“ʻOua Naʻa Tau Manavahē,” Liahona, Siulai 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOua Naʻa Tau Manavahē
ʻOku ou ʻilo te tau fiefia ʻi heʻetau vahevahe ʻa e ongoongoleleí mo e kakai tokolahi taha te tau lavá.
Laʻitā ne maʻu ʻi he angalelei ʻa e tokotaha naʻá ne faʻú
Ko e tokolahi hoku ngaahi kaungāmeʻa mo e kaungāako ʻoku ʻikai ke nau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní te nau faʻa fehuʻi mai fekauʻaki mo e Siasí. Hili ha kiʻi taimi, ne u helaʻia hono toutou tali e ngaahi fehuʻi tatau, ko ia ne u maʻu ai ha founga ke fakaleleiʻi ʻaki.
ʻOku ou saiʻia ke faʻu ha ngaahi vitiō he ʻinitanetí ke fakafiefiaʻi e kakaí. ʻOku ou faʻu ha ngaahi vitiō hiva, ngaahi vitiō fakamatala, mo e ngaahi vitiō fakaoli. ʻI heʻeku fakakaukau ʻi ha ʻaho ʻe taha ki he meʻa te u faʻu ʻaki ʻeku foʻi vitiō hokó, naʻá ku fakakaukau ke faʻu ha foʻi vitiō naʻe tali ai e ngaahi fehuʻi fekauʻaki mo e Siasí.
Naʻá ku toʻo mai ʻeku meʻafaitā. Peá u hiki ʻa e foʻi vitioó, ʻo ʻikai toe tohi e meʻa te u lea ʻakí ka ne u manatuʻi ʻa e ngaahi potufolofola mahuʻinga naʻá ku fie lave ki aí. Naʻe ʻikai ke u ʻilo pe ko e hā e meʻa ʻe hokó. Naʻá ku ongoʻi pē naʻe ueʻi au ke faʻu ʻa e foʻi vitioó. “Pea naʻe tataki au ʻe he Laumālié, ʻo ʻikai te u tomuʻa ʻilo ʻa e meʻa te u faí” (1 Nīfai 4:6).
Naʻá ku upload ia, ʻo ʻikai hohaʻa pe ʻe fēfē ʻa e fakafeangai hoku ngaahi kaungāmeʻá, kaungāakó, mo e kāingá—naʻe mēmipa ʻi he Siasí pe ʻikai.
Hili ha ngaahi uike siʻi mei hono upload e vitioó, ne u kamata maʻu ha fakamatala tokoni ʻi heʻeku ngaahi ʻakauni mītia fakasōsialé. Naʻe kamata tohi mo fakamālō mai e kakai ne ʻikai ke u ʻilo ʻi heʻeku foʻi vitioó. Koeʻuhí ko ʻeku vitioó, naʻe kamata ha tokotaha ke talanoa mo e kau faifekaú. Naʻe fakakaukau kimui ange ʻa e tokotaha ko iá ke papitaiso.
Talu mei heʻeku faʻu ʻa e foʻi vitioó, ko e kakai ʻoku ou ʻiloʻi ne ʻikai kau ki he Siasí ne hangē naʻa nau saiʻia ʻiate aú—mahalo ʻo lahi ange. Ko e tokolahi ʻo kinautolu kuo ʻikai ke nau toe fakaangaʻi ʻa e Siasí. Kuo ʻikai toe fai ʻe ha niʻihi ʻa e ngaahi fehuʻi tatau fekauʻaki mo e Siasí koeʻuhí kuo nau maʻu ʻeni ha ngaahi tali.
ʻOua naʻa tau manavasiʻi ke fai e meʻa kuo fekau mai ʻe he ʻEikí kiate kitautolú. Naʻá Ne folofola, “Mou ʻalu ki māmani kotoa pē, ʻo malanga ʻaki ʻa e ongoongoleleí ki he kakai fulipē” (Maʻake 16:15).
ʻOku ou palōmesi atu he ʻikai ke tau fakaʻiseʻisa ʻi heʻetau talangofua kiate Iá.