“Sa Unsa nga Paagi nga ang Pag-atubang og mga Hagit Nakatabang Nako sa Pagpalig-on Pag-usab sa Akong Pundasyon sa Hugot nga Pagtuo,” Liahona, Sept. 2024.
Mga Young Adult
Sa Unsa nga Paagi nga ang Pag-atubang og mga Hagit Nakatabang Nako sa Pagpalig-on Pag-usab sa Akong Pundasyon sa Hugot nga Pagtuo
Human sa pipila ka seryoso nga mga hagit sa pangisip, pisikal, ug espirituwal, nadiskobrehan nako unsa ang gipasabot sa pagpangita og kaayohan pinaagi sa atong Manluluwas, nga si Jesukristo.
Nagserbisyo ko isip usa ka misyonaryo sa France sa dihang ang kalibotan mihagsa ug ang COVID-19 maoy nakaingon nga ang tibuok nasod milunsad og estrikto nga paghigpit sa paggawas [lockdown]. Nakigbisog ko og depresyon sa akong tibuok kinabuhi, maong nabalaka ko nga ang limitado nga sirkumstansiya maoy makaingon nga mograbe ang mga simtoma sa depresyon. Apan sa unang semana sa kwarentena [quarantine]—ang semana nga padulong sa makasaysayanong kinatibuk-ang komperensiya niadtong Abril 2020—mao ang usa sa labing espirituwal nga mga semana sa akong kinabuhi.
Sa paghunahuna niini nga hitabo, ang akong mga kasinatian nianang semanaha gibati nako nga ingon og ang Ginoo milig-on nako aron makalahutay sa mga pagsulay.
Si Elder Gary E. Stevenson sa Korum sa Napulog Duha ka Apostoles mihatag og pakigpulong niana nga komperensiya mahitungod sa mga pag-ayo nga himoon sa mga pundasyon sa Salt Lake Temple. Iyang gipahisama ang pag-ayo ngadto sa atong kaugalingong mga kinabuhi ug gihangyo kita sa pagkonsiderar niini nga pangutana:
“Unsay sukaranang mga elemento sa akong espirituwal ug emosyonal nga kinaiya nga makapahimo nako ug sa akong pamilya nga magpabiling makanunayon ug dili matarog, gani sa pagbuntog sa pagtay-og sa yuta ug sa kaguliyang sa seismic nga mga panghitabo nga siguradong mahitabo sa atong kinabuhi?”
Samtang naminaw ko sa iyang pakigpulong, ang Espiritu misulti nako nga, sama sa templo, ako moatubang og mga hagit sa piho nga paagi sa sunod nga panahon sa akong kinabuhi. Apan mibati usab ako nga kon ako modangop ngadto sa Ginoo atol niini nga mga hagit, Siya motabang nako nga malig-on ang akong pundasyon sa hugot nga pagtuo.
Mibati nga Nag-atubang og mga Hagit
Sumala sa akong gipaabot, wala madugay nagkagrabe ang akong depresyon, ug wala madugay mibati ko nga nalit-ag sa walay kataposan nga sikulo sa paghunahuna nga maghikog. Gibati nako ang tumang kasubo sa pangisip, emosyonal, ug sa espirituwal.
Human sa duha ka bulan sa kwarentena, medyo miarang-arang og gamay. Salamat sa mga kausaban sa akong mga sirkumstansya, sama sa tambal nga antidepressant ug sa pagkatapos sa lockdown, nagsugod ko nga mibati og mas maayo sa pangisip. Apan sa wala madugay human niini, nagsugod ko nga lain ang akong pamati ug nakamatikod og tulo sa dagko nga bugon sa tunga-tunga sa akong tutunlan.
Sa sinugdanan gibaliwala ra nako ang mga bugon, apan sa dihang ang mga simtoma nagkagrabe, naklaro nga ako dili mahimong magpabilin sa natad sa misyon. Mipauli ko, diin ako nadayagnos dayon nga dunay kanser sa dugo—Hodgkin’s lymphoma.
Tungod sa akong mga antidepressants medyo napugngan ang akong emosyon, gibati nako nga wala manumbaling sa akong pagsugod og unom ka bulan nga chemotherapy.
Apan bisan pa, nagsugod ko sa pagkaluya sa pisikal nga paagi.
Pagpalig-on Pag-usab sa Akong Espirituwal nga Pundasyon
Usa ka tuig human sa akong chemotherapy nga pagtambal, nagsugod ko nga mibati nga miarang-arang. Mibalik ko sa kolehiyo ug naghimo og mga plano. Apan ang grabe nga espirituwal nga kasakit ug kawalay emosyon nga akong gibati sa akong misyon ug atol sa chemotherapy nahimo na karon nga usa ka kinatibuk-ang pagbati nga walay kadasig mahitungod sa Langitnong Amahan ug ni Jesukristo.
Nakigbisog ko sa akong mga pagbati mahitungod sa unsay akong naagian ug gibati nga ingon og Sila mitalikod kanako sa dihang ako grabeng nakasinati og hilabihang kalisod.
Apan ang Langitnong Amahan nasayod unsa nga mga dalan nga kinahanglan nakong subayon aron ako mamaayo.
Gibati nako nga daw nag-atubang sa nangaguba ug ang mga salin sa akong kanhi lig-on nga hugot nga pagtuo ug sa akong alegre nga personalidad. Gibati nako nga wala na makasabot sa akong kaugalingon. Ang akong kasingkasing mibati sa mga paningkamot sa Ginoo sa pagtabang nako, apan sa espirituwal mibati ko nga sad-an, nahingawa, ug dili takos tungod sa akong wala pagpakabana sa ebanghelyo.
Human mamalandong sa akong espirituwal nga kahimsog sulod sa pipila ka bulan, naaghat ko sa paghimo og gamay nga espirituwal nga mga kausaban sa akong kinabuhi. Gibaliwala nako ang kasakit sa makadiyot, apan gusto nako nga hatagan og pagtagad ang sakit nga akong gibati sa akong kalag tungod sa mga hagit nga akong nasinati.
Sa wala madugay akong nakita ang impluwensya sa Langitnong Amahan sa akong kinabuhi. Wala makahibalo sa akong gibati kon unsa ko ka walay kadasig sa espirituwal, ang mga higala ug mga minahal mihisgot sa hilisgotan mahitungod sa pagkaayo. Usa kanila mipakigbahin gani og usa ka debosyonal nga pakigpulong ni Elaine S. Marshall.
Nagduhaduha, akong gibasa kini.
Isip usa ka nars, si Elaine nagtandi sa mga kapareha tali sa pisikal nga pagkaayo ug espirituwal nga pagkaayo, nag-ingon: “Ang pagkaayo dili pagtambal. Ang pagtambal limpyo, paspas, ug human dayon—sa kasagaran ubos sa anesthesia. … Ang pagkaayo … kanunay usa ka tibuok kinabuhi nga proseso sa pagkaayo ug pagtubo bisan pa, tingali tungod sa malahutayon nga pisikal, emosyonal, o espirituwal nga pag-atake. Nagkinahanglan kini og panahon.”
Wala ko magtuo nga sulagma lang nga ang pagtambal sa akong kanser magkinahanglan og unom ka bulan nga chemotherapy. Ang mga epekto sa chemo grabe, makakulba, ug mahagiton. Makapainteresado, ang pagkat-on sa pagtugot sa akong lawas nga mamaayo sa pisikal nga paagi nagtudlo nako og importante nga baroganan sa espirituwal nga pagkaayo—unsaon nga mosalig sa grasya ni Jesukristo ug mohatag sa akong kaugalingon og higayon ug panahon nga mamaayo ang akong relasyon uban Kaniya ug sa Langitnong Amahan.
Pagdawat sa Grasya sa Manluluwas
Ang grasya mao ang balaanon nga tabang, makapahimo ug makapalig-on nga gahom, ug espirituwal nga pagkaayo. Usa kini ka gasa gikan sa atong Langitnong Amahan, “gihatag ngari kanato pinaagi sa Pag-ula ni Ginoong Jesukristo.”
Ang akong paborito nga ehemplo sa usa ka tawo nga migamit sa makaayo nga gahom ni Jesukristo pinaagi sa Iyang Pag-ula mao si Alma ang Batan-on. Samtang nagbuy-od siya sa kahimtang nga coma sulod sa tulo ka adlaw, gisakit “sa mga kasakit sa usa ka gipanghimaraot nga kalag,” nahinumdom siya sa mga pagtulon-an sa iyang amahan bahin ni Jesukristo (tan-awa sa Alma 36:16–17). Una niyang gitinguha ang tabang ug dayon midangop ngadto ni Kristo, nga nakapausab sa iyang dalan ug mitugot kaniya nga mamaayo sa espirituwal nga paagi (tan-awa sa Alma 36:18–22).
Ang unang lakang nga akong gihimo padulong sa espirituwal nga pagkaayo mao ang pagpangita og tinguha nga makakonektar sa Dios. Si Alma mitudlo nako unsaon sa pagsugod sa dihang siya miingon, “Magpakita og gamay nga pagtuo, oo, bisan kamo wala nay mahimo gawas sa pagtinguha nga motuo, tugoti nga kini nga tinguha mopalihok kaninyo, gani hangtod nga kamo motuo nga kamo makahatag og luna alang sa usa ka bahin sa akong mga pulong.” (Alma 32:27).
Mopamatuod ko gikan sa personal nga kasinatian nga kini nga pagtulon-an tinuod.
Makapalambo kita og tinguha, makatanom og liso (ang pulong sa Dios), ug makaamuma niana nga liso hangtod nga kini mahimong tinuod ug lig-on. Sa kataposan, ang mga bunga sa atong hugot nga pagtuo diha ni Jesukristo maangkon kon kita makakita og mga kausaban sa atong mga binuhatan, sa atong mga opinyon, sa atong mga pagtuo, sa atong mga kasingkasing, sa atong mga hunahuna, ug dayon sa atong mga kalag. Ang atong pundasyon mahimong natukod diha Kaniya (tan-awa sa Helaman 5:12).
Susama sa kasinatian ni Alma, ang akong tinguha nga mobati sa Espiritu ug hingpit nga kalipay sa ebanghelyo mao ang sinugdanan sa kinatibuk-ang kausaban nga midala nako latas sa proseso sa pagkaayo. Sukad niadto, ang Manluluwas mitabang nako sa pagsulbad sa akong milabay nga mga pagbati samtang nakat-on ko nga kalimtan ang akong mga kasuko sa Dios, Kaniya, ug sa akong kaugalingon nga mga kahuyang.
Tungod Kaniya, ang mga kabahin sa akong kaugalingon nga sa akong pagtuo nawala kanako taliwala sa akong mga pagsulay—sama sa akong personalidad, sa akong mga tinguha, ug sa akong gugma sa ebanghelyo—mibalik na kanako ug mipabati nako nga naayo, nabag-o, ug napahiuli.
Usa ka mas Lig-on nga Pundasyon
Ang kasakit ug mga hagit nakapausab nako, apan samtang akong nakaplagan ang pagkaayo pinaagi ni Jesukristo, sa tinuod akong napalig-on pag-usab ang akong pundasyon sa hugot nga pagtuo diha Kaniya. Sa paglabay sa panahon ug ako naayo, akong nakita nga tungod ni Jesukristo, ako makakat-on nga makaangkon og hingpit nga kalipay bisan pa sa akong mga pakigbisog. Nakasabot na ako karon nga ang labing importante nga bahin nga makasinati og pagsulay dili ang unsay makapaluya nato o ang kasakit nga atong gibati—kondili ang unsay mosunod sa higayon nga kita makasinati og pagkaayo ug pagpalig-on pag-usab pinaagi sa grasya sa Manluluwas.
Si Elder Patrick Kearon sa Korum sa Napulog Duha ka Apostoles mitudlo: “Minahal nga mga higala kinsa … nakasinati sa mga kawalay hustisya sa kinabuhi—mahimo kamong makabaton og bag-ong sinugdanan ug presko nga pagsugod. Sa Getsemani ug sa Kalbaryo, si Jesus ‘midala sa Iyang Kaugalingon … sa tanan nga hilabihan nga kagul-anan ug pag-antos nga sukad ninyo nasinati ug nako’ [Russell M. Nelson, “Ang Sakto nga Ngalan sa Simbahan,” Liahona, Nob. 2018, 88], ug nabuntog Niya kining tanan!”
Nan, kadtong kinsa mibati nga naluya, ako mangamuyo kaninyo nga magmaisugon, sa paglahutay, ug sa pagsalig sa Ginoo ug sa Iyang makaayo nga gahom. Uban sa panahon, pailob, ug gani sa labing gamay nga tinguha, ang Iyang grasya makapausab kaninyo, makapalig-on pag-usab sa inyong pundasyon, ug makatabang ninyo nga mobati nga napahiuli pag-usab.
Kana ang gasa nga Iyang gitanyag sa matag usa kanato.
Ang tagsulat nagpuyo sa North Carolina, USA.