“Unsaon Nako sa Pagpalig-on ang Akong Pagpamatuod sa Propeta?,” Liahona, Sept. 2024.
Dali, Sunod Kanako
Unsaon Nako sa Pagpalig-on ang Akong Pagpamatuod sa Propeta?
Ang kinatibuk-ang komperensiya makatabang kanato sa pagpalig-on sa atong pagpamatuod sa buhing mga propeta.
Diha sa basahon ni Helaman, si propeta Samuel ang Lamanita nagpamatuod mahitungod ni Jesukristo ug naghatag og mga pasidaan ug mga pagdapit ngadto sa mga Nephita (tan-awa sa Helaman 13–14). Sa atong panahon aduna usab kitay kahigayonan sa pagpaminaw sa haom sa panahon nga mga pasidaan gikan sa atong propeta ug ubang mga lider sa Simbahan. Ang pagpatalinghog sa ilang mga pagdapit magtabang kanato sa pagsunod sa dalan sa pakigsaad.
Ang kinatibuk-ang komperensiya mao ang tukmang higayon sa pagpaminaw sa labing bag-o nga mga pulong gikan sa atong dinasig nga mga lider ug mas mapaduol ngadto kang Jesukristo. Ania ang pipila ka paagi nga tingali imong ikonsiderar sa paggamit sa kinatibuk-ang komperensiya aron mapalambo ang imong pagpamatuod sa buhing mga propeta:
-
Sa wala pa ang komperensiya, pamalandongi sa mainampoong paagi nganong importante para nimo nga adunay buhing propeta. Ikonsiderar ang pag-ampo aron makadawat og kompirmasyon gikan sa Espiritu nga ang Presidente sa Simbahan karon mao ang propeta sa Dios, manalagna, ug tigpadayag sa kalibotan karon. “Ang pagkahibalo pinaagi sa pagpadayag nga adunay buhing propeta sa kalibotan makausab sa tanan.”
-
Siksika kon unsay ipasabot sa pagsuporta ug pagpaluyo sa propeta ug sa Kinatibuk-ang mga Awtoridad. Samtang ang ilang mga ngalan gipresentar sa kinatibuk-ang komperensiya alang sa pagpaluyo nga boto, mahimo kamong moapil sa pagpaluyo kanila.
Imahetawo diha sa Sentro sa Komperensiya nga miisa sa iyang kamot alang sa pagpaluyo nga boto -
“Pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang” (Moroni 10:5). Samtang maminaw ka sa mga mensahe gikan sa mga lider sa Simbahan, paminawa ang Espiritu nga magpamatuod nga ang ilang mga pulong tinuod.
-
Ang usa sa mahinungdanong tahas sa propeta mao ang pagpamatuod mahitungod ni Jesukristo ug pagtudlo kanato nga “motan-aw sa Anak sa Dios uban sa hugot nga pagtuo” (tan-awa sa Helaman 8:13–16). Tingali gusto nimong isulat kon unsa ang gitudlo sa propeta ug sa ubang mga mamumulong mahitungod a Manluluwas.
-
“Pinaagi [ni Presidente Russell M. Nelson], kita nakadawat og dili maihap nga mga pagdapit ug gisaaran og mahimayaong mga panalangin kon atong isentro ang atong mga kinabuhi diha sa atong Manluluwas.” Ikonsiderar ang paghimo og lista sa mga pagdapit nga gipadangat pinaagi sa propeta ug sa ubang mga mamumulong atol sa komperensiya. Tan-awa og balik kana nga lista aron makatabang nimo sa pagpaningkamot nga mahimong mas mahisama ni Kristo.
-
Hinumdomi ang pagdapit ni Presidente Nelson: “Awhagon ko kamo sa pagtuon kanunay sa mga mensahe niining komperensiya–gani balik-balikon—sulod sa mosunod nga unom ka bulan.” Samtang maminaw kamo o mobasa pag-usab sa mga mensahe, markahi ang mga butang nga labing importante ninyo.
-
Si Presidente Nelson nagdapit kanato nga “tinguhaa ug laomi ang mga milagro.” Samtang mosunod kamo sa tambag sa propeta ug mohimo og mga kausaban sa inyong kinabuhi, hatagi og pagtagad ang mga panalangin nga inyong madawat ug ang mga milagro nga inyong makita (tan-awa sa Helaman 16:4–5).
Samtang sundon ninyo kini nga mga lakang sa pag-ugmad sa inyong pagpamatuod sa usa ka propeta, manalagna, ug tigpadayag, gamita ang inyong pagtuo ni Jesukristo ug sa mahigugmaong Langitnong Amahan. Ang Dios mahigugmaong mihatag kanato og mga propeta aron mogiya kanato balik ngadto Kaniya—mga propeta kinsa molihok isip iyang tigpama-ba aron mopadayag sa Iyang kabubut-on ngadto sa kalibotan. (Tan-awa sa Doktrina ug mga Pakigsaad 1:38; 21:5–6.) Kon kita mopili sa pagsunod sa Iyang mga sulugoon, kita nagpili sa pagsunod Kaniya.