Itulau i le Lotoifale
Ua Maua e se Tagata Musika i Melepone Vavega i le Malaga Faamusika
O tausaga o vavega ma avanoa sa taitai atu ai se alii Ausetalia, o Scott Hamilton, i se Faailoga Faamamaluina tulaga muamua mai i se faalapotopotoga atiina’e tau galuega, Au Paia o Aso e Gata Ai i Lomiga, Faasalalauga ma Faatufugaga (LDSPMA).
O se tagata o Le Ekalesia a Iesu Keriso o le Au Paia o Aso e Gata Ai, sa auai atu Scott i le polokalama o Taui a le LDSP ma sa faia i le Iunivesite a Utah Valley, ISA, ia Oketopa talu ai, lea sa ia taliaina ai lona Taui Faamamaluina mo le vitio faalauiloa o lana pese fatu, ‘Ua ou Vaai i le Keriso.’
Sa tusia e Scott le pese manumalo mo se faamusika o loo ia atiina’eina e igoa o le Se Tasi Taeao Tautotogo, o faamanatuina ai le soifuaga o le perofeta o Iosefa Samita ma lona faletua o Emma. ‘Ua Ou Vaai i le Keriso’ ma le isi pese mai le faamusika ‘Aumaia Taeao’, na aofia uma i le lisi puupuu mo taui i le vaega o Fale Faafiafia.
Na gaosia i le Aai o Sate Leki i le 2022, o le vitio faalauiloa mo le ‘Ua ou Vaai i le Keriso’ o faafiafia ai tagata pepese o Casey Elliot, mai le faamusika toatolu Gentri, ma Savannah Stevenson, o se tamaitai taitai mai le London’s West End. O loo pepese i latou faatasi ma Jayne Galloway i le piano ma le ta selo na filifilia i le faailoga o le Grammy, o Nicole Pinnell.
Na ulua’i vaai ia Scott i a Nicole o ta lana selo i le ata tifaga fetuutuunai o gaosiga faamusika a Rob Gardner, Tamai Mamoe a le Atua, lea e ala i lana selo, sa mataina ai lona suiina o le siufofoga o Keriso. Mulimuli atu i se uunaiga sa tautala atu i lona loto, sa fesootai atu Scott i a te ia i ala faaagafesootai.
“Ou te lagona le tatalaina moni o le faitotoa e le Tama Faalelagi mo a’u e ala i le taleni mataina a Nicole, agalelei ma sootaga,” ua toe manatua e Scott. “Ou te matua faafetai i le i ai o lona loto e naunautai ai e faalogo i a’u musika.”
Sa faailoa atu e Nicole ia Scott i a Casey Elliot, ma sa aapa atu ia Scott i a Savannah Stevenson, e ala atu foi i fesootaiga faaagafesootai, ina ua mavae ona matamata i ana faafiafiaga i luga o se polokalama a le Iunivesite o Polika Iaga. Sa pese toatasi e Savannah mo le, “Aumaia Taeao,’ ma i le pese toalua, ‘Ua Ou Vaai i le Keriso’ faatasi ma Casey.
Ina ua mae’a le pueina o le vitio faalauiloa, e le’i leva ona toe foi atu i Ausetalia, sa puapuagatia ai Scott i le faiai aneurysm ma se lavatoto tele i le pito i luma o lona faiai. O se taotoga faafuasei na faasaoina lona ola ma e faafetaia—faavavegaina—sa ia toe gafatia ona faaauau lana musika.
I le na lava tausaga ia Me, sa ia faatonutonu mamao maia le pueina o isi ana pese se lua, na faafesoota’ia i le Zoom atu i le Falepuepese a Funk i le Aai o Sate Leki.
“Ou te faafetaia e faavavau le Tama Faalelagi ma fomai tipitipi ofoofogia mo le lavea’ia o lo’u ola, ma mo lo’u toalua o Jo mo le uuna’ia lemu o a’u i lenei faigamalaga o le musika mo le toeitiiti 15 tausaga,” na fai mai ai Scott.
E tutusa foi lona agaga faafetai mo ona matua o Nanette ma Frank sa faafaileleina lana taleni musika mai lona laitiiti. I se taimi puupuu a o le’i maliu lona tina i le tausaga e 2020, sa ia folafola atu ia te ia o le a ia faaauau pea ona tusia musika, ma na faapea lava ona ia fai.
“O le toeitiiti lava oo i le oti e mafua ai ona toe taulai le faamuamua a se tasi i le olaga. Mo a’u o le faatuatua lea ma le aiga, ma e faapena foi o musika e faatupu tele ai le faatuatua,”na fai mai ai Scott.
O le taimi nei o loo ia faatonutonu ma tapenaina mo le faalauiloaina o lana polokalama o musika ua leva ona faatalitali iai, Se Tasi Taeao Totogo. Faatasi ai ma le uluai faalauiloaga o fuafuaina i le 2025—i le atoaga tonu o le 205 tausaga talu mai le Uluai Faaaliga ia Iosefa Samita—O lona tala o le a suesue ai aafiaga o Iosefa ma Emma Samita, o o la lagona o le faatuatua ma le tuuto atu i lo la’ua Faaola, o Iesu Keriso, ma lo la’ua faafetai mo Lona alofa mutimutivale.
Ia vaavaai ane mo le muai koneseti e faatatau i lenei faiga faamusika i Melepone, Ausetalia, ia Iuni a sau nei.