Digital Lamang: Mga Young Adult
7 ka Paagi nga ang Ebanghelyo ni Jesukristo Makapalambo sa Kahimsog sa Pangisip
Ang mga panalangin sa ebanghelyo makatabang kanato nga makakaplag og kalinaw taliwala sa mga isyu sa kahimsog sa pangisip.
Sa tibuok nakong kinabuhi, kanunay nakong nabati ang akong mga emosyon sa halawom nga lebel ug nanglimbasog sa akong kahimsog sa pangisip.
Bisan pa man niini nga mga hagit, nakakaplag ko og mga paagi sa pagsagubang sa kabalaka ug depresyon. Ang mga pamaagi sama sa pagtumar og tambal ug pagpakigtambayayong sa usa ka propesyonal sa kahimsog sa pangisip nakatabang gayod og maayo! Apan sa pagkatinuod, unsay labing nakatabang kanako mao ang makahimo sa pagkonektar ngadto sa usa ka tinubdan sa kalinaw nga mopapha sa kangitngit gikan sa akong kinabuhi: si Jesukristo ug ang Iyang ebanghelyo.
Ug wala ako mag-inusara! Ang mga pagtuon nagpakita nga ang relihiyoso nga pagkalambigit ug ang espirituwalidad adunay kalabotan sa mas maayo nga mga sangpotanan sa kahimsog sa pangisip.
Ang pagsunod sa ebanghelyo makatabang usab kaninyo nga makakaplag og kahayag! Ania lang ang pito ka butang nga mahatag sa ebanghelyo samtang kamo magsagubang sa mga panglimbasog sa kahimsog sa pangisip:
1. Katuyoan ug Direksiyon
Tungod sa ebanghelyo, kita nasayod nga kita mga anak sa langitnong mga ginikanan ug nga adunay katuyoan sa kinabuhi. Kita usab adunay kataposan nga tumong nga paningkamotan: mamahimong sama sa atong Manluluwas ug maningkamot nga makapauli ngadto sa atong Langitnong Amahan.
Si Presidente Russell M. Nelson bag-ohay lang mitudlo: “Tungod sa walay kinutoban nga Pag-ula ni Jesukristo, ang plano sa Langitnong Amahan usa ka hingpit nga plano! Ang pagsabot sa katalagsaon sa plano sa Dios mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot.”
Kini nga balaanon nga mga kamatuoran makatabang kanato nga magpabilin nga konektado ngadto sa unsay labing importante kon ang mga panglimbasog sa kahimsog sa pangisip mohimo sa kinabuhi nga mabati nga walay kaseguroan.
2. Usa ka Dapit nga Mahisakop
Isip mga disipulo ni Kristo, kitang tanan nagkahiusa sa pagsunod sa Manluluwas. Pinaagi sa pagsunod sa ebanghelyo, makapalambo kita og usa ka sosyal nga grupo sa mga higala ug suporta.
Sa pagkatinuod, si Elder Ulisses Soares sa Korum sa Napulog Duha ka Apostoles mitudlo, “Akong ikapaneguro ninyo nga ang kahayag sa bag-ong adlaw mas mosanag pa sa atong mga kinabuhi kon atong tan-awon ug tagdon ang atong mga isig ka tawo uban ang pagtahod ug kaligdong ug isip tinuod nga mga igsoon nga lalaki ug mga igsoon nga babaye diha ni Kristo.”
Ang pagkahimong usa ka miyembro sa Simbahan makasilsil og pagbati nga nahisakop dinhi kanato. Ug ang mga koneksiyon nga atong mahimo makapagamay sa mga pagbati sa pag-inusara nga nag-uban sa mga isyu sa kahimsog sa pangisip.
3. Balaanon nga mga Pamaagi sa Pagsagubang
Kon kita manlimbasog sa kahimsog sa pangisip, ang mga kahanas sa pagsagubang makatabang kanato sa pagproseso sa atong mga emosyon sa usa ka maayo nga paagi. Ug ang espirituhanon nga mga naandan sama sa sinsero nga pag-ampo, pagtuon sa kasulatan, ug pagsimba sa templo mahimong epektibo usab alang sa pagsagubang sa kabalaka o depresyon. Ang pagbuhat niini nga mga butang modapit sa Espiritu Santo, kinsa nailhan isip ang Tighupay (tan-awa sa Juan 14:26), nganhi sa atong mga kinabuhi.
4. Mga Lagda alang sa Pisikal nga Kahimsog
Sa dihang nakigtambayayong sa usa ka doktor aron sa pagsagubang sa kabalaka o depresyon, ang labing importante nga depensa alang niini nga mga sakit kasagaran mao ang pagsunod og usa ka himsog nga paagi sa kinabuhi pinaagi sa diyeta ug ehersisyo. Magtan-aw sa Pulong sa Kaalam (tan-awa sa Doktrina ug mga Pakigsaad 89), mahimong inyong makita kon sa unsang paagi ang mga panalangin niini nga sugo makabenepisyo sa atong kahimsog sa pangisip.
Ang atong hunahuna, lawas, ug espiritu tanan konektado, ug ang pagsunod sa Pulong sa Kaalam motabang kanato sa pag-atiman sa tanang bahin sa atong kaugalingon, nga mahimong mohatag usab sa atong kahimsog sa pangisip og gikinahanglan nga kaayohan.
5. Paglaom pinaagi sa mga Pakigsaad
Ang mga hagit sa kahimsog sa pangisip makahimo sa kinabuhi nga mobati nga walay paglaom ug usahay bug-at ra kaayo nga pas-anon.
Apan ang ebanghelyo ni Jesukristo usa ka ebanghelyo sa paglaom. Ang mga pakigsaad nga atong gihimo ngadto sa Langitnong Amahan nagtanyag kanato og dugang nga kalig-on, seguridad, ug mga rason nga molaom kaysa bisan unsang butang sa kalibotan!
Si Elder Dale G. Renlund sa Korum sa Napulog Duha ka Apostoles mitudlo: “Ang pagtuman sa mga pakigsaad … makahatag usab kanato og kalig-on aron makasagubang sa mga pagsulay ug mga kasakit sa mortalidad. Ang doktrina nga may kalambigitan niining mga pakigsaad makapasayon sa atong dalan ug makahatag og paglaom, kahupay, ug kalinaw.”
6. Kahupay pinaagi sa Pagserbisyo sa Uban
Samtang ang serbisyo pinaagi sa mga calling o pagpangalagad ingon og lisod buhaton kon kamo nanglimbasog sa inyong kaugalingon nga mga palas-anon, kon kita motabang aron sa pagbayaw sa uban, mas sayon nga motan-aw sa gawas sa atong kaugalingon ug mapahinumdoman sa gugma nga ang Langitnong Amahan anaa alang kanato.
Si Presidente Camille N. Johnson, Kinatibuk-ang Presidente sa Relief Society, mipamatuod, “Kita mahimong makig-uban sa Manluluwas sa pagtabang nga mahatagan og temporal ug espirituwal nga kahupayan kadtong mga nanginahanglan—ug sa proseso makakaplag sa atong kaugalingong kahupayan diha ni Jesukristo.”
7. Kalinaw ug Kapahulayan
Ang Langitnong Amahan ug si Jesukristo wala nagdahom kanato nga mahimong perpekto “niining puntoha sa atong mahangtorong pag-uswag.” Aron mapugngan nga ang pagkaperpeksyonista negatibong makaapekto sa atong kahimsog sa pangisip, makatabang ang paghinumdom nga, niini nga kinabuhi, ang Langitnong Amahan ug si Jesukristo gusto lang nga kita mopunting sa atong mga kasingkasing ngadto Kanila, mosalig sa tabang sa Manluluwas kon makahimo kita og kasaypanan, ug magpabilin sa dalan sa pakigsaad.
Si Presidente Nelson mipamatuod: “Samtang kita maningkamot sa pagsunod sa mas taas nga mga balaod ni Jesukristo, ang atong mga kasingkasing ug ang atong pagkatawo magsugod sa pagkausab. Ang Manluluwas motabang nato sa pagbuntog sa mga tintasyon niini nga [napukan nga] kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.”
Sa akong hunahuna kana mao ang usa ka butang nga kitang tanan nangita gayod—kalinaw ug kapahulayan gikan sa mga palas-anon sa kinabuhi. Ug kana mao ang padayon nga gitanyag kanato sa ebanghelyo ni Jesukristo.
Alang nako, ang ebanghelyo nagpadayon sa pagbugaw sa negatibo nga mga emosyon ug mga impluwensiya sa kalibotan ug nagkonekta kanako pag-usab ngadto sa ginagmay nga positibo nga mga impluwensiya sa Manluluwas.