Digital Lamang: Mga Young Adult
Sa Dihang Gusto Nakong Taposon ang Akong Kinabuhi, si Jesukristo Mitabang Kanako nga Makakita sa Kahayag
Sa usa ka malisod nga panahon sa akong kinabuhi, nabati nako nga ang paghikog mao lamang ang akong opsiyon. Apan nakakaplag ko og kalinaw pinaagi ni Jesukristo.
He Comes Again to Rule and Reign [Siya Moanhi Pag-usab sa Pagmando ug Paghari], ni Mary R. Sauer
Nagdako ko nga nagdula og rugby sa Ireland, ug propesyonal akong nakadula niini sa tibuok kalibotan isip usa ka young adult. Samtang mibisita ako sa England aron modula og rugby, nahimamat nako ang mga misyonaryo ug nabunyagan. Sa wala madugay miserbisyo ko og misyon ug dayon mibalhin ngadto sa Australia, diin akong nahimamat ang akong asawa ug nahimong usa ka amahan.
Sa dihang nakabig ko sa ebanghelyo ni Jesukristo, ang akong tibuok nga pamaagi sa kinabuhi nausab sa mubo lang nga panahon! Sa kalit lang aduna na akoy asawa, usa ka panimalay sa lahi nga nasod, ug usa ka anak nga lalaki. Wala ko nagdako sa usa ka tradisyonal nga pamilya, mao nga kining tanan bag-o kanako. Ang pagsunod sa ebanghelyo mihatag kanako og mga panalangin nga wala gayod nako madawat sukad, ug mapasalamaton kaayo ako alang niini.
Apan bisan og napanalanginan ko sa daghan kaayong mga bahin sa akong kinabuhi, mibati gihapon ko nga nabug-atan.
Pagbati nga Nag-inusara sa Akong mga Emosyon
Sa gawas, maayo ang kinabuhi, apan naamgohan nako nga adunay pipila ka kalisod taliwala sa mga panalangin. Sa dihang ang akong asawa ug ako naglalis, naglisod ko sa pagpakigbahin sa akong mga pagbati. Wala ko nakakat-on kon unsaon sa pagpahayag niini sa epektibo nga paagi. Ug tungod kay nagdako ko uban sa dili minyo nga inahan, mibati ko nga ingon og nahisalaag kon mahitungod na sa usa ka relasyon sa kaminyoon.
Nausab ang mga sirkumstansiya, ug dili na ako makadula og rugby. Gibati nako nga dili ako usa ka maayo nga amahan, dili usa ka maayo nga bana, o dili usa ka maayo nga tigsangkap sa panginahanglan. Ug gusto gayod kaayo nako nga mosangkap sa panginahanglan alang sa akong pamilya! Wala lang gayod ako mahibalo kon asa mangayo og tabang.
Ang akong kasinatian sa pagkahimong nabug-atan nag-anam og kagrabe. Nagsugod ko nga nawad-an og paglaom nga moarang-arang pa ang mga butang, ug mas nagmagul-anon ako. Paglabay sa panahon, mitumaw ang mga hunahuna sa paghikog. Tungod kay ang akong mga hunahuna sa paghikog ug depresyon wala matambali, mipili ko sa pagsulay sa paghikog.
Pinaagi sa usa ka milagroso nga panghitabo, naluwas ko sa akong pagsulay sa paghikog. Naamgohan nako kon unsa na ka dili maayo ang akong kahimsog sa pangisip, ug misugod ko sa pagpakigkita sa usa ka magtatambag. Kini nga magtatambag mitabang kanako nga makabaton og mas maayo nga panglantaw ug makakat-on sa pag-ila ug pagpakigbahin kon unsa gayod ang akong gibati.
Pagdapit sa Kahayag sa Ebanghelyo
Uban sa usa ka bag-o nga pagtutok sa paglaom, ug uban sa propesyonal nga tabang alang sa akong kahimsog sa pangisip, determinado ko sa pagsugod sa pagpaayo. Nagsugod ko sa pagkasabot nga bisan og dili ko perpekto, uban sa tabang sa Langitnong Amahan, akong mapabilin nga lig-on ang akong kaminyoon, mahimong usa ka maayo nga amahan, ug mosangkap sa panginahanglan alang sa akong pamilya.
Ang akong ward misuporta usab kanako samtang ako miserbisyo sa bishopric. Ang pagkahimong makaserbisyo sa uban mihatag og laing pagbati sa katuyoan balik sa akong kinabuhi.
Laing milagroso nga panalangin nga mitabang kanako nga makakita sa kahayag mao ang pagtuon sa akong patriyarkal nga panalangin. Ang mga pulong mipahinumdom kanako sa mga saad nga gihimo sa Langitnong Amahan kanako ug mitabang kanako nga makaamgo nga ako mahimong makasangkap alang sa akong pamilya kon unahon nako ang Ginoo.
Nagsugod ko sa pag ampo nga mas sinsero ug sa pagdapit sa kahayag sa ebanghelyo sa akong kinabuhi. Gibasa nako ang akong mga kasulatan matag adlaw. Kanunay kong naningkamot sa pagdapit sa Espiritu aron makabaton ko og positibo nga mga hunahuna ug mapalambo ang akong relasyon sa akong asawa ug anak nga lalaki.
Si Elder Dieter F. Uchtdorf sa Korum sa Napulog Duha ka Apostoles mitudlo:
“Matag karon ug unya ang atong kinabuhi daw mobati, o gani maputos sa kangitngit. …
“… Ako mosaksi nga ang atong buhing paglaom anaa ni Kristo Jesus! Siya ang tinuod, tiunay, ug gamhanang agianan paingon sa balaanong kahayag.
“Ako mopamatuod nga uban kang Kristo, ang kangitngit dili molampos.”
Karon adlaw-adlaw akong makig-istorya sa Langitnong Amahan. Kon ako adunay malisod nga panahon, moluhod ko ug mopahibalo Kaniya nga naningkamot gihapon ko sa akong labing maayo. Karon akong nasabtan nga bisan unsa pa ako ka nabug-atan, kanunay akong makadangop sa akong Manluluwas alang sa tabang.
Wala gayod ako mag-inusara. Sa pagkatinuod ako usa ka anak sa Dios.
Ug kamo usab.
Makakaplag Kamo og Kalinaw ug Paglaom
Ang mga kasulatan nagtudlo kanato nga ang bili sa mga kalag mahinungdanon sa panan-aw sa Dios (tan-awa sa Doktrina ug mga Pakigsaad 18:10). Ug ang Langitnong Amahan nahigugma og maayo sa matag usa sa Iyang mga anak ug nasayod sa atong mga panglimbasog. Bisan kon mahagiton ang kinabuhi, mahimo kitang magbaton sa kanunay og hugot nga pagtuo nga Siya mogiya kanato ngadto sa husto nga mga tawo ug sa husto nga mga kapanguhaan.
Ipalanog nako ang unsay gitudlo ni Presidente Jeffrey R. Holland, Akting nga Presidente sa Korum sa Napulog Duha ka Apostoles: “Bisan unsay inyong mga kabalaka o mga kalisod, ang kamatayon pinaagi sa paghikog napamatud-an nga dili maoy tubag. … Dinhi sa kalibotan nga nagkinahanglan gayod sa tanan nga kahayag nga maangkon niini, palihog ayaw pagamyi ang mahangtoron nga kahayag nga gibutang sa Dios sa inyong kalag sa wala pa kini nga kalibotan. Pakigsulti sa uban. Pangayo og tabang. … Masugakod ninyo ang mga panglimbasog niining mortal nga kinabuhi tungod kay kami motabang ninyo sa pagpas-an niini. Mas lig-on kamo kay sa inyong [gi]hunahuna. Anaa ang tabang, gikan sa uban ug ilabi na gikan sa Dios. Gipangga kamo, ug gipakabili ug gikinahanglan. Nagkinahanglan kami kaninyo!”
Sa sinugdanan, wala ko nakaamgo nga nanglimbasog ko sa akong kahimsog sa pangisip, hangtod nga nahimo kining makaluya kaayo nga halos dili ko makalihok. Ang pagkat-on sa paghisgot mahitungod sa akong mga pagbati ug pagtutok sa akong Manluluwas ug sa Iyang makaayo nga gahom nakatabang kanako nga mobati og kalinaw ug paglaom sa akong kinabuhi pag-usab.
Nasayod ko nga ang pagtutok diha Kaniya makatabang usab kaninyo sa pagkaplag og pagkaayo.