Daghang Dekada sa Mapahinungoron nga Serbisyo: Pinili nga mga Pagtulon-an ni Presidente Russell M. Nelson

100 anyos na karon, si Presidente Nelson nagserbisyo og 40 ka tuig isip Apostol. Ang mosunod mao ang pipila sa iyang mga pagtulon-an gikan sa iyang panahon isip Presidente sa Simbahan.

Mosugod nga Maghunahuna sa Tumong

“Ang tumong nga gipaningkamotan sa matag usa kanato mao ang matugahan og gahom diha sa balay sa Ginoo, ma-seal isip mga pamilya, matinud-anon sa mga pakigsaad nga gihimo diha sa templo nga maghimo kanato nga takus sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”

“Samtang Dungan Kita nga Magpadayon sa Unahan,” Liahona, Abr. 2018, 7.

Maghinulsol Matag Adlaw

“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.”

“Kita Makabuhat og Mas Maayo pa ug Mahimong mas Maayo,” Liahona, Mayo 2019, 67.

Paghimo ug Pagtuman sa mga Pakigsaad

“Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios. Kadtong gitugahan diha sa balay sa Ginoo makadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon paggamit niana nga gahom.”

“Espirituhanon nga mga Bahandi,” Liahona, Nob. 2019, 77.

Paminawa ang Ginoo

“Ang atong Amahan nakahibalo nga kon kita gilibotan sa walay kasegurohan ug sa kahadlok, ang labing makatabang nato mao ang pagpaminaw sa Iyang Anak.

“Tungod kay kon kita magtinguha nga maminaw—tinuod nga pagpaminaw—sa Iyang Anak, kita giyahan nga makahibalo unsay buhaton sa bisan unsa nga sirkumstansiya.”

“Paminaw Kaniya,” Liahona, Mayo 2020, 89.

Pilia nga Ipatigbabaw ang Dios Labaw sa Tanan

“Kon maghunahuna sa buot ipasabot sa Hebreo sa pulong nga Israel atong makaplagan nga ang pagpundok sa Israel adunay dugang nga kahulogan. Ang Ginoo nagpundok niadtong andam nga mopatigbabaw sa Dios labaw sa tanan diha sa ilang mga kinabuhi. Ang Ginoo nagpundok niadtong mopili nga tugotan ang Dios nga maoy labing importante nga impluwensiya diha sa ilang mga kinabuhi.”

“Ipatigbabaw ang Dios Labaw sa Tanan,” Liahona, Nob. 2020, 92.

Buntoga ang Kalibotan

“Ang pagbuntog sa kalibotan dili usa ka kalihokan nga mahitabo sa usa ka adlaw o duha. Kini mahitabo sa tibuok kinabuhi samtang kita balik-balik nga modawat sa doktrina ni Kristo. Kita mougmad og hugot nga pagtuo diha ni Jesukristo pinaagi sa paghinulsol kada adlaw ug pagtuman sa mga pakigsad nga motuga nato sa gahom. Kita magpabilin diha sa dalan sa pakigsaad ug mapanalanginan sa espirituhanong kalig-on, personal nga pagpadayag, paglig-on sa hugot nga pagtuo, ug sa pagpangalagad sa mga anghel. Ang pagsunod sa doktrina ni Kristo makahatag sa labing gamhanan, balik-balik nga pagkamahiyason, paghimo og espirituhanong paglambo diha sa atong mga kinabuhi.”

“Buntoga ang Kalibotan ug Pangita og Kapahulayan,” Liahona, Nob. 2022, 97.

Pagpili nga Mahimong Tigpasiugda og Kalinaw

“Ang panagbingkil mopapahawa sa Espiritu—matag higayon. Ang panagbingkil nagsuporta sa sayop nga ideya nga ang pagpakigkomprontase mao ang paagi sa pasulbad sa mga kasungian; apan dili gayod. Ang panagbingkil usa ka pagpili. Ang pagpasiugda og kalinaw usa ka pagpili. Kamo adunay inyong kabubut-on sa pagpili og panagbingkil o panag-uli. Ako moawhag ninyo sa pagpili nga mahimong tigpasiugda og kalinaw, karon ug sa kanunay.”

“Gikinahanglan ang mga Tigpasiugda og Kalinaw,” Liahona, Mayo 2023, 100.

Paghunahuna og Celestial

“Kon kamo mohimo og mga pagpili, ako modapit kaninyo sa pagtan-aw sa taas nga panglantaw—usa ka mahangtoron nga panglantaw. Unaha si Jesukristo tungod kay ang inyong kinabuhing dayon nagdepende sa inyong hugot nga pagtuo diha Kaniya ug sa Iyang Pag-ula. Nagdepende usab kini sa inyong pagkamasulondon sa Iyang mga balaod. Ang pagkamasulundon naglig-on sa agianan alang sa usa ka malipayon nga kinabuhi alang kaninyo karon ug sa halangdon, mahangtoron nga ganti ugma.”

“Paghunahuna og Celestial!,” Liahona, Nob. 2023, 118.