Fakakomipiuta Pē
Ko Hono Vahevahe ʻo e Ongoongoleleí—Ngaahi Pōpoaki Kimuí Ni mei he Kau Palōfitá, Kau ʻAposetoló, mo e Kau Taki Kehe ʻo e Siasí
Vakai ki he meʻa naʻe toki akoʻi kimuí ni ʻe he kau taki ʻo e Siasí ʻi he mītia fakasōsialé fekauʻaki mo hono fakaafeʻi ʻo e niʻihi kehé ke nau tali ʻa e ongoongolelei ʻo Sīsū Kalaisí.
Naʻe akonaki ʻa Palesiteni Lāsolo M. Nalesoni ʻo pehē:
“ʻOku fiemaʻu lahi ange ʻa e ongoongolelei ʻo Sīsū Kalaisí ʻi he ʻahó ni ʻi ha toe taimi kimuʻa. …
“… ʻOku ʻi ai hotau fatongia toputapu ke vahevahe ʻa e mālohi mo e melino ʻa Sīsū Kalaisí kiate kinautolu kotoa pē ʻe fie fanongo mo tuku ke pule ʻa e ʻOtuá ʻi heʻenau moʻuí.
“Ko e tokotaha kotoa pē ʻa ia kuó ne fai ha fuakava mo e ʻOtuá kuó ne palōmesi ke tokanga ki he niʻihi kehé mo tokoniʻi ʻa kinautolu ʻoku faingataʻaʻiá. Te tau lava ʻo fakahaaʻi ʻa e tui ki he ʻOtuá mo mateuteu maʻu pē ke tali kiate kinautolu ʻoku nau fehuʻia ʻʻa e ʻamanaki lelei ʻoku ʻiate [kitautolú]ʼ [1 Pita 3:15]. ʻOku ʻi ai hotau fatongia takitaha ki hono tānaki ʻo ʻIsilelí. …
“… ʻE fiemaʻu ʻe he taha kotoa pē ha faingamālie ke ne ʻilo fekauʻaki mo e ongoongolelei ʻo Sīsū Kalaisi kuo fakafoki maí. ʻE fiemaʻu ʻe he taha kotoa pē ke ne ʻilo ʻa e feituʻu te nau lava ke maʻu ai ʻa e ʻamanaki leleí mo e melino ʻoku ʻ[ope] atu ʻi he ʻilo kotoa pēʼ [Filipai 4:7].1
Vakai ki he meʻa kuo vahevahe ʻe he kau palōfitá, kau ʻaposetoló, mo e kau taki kehe ʻo e Siasí ʻi he mītia fakasōsialé fekauʻaki mo hotau faingamālie mo e fatongia ke vahevahe ʻa e ongoongoleleí.
ʻE Tākiekina ʻe he ʻOtuá ʻa e Moʻui ʻa ha Laui Miliona
“ʻI he fakaʻau ke mālohi ange hoʻo fakamoʻoní, te ke ongoʻi ʻa e tupulaki ʻo e māmá ʻi hoʻo moʻuí. He ʻikai hoko noa mai ia kae ʻoua kuó ke ngāueʻi. Ka ʻe hoko mai ia ʻi he tupulaki hoʻo fakamoʻoní mo hoʻo fili ke tanumaki iá.
“Te ke hoko ko e maama ki he māmaní ʻi hoʻo vahevahe hoʻo fakamoʻoní ki he niʻihi kehé. Te ke fakahaaʻi ki he niʻihi kehé ʻa e Maama ʻo Kalaisi ʻoku ʻi hoʻo moʻuí. ʻE maʻu ʻe he ʻEikí ha ngaahi founga ke aʻusia ai ʻa e maama ko iá ʻe he niʻihi ʻokú ke ʻofa aí. Pea ʻe fakafou ʻi he tui mo e fakamoʻoni kuo fakatahaʻi mei he ngaahi ʻofefine mo e ngaahi foha ʻo e ʻOtuá, ʻa ʻEne tākiekina ʻaki ʻEne māmá ʻa e moʻui ʻa ha laui miliona ʻi Hono puleʻangá mo e funga ʻo e māmaní.”
Palesiteni Henry B. Eyring, Facebook, Aug. 20, 2020, facebook.com/henry.b.eyring.
Kumi ha Ngaahi Founga ke Foaki ai ʻa e Meʻaʻofa Lelei Tahá
“ʻOku liliu taha taha ʻe he ʻEikí ʻa e moʻuí. Ko e ʻaloʻi ʻo e Fakamoʻuí ko e kamataʻanga ia ʻo ha ngāue fakalaumālie ʻi he māmaní. Naʻá Ne ʻomi ha ngaahi laumālie taʻe-faʻa-laua ki he maama ʻo e ongoongoleleí ʻi he kotoa ʻo ʻEne moʻuí. Kuó Ne kole mai ke tau fakahoko ʻa e meʻa tatau. Kumi ha ngaahi founga ke ʻomi ai koe mo e niʻihi kehé ke ofi ange kia Kalaisi. … Ko e meʻaʻofa lelei taha ia te ke lava ʻo foakí.”
Palesiteni M. Russell Ballard, Facebook, Dec. 12, 2022, facebook.com/mrussell.ballard.
Talanoa mo e Niʻihi Kehé fekauʻaki mo e Ngāue Fakafaifekaú
“ʻOku ou ui atu … ki he kau talavoú, mo e kau finemui ʻoku mou loto ke ʻalu ʻo ngāue fakafaifekaú, ke mou kamata talanoa leva ʻi he taimí ni mo hoʻomou mātuʻá ki he ngāue fakafaifekaú. ʻOku ou toe fakaafeʻi atu ke ke talanoa mo ho kaungāmeʻá kau ki he ʻalu ʻo ngāue fakafaifekaú, pea kapau ʻoku kei veiveiua ha taha ho ngaahi kaungāmeʻá ki he ngāue fakafaifekaú, fakalotolahiʻi ke nau ʻalu ʻo talanoa mo ʻenau pīsopé.
“Naʻe teuteuʻi au ʻe heʻeku ngāue fakafaifekaú ke u hoko ko ha husepāniti, tamai, mo ha tangata pisinisi lavameʻa mo lelei ange. Naʻá ne toe teuteuʻi au ke u tokoni ki he ʻEikí mo Hono Siasí ʻi he toenga ʻo ʻeku moʻuí.
“Ki he kau faifekau kuo foki ki ʻapi hili ʻenau ngāue fakafaifekaú, manatuʻi ʻoku ʻikai ke tukuange koe mei hoʻo mālohi ʻi he Siasí. Fakatupulaki ʻa e ngaahi tōʻonga lelei naʻá ke ako ʻi hoʻo ngāue fakafaifekaú, hokohoko atu hono fakamālohia hoʻo fakamoʻoní, ngāue mālohi, lotu, pea talangofua ki he ʻEikí. Tauhi ʻa e ngaahi fuakava kuó ke faí. Hokohoko atu hono tāpuekina mo tokoniʻi ʻa e niʻihi kehé.”
Palesiteni M. Russell Ballard, Facebook, May 9, 2021, facebook.com/mrussell.ballard.
‘Ofa, Vahevahe, Fakaafe
“ʻOku ou tui ʻoku maʻu ʻe he foʻi lea ʻe tolú ʻa e mālohi ke liliu ʻetau ngāue ki he ʻOtuá mo hotau kāingá. ʻE liliu ʻe hono moʻui ʻaki kinautolú ʻa e founga ʻo ʻetau feohi mo e niʻihi kehé ʻi hotau haʻofangá, mo hotau ngaahi kaungāmeʻá, pea mo e fānau kotoa ʻa e ʻOtuá: ʻa e ʻofá, vahevahé, mo e fakaafé.
1) ʻOku totonu ke hoko ʻa e ʻofá ko e makatuʻunga mo e fakalotolahi ki he meʻa kotoa pē ʻoku tau fakahokó. ʻOkú ne ngaohi ʻetau ngaahi feingá ke ʻaonga mo fakafiefia ange.
2) Vahevahe ʻa e meʻa ʻokú ke ʻofa ai fekauʻaki mo e ongoongolelei ʻo Sīsū Kalaisí? Vahevahe ʻa e ʻuhinga ʻokú ke saiʻia ai ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
3) Fakaafeʻi ʻa e kakaí ke nau omi ʻo mamata, omi ʻo tokoni, pea nau omi ʻo kau mai!
“ʻI hoʻo feinga ke fononga ʻi he hala ʻo e tuʻunga fakaākongá, tatau ai pē pe te ke humu ʻi ha ngaahi taimi, [ka] ʻe fakafōtunga atu ʻa e maama mo e fiefia ʻo e ongoongolelei ʻo Sīsū Kalaisí ʻi hoʻo moʻuí. ʻE fakatokangaʻi ʻe he niʻihi kehé ʻoku ʻi ai ha meʻa mahuʻinga ʻi hoʻo moʻuí, pea ʻe iku ia ki ha ngaahi faingamālie ke vahevahe ai [ʻa e ongongoleleí].
“Naʻá ku ako ʻi heʻeku moʻuí ʻoku ʻomi ʻe he ongoongolelei ʻo Sīsū Kalaisí ʻa e ʻamanaki leleí, fiefiá, mo e fakamoʻuí. Ko hotau faingamālie mo e tāpuaki maʻongoʻonga ia ke vahevahe ʻa e ongoongoleleí mo e fānau kotoa ʻa e ʻOtuá.
ʻEletā Dieter F. Uchtdorf, Facebook, July 1, 2021, facebook.com/dieterf.uchtdorf.
ʻOku Mahuʻinga ʻa e Kiʻi Vali Takitaha
“Naʻá ku vahevahe mo Halieta ʻa e vitiō ko ʻení ʻi ha fakataha lotu kimuí ni mai. ʻOkú ne fakatātaaʻi hono faʻu ʻo ha tā valivali fakaʻofoʻofa ʻa Sei Uooti. ʻOku fakatātaaʻi ʻe he foungá ni ʻi ha founga makehe ʻa e meʻa ʻoku tau feinga ke moʻui ʻaki ʻi ha founga ʻoku anga faka-Kalaisi angé, pea ko ʻetau ngāue fakaʻahó ko hono fakaafeʻi ʻo e niʻihi kehé ke nau ofi ange kia Kalaisí. ʻOku mau poupouʻi ʻa e kakaí ʻi ha ngaahi founga angamaheni mo fakanatula ke tali ʻa e ongoongoleleí mo e Siasi ʻo Sīsū Kalaisí. ʻOku tau ʻofa, vahevahe, pea fakaafeʻi ʻa e kakaí ke nau ʻahiʻahi fakahoko ia pea haʻu ʻo ofi ange ki he Fakamoʻuí. ʻOku mau kole kiate kinautolu ke nau omi ʻo mamata, omi ʻo tokoni, omi ʻo kau ki he kolo maʻongoʻonga ko ʻeni ʻo e Kau Māʻoniʻoni ʻi he Ngaahi ʻAho Kimui Ní.
“Siʻoku ngaahi kaungāmeʻa, ʻoua naʻá ke teitei foʻi ʻi hono fai ʻa e ngāue toputapu ʻa e Fakamoʻuí. ʻI hoʻo ngaahi ngāue mateakí, te ke tokoni ai ke faʻu ha fakatātā kakato angé ʻaki hono tokoniʻi ʻa e kakaí ke nau ʻunu ʻo ofi ange kia Sīsū Kalaisi mo Hono Siasí. ʻE ʻomi ʻe hono fakaʻaongaʻi ʻo e ngaahi tefitoʻi moʻoni ko ʻení ha fiefia lahi ange ki he māmaní.
“ʻOku fiemaʻu ki ai ha ngāue lahi—fanga kiʻi vali iiki, siʻisiʻi, pea meimei taʻe-fakatokangaʻi ʻa ia ʻe tokoni ke fakahaohaoaʻi mo kakato ʻa e fakatātaá. ʻOku ʻiloʻi lelei pē ʻe he tokotaha tā valivalí ʻa e meʻa ʻokú ne fiemaʻu ke aʻusiá. ʻE lava ke ʻasi noaʻia pe moveuveu ʻa e mataʻi valí ki ha taha mei tuʻa, ka ʻoku fokotuʻu ia ʻi ha taumuʻa pau ke fakakakato ʻa e ngāue fisifisimuʻá. ʻE tokoni ʻa e lotú, tokangá, mo e tokoni ʻi he faʻa kātaki ki he kakai ʻoku tau feohí ke tau ofi ange kia Kalaisi. ʻE hanga ʻe hoʻomou fanga kiʻi ngāue fakaʻaho ʻo e angaʻofá, manavaʻofá, mo e ʻofa ki he ʻOtuá mo ʻEne fānaú, ʻo ʻomi ki he kakaí ʻa e mālohi ʻo e ʻofa ʻa e ʻOtuá.
“ʻOku mahuʻinga ʻa e vali takitaha. ʻOkú ke mahuʻinga. ʻOku fiemaʻu kimoutolu, ʻoku fiemaʻu hoʻomou ngāué, ʻoku ʻikai ha meʻa ia ʻe fuʻu siʻisiʻi pe ʻikai mahuʻinga.”
ʻEletā Dieter F. Uchtdorf, Facebook, Mar. 19, 2021, facebook.com/dieterf.uchtdorf.
Fakaʻaongaʻi ʻa e Tekinolosiá mo e Mītia Fakasōsialé ʻi he Founga ʻa e ʻEikí
“ʻOku fakaofo ʻa e founga ʻoku ako ai ʻetau kau faifekau ʻofeiná ki he founga hono fakaʻaongaʻi fakapotopoto mo ola lelei ʻa e ngaahi meʻangāue mālohi ʻo e tekinolosiá—ʻi he founga ʻa e ʻEikí. Hangē pē ko e fakahaohaoaʻi ʻe he kau faifekaú ʻenau fakaʻaongaʻi ʻo e tekinolosiá mo e mītia fakasōsialé, ʻoku totonu ke tau fai mo e meʻa tatau mei hotau ngaahi ʻapí mo e ngaahi uōtí mo e ngaahi koló. Kapau ʻoku ʻikai ke ke fakapapauʻi ʻa e founga ke kamata aí, tuku ke akoʻi koe ʻe he kau faifekaú. Te nau fiefia ke tokoni!
“Siʻi ngaahi kaungāmeʻa, ʻoku moʻui ʻa e ʻOtuá pea ʻokú Ne ʻofa ʻiate kimoutolu. ʻOku tataki ʻe Sīsū Kalaisi ʻa Hono Siasí. … Manatuʻi, ʻoku ʻikai fiemaʻu ke haohaoa pe fakapalōfesinale hoʻo ngaahi ngāue ʻi he mītia fakasōsialé mo e tekinolosiá. ʻOku fiemaʻu ia ke nau faitotonu mo fakamātoato.
“Fakaafeʻi ho ngaahi kaungāmeʻá mo e niʻihi ʻokú ke ʻofa aí ke nau omi ʻo mamata, omi ʻo tokoni, pea nau omi ʻo kau mai. Fakaʻaongaʻi ʻa e ngaahi tefitoʻi moʻoni ʻo e ʻʻofá,ʼ ʻvahevahéʼ mo e ʻfakaafé.ʼ …
“ʻI he ngaahi meʻá ni kotoa, ʻoku ʻi loto mālie ʻa Kalaisi. Te tau lava ʻiate Ia pea meiate Ia ke ʻomi ʻa e fiefiá ki he māmaní.”
ʻEletā Dieter F. Uchtdorf, Facebook, Mar. 6, 2021, facebook.com/dieterf.uchtdorf.
Faʻa Kātaki, Feinga Pē, pea Falala ki he ʻEikí
“ʻI hono vahevahe ʻo e ongoongoleleí, ʻoku ʻomi ʻe he sīpinga faingofua ʻo e ʻʻofá, vahevahé, mo e fakaaféʻ ha tokanga lahi ange ki he ngaahi tafaʻaki kotoa pē ʻo e ngāue ʻa e ʻEikí. ʻE fakanatula pē ʻetau moʻui ʻaki ʻa e ngaahi tefitoʻi moʻoni mahuʻinga ko ʻeni ʻo e ongoongoleleí ke tau lava ai ʻo tokoniʻi ʻa e niʻihi kehé ke nau haʻu kia Kalaisi ʻaki ʻetau fakahoko mo tauhi ʻa e ngaahi fuakavá. Mahalo he ʻikai ke tau fakatokangaʻi ʻoku tau vahevahe ʻa e ongoongoleleí, he ʻoku fakanatula pē hono fakahaaʻi ʻetau ʻofa moʻoni ki he niʻihi kehé ʻi he fevahevaheʻakí mo e fakaafé. Ko ha konga pē ia ʻo ʻetau moʻuí.
“ʻOku pehē ʻe he folofolá ʻʻoku kātaki fuoloa ʻa e ʻofáʼ pea ʻkātakiʻi ʻa e meʻa kotoa pēʼ (1 Kolinitō 13:4, 7). ʻOku ʻikai ha taimi-tēpile pe ʻaho ke ʻosi ki ai ʻa e ʻaonga ʻo e ʻofá. ʻI he taimi ʻoku fakalotoʻi ai ʻe he ʻofá ʻa ʻetau vahevahé mo e fakaafé, ʻoku ʻikai siʻi ʻetau kātakí. ʻOku tau feinga pē, pea ʻoku tau falala ki he ʻEikí ʻi heʻetau tokoniʻi ʻa e niʻihi kehé.”
ʻEletā David A. Bednar, Facebook, Aug. 2, 2021, facebook.com/davida.bednar.
Tokoniʻi ʻa e Niʻihi Kehé ke Nau Maʻu ʻa e Tauʻatāina mei he Nofo Pōpulá
“ʻI heʻetau tānaki kitautolu kia Kalaisi ʻaki ʻetau muimui ki Heʻene ngaahi akonakí, ʻoku tau aʻusia ai ʻa e tauʻatāina mo e fiemālie ko e ongoongoleleí pē ʻoku maʻu aí—ʻoku tau maʻu ʻa e tauʻatāina ke maʻu fakahā fakatāutahá mo e tauʻatāina ke aʻusia ʻa e tuʻunga ʻoku finangalo ʻa e Tamai Hēvaní ke tau aʻusiá.
“ʻE lava ke iku ʻa e moʻui taʻe-māʻoniʻoní ki he pōpulá mo e ngaahi fakangatangatá, fakatuʻasino mo fakalaumālie fakatouʻosi. ʻI heʻetau tokoni ʻi hono tānaki hotau kaungāmeʻá mo e niʻihi ʻoku tau ʻofa aí ki he ongoongoleleí, kau ai hono tokoniʻi kinautolu ke fakahoko mo tauhi ʻa e ngaahi fuakava toputapu mo e ʻOtuá, te tau lava ʻo tokoniʻi kinautolu ke nau tauʻatāina mei ha faʻahinga pōpula lahi.
“ʻI hoʻo moʻui angatonú, he ʻikai ngata pē ʻi hoʻo hao mei he pōpula ki he filí, ka te ke hoko foki ko ha sīpinga ʻo e ʻamanaki leleí mo e māmá ki he niʻihi kehé.”
ʻEletā Quentin L. Cook, Facebook, Oct. 23, 2022, facebook.com/quentin.lcook.
Fakaafeʻi ʻa e Niʻihi Kehé ke Nau Fiefia ʻi he Ngaahi Tāpuaki ʻo e Ongoongolelei ʻa e Fakamoʻuí
“ʻOku ou fie fakahaaʻi atu ʻeku houngaʻia ki heʻetau kau faifekau fakaʻofoʻofa ʻi he funga ʻo e māmaní ʻoku nau holi ke ʻave ʻa e pōpoaki ʻo hono Fakafoki Mai ʻo e Ongoongoleleí pea mo langa hake ʻa e tui ki he ʻEiki ko Sīsū Kalaisí.
“Hangē ko e kau faifekau ko ʻení, ʻoku tau takitaha maʻu ʻa e faingamālie ke ʻofa, vahevahe, mo fakaafeʻi ʻa e niʻihi kehé ke nau kau fakataha mo kitautolu pea fiefia ʻi he ngaahi tāpuaki ʻo e ongoongolelei ʻa e Fakamoʻuí.”
ʻEletā Quentin L. Cook, Facebook, Oct. 30, 2021, facebook.com/quentin.lcook.
Vahevahe ʻa e Moʻoni Mahuʻingá ni mo e Tokotaha Kotoa Pē ʻOku Tau ʻIloʻí
“Kimuʻa peá u toki lea ʻi ha fakataha lotu kimuí ni ʻa e Palaimelí ʻi ʻEngikulasi ʻi ʻAlasikā, naʻá ku fehuʻi ki ha niʻihi hoku makapuná pe ko e hā ʻoku totonu ke u vahevahe mo e fānau kehe ʻi honau toʻú.
“Naʻa nau tali mai, ʻPa (Kulenipā), talaange ʻokú ke ʻiloʻi ʻa Sīsū pea ʻokú Ne ʻofa ʻiate kinautolu.ʼ
“Naʻá ku loto ʻaki ʻenau fokotuʻú peá u fakapapauʻi ke palōmesi ki he fānau takitaha ko iá ʻoku ʻiloa kinautolu ʻi honau hingoá ʻe he Tamai Hēvaní, Sīsū Kalaisi, pea mo e Laumālie Māʻoniʻoní. Naʻá ku vahevahe foki mo kinautolu ʻoku ʻofa ʻa e ʻOtuá ʻiate kinautolu.
“Ko e ngaahi moʻoni ne u vahevahe mo e fānau pelepelengesi ko ʻení ko e ngaahi moʻoni tatau pē ia ʻoku ou vahevahe mo kimoutolu takitaha.
“ʻOku ʻofa lahi ʻaupito ʻa e Tamai Hēvaní mo Sīsū Kalaisi ʻiate kitautolu. Ko e fānau kitautolu ʻa e ʻOtuá. ʻOku totonu ke tau vahevahe ʻa e moʻoni mahuʻinga ko ʻení mo e tokotaha kotoa pē ʻoku tau ʻiloʻí. ʻOku ʻikai ke tau teitei tuenoa. ʻOku tau maʻu maʻu pē ʻa e anga fakakaumeʻá mo e poupoú ʻi he Tamai Hēvaní mo Sīsū Kalaisi.
ʻEletā Ronald A. Rasband, Facebook, July 12, 2022, facebook.com/RonaldARasband.
Hoko ko ha Maama ʻi he Māmani Fakapoʻuli Ko ʻEní
“Te ke lava ʻo hoko ko ha maama ʻi he māmani fakapoʻuli ko ʻení, ke tuʻu ko e kau fakamoʻoni ʻo e ʻOtuá mo ʻEne māʻoniʻoní ʻi he ngaahi taimi kotoa pē, ʻikai ha ngaahi fakaʻatā makehe, pea maʻu ha fiefia ʻi he ngāue tokoní. ʻOfa ke mou ʻilo homou ivi tākiekina maʻongoʻongá, pea ʻofa ke mou ngāue mateaki maʻa hoʻomou Tamai Hēvaní.”
ʻEletā Ronald A. Rasband, Facebook, Apr. 30, 2021, facebook.com/RonaldARasband.
ʻOku ʻI Ai Hotau Fatongia ke Fakaafe
“Naʻá ku lea ʻi ha fakataha lotu kimuí ni ʻa BYU fekauʻaki mo e fehokotakiʻanga ʻo e ngaahi tāpuakí mo e ngaahi fatongiá ki he kau mēmipa ʻo Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
“ʻOku ʻatautolu ʻa e fatongia ke fakaafeʻi ʻa e tokotaha kotoa pē ke nau tali ʻa e ongoongoleleí. ʻOku tāpuekina ʻa e kau faifekaú ʻi heʻenau ngāué ʻo fakafou ʻi he tokoni ʻa honau fāmilí mo e kāingalotú.
“ʻOku ʻi ai hotau fatongia ke fakatahaʻi ʻa e ngaahi fāmilí ki he taʻengatá. ʻOku tāpuekina kitautolu ʻaki ha ngaahi temipale ʻi he funga ʻo e māmaní.
“ʻOku ʻi ai hotau fatongia ke moʻui ʻaki ʻa e ongoongolelei ʻo Sīsū Kalaisí. ʻOku tau maʻu ʻa e ngaahi tāpuakí ʻo fakafou ʻi he ngaahi maʻuʻanga tokoni kehekehe ʻa e Siasí, kau ai ʻa e Tohi ʻa Molomoná—ʻa ia ʻoku ʻi he lea fakafonua ʻe 112 ʻi he taimí ni.
“ʻOku ʻi ai hotau fatongia ke tokangaʻi ʻa kinautolu ʻoku faingataʻaʻiá. Koeʻuhí ko e angaʻofa mo e faivelenga hotau kāingalotú, kuo tau vahevahe ai hotau ngaahi tāpuakí mo e māmaní ʻo fakafou ʻi ha ngaahi ngāue tokoni ʻofa fakaetangata lahi.
“Ko ʻeku fakaafé ke tau fakakaukau ki hotau fatongia ʻi hono fakahoko ʻo e ngaahi fatongia fakalangí ni pea kau loto-vēkeveke atu ki ai. ʻI heʻetau fai iá, te tau ʻiloʻi ai mo fiefia ʻi he ngaahi tāpuaki kuo ʻomi mei he langí.”
ʻEletā Gary E. Stevenson, Mar. 16, 2021, facebook.com/stevenson.gary.e.
Fakaulo ʻa e Māmá ʻi he ʻAhó ni
“ʻOku faingataʻa ke ʻoua naʻa tau saiʻia ʻi he foʻi hiva ʻFiemaʻu Au ʻe Sīsū Ke u Ulo Hangē ko ha Huelóʼ! Ko e taimi kotoa pē ʻoku ou fanongo ai ki aí, ʻoku ou sioloto atu ki hono hivaʻi ia ʻe he ngaahi fofonga fiefia ʻo e fānaú. ʻOku pehē ʻe he veesi hono uá, ʻFiemaʻu ʻe Sīsū ke u ʻofa ki he kakaí, fakahā e fiefia ʻa ʻene fānaú.ʼ
“ʻOku tau takitaha maʻu ha maama, pea ʻoku finangalo ʻa Kalaisi ke tau fakaulo atu ʻa e maama ko iá! Ngaahi kaungāmeʻa, ʻoku ou fakatauange te mou tali ʻa e fakaafe ko ʻení ke ulo atu ʻa e māmá ʻi he ʻahó ni, ʻi ha feituʻu pē ʻoku mou ʻi aí.”
Sisitā Tracy Y. Browning, Jan. 24, 2023, facebook.com/Primary2ndCounselor.