“Ang Propeta Mogiya Kanato ngadto kang Jesukristo,” Liahona, Sept. 2024.
Ang Propeta Mogiya Kanato ngadto kang Jesukristo
Ang propeta nahibalo sa dalan kay nakaila siya ni Jesuskristo, kinsa mao ang “dalan, ang kamatuoran, ug ang kinabuhi” (Juan 14:6).
Seeking the One [Pagpangita sa Usa], ni Liz Lemon Swindle, dili mahimong kopyahon
Usa ka adlaw naniudto ko didto sa cafeteria sa Administration Building sa Simbahan kuyog sa akong mga kaubanan sa Seventy. Samtang nangaon mi, si Presidente Russell M. Nelson miduol sa among lamesa nga nagdala sa iyang usa ka panaksan sa sabaw ug miingon, “Mahimo ba nga modungan ko ninyo?”
“Pwede kaayo, President!” mitubag ming tanan. Kinsa may dili gustong makig-uban og paniudto sa propeta?
Samtang nangaon mi, si Presidente Nelson mipakigbahin og pipila sa iyang mga kasinatian sa daghang mga nasod nga iyang nabisitahan ug naghisgot mahitungod sa mga tawo nga nakadasig niya. Mabination kaayo siya, maalamon, ug mahinatagon.
Sa pagkahuman namo og paniudto, milingi ko ni Presidente Nelson ug miingon, “President, wala ko kahibalo kon makauban pa gihapon nimo sa samang lamesa bisan kanus-a sa dili madugay. Apan karong gabii, magkita mi sa akong asawa ug sa akong mga anak ug sultihan sila nga nagkadungan mi og paniudto sa propeta. Nahibalo ko nga mangutana sila, ‘Unsay iyang gisulti nga imong isulti namo?’ President, unsay gusto nimo nga akong isulti sa akong asawa ug mga anak?”
Si Presidente Nelson mitan-aw nako sa makadiyot. Naghinamhinam ko nga makadungog kon unsay iyang isulti! “Adunay koy tulo lamang ka pulong para nimo,” miingon siya. “Sultihi ang imong pamilya nga miingon ko, ‘Sunda ang mga sugo.’”
Nakadungog na kitang tanan niini nga tambag gikan ni Presidente Nelson kaniadto, apan nianang higayona, akong gibati ang personal, lig-on nga pagpamatuod nga siya propeta gayod. Gipasalamatan nako siya, ug sa kaulahian niana nga adlaw akong gisultihan ang akong pamilya kon unsay nahitabo. Ang akong mga anak pagkataodtaod mihimo og mga sticker nga “Sunda ang mga Sugo” ug gibutang kini sa among refrigerator ug sa mga samin aron sa pagpahinumdom namo sa gisulti ni Presidente Nelson.
Sukad niadto, namalandong ko sa tambag ni Presidente Nelson. Kon sundon nato ang mga sugo, atong gipakita ang atong gugma sa Langitnong Amahan ug sa Manluluwas. Makapaduol kita Kanila ug magpabilin diha sa Ilang gugma. (Tan-awa sa Juan 14:21; 15:10.)
Kini nga kasinatian kuyog sa propeta mipamatuod kanako sa lawom og makahuloganong espirituwal nga kamatuoran. Sa Primary mokanta kita og, “Sunda’ng propeta; nasayod siya.” Siya tinuod nahibalo sa dalan! Ang propeta nahibalo sa dalan kay nakaila siya ni Jesuskristo, kinsa mao ang “dalan, ang kamatuoran, ug ang kinabuhi” (Juan 14:6). Kon nagsunod kita sa propeta, magiyahan kita padulong ni Jesukristo.
Ang Sagrado nga Tahas sa mga Propeta
Ang Ginoo naghatag og mahinungdanon ug sagrado nga tahas sa mga propeta sa karaan ug sa atong panahon. Mabasa nato sa mga kasulatan nga “sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta” (Joseph Smith Translation, Amos 3:7 ).
Diha sa basahon ni Ezequiel, makat-on kita og dugang mahitungod sa unsa ang gikinahanglan gikan sa mga propeta. Ang Ginoo namulong ngadto ni propeta Ezequiel, “Gibutang ko ikaw [isip] usa ka magbalantay alang sa balay sa Israel; tungod niini patalinghugi ang pulong [gikan] sa akong ba-ba, ug ihatag kanila ang pasidaan gikan kanako” (Ezequiel 33:7).
Ang mga propeta, sama sa mga magbalantay sa tore, adunay espesyal nga mga mando aron mahimong tigpama-ba sa Ginoo sa pagpahayag kon unsa ang Iyang gipadayag ngadto kanila. Ang Ginoo nagkinahanglan sa Iyang mga propeta nga mahimong mga tawo sa pagtuo, mga tawo sa kaligdong, ug mga tawo nga walay kahadlok.
Paghulagway kang Samuel ang Lamanita pinaagi ni Dan Burr
Si Samuel ang Lamanita, pananglitan, mipakita sa iyang hingpit nga pasalig ngadto ni Jesukristo sa dihang mibarog siya sa ibabaw sa paril aron ipahayag ngadto sa mga Nephita ang mga butang nga gibutang sa Ginoo ngadto sa iyang kasingkasing (tan-awa sa Helaman 13:4).
“Ug tan-awa, usa ka anghel sa Ginoo mipahayag niini kanako” miingon si Samuel, “ug siya midala og malipayon nga mga balita sa akong kalag. Ug tan-awa, ako mipadala nganhi kaninyo aron pagbutyag niini nganha usab kaninyo, nga kamo makaangkon unta sa malipayon nga mga balita; apan tan-awa kamo dili modawat kanako” (Helaman 13:7).
Talagsaon para kanako nga si Samuel maisogong mipamatuod sa kamatuoran—bisan kon ang mga Nephita “mibato kaniya … ug …mipanâ kaniya samtang nagbarog siya diha sa paril” (Helaman 16:2). Makita nato kini nga kaisog sa mga propeta, ug mga manalagna karon.
Paghimo sa Kalibotan nga mas Maayong Dapit
Dili pa dugay, nahimamat nako ang magtiayon atol sa usa ka komperensiya sa stake didto sa Nashville, Tennessee, USA. Ang asawa dugay na nga miyembro sa Simbahan sa tibuok niyang kinabuhi. Ang iyang bana dili miyembro.
Miduol sila nako, ug ang bana miingon, “andam na akong magpabunyag.”
Nalipay ko nga nakadungog niana! Nangutana ko kaniya, “Unsa may nausab?”
Gisultihan ko niya, “Sa dihang nadungog nako ang mensahe ni Presidente Nelson sa kinatibuk-ang komperensiya, nakatandog kaayo kadto kanako. Nasayod dayon ko nga propeta siya. Nakaangkon ko og pagpamatuod, ug karon andam na ako nga magpabunyag.”
May nailhan usab ako nga babaye didto sa Cape Coast Ghana, kinsa sa wala damha nga paagi mipasalida sa kinatibuk-ang komperensiya. Wala pa gayod siya makadungog bahin sa Ang Simbahan ni Jesukristo sa mga Santos sa Ulahing mga Adlaw, apan natutok ang iyang atensiyon sa unsay iyang nakita ug nadungog gikan sa mga propeta, mga manalagna, ug mga tigpadayag. Human niadto, gipangita niya ang Simbahan. Nakakaplag siya og usa ka chapel ug nakighimamat sa mga misyonaryo. Sa kataposan nabunyagan siya. Bag-ohay lang gipadalhan ko niya og mga litrato sa iyang kaugalingon nga anaa sa templo aron modawat sa iyang pagtuga.
Kining duha ka panghitabo nagpakita kon unsa ka gamhanan ang mensahe sa propeta ngadto sa kalibotan! Kon ang tanan mopatalinghog sa iyang mensahe, ang kalibotan magmalinawon kaayo. Kitang tanan makatutok kon unsay labing mahinungdanon, lakip na sa pag-ugmad og relasyon ngadto sa Langitnong Amahan ug sa Iyang Anak, si Jesukristo, ug paghimo og lig-on, mahangtorong mga pamilya. Mamahimo usab kita nga maanaa sa labing maayo nato nga pagkatawo tungod kay magasunod man kita sa duha ka dagkong mga sugo: ang paghigugma sa Dios ug paghigugma sa atong silingan (tan-awa sa Mateo 22:37–39). Atong mamugna ang Zion, ang katilingban diin ang gugma, pagkamatarong, ug panag-uyon mopatigbabaw, (tan-awa sa Doktrina ug mga Pakigsaad 82:14).
Kon atong sundon ang propeta, mahimo kitang masaligon nga atong gibuhat kon unsa ang gusto sa Dios nga ipabuhat kanato kay ang mga propeta nagsunod—ug motabang kanato sa pagsunod—ni Jesukristo. Tungod ni Jesukristo, ang tanang butang sa kinabuhi mahimong makahuloganon. “Mobati kita og kalipay bisan unsa pay nahitabo—o wala mahitabo—sa atong mga kinabuhi.” Pinaagi sa pagsunod sa propeta, kita sa tinuoray makahimo sa kalibotan nga mas maayong dapit.
Pagkaplag sa Gisaad nga mga Panalangin
Dihang ang mga Santos gipalayas gikan sa Kirtland, Ohio, ang Unang Kapangulohan mihatag ni Oliver Granger sa katungdanan sa pagbaligya sa mga kabtangan sa mga Santos ug sa paghusay sa mga utang sa Simbahan. Si Oliver, ordinaryo nga tawo nga hapit na mabuta tungod sa pagkabantang sa katugnaw, midawat niining mahagiton nga tahas kay si Propeta Joseph Smith ug ang ubang mga lider mihangyo kaniya. Si Oliver padayon nga naningkamot latas sa daghang mga kalisod, ug ang Ginoo mipasidungog sa iyang mga sakripisyo ug mga paningkamot.
“Ako nahinumdom sa akong sulugoon nga si Oliver Granger,” ang Ginoo miingon. “Tan-awa, sa pagkatinuod Ako moingon ngadto kaniya nga ang iyang ngalan pagahinumdoman diha sa pagkasagrado gikan sa kaliwatan ngadto sa kaliwatan, hangtod sa kahangtoran. …
“… Ug kon siya mapukan siya makabangon pag-usab, kay ang iyang pagsakripisyo mahimo nga labaw pa nga sagrado ngari kanako kay sa iyang paglambo” (Doktrina ug mga Pakigsaad 117:12–13).
Si Oliver ug ang iyang asawa, si Lydia, mipaluyo sa propeta, ug ang Ginoo miangkon nga si Oliver nakahimo sa iyang labing maayo bisan kon wala siya kanunay nga nagmalamposon. Gihatagan sa Ginoo og bili ang iyang mga paningkamot kaysa iyang mga kalamposan.
Isip misyonaryo ug bisan karon, wala ko makahinumdom nga nakadungog og daghan mahitungod ni Oliver Granger, apan ang iyang ngalan gihisgotan diha sa kasulatan tungod kay iyang gisunod ang mando sa propeta ug nakadawat og gisaad nga mga panalangin—ang iyang ngalan pagahinumdoman gayod diha sa pagkasagrado. Atong nakat-onan gikan kang Oliver Granger nga bisan kon ang mando nagagikan sa balaanong tinubdan (pinaagi sa mga propeta), dili kini mogarantiya og hapsay nga agianan nga walay mga hagit, apan ang mga saad segurado (tan-awa sa Alma 37:17).
Unsa kaha ang mahitabo sa kinabuhi kon wala ang mga propeta? Ang buhing propeta ug Presidente sa Simbahan nagrepresentar og direkta nga linya sa komunikasyon gikan sa Dios ngadto sa Iyang katawhan ug mao lamang ang bugtong nga tawo sa yuta kinsa nagdawat og pagpadayag sa paggiya sa tibuok Simbahan. Siya usab naghatag og padayon nga pagpadayag gikan sa Dios aron sa pagtabang kanato sa pagmaniobra sa mga hagit sa atong panahon. Pinaagi sa pagpatalinghog sa tambag sa propeta, makakaplag kita og kalinaw, kamaya, ug direksiyon sa atong mga kinabuhi samtang maningkamot kita nga mahimong mas sama ni Jesukristo. (Tan-awa sa Doktrina ug mga Pakigsaaad 21:4–6.)
Hangopon nato ang mga pagtulon-an ug ang mga ehemplo sa mga propeta sa bag-ong panahon, kay nahibalo nga mga instrumento sila sa mga kamot sa Dios ug mogiya kanato ngadto sa mahangtorong mga panalangin. Ako nahigugma kanila ug nag-ampo alang kanila. Mapasalamaton ko nga nahibalo nga gidasig sila ug motabang sa paggiya kanato ug sa atong mga pamilya ngadto sa Manluluwas, si Jesukristo.