“Russell M. Nelson: Usa ka Propeta alang sa Atong Panahon,” Liahona, Sept. 2024.
Russell M. Nelson: Usa ka Propeta alang sa Atong Panahon
Uban sa usa ka propeta nga mogiya kanato niining ulahing mga adlaw, sa tinuod kita usa ka bulahan nga katawhan.
Si Presidente Russell M. Nelson mitimbaya sa mga tawo human sa usa ka debosyonal sa Singapore niadtong Nobiyembre 20, 2019.
Sa dihang ang usa ka tig-interbiyo misaway sa Ang Simbahan ni Jesukristo sa mga Santos sa Ulahing mga Adlaw nga “usa ka simbahan nga gidumala sa tigulang nga mga tawo,” si Presidente Gordon B. Hinckley (1910–2008) mitubag, “Dili ba talagsaon nga usa ka tawong hingkod ang mangulo, tawo nga maayog panghukom nga dili daling mapaling sa nag-usab-usab nga mga doktrina?”
Si Presidente Russell M. Nelson, ang labing tigulang nga buhi nga propeta nga nagserbisyo niini nga dispensasyon, mao kana ang gihulagway nga tawo. Makompleto niya ang ika-100 nga tuig karong Septiyember 9, 2024. Siya usa ka lider sa dili ordinaryo nga kaluoy ug kamahigalaon, panan-awon ug kalagsik, kamatinuoron ug kaalam.
Gimahal nako si Presidente Nelson. Managhigala kami sulod sa 60 ka tuig ug isigka Apostol sulod sa 40 ka tuig. Sukad sa Enero 2018, napanalanginan ko nga moserbisyo ubos sa iyang direksyon diha sa Unang Kapangulohan sa Simbahan.
Gitawag sa pagpangulo sa gipahiuli nga Simbahan ni Jesukristo ug mahimong labing maayong magtutudlo niini, si Presidente Nelson nakaila a Manluluwas, kansang propeta mao siya. Sa usa ka siglo nga pagpakabuhi ug pagkat-on, milabaw siya sa kabantog sa propesyonal ug militar nga pagserbisyo. Sa iyang dako nga pamilya, siya usa ka mahigugmaon ug epektibo nga lider sa pamilya. Sa mga calling sa Simbahan, lakip sa unom ka tuig isip usa ka propeta sa Ginoo, siya usa ka ehemplo nga lider sa gipahiuli nga Simbahan sa Ginoo.
Sa usa ka siglo nga pagpakabuhi, si Presidente Nelson nakakat-on ug nakapraktis sa labing importante nga butang aron makabaton og kalipay niini nga kinabuhi ug sa kinabuhi nga moabot—nga iyang gitawag nga “labing importante nga mga leksiyon” sa kinabuhi.
Gitudloan kita niya nga kita kinahanglan nga “mosugod nga maghunahuna sa tumong.”
Gimahal niya ang balay sa Ginoo. Atol sa iyang mga tuig isip Presidente sa Simbahan, siya mipahibalo og 153 ka bag-ong templo—mga katunga sa tanang 335 ka templo sa Simbahan nga natukod, gitukod pa, o gipahibalo nga itukod niini nga dispensasyon.
Siya mitudlo nato nga ang tanan natong pagtukod og templo mao ang pagdala sa templo, ug sa mga panalangin sa mga pakigsaad sa templo, nga mas duol ngadto sa mas daghan pa nga mga anak sa Dios. Kana mao ang plano sa Dios.
Si Presidente Nelson mitudlo, “Akong nakat-onan nga ang plano sa Langitnong Amahan alang nato talagsaon, nga unsay atong gihimo niini nga kinabuhi importante gayod, ug nga ang Pag-ula sa Manluluwas maoy nakapahimong posible sa plano sa Amahan.” Ang pagsabot niana nga plano, siya miingon, “mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot. Kini makatugot sa matag usa nato sa pagpili sa unsang paagi kita magpuyo dinhi sa yuta ug asa kita magpuyo sa kahangtoran.”
Isip mga Santos sa Ulahing ga Adlaw, kita tinuod gayod nga bulahan nga katawhan nga gigiyahan sa mapainubsanon nga sulugoon sa Ginoo, si Presidente Nelson, kinsa mapahinungoron sa pag-andam sa kalibotan alang sa Ikaduhang Pag-anhi sa atong Manluluwas ug Manunubos, nga si Jesukristo. Hinaot nga kitang tanan magpadayon sa pag-ampo, pagpamatuod, pagpaluyo, ug pagpasalamat sa Dios alang sa atong propeta—si Presidente Russell Marion Nelson.