“ʻOkú Ke Tui Nai ki he ʻOtuá?,” Liahona, Siulai 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOkú Ke Tui Nai ki he ʻOtuá?
ʻI hono vahevahe mai ʻe hoku kaungāmeʻá ʻa e ngaahi meʻa naʻe hohaʻa ki aí, naʻe fakafokifā pē haʻaku maʻu ha mahino lahi ange.
Tā fakatātaaʻi ʻe Katy Dockrill
ʻI heʻeku tupu haké, naʻe ʻikai ke u fuʻu veiveiua ki he moʻoni ʻo e ongoongoleleí. Ka ʻi he aʻu ki hoku taʻu hongofulu tupú, ne u fehuʻia pe naʻe ʻi ai koā haʻaku fakamoʻoni pe naʻá ku tali pē ʻa e meʻa naʻe tui ki ai ʻeku ongomātuʻá mo e ngaahi kaungāmeʻá. Naʻá ku lotua ke u ʻiloʻi ʻoku moʻoni ʻa e ongoongoleleí.
Neongo ʻeku faingataʻaʻiá, ka naʻe talamai ʻe ha finemui ne u fetaulaki mo ia ʻi heʻeku ʻunivēsiti fakakoló naʻá ne ongoʻi naʻe mahino kiate au ʻeku taumuʻá mo e fakahinohino ʻi he moʻuí.
Naʻá ne fehuʻi mai, “ʻOkú ke tui nai ki he ʻOtuá?”
Naʻá ku talaange ʻio pea ʻoku akoʻi ʻe hoku siasí hotau vā fetuʻutaki mo e ʻOtuá pea mo e taumuʻa ʻo e moʻuí. Naʻá ku fakamatala ange foki fekauʻaki mo e Palōfita ko Siosefa Sāmitá mo hono Fakafoki Mai ʻo e ongoongoleleí. Naʻá ne fakafanongo lelei.
ʻI he lotú he Sāpate hono hokó, naʻá ku toʻo ai ha kiʻi tohi tufa fekauʻaki mo Siosefa Sāmita mo e palani ʻo e fakamoʻuí maʻa hoku kaungāmeʻá. Hili ʻene lau iá pea kamata lau e Tohi ʻa Molomoná, ne u ʻave ia ki he lotú.
Naʻá ne talamai kimui ange naʻá ne vāofi ʻaupito mo hono tuongaʻane lahí. Naʻá ne hoko ko ha pailate fakaʻaliʻali naʻá ne fakaʻaliʻali ʻi he ngaahi polokalama fakalotofonuá. Ko e fakamamahí, he ko e faʻahitaʻu māfana kimuʻa peá ma fetaulakí, naʻe fakapoongi ia lolotonga ʻene puna ʻi ha fakaʻaliʻali. Naʻá ne loto mamahi ʻi heʻene pekiá pea naʻá ne hohaʻa kau kiate ia koeʻuhí he naʻá ne pehē ʻokú ne taʻetui. Naʻá ne lotua ke ʻiloʻi e meʻa ʻoku hoko ki aí mo hono tuʻunga ʻi he ʻao ʻo e ʻOtuá.
ʻI heʻene vahevahe mai e ngaahi meʻa naʻe hohaʻa ki aí, naʻe fakafokifā pē haʻaku maʻu ha mahino lahi ange. Ko ha ongo ia ʻo e moʻoni mo e maama haohaoa. Naʻe mahino kiate au naʻe ʻikai tupukoso pē ʻema fetaulakí. Ka, kuo fanongoa mo tali ʻe he ʻOtuá ʻa e lotu fakamātoato ʻa e finemui loto mafesifesi ko ʻení.
Naʻá ku ongoʻi loto fakatōkilalo ʻi heʻeku ʻiloʻi naʻe ʻafioʻi au ʻe he Tamai Hēvaní pea te Ne lau ʻoku ou taau ke hoko ko ha meʻangāue ʻi Hono toʻukupú ʻi hono tali ʻene lotú. Naʻe mahino kiate au ʻa Hono poto kāfakafá ʻi hono fakaʻaongaʻi e aʻusia ko ʻení ke tali foki ʻeku lotú ke ʻiloʻi ʻoku moʻoni ʻa e ongoongoleleí.
Hili ʻeku teuteú, naʻá ku faʻo ʻeku kató ki he taʻu lelei taha ʻe ua ʻo ʻeku moʻuí. Lolotonga iá, naʻe toʻo ʻe hoku kaungāmeʻá ʻa e ngaahi lēsoni fakafaifekaú mo hono tokouá. Naʻá na fakatou kau ki he Siasí peá na ngāue fakafaifekau kimui ange. Hili ʻeku ngāue fakafaifekaú, naʻe kole mai hoku kaungāmeʻá ke u fakahoko e ngaahi ouau fakatemipalé maʻa hono tuongaʻané.
ʻOku ou ʻiloʻi ʻoku fanongo mo tali mai ʻe he ʻOtuá ʻa e ngaahi lotu fakamātoató, neongo ʻoku hoko ia he taimi ʻe niʻihi ʻi ha founga pe taimi ʻoku ʻikai ke tau ʻamanaki ki ai.