“Pagkaplag og Kahupayan sa Atong Relasyon sa Pakigsaad ngadto sa Dios,” Liahona, Sept. 2024.
Pagkaplag og Kahupayan sa Atong Relasyon sa Pakigsaad ngadto sa Dios
Si Jesukristo ang tinubdan sa putli nga paghigugma, pagkaayo, kalipay, ug kahupayan.
Detalye gikan sa He Comes Again to Rule and Reign [Siya Moabot Pag-usab sa Pagmando ug Paghari], ni Mary R. Sauer
Ang pagkaplag og kahupayan pinaagi sa atong relasyon sa pakigsaad ngadto sa Dios anaa na sa akong hunahuna ug kasingkasing sa taas-taas na nga panahon. Samtang ang propeta sa Dios nagtudlo ug nag-awhag kanato sa pagkat-on mahitungod sa mga pakigsaad, mga templo, ug gahom sa pagkapari, nakita nako ang akong kaugalingon nga nangita, naghigugma, ug nagbusog sa makapadasig nga mga kamatuoran nga gilangkob diha sa mga pakigsaad.
Gilaoman kita nga makig-uban sa Ginoo sa gamhanang paagi pinaagi sa atong mga pakigsaad. Nagtinguha Siya nga magauban kanato sa atong mga kabalaka ug mga desisyon. Dili kinahanglan nga mosagubang sa mga hagit, mga kaguol, kawalay pagsalig sa kaugalingon, ug mga kasakit sa kinabuhi nga mag-inusara. Magauban Siya kanato. Miingon siya: “Dili ko kamo pagabiyaan nga daw mga ilo: Ako mobalik ra kaninyo” (Juan 14:18).
Si Presidente Russell M. Nelson mihulagway sa kinaiya sa Dios ug sa Iyang dakong gugma alang kanato sa dihang mitudlo siya nga “ang dalan sa pakigsaad mahitungod gayod sa atong relasyon uban sa Dios.” Miingon siya: “Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong [mas] suod kay sa wala pa ang atong pakigsaad. Karon nahiusa kita. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato.”
Ang Labing Dako nga Tinubdan sa Kalinaw
Isip usa ka sister nga wala pa maminyo, kining mahigugmaon ug maluluy-on nga relasyon sa pakigsaad ngadto sa akong Amahan sa Langit ug sa Manluluwas adunay lawom nga dapit sa akong kinabuhi ug mao ang akong labing dako nga tinubdan sa kahupay ug kalinaw. Bisan unsa pa ang kahimtang sa atong kaminyoon o kaagi, ang Ginoo nagtinguha nga makig-uban kita Kaniya sa gamhanan nga paagi—aron “mahiusa” (3 Nephi 19:23) ngadto Kaniya sa “tanan [nato] nga buhaton” (Alma 37:37). Samtang mangamuyo kita sa Ginoo alang sa atong kabuhian, ug “mohimo nga ang tanang pagbati sa [atong] [mga] kasingkasing [ma-Iya] sa kahangtoran” (Alma 37:36), ang atong kinabuhi mahimong mapuno niining matahom nga bugkos sa pakigsaad.
Pinaagi sa atong Manluluwas, si Jesukristo, makadawat kita og kahupayan gikan sa pagsagubang sa mga hagit sa kinabuhi nga mag-inusara.
Kitang tanan adunay mga kabalaka ug mga panginahanglan nga mabati nato nga nag-inusara kita niana. Nagpakabana siya sa atong mga kabalaka bisan unsa pa kagamay o kadako. Nabati nako ang panginahanglan sa Iyang tabang sa dihang nabalaka ko mahitungod sa maingon ta nga ginagmay nga mga butang sama sa kanunayng anaa nga akong gitawag og “mga ayohonon sa balay.” Kay walay kapikas nga akong kapangayoan og tambag, mag-inusara ko nga mabalaka mahitungod sa angay nga kontraktor, makiangayon nga presyo, mobakasyon sa trabaho aron makagahin og panahon sa balay, ug mamahimong maayong sinaligan sa akong mga galastohanan ug sa panimalay. Usa kadto ka kadaogan sa miaging adlaw nga akong napaayo ang pultahan sa garahe! Ang Ginoo nakadungog sa akong kabalaka. Ug bisan gamay ra nga bahin sa dako nga plano, Iyang gitubag ang akong pag-ampo. Sa unsang paagi? Pinaagi sa tabang sa usa ka mabination nga silingan, sa tabang sa Espiritu, ug sa usa ka bidyo sa You Tube, napalanginan ko nga mahibalo kon unsay buhaton aron matarong ang pultahan.
Kon ang Ginoo mohatag og pagtagad sa gagmay nga mga panginahanglan, hunahunaa ang Iyang tinguha sa pagpanalangin ug pagsuporta kanato diha sa mas mabug-at nga mga butang sa kasingkasing ug kalag, nga dili lang gamay ra: pag-abuso, pagkaadik, malisod nga mga relasyon sa pamilya, ang mawad-an ug pagkasagmuyo, padayon nga mental ug pisikal nga mga hagit, pinansyal nga kalisod, kanunay nga kabalaka isip ginikanan, kanunay nga kabalaka sa pag-atiman sa usa ka ginikanan, mga panlimbasog sa personal nga pagtuo, sa usa ka anak o kapikas kinsa mipili nga dili mosunod sa ebanghelyo.
Atol sa mga kalisdanan ug mga kahuyang sa kinabuhi, mosalig ug mohupot ko og maayo ngadto sa akong relasyon sa pakigsaad ngadto sa Dios. Samtang misalig ko sa Iyang mahigugmaong pag-amuma ug naningkamot kutob sa akong mahimo sa pagpahinungod sa akong kinabuhi ngadto Kaniya, mihatag Siya og kahupay pinaagi sa Iyang gahom sa pagkapari ug dugay na nga Siya mao ang akong Tighatag sa akong espirituhanon ug temporal nga mga panginahanglan. Nakahatag Siya kanako og kahupayan gikan sa kahadlok, kahupayan gikan sa akong kawalay pagsalig sa kaugalingon, kahupayan gikan sa garbo, kahupayan gikan sa sala, kahupayan gikan sa kamingaw, kahupayan gikan sa kagul-anan.
Si Presidente Nelson tin-aw ug masaligon nga nagtudlo nga: “ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tentasyon, ug mga kasakit.”
Pinaagi ni Jesukristo, kita mahimong makadawat og kahupayan gikan sa pagsagubang sa mga hagit sa kinabuhi nga mag-inusara.
Si Sister Yee uban sa duha ka igsoong babaye didto sa Micronesia kinsa nagpadako og mga bata nga gibiyaan sa ilang mga ginikanan.
Mga igsoong babaye “sa mga Isla sa Dagat”
Samtang namalandong ko sa mga panalangin sa pakigsaad nga nagbugkos kanato ngadto sa Dios, naghunahuna ko mahitungod sa akong mga buluhaton sa pagbisita sa Asia North Area.
Nakahigayon ko sa pagbiyahe ngadto sa gagmayng mga isla sa Chuuk sa Micronesia, mga 1,500 ka milya (2,400 km) sa habagatang sidlakan sa Japan. Duha sa mga igsoong babaye didto sa Weno, Chuuk, mihatag sa ilang mga kinabuhi aron sa pagpadako sa mga bata nga gibiyaan sa ilang mga ginikanan. Kining duha ka sister mibati nga importante ang pagpadako nining mga bata diha sa ebanghelyo. Ang usa niining mga igsoong babaye dalaga pa ug nagtrabaho og full-time isip magtatambag sa eskuwelahan.
Akong gipakigbahin kanila ang mensahe ni Presidente Nelson ngadto sa mga igsoong babaye sa Simbahan, nga kamo nga mga sister gihigugma, mahinungdanon, ug bililhon.
Ang matahom nga dalaga nga sister nga nagpadako sa iyang mga pag-umangkon mihilak nga nagbakho ug miingon nga bag-ohay lang wala siya mobati nga bililhon; gibati niya nga gikalimtan. Apan mipamatuod siya nga gibati niya ang gugma ug pagpakabana sa Dios alang kaniya pinaagi sa mga pulong sa propeta nga siya sa tinuod “bililhon” ug nasayod siya nga tinuod kadto. Gibati niya ang makaayo nga gugma sa Dios, gibati niya ang kahupay.
Ang Ginoo miingon, “Wala ba kamo masayod nga Ako, ang Ginoo nga inyong Dios, naglalang sa tanan nga mga tawo, ug nga Ako nahinumdom niadto kinsa anaa diha sa mga pulo sa dagat?” (2 Nephi 29:7).
Kini nga mga sister nailhan sa ilang Langitnong Amahan ug Manluluwas. Wala sila mag-inusara. Ug kamo ug ako wala usab mag-inusara sa atong mga pagsulay ug mga kalisod. Ang Ginoo mipadala kanako sa 8,500 ka milya (13,700 km) pinaagi sa eroplano, tren, ug sakyanan, ug barko aron dalhon ang gugma sa Dios ug kahupayan ngadto sa “usa ka tawo” didto sa mga isla sa dagat. Ug sa ingon Siya mangita kaninyo ug kanako diha sa atong personal nga mga isla diin tingali mibati kita nga nag-inusara sa mga kabalaka ug mga palas-anon nga atong gidala diha sa atong mga kasingkasing. Anaa siya ug andam nga mopanalangin, mogiya, ug mohupay kanato.
“Makaduol Ako Kaninyo”
Si Presidente Gordon B. Hinckley (1910–2008) sa makausa mihulagway sa kasinatian sa usa ka batan-ong deborsiyado nga “inahan sa pito ka anak nga anaa sa mga pangedaron gikan sa 7 ngadto sa 16. Miingon siya nga usa ka gabii mitabok siya sa karsada kay adunay i-deliver ngadto sa usa ka silingan.” Kini ang iyang mga pulong sumala sa iyang nahinumdoman:
“Sa akong pagbalik aron mopauli, makita nako ang akong balay nga nagsiga ang suga. Madungog nako ang tingog sa akong mga anak sa paggawas nako sa pultahan pila pa lamang ka gutlo. Nanag-ingon sila: ‘Ma, unsay atong pagkaon sa panihapon?’ ‘Pwede ko nimong ubanan sa library?’ ‘Kinahanglan kong mokuha og poster paper karong gabhiona.’ Naluya ug gikapoy, mitan-aw ko sa balay ug nakita nga siga ang suga sa kada kwarto. Naghunahuna ko sa tanang bata nga anaa sa balay nga naghulat nako nga moabot ug motubag sa ilang mga panginahanglan. Misamot kabug-at ang akong pamati labaw pa sa akong mapas-an.
“Nahinumdom ko nga naghilak nga naghangad sa langit, ug miingon, ‘Minahal nga Amahan, dili na gyod nako madaog karong gabii. Gikapoy na kaayo ko. Dili na gyod mahimo. Dili ko makapauli ug moatiman sa tanang mga bata nga ako ra. Mahimo bang moanha ko Nimo ug mouban Nimo bisag sa usa ka gabii lang? …’
“Wala gyod nako madungog ang tubag, apan nadungog ko kini diha sa akong hunahuna. Ang tubag mao: ‘Dili, anak ko, dili ka makaanhi nako karon. … Apan mahimo kong moanha nimo.’”
“Mahimo kong moanha nimo.” Siya miadto kaniya, ug siya moanha kaninyo ug kanako, sama nga ang Manluluwas miadto sa babaye didto sa may atabay diin siya naghago ug naningkamot sa iyang mga adlaw (tan-awa sa Juan 4:3–42). Siya midasig kaniya, mitudlo kaniya, mipahayag sa Iyang pagka-mesiyas ngadto kaniya, ug mihigugma kaniya dihang siya mismo tingali wala mohigugma sa iyang kaugalingon. Ngadto sa babaye sa atabay, ngadto sa batan-ong inahan nga adunay pito ka anak, nganha kaninyo ug kanako, si Jesukristo nagbarog nga andam sa paghatag og kahupayan. Ako mopamatuod nga kita makadawat og kahupayan pinaagi sa atong pagkabugkos pinaagi sa pakigsaad ngadto sa usa ka mahigugmaon nga Dios.
Tingali sama kanako, kamo nangamuyo og panabang nga dili biyaan nga mag-inusara atol sa labing makaugtas sa emosyonal, pisikal, ug espirituwal nga mga panahon sa inyong kinabuhi. Kining malisod kaayong mga panahon sa paglambo nagbilin sa unsay akong gitawag og “espirituwal nga mga marka sa nainat nga panit” sa akong kalag. Apan ako mohatag sa akong pagpamatuod nga Siya mitabang kanako ug Siya motabang kaninyo. Siya mikulit kaninyo diha sa mga palad sa Iyang kamot (tan-awa sa Isaias 49:16; 1 Nephi 21:16). Anaa Siya samtang nagtinguha kamo nga “mahimong matarong diha sa kangitngit.” Wala Siya mobiya kanako, ni Siya mobiya kaninyo. Ug higugmaon ko Siya sa hangtod tungod niana.
Mga kaigsoonan, ang tinubdan sa putli nga gugma, pagkaayo, kalipay, ug kahupayan nakaplagan na diha ni Jesukristo. Ako mopamatuod nga si Jesukristo mao ang kahupayan.
Nagtinguha Siya sa pag-atiman kaninyo, sa pagpanalangin ug pagpasaylo kaninyo. Mianhi Siya alang niini gayod nga katuyoan, aron mohatag kaninyo sa gikinahanglan kaayo nga kahupay nga inyong gitinguha. Siya mao ang Manunubos sa kalibotan, ug ako mopamatuod nga buhi Siya ug nga Siya nagmahal kaninyo.
Gikan sa Brigham Young University sa pakigpulong nga gihatag atol sa Komperensiya sa Kababayen-an niadtong Mayo 3, 2023.