Digital Lamang
14 ka mga Ideya sa Paghimo sa Inyong Pagtuon sa Kasulatan nga Mas Makahuloganon
Ang mga miyembro sa tibuok kalibotan nagpakigbahin kon unsa ang ilang gibuhat alang sa mas gamhanan nga pagtuon sa ebanghelyo.
Sa kalibotan nga puno sa kasamok ug nagsumpaki nga mga tingog, ang kalinaw moabot pinaagi sa Manluluwas, kinsa nagdapit kanatong tanan sa pagduol ngadto Kaniya (tan-awa sa Mateo 11:28) ug pagpaminaw sa Iyang mga pulong (tan-awa sa Doktrina ug mga Pakigsaad 19:23). Pinaagi sa pagpangita sa “gagmay ug yano” (Alma 37:6) nga mga paagi sa pagpalambo sa atong inadlaw adlaw nga pagtuon, kita makahimo og usa ka mas suod nga relasyon kang Jesukristo nga magtabang kanato sa pagsugakod sa mga hagit nga atong giatubang sa atong mga kinabuhi.
Nagpahinumdom si Presidente Russell M.Nelson kanato: “[Ang] inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon.”
Ang mosunod nga mga baroganan makatabang samtang mangita kita og mga paagi sa pagkonektar kang Kristo pinaagi sa mga kasulatan.
1. Sugdi sa pag-ampo
“Aron mahimo ang akong pagtuon sa mga kasulatan nga mas makahuloganon, ganahan ko nga magsugod sa pag-ampo. Mangayo ko sa Langitnong Amahan nga unta ang Espiritu Santo magauban kanako aron mas bukas ako sa mga butang nga gusto Niya nga akong makat-onan. Samtang nagbasa, maningkamot ko sa pagpamalandong sa mga pulong sa mga propeta. Maghunahuna ko mahitungod sa ilang mga ehemplo nga mahimong magamit sa akong kinabuhi, unsaon nako sa pagbaton og dugang hugot nga pagtuo, ug sa unsang paagi ako makasalig sa Ginoo, sama sa ilang gibuhat.
“Sa akong pagbuhat sa ingon, makabati ko og kalinaw sa akong kasingkasing ug sa gugma sa Ginoo.”
Gabriela Pineda Portillo, La Libertad, El Salvador
2. Paghimo og Leksiyon nga ipakigbahin sa uban
“Kon ako magtuon sa mga kasulatan, akong isulat ang mga baroganan ngadto sa usa ka leksiyon aron nga akong ikapakigbahin kon unsa ang akong nakat-onan. Kon ako makakat-on og usa ka butang, gusto nakong ipakigbahin kini aron nga akong makita ang mga panglantaw sa akong mga kaedad kabahin sa leksiyon.”
Chester Chan, Singapore
3. Tutokan ang usa ka Tema
“Matag tuig, magpili ko og usa ka piho nga tema nga tutokan. Karon mismo, akong gitan-aw kon sa unsang paagi ang mga tawo diha sa Basahon ni Mormon nangayo og tabang ug mga panalangin ug kon unsa ang reaksiyon sa Ginoo o aksiyon ngadto niana.”
Heike Dröge, Germany
4. Pagtipig og Journal sa Imong Espirituwal nga Panaw
“Nagtakda ko og higayon sa buntag alang sa akong pagtuon sa kasulatan. Sugdan nako sa pag-ampo aron mobukas ang akong kasingkasing sa Balaang Espiritu ug mobati og kasuod ngadto Kaniya. Ang pagsubsob ngadto sa mga kasulatan, pagpamalandong sa kahulogan niini, ug usahay ang pagbasa og balik sa mga tudling sa makadaghang higayon mopahiuyon sa mga tambag diha sa 2 Nephi 32:3 sa “pagbusog diha sa mga pulong ni Kristo.” Ang pagtuon sa kasulatan, para nako, labaw pa sa pagbasa. Pagsulat usab kini sa akong mga hunahuna ug mga impresyon aron ako kining mabasa og balik-balik ug magbusog niini. Sama kini sa paghipos og usa ka journal sa akong espirituwal nga panaw. Makig-istorya sa uban kabahin sa unsay akong nakat-onan makapahimo niini nga mas maayo pa. Among ipakigbahin ang among mga hunahuna ug mga salabotan, ug kini makatabang kanamong tanan nga molambo sa espirituhanong paagi. Niining paagiha, ang akong pagtuon mahimong molabaw pa kay sa pagbasa sa mga pulong—usa kini ka paagi sa pagtukod og usa ka mas lig-on nga koneksiyon diha kang Kristo.”
Naima Glück, Germany
5. Hatagi og Pagtagad ang mga Hunahuna ug mga Pagbati samtang Ikaw Mamalandong sa mga Kamatuoran
“Mohalad ko og pag-ampo mangayo alang sa inspirasyon gikan sa Langitnong Amahan aron mabati ang Espiritu Santo aron makasabot ko sa mensahe, matugkad kini, ug buhaton kon unsa ang akong nakat-onan. Sa akong journal sa pagtuon, akong isulat ang akong mga pagbati ug mga impresyon sa unsay akong gibasa. Akong badlisan ang importanteng mga pulong o mga bersikulo nga makatabang kanako unya ug panahon sa akong inadlaw adlaw nga kinabuhi. Akong koloran og dalag ang ngalan ni Jesukristo ug ang mga titulo nga naghulagway Kaniya, tungod kay kini nagtudlo ug nagpamatuod sa Manluluwas. Mohunong ko sa makadiyot aron sa pagpamalandong sa unsay mga kamatuoran nga gitudlo ug mohatag og pagtagad sa akong mga hunahuna ug mga pagbati sa unsay gusto sa Langitnong Amahan nga akong makat-onan ug masabtan. Siya hingpit nga nakaila kanato ug nasayod sa atong mga sitwasyon.
“Nagsulat ko og mugbong makapadasig nga hugpong sa mga pulong nga naggikan sa mga kasulatan ug sa kinatibuk-ang komperensiya ug ibutang kini diha sa bungbong sa among panimalay aron akong mabati ang paggiya ug paglig-on niini.”
Yahaira Nuñez Periche, Chiclayo, Peru
6. Pangita Unsa ang Epektibo alang Kanimo
“Unsay akong naamgohan mao nga ang paagi diin kita magtuon sa mga kasulatan ug sa kinatibuk-ang komperensiya mao ang butang nga personal kaayo ug managlahi sa matag tawo. Ang ubang mga tawo mohimo og tag-as nga mga sulat, ug ang uban dili. Ang uban ganahan mobasa sa mga kasulatan; ang uban ganahan maminaw o motan-aw. Unsa ang importante nako dili ang pagsunod sa bisan unsang higpit nga lagda o mga pamaagi sa pagtuon. Kabahin kini sa pagsabot kon unsa ang buot ipabati sa mga kasulatan ngari kanako. Pinaagi sa paghimo sa pagtuon diha sa paagi nga mangita og mga tubag sa mga pangutana sa akong kinabuhi, kini nakatabang nako nga dili lang mobasa o maminaw ngadto sa mga pulong apan mokuha og kahulogan gikan niini ug mosabot kon unsa kini kaimportante sa akong kaugalingong kinabuhi. Ang pagbuhat sa ingon nagpahinumdom nako nga ako personal nga nailhan ug nga si Kristo nagpakabana nako isip usa ka indibidwal. Unsay molabaw pa nga pagbati nga mahimong maangkon kaysa pagkahibalo nianang yano nga kamatuoran?”
David Haddock, York, England
7. Magpabilin nga Makanunayon
“Pamilya, eskwelahan, trabaho, ug ang mga pasalig sa kinabuhi usahay makapalisod sa pagbaton og bisan unsa, labi na sa makahuloganon, nga pagtuon sa kasulatan. Isip nagdako nga nagtrabaho ug nagpuyo diha sa mga dairy, among nakaplagan ang among labing nindot nga kahigayonan alang sa kalamposan mao ang 5:30 sa buntag atol sa ting-eskwela—usahay ang among sukdanan sa kalamposan mao kon ang tanan nakabangon ba sa higdaanan! Labaw sa tanan, among nakaplagan nga ang pagkamakanunayon mao ang yawe, apan kana wala naghatag kanamo og dugang panahon. Ang pagkaplag og mga paagi sa pag-usab sa among pagkat-on importante usab. Ang mga butang nga among mahimo samtang nagdrayb o nagpaabot, sama sa pagpaminaw sa maayong mga libro, mga podcast, ug mga pakigpulong ang tanan nakapalambo ug nakapalig-on sa among pagsabot sa mga baroganan sa ebanghelyo ug nagpalig-on sa among relasyon ngadto sa among mahigugmaong Langitnong Amahan ug sa iyang Anak, si Jesukristo, nagtugot kanamo sa pagpabilin sa among mga hunahuna nga magpadayon ngadto Kanila.”
Spencer ug Sarah Parkinson, Iowa, USA
8. Pagbuntog sa Pagkabalda pinaagi sa Pag-ampo
“Para nako, lisod usahay ang makabaton og makahuloganon nga pagtuon sa kasulatan tungod kay akong nabantayan nga dali ra ko nga mabalda sa akong mga gihunahuna, sa akong telepono, sa ubang tawo, sa akong mga lista sa buhatonon, ug uban pa. Apan, akong nabantayan nga kon ako mohalad og sinsero ug kinasingkasing nga pag-ampo sa dili pa ang akong pagtuon sa kasulatan, mas makatutok ako ug makonektar kang Kristo ug makat-on gikan sa Espiritu. Ang pag-ampo mokonektar nako ngadto sa mga gahom sa langit ug makapahimo sa pagdagayday sa personal nga pagpadayag samtang magtuon ako sa mga kasulatan.”
Morgan Green, Alaska, USA
9. I-summarize ug I-save ang Importanteng mga Mensahe
1. “Maghimog mubo nga mga sulat samtang maminaw sa mga pakigpulong sa komperensiya.
2. Sa higayon ang Liahona moabot, badlisan ang importanteng bahin samtang ako magbasa.
3. I-summarize ang importanteng mensahe ug i-file kini diha sa computer (lakip sa mga ngalan, mga kategoriya, ug mga petsa). Mga 16,000 ka importanteng mga mensahe ang na-file na.
4. Moanalisar sa mga tema ug paggamit sa pinulongan.”
Ryuichi Inoue, Japan
10. Hinumdomi ang Unsay Inyong Nakat-onan—ug Paghimo og Kausaban
“Lima ka tuig ang milabay, ang akong magtutudlo sa MTC mipakigbahin kanako og butang nga gisulti kaniya sa usa ka tawo: ‘Kon ang imong pagtuon sa kasulatan wala nakahimo nimo nga gustong mausab, dili pa igo ang imong pagtuon.’
“Para nako, mahitungod kini sa unsay buhaton human nako magbasa sa mga kasulatan. Maningkamot ko sa paghinumdom sa unsay akong nabasa, sa tibuok adlaw ug sa akong kinabuhi. Sa akong paggamit sa mga baroganan nga gitudlo diha sa mga kasulatan, ang akong mga panglantaw ug mga tinguha nausab, ug ang akong pagsabot kon si kinsa si Kristo ug unsa ang Iyang nahimo mitubo.”
Maureen Dätwyler, Solothurn, Switzerland
11. Himoa kining Personal
“Akong ipuli ang akong ngalan sa ubang ngalan diha sa mga kasulatan. Ganahan ko nga maghunahuna nga ang tanang butang sa mga kasulatan adunay kaugalingong personal nga kahulogan ngari kanako. Akong pangitaan og kahulogan ang matag pulong, silaba, pangudlit [comma]. Usahay medyo hinay ko nga makat-on ug makatuhop lang og pipila ka mga bersikulo kay sa tibukok kapitulo. Apan para nako, kini nga paagi mas epektibo ug makatabang nako nga mapaduol ngadto ni Jesukristo ug makapabilin nakong maghunahuna mahitungod Kaniya sa tibuok adlaw. Sukad pa sa akong misyon, akong nabatasan ang pagpaminaw sa kinatibuk-ang komperensiya sa buntag samtang magmake-up ko, manghipos sa akong higdaanan, o mobiyahe sa trabaho. Kini nakapahimo sa akong hunahuna nga bukas ngadto sa husto nga mga butang. Sa gabii sa dili pa ko matulog, akong isulat ang mga pagbati ug mga pasalig nga dinasig sa Espiritu Santo.”
Marina Kharlamova, Krasnoyarsk, Russia
12. Pangutana sa Uban Kon Ikaw Wala Makasabot
“Akong sugdan ang akong pagtuon sa kasulatan sa pag-ampo. Akong isulat ang mga pangutana mahitungod sa ebanghelyo, o akong tutokan ang piho nga hilisgotan nga gusto nakong makat-onan pa. Akong sugdan sa pagtuon kana nga hilisgotan o pangutana ug isulat ang ubang mga pangutana nga mosantop sa hunahuna. Kon dili ko makasabot sa usa ka butang, makig-istorya ko sa akong mga ginikanan o mga higala o mangutana sa akong magtutudlo sa Sunday School.
“Ganahan ko magtuon sa mga kasulatan diha sa templo tungod kay hilom ug didto gamay ra ang mga makabalda.”
Laura Dätwyler, Bern, Switzerland
13. Mopaduol Ngadto sa Ginoo
“Ang pulong sa Ginoo kanunayng mopuno kanako sa akong adlaw. Sa Siyudad sa Ho Chi Minh, Vietnam, diin ako nagpuyo, ang trapik grabe sa mga buntag, mao nga kasagaran moadto ko sa trabaho og sayo ug mogahin og 30 ka minuto sa dili pa motrabaho sa pagtuon sa kasulatan. Mobati ko nga suod kaayo ngadto sa Ginoo kon maningkamot ko sa paggahin og panahon ngadto Kaniya. Dili igsapayan kon unsa ka ka-busy sa usa ka adlaw, ihatag ang imong panahon ngadto sa Dios kutob sa imong mahimo. Kon maningkamot ka sa pagpaduol ngadto Kaniya, Siya mopaduol nganha kanimo (tan-awa sa Doktrina ug mga Pakigsaad 88:63). Siya mogiya kanimo ug mohimo sa imong adlaw nga mas makahuloganon kaysa imong mahimo.”
Mi Vo, Ho Chi Minh City, Vietnam
14. Pangandam sa Espirituhanong Paagi
“Kon ako magtuon sa mga kasulatan, mag-andam ko sa espirituhanong paagi pinaagi sa pag-ampo ug dayon mamalandong ko sa unsay akong natun-an.”
Yuberky Antonia Fernandez Cruz, Santiago de los Caballeros, Santiago, Dominican Republic