“Ko Hono Vahevahe e Ongoongolelei ʻo Sīsū Kalaisí,” Liahona, Siulai 2023.
Ngaahi Tefitoʻi Meʻa Mahuʻinga ʻo e Ongoongoleleí
Ko Hono Vahevahe e Ongoongolelei ʻo Sīsū Kalaisí
ʻI heʻetau fakakaukau ki he ngaahi tāpuaki ʻoku tau maʻu koeʻuhí ko e kau mēmipa kitautolu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau fie vahevahe ʻa e ongoongoleleí mo kinautolu ʻoku tau ʻofa aí. Te tau lava ʻo vahevahe ʻetau fakamoʻoni ki he moʻoní ʻo fakafou ʻi heʻetau leá mo e sīpingá. Te tau lava ʻo lotua ha ueʻi fakalaumālie ke ʻiloʻi e tokotaha ke vahevahe ki aí mo e meʻa ke lea ʻakí.
ʻOfa he Niʻihi Kehé
Ko ha konga mahuʻinga ʻo hono vahevahe ʻo e ongoongoleleí ko e ʻofa ki he niʻihi kehé. ʻI heʻetau fakahaaʻi ʻetau ʻofa ki he niʻihi kehé ʻo fakafou ʻi he ngaahi tōʻonga faka-Kalaisí, ʻoku tau vahevahe ai e ongoongolelei ʻo Sīsū Kalaisí—he taimi ʻe niʻihi ʻo ʻikai ke tau lea. Pea ʻi he ʻiloʻi ʻe he niʻihi kehé ʻoku tau tokanga moʻoni kiate kinautolú, mahalo te nau ongoʻi tauʻatāina ange ke fanongo ki heʻetau ngaahi fakakaukau fekauʻaki mo e ongoongoleleí. (Vakai, Gary E. Stevenson, “ʻOfa, Vahevahe, Fakaafe,” Liahona, Mē 2022, 84–87.)
Vahevahe ʻi he Ngaahi Founga Angamaheni mo Fakanatula
Te tau lava ʻo vahevahe ʻa e meʻa ʻoku tau ʻofa ai fekauʻaki mo e ongoongoleleí. ʻI heʻetau fai ʻeni ko ha konga ʻo ʻetau moʻui fakaʻahó, he ʻikai toe ngalikehe pe taʻe fakafiemālie ia. Hangē ko ʻení, te tau lava ʻo talanoa mo hotau fāmilí mo e kaungāmeʻá fekauʻaki mo e meʻa ʻoku tau fakahoko ʻi he Sāpaté. Pe ko ʻetau talanoa kiate kinautolu fekauʻaki mo e fiefia ʻoku tau ongoʻi ʻi heʻetau tokoniʻi e niʻihi kehé. (Vakai, Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 15–18.)
Fakaafeʻi e Niʻihi Kehé ke Kau Mai
Te tau lava ʻo fakaafeʻi e niʻihi kehé ke nau ako lahi ange ki he ongoongoleleí. Hangē ko ʻení, te tau lava ʻo fakaafeʻi kinautolu ke nau haʻu ki ha fakatahaʻanga pe ʻekitivitī ʻa e Siasí, lau e Tohi ʻa Molomoná, sio ʻi ha vitiō ʻa e Siasí, pe talanoa mo e kau faifekaú. ʻE lava ke tokoniʻi kinautolu ʻe he ngaahi aʻusia ko ʻení ke nau ongoʻi ʻa e Laumālié mo fie ako lahi ange.
Fehuʻi fekauʻaki mo ʻEnau Aʻusiá
Hili e haʻu ʻa e ngaahi kaungāmeʻá mo e kau mēmipa ʻo e fāmilí ki he lotú pe tā lēsoni mo e kau faifekaú, te tau lava ʻo fehuʻi ange fekauʻaki mo e meʻa ne nau aʻusiá. Mahalo ʻe foʻou kiate kinautolu ha ngaahi akonaki ʻe niʻihi ʻo e ongoongoleleí, ko ia te tau lava ʻo tali ʻenau ngaahi fehuʻí. Te tau lava ʻo fakahaaʻi ʻetau ʻofá mo e poupoú ʻi heʻenau feinga ke haʻu kia Kalaisí.
Tānaki atu ki Heʻenau Tuí
ʻOku tau fakamahuʻingaʻi mo fakaʻapaʻapaʻi e tui ʻa e niʻihi kehé, pea ʻoku tau feinga ke tānaki atu ki he tui kuo nau ʻosi maʻú. Hangē ko ʻení, ʻe lava foki ke maʻu ʻe ha kaungāmeʻa kuó ne maʻu ha fakafiemālie ʻi he ngaahi folofola ʻo e Tohi Tapú ha fakafiemālie ʻi he ngaahi akonaki ʻoku tau vahevahe mei he Tohi ʻa Molomoná.
Tokoniʻi e Kau Mēmipa Foʻou ʻo e Siasí
ʻI he kau mai ai ʻa e kakaí ki he Siasí, te tau lava ʻo tokoni ke fakamālohia ʻenau tuí. Te tau lava ʻo hoko ko honau kaungāmeʻa, tali ʻenau ngaahi fehuʻí, mo poupouʻi kinautolu ʻi heʻenau maʻu ha ngaahi uiuiʻí. Te tau lava ʻo poupouʻi kinautolu ke hokohoko atu ʻenau muimui kia Sīsū Kalaisí mo ako fekauʻaki mo ʻEne ongoongoleleí.
Ngāue Fakafaifekau Taimi Kakato
Makehe mei hono vahevahe ʻo e ongoongoleleí ʻi heʻetau moʻui fakaʻahó, ʻe lava ke uiuiʻi ʻa e kāingalotu ʻo e Siasí ke nau hoko ko ha kau faifekau taimi kakato. Kapau kuo mateuteu ʻa e kau talavoú, ʻe lava ke nau ngāue ʻi honau taʻu 18. ʻE lava foki ke ngāue ʻa e kau finemuí mo e kakai lalahi matuʻotuʻa angé. Te ke lava ʻo maʻu ha fakamatala lahi ange ʻi he ChurchofJesusChrist.org/callings/missionary.