Itulau i le Lotoifale
Ua Valaaulia Autalavou Matutua i Kiripati e ‘Mafaufau Faaselesitila’ ma Maua le Olioli ia Iesu Keriso
O se faatasiga e lima aso a le Ekalesia ua faa’autuina “Ou te mafaia mea uma lava ia Keriso” (Filipi 4:13), sa faia mo autalavou matutua (YSA), tausaga 18–30, i le Aoga Maualuga a Moronae i Tarawa, Kiribati i le faaiuga o le 2023.
E silia ma le 300 tagata auai na omai mai Tarawa i Saute, Betio ma isi motu mamao e tele, e aofia ai le motu o Kiritimati.
O Elder Jeremy R. Jaggi, o se sui o le Au Peresitene o le Eria a le Pasefika o Le Ekalesia a Iesu Keriso o le Au Paia o Aso e Gata Ai, na faasoaina atu se savali o le alofa ma le olioli i autalavou matutua, e ala i le Zoom.
Na saunoa Elder Jaggi, “O i tatou o le aiga e tasi i le fogaeleele. O o tatou agaga e faavavau ia. Ae tatou te le’i fananau mai, sa tatou nonofo faatasi uma ma le Tama Faalelagi. O se aso o le a o ese ai o tatou tino “i le ala o le lalolagi,” ae o le ute poo ai i tatou, o le a faaauau pea ona ola o tatou agaga. Ona ua faatoilaloina e Iesu Keriso le oti, e ala i lona mana, o lea o le a Ia faia o tatou agaga ia toefaatasia ma o tatou tino. O le a le toe i ai le faanoanoa ma le oti, ma o le a tatou maua le olioli.”
Sa ia fa’aauau, “Tatou te faia uma se sese, ae o le a tatou le faaaluina le faavavau e faanoanoa ai mo a tatou mea sese. Tatou te salamo ma le olioli aua sa pagatia ma le loto i ai Iesu Keriso mo a tatou mea sese. O lea la-ataata!”
Sa fesili atu Elder Jaggi ia i latou, “Pe o outou manatua le mea sa valaaulia ai i tatou e Peresitene Russell M. Nelson e fai? Na saunoa mai Peresitene Nelson, ‘Ia Mafaufau Faaselesitila.’”
“Ia mafaufau faaleagaga ma taulai atu i faamanuiaga e faavavau o faatali mai ia te oe. “Ia mafaufau Faaselesitila e ala i le saunia e mauaina ou faaeega paia i le malumalu,” na ia saunoa ai.
Na faaopoopo mai Elder Jaggi, “I totonu o le malumalu e faailoa atu ai i a te oe le auala e te agaigai atu ai i le olaga faaselesitila. I totonu o le malumalu o le a e latalata atu ai i le Faaola. O lou faaeega paia o le malumalu o se faamanuiaga o se avanoa sili atu i Lona mana. O luitau ma faigata i lou olaga e mafai ona faatoilaloina e ala i le mafaufau faaselesitila.”
O Elder Iotua Tune, Fitugafulu Eria, e alala i Kiripati ma sa auai i le faatasiga. Sa ia faatonuina le autalavou matutua ina ia faia mea i se faatulagana ma i se faasologa ma ia iloaina le mamanu mo se olaga o le olioli.”
Sa ia faamatalaina o le mamanu o le olaga o le ‘faatuputeleina lea o lou faatuatua ia Iesu Keriso; tuuina atu ma le naunauta’i auaunaga faafaifeautalai mo le Alii; faaipoipo i le malumalu paia o le Alii mo le faavavau; faaauau ona saili le aoaoina i aso taitasi e ala i le tatalo, suesue i tusitusiga paia, ma saunoaga a perofeta o Aso e Gata Ai; ma tumau i luga o le ala o feagaiga a le Alii.”
I le sii mai o upu mai le Faataoto e 3:5–6, na valaaulia ai e Elder Tune ia talavou matutua e: “Ia e faatuatua ia Ieova ma [tou] loto atoa.’” Na ia folafola atu o Iesu Keriso o le a “faatonuina [o latou] ala i la latou Malaga i le olaga selesitila.”
Sa aofia ai i le faatasiga ia mafutaga faaleaoaoga i autu i le soifua manuia i le faaletino ma le faaleagaga, ma le ola faalagolago i le tagata lava ia. Sa aofia ai foi aoaoga tau le taitaiga, o le avanoa e fefaasoaa’i ai taleni, ma faatinoga faaleaganuu.
Sa fesoasoani foi tagata talavou e faamama ma faamatagofie le lotoa o le Falemai Tutotonu i Tungaru, o le matafaga i Ambo, ma le fanua i Bairiki.
Sa faatulagaina lenei faatasiga e taitai o le Ekalesia i Kiripati. O Elder ma Sister Fuimaono, o ni faifeautalai matutua mai Samoa, na saunia le tele o itula o tapenapenaga ma le lagolagosua mo tagata auai i le faagasologa atoa o le faamoemoe. O tagata o Le Ekalesia a Iesu Keriso o le Au Paia o Aso e Gata Ai i le lalolagi e galulue fua i o latou afioaga i le gasologa o le tausaga ma aemaise lava i le vaitau o le Kerisimasi. O nei aafiaga e aoao ai le taua o le alofa ma le auaunaga ia i latou e vaivai ma tausia ai le siosiomaga.
O tagata o le Ekalesia e faamalosia e ola e pei o le Faaola e ala i le tausia o tagata i le ala e pei ona sa Ia faia, i o latou soifuaga atoa.