Nagkatigulang nga Matinud-anon

Wala na Mag-inusara: 7 ka Paagi sa Pagpalig-on sa Relasyon

Ni Julianne Holt-Lunstad

Propesor sa Psychology, Brigham Young University

Ang pag-inusara usa ka hagit nga mabuntog sa pipila ka paningkamot, emosyonal nga kalagsik, ug tabang gikan sa Manluluwas.

Kitang tanan makasinati gayod og kamingaw usahay. Ang panagsa nga mga pagbati sa pag-inusara mahimong makaayo ug positibo, usa ka biyolohikal nga timailhan nga kinahanglan kita nga mopalig-on sa mga relasyon. Apan ang nagpadayon nga pag-inusara sa kasagaran usa ka dakong babag sa kalipay.

Ang plano sa Langitnong Amahan sa kalipay naglakip sa pagpundok nato diha sa pamilya ug sa mga kongregasyon. Kini makatabang nato dili lamang sa atong mahangtoron nga kauswagan apan usab sa atong tawhanon nga panginahanglan nga mahilakip sa uban, mobati nga kita nahisakop, sa paghatag ug pagdawat og emosyonal nga suporta. Ang siyensya nagsugod na sa pag-ila sa sosyal nga koneksyon isip usa ka biyolohikal nga panginahanglan nga nagsumpay sa atong kahimsog ug pagsugakod.

Usa usab kini ka espirituwal nga panginahanglan. Nagkinahanglan kita sa usag usa alang sa atong espirituwal nga pagkatawo ug pagtubo. Ug ang usa ka langit nga puno sa mahangtorong mga relasyon usa gayod ka malipayon nga panghunahuna (tan-awa sa Doktrina ug mga Pakigsaad 130:2).

Ikonsiderar ang mosunod nga mga ideya sa pagbuntog sa pag-inusara sa inyong kinabuhi:

1. Salig sa Manluluwas. Ang inyong Langitnong Amahan ug si Jesukristo nasayod sa inyong pag-inusara ug gusto nga motabang. Ang pagkahibalo nga ang Manluluwas nakasinati sa kasakit sa pag-inusara makatabang ninyo nga makahibalo nga Siya nakasabot sa unsay inyong gibati. Ang pagpaduol ngadto sa Langitnong Amahan ug sa Manluluwas pinaagi sa pag-ampo, pagtuon sa mga kasulatan, ug pagsimba sa Igpapahulay ug diha sa templo motabang ninyo nga makahibalo nga kamo wala gayod mag-inusara. Sama sa gitudlo ni Presidente Russell M. Nelson: “Kon ang sentro sa atong kinabuhi anaa … ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”

2. Pagmahigalaon. Ang pag-inusara usahay makapaduha-duha nato nga ang pagpaningkamot motabang sa pagpagaan sa atong kasakit. Susiha ang kaugalingon aron mahibaloan kon kamo ba negatibo. Samtang nangita og mga higala, hinumdomi nga ang pagkamahigalaon sa kasagaran gikinahanglan. Ang yanong pagsulti og hello ngadto sa usa ka silingan makahimo og kalainan. Ug ang pagpangita og mga oportunidad sa pagpanalangin sa mga kinabuhi sa uban nga nakigbisog usab sa pag-inusara tingali mao ang labing gamhanan nga mga paagi sa tanan.

3. Pagpalambo og komon nga mga tinguha. Pangitaa ang mga tawo ug mga grupo kansang mga tinguha, mga panglantaw, ug mga sumbanan susama sa inyoha. Mahimo kamong mangita (o gani mokonsiderar sa pagsugod!) og club sa libro, club sa pagserbisyo, club sa pagpanglakaw, grupo sa pagpanganta, grupo sa home evening, o grupo sa mga ginikanan nga ang mga anak mibalhin na.

4. Pagpalig-on sa kasamtangan nga mga relasyon. Kadaghan sa mga tawo aduna nay mga relasyon sa pamilya, mga higala, mga silingan, ug mga miyembro sa ward. Ang pag-amuma niining kasamtangan nga mga relasyon usa ka maayong dapit sa pagsugod sa pabuntog sa pag-inusara. Ang panaghigalaay nagkinahanglan og panahon nga malig-on sa natural nga paagi, mao nga pagmapailubon samtang inyong amumahan ang mga relasyon. Hinumdomi nga ang kalidad sa inyong mga relasyon mas importante kay sa gidaghanon sa inyong mga relasyon.

5. Pangita og mga oportunidad sa pagserbisyo ug pagpakigbahin sa inyong mga talento ug espirituwal nga mga gasa. Hapit walay kinutoban ang mga oportunidad sa pagpangalagad ug pagserbisyo diha sa Simbahan, sa atong mga pamilya, ug sa komunidad. Kon kita mobati nga ang atong mga paningkamot adunay positibo nga epekto sa uban, makahatag kini og kahulogan ug katuyoan sa atong mga kinabuhi. Ang pagbati nga ang atong mga kinabuhi adunay kahulogan ngadto sa uban usa ka dakong panalipod batok sa pag-inusara.

6. Pagplano sa mahagiton nga mga panahon. Ang holiday ug importante nga mga petsa, sama sa anibersaryo sa kamatayon sa usa ka minahal, mahimong lisod. Paningkamoti ang pagpalano og mga kalihokan uban sa mga higala o pamilya sa maong mga adlaw aron makalimot sa paghunahuna sa mga relasyon nga inyong gipanghinaot nga inyong nabatonan.

7. Apil sa buhat sa templo ug sa family history. Usa kini ka gamhanan nga paagi nga mobati og kahupayan ug nahisakop. Si Elder Dale G. Renlund sa Korum sa Napulog Duha ka Apostoles misaad og daghang panalangin nga atong madawat, lakip sa “dugang nga gugma ug pasalamat para sa mga katigulangan ug buhing mga paryente, aron dili na kita mobati nga nag-inusara.”

Alang sa kadaghanan sa mga tawo, ang pag-inusara usa ka hagit nga mahimong mabuntog sa pipila ka paningkamot, emosyonal nga kalagsik, ug tabang gikan sa Manluluwas.

Mubo nga mga Sulat

1. Tan-awa sa Julianne Holt-Lunstad, “Social Connection as a Public Health Issue: The Evidence and a Systemic Framework for Prioritizing the ‘Social’ in Social Determinants of Health,” Annual Review of Public Health, vol. 43 (2022), 193–213.

2. Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 82.

3. Dale G. Renlund, “Buhat sa Family History ug sa Templo: Pagselyo ug Pagkaayo,” Liahona, Mayo 2018, 47.