotoa pē.
ʻEletā Patricio M. Giuffra
ʻO e Kau Fitungofulú