“Ko e Hokohoko atu Hoku Misioná,” Liahona, Siulai 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Hokohoko atu Hoku Misioná
Naʻe ʻaonga e tohi fakaʻosi ʻa ʻeku tamaí ki hoku kahaʻú, ʻo ne ʻomi ha ngaahi lea naʻe mahuʻinga fau kiate au.
Naʻá ku fiefia ʻi heʻeku ngāue fakafaifekau taimi kakato ʻi he ʻotu moʻunga fakaʻofoʻofa ʻo Kasāmaka ʻi Peluú, ʻi he taimi naʻe pā kālava ai ʻeku tangataʻeikí. Hili ha taimi nounou mei ai, naʻá ne mālōlō.
ʻI heʻeku talanoa mo ʻeku palesiteni fakamisioná, naʻá ku tangi ʻi heʻeku manatuʻi naʻe akoʻi au ʻe heʻeku tangataʻeikí ki he ʻuhinga ʻo e hoko ko ha faifekau pea mo ha tangata angatonu. Naʻá ne faitohi mai he uike takitaha, ʻo vahevahe ʻene fakamoʻoní, akoʻi mai ha ngaahi fakakaukau mālohi ʻi he ongoongoleleí, mo poupouʻi au ke fai hoku lelei tahá.
Hili ʻema talanoá, naʻe mono mai ʻe he palesiteni fakamisioná ha tohi—ko e tohi fakamuimui ia mei heʻeku tangataʻeikí. Naʻe ʻaonga ʻene tohí ki hoku kahaʻú, ʻo ne ʻomi ha ngaahi lea naʻe mahuʻinga fau kiate au:
“ʻOku toe ʻi ai haʻo [misiona] ʻe taha ʻe hoko mai ʻi ha ngaahi māhina siʻi—ko ha misiona faingataʻa fau, ʻa ia ʻe fakafalala atu ai ke ke fakatapui hoʻo moʻuí ki he ngaahi tefitoʻi moʻoni kuó ke akoʻí, ke fai ʻa e ngaahi meʻa ko ia kuó ke malangaʻí, ʻo aʻu mai ki he taimi ni. ʻE lava ke hoko ia ko e misiona lavameʻa tahá. ʻOkú ke hangē ko e meʻa fakatupu ʻi he foʻi maá. …
“ʻOkú ma ʻofa atu mo lotua fakaʻaho koe. Ngāue mālohi pea fai ʻa e ngaahi meʻa ʻoku totonú.”
ʻI heʻeku lau ʻene ngaahi leá, naʻá ku tangi—ʻi he mamahi ʻi hono ʻiloʻi ko ʻene ngaahi lea fakaʻosi ia kiate au ʻi he moʻui ní, pea mo e fiefia ʻi hono ʻiloʻi honau mālohí mo e taumuʻa maʻakú. Naʻá ku ʻilo ko hoku misiona hokó—ʻa e toenga ʻo ʻeku moʻuí—ʻe matuʻaki mahuʻinga ia. ʻE hoko ia ko ha taimi ʻo e siviʻi moʻoni, pea ʻe fie maʻu ki ai ʻa e meʻa kotoa pē kuó u ako mo aʻusia ʻi heʻeku hoko ko ha faifekau.
ʻOku ou ʻiloʻi ʻoku ʻi ai ha palani ʻa e Tamai Hēvaní mo ha taumuʻa mahuʻinga maʻatautolu hono kotoa. Te Ne lava ʻo langaki hake hotau ngaahi momeniti ʻi he māmaní mo ʻomi ha mata ke tau mamata mo ʻiloʻi ʻEne moʻoní. Kuó u mātā ʻeni ʻi heʻeku tukupā ʻeku moʻuí kiate Ia mo aʻusia ʻEne ngaahi tāpuakí. Pea kuó u mātā ʻeni ʻi heʻeku ngāue fakataha mo hoku uaifi fakaʻofoʻofá ke langa ha fāmili ʻoku fonu ʻi he ʻamanaki leleí, fānaú, mo e ongoongoleleí.
Kuo ʻomi ʻe he Fakamoʻuí ha mālohi kiate kimaua ʻi heʻema tafoki ʻo tūʻulutui, ki he folofolá, temipalé, mo e ngāue tokoni ki he niʻihi kehé. Kuó u mātā e tokoni ʻa e toʻukupu ʻo e ʻEikí lolotonga ha ngaahi momeniti fakaofo ʻi heʻeku moʻuí ʻi heʻeku vahevahe ʻa e ongoongoleleí mo e fāmilí mo e ngaahi kaungāmeʻá.
Ko Hono misioná “ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). ʻOku kei hokohoko moʻoni atu pē ʻa e misiona ko iá.