Unsaon Nako sa Pagpangandam sa Pagdawat sa Manluluwas?

Adunay daghang paagi nga inyong madawat ang Manluluwas nganha sa inyong kinabuhi.

Ang mga Nephita nagkinahanglan nga moandam sa ilang kaugalingon aron modawat sa Manluluwas sa personal mismo ngadto sa ilang presensya. Unsa man ang atong makat-onan gikan sa ilang ehemplo nga makatabang nato sa pagdawat sa Manluluwas sa espirituhanong paagi nganha sa inyong mga kinabuhi?

Pagpamalandong sa mga Butang sa Dios

Kaniadto: Sa dihang si propeta Nephi “nagsubo,” namalandong siya “sa mga butang nga gipakita sa Ginoo ngadto kaniya” (Helaman 10:2–3).

Karon: Ang paghinumdom kon unsa ang nabuhat sa Dios alang kanato, sa mga panahon nga maayo ug dili maayo, mohatag kanato og kalig-on ug kaisog nga magpabiling suod Kaniya ug moatubang sa umaabot uban sa pagtuo.

Si Presidente Henry B. Eyring, Ikaduhang Magtatambag sa Unang Kapangulohan, misugyot nga mamalandong kita matag adalw ug irekord ang atong mga impresyon. Miingon siya, “Kamo tingali mag-ampo ug mamalandong, mangutana: Ang Dios mipadala ba og mensahe nga alang lamang kanako? Nakita ba nako ang Iyang kamot sa akong kinabuhi o sa mga kinabuhi sa akong mga anak?”

Nakita ba nimo ang gugma sa Dios, inspirasyon, o mga panalangin diha sa imong kinabuhi karon?

Dad-a Ninyo ang Ngalan ni Kristo

Kaniadto: Si Mormon maisogon nga mipahayag nga siya “usa ka tinun-an ni Jesukristo” (3 Nephi 5:13).

Karon: Si Elder Jonathan S. Schmitt sa Seventy nagsugyot nga makatutok kita kang Jesukristo pinaagi sa pagdala ngari kanato sa nagkalainlain Niya nga pangalan. Sama pananglit, si Jesus “sama ra kagahapon, karon, ug sa kahangtoran” (1 Nephi 10:18). Gisugyot ni Elder Schmitt nga mahimo natong dad-on kini nga pangalan pinaagi sa pagkamakanunayon sa pagsunod sa ebanghelyo.

Unsa pa ang ubang mga ngalan ug mga pangalan ni Jesukristo nga mahunahunaan nimo ug maaplay sa imong kaugalingon?

Tugoti ang Manluluwas nga Mopundok Kaninyo ngadto Kaniya

Kaniadto: Sa 3 Nephi 10:4–6, si Jesukristo mipahisama sa Iyang Kaugalingon ngadto sa himongaan nga nagpundok sa iyang mga piso. Matahom kini nga larawan sa hunahuna kay kanunay Siya nga nagtawag kanato sa pagduol ngadto Kaniya aron Siya makapanalipod ug makaamuma kanato. Apan kinahanglan atong pilion ang pagduol ngadto Kaniya. Miingon Siya, “Kapila ba Ako magtigom kaninyo ingon sa usa ka himongaan nga magtigom sa iyang mga pisô, ug dili gayod kamo mosunod” (bersikulo 5).

Karon: Si Jesus nagpadayon sa pagpundok kanato karon, apan kinahanglan atong tugotan ang atong mga kaugalingon nga mapundok ngadto Kaniya. Imo bang gitugotan ang imong kaugalingon nga mapundok ngadto sa Manluluwas ug magkakaplag og proteksiyon uban Kaniya, o nagdumili ka ba ug nagpabantang kanunay ngadto sa peligro?

Unsa ang pagdapit nga gipadangat sa Manluluwas kanimo, ug unsay kinahanglan nimong buhaton aron sa pagdawat niini?

Tan-aw ngadto sa Langit

Kaniadto: Makatulo misulay ang mga Nephita sa pagpaminaw sa tingog sa Dios. “Sa ikatulo nga higayon sila nakadungog sa tingog, ug ilang gipaminaw aron madungog kini; ug ang ilang mga mata gitumong ngadto diin nagagikan ang tingog niini; ug sila mihangad [nga nagtutok ngadto] sa langit” (3 Nephi 11:5).

Karon: Usa ka paagi nga kita “mohangad [nga nagtutok ngadto] sa langit” mao ang, sa mga pulong ni Presidente Russell M. Nelson, “paghunahuna og celestial.” Gipasabot niya nga ang usa ka aspeto sa paghunahuna og celestial mao ang “pagka-espirituhanon sa hunahuna.”

Unsa ang imong mabuhat aron mahimong mas espirituhanon sa hunahuna ug “mohangad [nga nagtutok] ngadto sa langit”?