Mga Tingog sa mga Santos sa Ulahing mga Adlaw

Ang Basahon ni Mormon Naghatag Kanako og Kalinaw

Ni Américo Chantre Fernandes, Cape Verde

Nasabtan nako nga ang Basahon ni Mormon angay nga tinguhaon aron mausab ang akong kinabuhi ug mas makapaduol nako ngadto kang Jesuskristo.

Paghulagway pinaagi ni Allen Garns

Sa kataposan sa 2013, duha ka batan-ong lalaki nga nagsul-ob og puti nga polo ug korbata ang misugod a pagbisita sa akong igsoong babaye kaduha sa usa ka semana. Nakahibalo ko dihadiha dayon nga naggikan sila sa usa ka simbahan. Para nako, ang pagkahimong kabahin sa simbahan walay apil sa akong plano, mao nga nakahukom ko nga dili makig-estorya nila.

Sa matag pagbisita nila, akong giseguro nga wala ko sa balay inig abot nila. Dunay usa ka butang, hinuon, nga nakaagni sa atong atensiyon. Kanunay silang magdala og asul nga basahon. Wala pa ni nako makita sukad, ug morag katingad-an kaayo kadto kanako.

Usa ka adlaw didto sa sala, ang akong igsoong babaye misugod sa pagpakig-estorya nako mahitungod sa basahon. Sa kalit lang miabot ang duha ka batan-ong lalaki. Dimalas lang, wala na ko makatago gikan nila. Nakita mi nila nga adunay asul nga basahon—ang Basahon ni Mormon—ug nagsugod sa pagpangutana kon unsay akong nahibaloan mahitungod ni Jesukristo.

Naminaw ko sa mga misyonaryo sukad niadtong adlawa, nakadayeg ko kon giunsa nila sa pagkonektar sa ilang mga pagtudlo ngadto sa Basahon ni Mormon. Isip resulta, ang asul nga basahon dili na kaayo katingad-an para nako.

Aduna gihapon koy seryoso nga pagduhaduha mahitungod niini, apan gisugdan nako kini sa pagbasa. Nasabtan nako nga ang Basahon ni Mormon dili puli sa Biblia apan angay tinguhaon aron mausab ang akong kinabuhi ug mas makapaduol nako ngadto ni Jesukristo. Nakat-onan nako nga ang Basahon ni Mormon nakasentro sa Manluluwas. Ang mga pagtulon-an niini nakatabang kanako nga masayod kon si kinsa Siya ug kinsa ang Langitnong Amahan.

Ang Basahon ni Mormon sa wala madugay nakatabang nako nga mahimong mas maayo nga tawo, tinuod nga disipulo ni Jesukristo. Nakatabang usab kini kanako sa pagpalambo sa akong kinaiya samtang nag-atubang ko og inadlaw-adlaw nga mga hagit. Gikan sa akong kasinatian sa pagtuon niini, nasayod ko nga makatabang kini sa mga tawo nga moduol ngadto ni Kristo ug mosunod sa ebanghelyo (tan-awa sa Moroni 10:32). Modasig kini kanato nga mosunod sa mga pagtulon-an ni Kristo ug gamiton kini sa atong inadlaw-adlaw nga kinabuhi. Maghatag kini kanato og kahibalo nga mga anak kita sa Dios. Magdala kini og kalinaw.

Human sa pipila ka semana nga pagpakighimamat sa mga misyonaryo ug pagbasa sa Basahon ni Mormon, nabunyagan ko. Mohatag ko sa akong pagpamatuod sa tibuok nakong kasingkasing nga ang Basahon ni Mormon tinuod ug nga ang pagbasa niini maghatag og paglaom ug kahayag sa labing mangitngit nga mga gutlo, magtabang kanato nga mobati sa gugma ug proteksiyon sa Ginoo. Mapasalamaton ako nga anaa ang Basahon ni Mormon sa akong kinabuhi.