Savali Faaleautaitai i le Eria
O Loo Matala Le Lagi Ma E Mafai Ona Ou Mauaina “Le Tele o Faamanuiaga i Aso Taitasi”
Tatou te mafai ona aoaoina le tele o mea e uiga i le tausaga 2024 e ala i le faitauina o le Helamana, mataupu e 5-12, i le Tusi a Mamona. I le toe ono tausaga a o le’i fanau mai le Faaola, sa oo ai Nifae ma Liae i ni tulaga faigata, e le faapea e le pei o aso nei. Sa matua tele taua ma fevaevaea’iga, vevesi ma misa faapolokiki, ma tagata ua taula’i atili atu i mea o le lalolagi nai lo mea tau i le Atua. A o tatou “faatatauina tusitusiga paia uma”1 ia te i tatou, tatou te mafai ona iloa atili le aao o le Atua i o tatou olaga ma mamanu o tatou olaga e pei o le Faaola, o Iesu Keriso.
O loo matala pupuni o le lagi. O loo i ai lo tatou Tama Faalelagi alofa o loo manao e fesootai ma i tatou. Ua Ia faavaeina se mamanu o fesootaiga lea e mafai ona faalogoina ai Lona siufofoga i aso taitasi, e oo lava i itula taitasi. Pe afai tatou te iloa le leo o le lagi, tatou te iloa ai o i tatou o Ana fanau, tatou te iloa e i ai lo tatou Faaola, ma tatou te iloa ua toe fuata’i mai le Ekalesia a Iesu Keriso i luga o le fogaeleele.
O le iloaina pe a musumusu mai le Agaga Paia ia i tatou o le faavae lea o le avea ma soo; ae uma ane, na saunoa mai Peresitene Russell M. Nelson, “I aso a sau, o le a le mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.”2 E toatele uso ma tuafafine e le’i ola faaleagaga i le taimi o Nifae ma Liae,3 ma e toatele o loo feagai ma faalavelave o le ola nei!
E faapefea ona tatou iloa o talanoa mai le Agaga Paia ia i tatou o le sui lona tolu o le Aiga Atua, o le Agaga Paia, “e auina mai e le Tama i le suafa o (Iesu) . . . ”4 o talanoa mai ia i tatou? Tatou vaai atu i faatonuga talu ai nei.
I lana lauga o le Konafesi Aoao ia Oketopa 2023, “O La Tatou Soa Tumau,” Sa faasino atu ai Peresitene Henry B. Eyring i le Helamana 11:23, o faapea mai “. . . ua taunuu . . . toatele sa malamalama e uiga i mataupu moni o aoaoga faavae, ona sa latou maua faaaliga e tele i aso taitasi, sa oo ina latou tala’i atu i le nuu, ma o lea na oo ai ina latou faamutaina a latou finauga i lena lava tausaga” (faaopoopo le faamamafa). Tatou te agavaa i le mauaina o le fesoasoani faalelagi e ala mai i faaaliga, e tele taimi i le aso! E le ofoofogia ea lena mea?
O le vaefaamatalaga i le Helamana 11:23 e auina atu i tatou i le e faapefea—o le a tatou te fai e faaagavaaina ai mo le mauaina “le tele” o faaaliga i aso taitasi. O ta’ua i le Iaroma 1:4, “Ma e toatele o i ai i totonu o i matou o e ua maua faaaliga e tele, ona ua latou le ua maaa uma. Ma o le toatele o e sa le ua maaa ma ua faatuatua, sa mafuta ma le Agaga Paia, o le na te faaali mai mea i le fanauga a tagata, e tusa ma lo latou faatuatua,” (faaopoopo le faamamafa). Mai i lenei mau, tatou te a’oa’o ai o le faamaulalo ma le faatuatua i le Alii e taua i le mauaina o faaaliga mai le lagi.
O le perofeta o Amona i le Alema 26:22 na ia ave le pe faapefea i se isi laasaga sili atu ina ua ia faapea mai, “Ioe, o ia o le e salamo ma faatino le faatuatua, ma faia galuega lelei, ma tatalo pea e le aunoa—o i latou ia ua tuuina mai ia iloa mealilo a le Atua, ioe, o i latou ia e tuuina mai i ai latou te faaali mai mea e lei faaalia lava” (faaopoopo le faamamafa). I le faaopoopo atu i le faamaualalo ma le faatuatua i le Alii, ua valaaulia i tatou e Amona ia salamo (ma ua valaaulia i tatou e Peresitene Nelson e salamo i aso taitasi, ma le olioli,5 e faia mea lelei mo isi tagata, ma ia i ai le tatalo i o tatou loto!
Ou te saili pea tali i fesili ou te le iloa, “mea e le i faaalia lava.”6 Ou te iloa e mafai ona ou maua tali i a’u fesili e ala i le mulimuli i lenei mamanu faaleagaga, faaletusitusiga paia. O le faatino o le faatuatua ia Iesu e ala i le mulimuli i Lana faataitaiga, filifili ia lotomaualalo, tatalo e le aunoa ma faia galuega lelei ma salamo ma le olioli e fesoasoani ai ia i tatou e maua faaaliga sili atu, e oo lava i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o.”7 O faaaliga e ono tupu i ni taimi se tele i le aso i ni aso se tele.
Ona faaali lea e le Alii le mea e mafai pe a tatou mulimuli i Lana mamanu e maua ai “faaaliga e tele” mai le Lagi: “O le mauaina o le avanoa e maua ai mealilo o le malo o le lagi, e tatala mai ai le lagi ia te i latou, e mafuta ai ma le faapotopotoga aoao ma le ekalesia a le Ulumatua, ma olioli i le mafutaga ma le afio ai o le Atua le Tama, ma Iesu le puluvaga o le feagaiga fou.”8
Ou te valaaulia outou, o’u uso e ma tuafafine, ina ia mulimuli i mamanu faaleagaga, faaletusitusiga paia e tatala atili ai pupuni o le lagi. Ou te folafola atu pe a outou faia, o le a outou mauaina le “tele o faaaliga i aso taitasi.”