Fakakomipiuta Pē: Kakai Lalahi Kei Talavoú
Kau ʻEa-hoko Moʻui Tāú
Kapau ʻoku mahino moʻoni kiate kitautolu ʻoku tau ako kotoa pē ke tau hoko ʻo tatau ange mo e Tamai Hēvaní, ʻe malava leva ke hoko ha liliu.
ʻI heʻeku tupu haké, ʻoku ou manatuʻi hono akoʻi mai ko e fānau au ʻa e ʻOtuá—ʻo tatau ai pē pe ko hono hivaʻi ʻo e himí ʻi he Palaimelí, fanongo ki ai mei heʻeku ongomātuʻá ʻi ʻapi, pe fanongo ki hono malangaʻi ia ʻe he kau taki ʻo e Siasí mei he tuʻunga malangá. Ko ha konga ia ʻo e tokāteliné ʻoku ʻikai teitei tuku ʻetau fanongo ki aí. Hangē ko hono akoʻi ʻe Palesiteni Lāsolo M. Nalesoni ki he kakai lalahi kei talavou ʻo e Siasí, “Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá.”1
Neongo ko ha tokāteline ʻeni naʻá ku tui maʻu pē ki ai, ka ʻoku ʻikai ke u tui naʻe mahino maʻu pē ia kiate au. Hangē ko ia naʻe lea ʻaki ʻe Palesiteni Poiti K. Pēká (1924–2015), “ʻOku liliu ʻa e ngaahi tōʻonga moʻuí mo e ʻulungāngá, ʻi he maʻu ha mahino ki he tokāteline moʻoní.”2
ʻI he tokāteline ʻo e tuʻunga fakalangí, ne u ʻiloʻi ai ko ha fānau au ʻa ha ongomātuʻa fakalangi, ka naʻe ʻikai liliu ʻeku ngaahi tōʻongá mo hoku ʻulungāngá koeʻuhí ko e ʻilo ko iá. Kiate au, ʻi heʻeku hoko ko e fānau ʻa e ʻOtuá, naʻe ʻuhinga ia ʻoku ʻi ai ha taha naʻe ʻofa mo tokangaʻi lelei au. Pea neongo ʻoku moʻoni ʻeni, ka naʻe teʻeki ke u tukulotoʻi ʻa e tafaʻaki ʻo e tuʻunga ko iá ʻokú ne fakamālohia au ke u liliú.
Ka naʻe tokoniʻi au ʻe he ʻOtuá ʻi ha ʻaho ʻe taha ke fakaloloto ʻeku mahinó. Lolotonga ʻeku ako pongipongia ʻeku folofolá ʻi ha pongipongi ʻe taha, naʻe tataki au ʻe he Laumālié ki ha ngaahi veesi siʻi ʻi he Loma 8. ʻOku fakamatala ʻi he ongo veesi 16–17 ʻo pehē, “Pea ʻoku fakamoʻoni ʻe he Laumālie pē ko iá mo hotau laumālié, ko e fānau ʻa e ʻOtuá ʻa kitautolu.” Naʻá ku ʻosi fanongo ki ai kimuʻa. Ka naʻá ku hoko atu ʻo lau ʻa e veesi hono hokó ʻa ia ʻoku fakamatalaʻi ai, “Pea kapau ko e fānau, pea tā ko e kau [ʻea-hoko]; ko e kau [ʻea-hoko] ki he ʻOtuá, pea ko e kau [ʻea-hoko] fakataha mo Kalaisi”. ʻI heʻeku lau pē ʻa e ngaahi leá ni, naʻe fakamoʻoniʻi mai ʻe he Laumālié kiate au ko e fānau au ʻa e ʻOtuá mo ha taumuʻa fakalangi ʻi he māmaní. Naʻe ongo mamafa ange ia ʻi ha toe taimi kimuʻa. ʻI he momeniti ko iá naʻe hangē pē ʻoku ou toʻotoʻo ha foʻi ama naʻe toki tutu pē. Naʻe lava ke mahino kiate au ʻi he taimí ni ʻi heʻetau hoko ko e fānau ʻa e ʻOtuá, ʻoku tau ʻi ha hala ʻoku ʻikai ngata pē ʻi heʻene tataki kitautolu ke tau foki ki he Tamai Hēvaní ka ʻokú ne toe tokoniʻi foki kitautolu ke tau hoko ʻo tatau ange mo Iá. Naʻe kamata ke fakamāfanaʻi au ʻe he mahino foʻou ko ʻení pea fakamaama hoku halá.
ʻI heʻeku ʻiloʻi ko e foha au ʻo e ʻOtuá pea ʻoku fakataumuʻa au ke u hoko ʻo tatau ange mo Iá kuó ne maʻu ha mālohi lahi ange ki heʻeku moʻuí. Kuó ne liliu ʻa e anga ʻo ʻeku fakakaukaú mo e tōʻongá ʻi he ngaahi tūkunga fakaʻahó. ʻI he moʻui fakamatelié kotoa, ʻoku lahi ha ngaahi fiemaʻu kuo tuku mai kiate kitautolu—mei he pau ke tau feinga ke maʻu ha maʻuʻanga moʻuí ki he maʻu ha maaka lelei ʻi he akó ki he tokoniʻi ʻa e kau mēmipa ʻo e fāmilí ʻoku puké pea aʻu pē ki hono teuteuʻi ʻo e ngaahi houa maʻu meʻatokoni angamahení. ʻE lava ke fakamafasia ʻaupito ʻa e moʻuí. Ka koeʻuhí ʻoku mahino kiate au hoku tuʻunga ko e foha au ʻo e ʻOtuá, ʻoku ou lava ai ʻo fakakaukau ki hoku ngaahi faingataʻaʻiá ko ha faingamālie ia ke u tupulaki ai. ʻOku ʻikai feinga ʻa e ʻOtuá ke tauteaʻi au pe ʻai ke faingataʻa ange ʻeku moʻuí ʻaki hono ʻomi ha ngaahi meʻa lahi ke u fakahoko ʻi heʻeku moʻui fakaʻahó. Ka, ʻokú Ne tokoniʻi au ke u ako ke u hoko ko ha ʻea-hoko ʻoku moʻui taau.
ʻI he taimi naʻe fakaloloto ai ʻeku mahino ki he tokāteline ko ʻení, naʻe fakanatula pē ʻeku kamata ke liliu ʻeku ngaahi tōʻongá mo e ʻulungaanga fekauʻaki mo e ngaahi meʻa faingofua ʻi heʻeku moʻuí. Hangē ko ʻení, naʻe kamata ke u fakamaau hoku mohengá mo fakamaʻa hoku lokí ʻi he pongipongi kotoa pē, ʻo ʻikai koeʻuhí naʻe ʻi ai ha taha naʻe haʻu ke sio pe kuó u fai ʻeku ngaahi ngāué, ka koeʻuhí he naʻá ku ʻiloʻi naʻe maʻa mo maau ʻa e ʻOtuá. Naʻá ku fakatokangaʻi kapau ʻoku ou lava ʻo maʻu ʻa e tuʻunga tatau mo Ia ʻi ha ʻaho, ʻoku fiemaʻu ke u maʻa mo maau foki mo au. Naʻe kamata ke u vakai ki he ngaahi ngāue ko ʻení ko ha ngaahi faingamālie ke fakatomala mo tupulaki ke hoko ʻo tatau ange mo e ʻOtuá.
Kuo hanga ʻe he mahino kiate au ʻo e tokāteline mahuʻinga ko ʻení ʻo liliu au ke toe lelei ange. Kuó ne tataki ʻeku ngaahi fakakaukaú mo e ngaahi ngāué ʻi heʻeku fokotuʻu ha ngaahi taumuʻa mo teuteu ki he kahaʻú. Kuó ne tokoniʻi au ke u fakaʻehiʻehi mei he koví ʻi heʻeku ʻiloʻi ʻoku taʻofi au ʻe he faiangahalá mo e fakavaivai ki he ʻahiʻahí ke ʻoua naʻá ku aʻusia ʻa e meʻa kotoa te u malavá. Kae mahuʻinga tahá, kuo fakaʻaiʻai au ʻe heʻeku ʻiloʻi ʻa e moʻoni ko ʻení ke u liliu. ʻOku ou tokanga mo hokohoko atu hono liliu hoku ngaahi ʻulungāngá ke fakafenāpasi mo e niʻihi ʻe ala hoko ko e ʻea-hoko ki he puleʻanga ʻo e ʻOtuá.