Ko Hono Moʻui ʻAki mo Vahevahe ʻo e Ongoongoleleí

ʻĪmisi

kau finemui ʻoku nau sio fakataha ki he folofolá

Siʻi Ngaahi Mātuʻa,

Ko e founga ʻe ua ʻoku tau fakahaaʻi ai ki he ʻOtuá ʻa ʻetau houngaʻia ʻi he ongoongoleleí, ko ʻetau moʻui ʻaki mo vahevahe. ʻOku nofotaha ʻa e ngaahi fakamatala ʻi he makasini ʻo e māhina ní ki hono ʻai ke hoko ʻa e ongoongolelei ʻo Sīsū Kalaisí ko ha konga lahi ange ʻo ʻetau moʻuí, ʻo tatau ai pē ʻi hono fakamālohia ʻetau tui kiate Iá, fakahoko ha ngaahi liliu mahuʻinga, pe fakamafola ʻEne ngaahi moʻoní ʻi he funga ʻo e māmaní. ʻOku fakatatali mai ʻa e fiefiá kiate kinautolu ʻoku nau ako mo muimui ki he ngaahi akonaki ʻa e Fakamoʻuí pea vahevahe ʻEne ngaahi pōpoakí ʻi he leá mo e ngāué.

Ngaahi Fealēleaʻaki ʻi he Ongoongoleleí

Ko hono Vahevahe ʻo e Ongoongoleleí ʻi he Fakamoʻoní

Fakaafeʻi e mēmipa takitaha ʻo e fāmilí ke nau vahevahe ha fakamoʻoni nounou ki ha tefitoʻi moʻoni ʻo e ongoongoleleí ʻoku nau saiʻia taha ai. Vahevahe ha ngaahi lea fekauʻaki mo e ngāue fakafaifekaú mei he fakamatala ʻa ʻEletā Kuenitini L. Kuki ʻi he peesi 4. ʻI hoʻo fakakaukau ki he ngaahi tefitoʻi moʻoni ʻo e ongoongoleleí naʻá ke toki vahevahé, fehuʻi ange: ʻOku ʻi ai nai ha kakai te tau lava ʻo vahevahe ki ai e ngaahi tefitoʻi moʻoni ko ʻení?

Ongoʻi Ofi Ange kia Sīsū Kalaisi

Fehuʻi ki hoʻo fānaú ʻa e taimi ʻoku nau ongoʻi ofi taha ai kia Sīsū Kalaisí. Hiki ha lisi mo ʻenau ngaahi talí. Fakamatalaʻi ange e ngaahi ʻekitivitī ʻe nima ʻa ʻEletā Patelesio M. Kiufala ki hono langaki ʻo e tuí (vakai, peesi 42–43). Fakakaukauʻi mo e fāmilí ke fai ha taha ʻo e ngaahi ʻekitivitī ko ʻeni ʻoku mou loto-taha ʻe fakahoko ai ha meʻa makehe ʻi homou ʻapí. Fokotuʻu fakataha ha palani ke nofotaha ʻi he ʻekitivitī ko iá he māhiná ni.

ʻE Lava ke Iku ʻa e Liliú ki he Tupulaki Fakalaumālié

Ko e liliú, ʻoku fakatou ʻamanaki ki ai mo taʻeʻamanekiná, ko ha konga ia ʻo ʻetau aʻusia ʻi he moʻui fakamatelié. Lau ʻa e fakamatala naʻe fai ʻe ʻEletā Sailo Simaila ʻi he peesi 30 fekauʻaki mo e ngaahi liliu kehekehe ʻi heʻetau moʻuí. ʻE tokoni fēfē ʻa e ngaahi liliu ko ʻení ke tau hoko ʻo hangē ange ko e Fakamoʻuí?

Fiefia Fakafāmili ʻi he Haʻu, ʻo Muimui ʻIate Aú

‘Oku ‘Ofa ‘a e ‘Otuá ‘i Heʻene Fānaú Kotoa

Ngāue 10

“ʻOku ʻikai filifilimānako ʻa e ʻOtuá ki he kakaí: ka ʻokú ne maʻu maʻana ʻa ia ʻoku manavahē kiate iá, mo faitotonu, ʻi he puleʻanga kotoa pē” (Ngāue 10:34–35).

ʻOku haʻu e Kau Taki Māʻolungá mei ha ngaahi fonua kehekehe. Ko e meimei vaeua nai mei he ʻIunaiteti Siteití. Ko e niʻihi ʻoku omi mei ʻAmelika Lotoloto mo Saute ʻAmelika, ʻĒsia, ʻIulope, ʻAfilika, ʻOusenia, Mekisikou, mo Kānata.

Te ke lava nai ʻo talamai ha ʻAposetolo naʻe fāʻeleʻi ʻi ʻIulope?
Te ke lava nai ʻo talamai ha ʻAposetolo mei ʻAmelika Tonga?
Te ke lava nai ʻo talamai ha ʻAposetolo ko ʻene ongomātuʻá mei Suēteni mo Finilani?
Te ke lava nai ʻo talamai ha ʻAposetolo naʻe fuofua haʻu hono fāmilí mei Siaina?

Mahalo te tau omi mei ha ngaahi feituʻu kehekehe, ka ʻoku ʻofa ʻa e ʻOtuá ʻiate kitautolu kotoa.

Fealēleaʻakí: Ko e hā ha ngaahi founga ʻe lava ke tau tatau pe kehe ai mei he kakai kehé? ʻOku ʻofa nai ʻa e ʻOtuá ʻiate kitautolu makatuʻunga ʻi hotau fōtungá pe feituʻu ʻoku tau haʻu mei aí? Toe fakamanatu ʻa e talanoa ʻo Pita mo Koniliusí ʻoku maʻu ʻi he Ngāue 10. Ko e hā naʻá na ako fekauʻaki mo hono fakamāuʻi e niʻihi kehé? Ko e hā e ngaahi ʻulungaanga ʻoku mahuʻinga ki he ʻEikí?