Digital Lamang
Pagkaplag og “Hinungdan nga Maglipay”
Sa dihang mibati og grabing kaguol ang akong kasingkasing, ang mga pulong sa propeta nakapahinumdom kanako sa pagmaya.
Sa dihang miigo ang COVID-19 nga pandemya, nagserbisyo ko isip usa ka misyonaryo sa Dominican Republic. Ang akong unang tulo ka pagbalhin isip usa ka misyonaryo wala nahimong sayon, apan mibati ko nga mapasalamaton tungod sa tanan nakong nakat-onan ug mibati ko og kahinam sa pagpadayon sa paglambo isip usa ka disipulo ni Jesukristo.
Mao nga sa dihang gipapauli ko sulod sa tulo ka bulan, nalibog ug nagguol ako. Ang akong pamati sa kinabuhi walay kasegurohan ug walay paglambo. Sa kadugayan nadawat nako pag-usab ang pagbalhin sa akong assignment ngadto na sa Iowa City, Iowa, USA. Bisan og nagustohan dayon nako ang Iowa ug ang mga tawo didto, mibati ko nga nagsugod ko sa uno. Ang pag-adjust lisod, ug nanglimbasog ko sa mga pagbati sa pagkakulangan, tumang kabalaka, ug pag-inusara.
Nag-ampo ako sa matag adlaw alang sa kahupayan. Ang akong mga gibati bug-at, ug nanglimbasog ko sa pagdala niini sa akong kaugalingon.
Atol sa akong personal nga pagtuon, nabasahan nako ang usa ka kinutlo ni Presidente Gordon B. Hinckley (1910–2008) nga nakatabang nga mogaan-gaan ang akong gibati sa akong kasingkasing. Siya mipakigbahin:
“Ang Ginoo nag-ingon ‘Busa, ipataas ang imong kasingkasing ug paglipay, ug hupot ngadto sa pakigsaad nga ikaw mihimo.’ (Doktrina ug mga Pakigsaad 25:13.)
“Mituo ko nga nagaingon siya sa matag usa kanato, magmalipayon. Ang ebanghelyo usa ka butang sa hingpit nga kalipay. Naghatag kini sa hinungdan nga maglipay.”
Gisugdan nako sa pagkakita ang pulong pagmaya diha sa mga kasulatan sa usa ka bag-ong panglantaw. Usa kini ka pagdapit gikan sa Ginoo nga maglipay. Ang Langitnong Amahan ug si Jesukristo mas nasayod kay sa ni bisan kinsa sa mga hagit, mga kasakit, ug mga kalisdanan nga atong giatubang—ug nagdapit gihapon kanato nga magmalipayon.
Midesisyon ko sa pagdawat niana nga imbitasyon. Bisan tuod og ang akong mga kahimtang wala mausab ug ang akong gibati nga mga kagul-anan wala mawagtang dayon, mibati ko og usa ka mas lawom, nga nagpahipi nga pagbati sa pagkamapasalamaton ug hingpit nga kalipay tungod sa mga panalangin ug mga saad sa ebanghelyo ni Jesukristo.
Ang mga ehemplo gikan sa mga kasulatan nagpakita kanato kon sa unsang paagi ang mga Santos gikan sa nangagi nakakaplag og hingpit nga kalipay bisan sa labing lisod nga mga kahimtang. Sa Helaman, atong makita ang mga miyembro sa Simbahan kinsa midangop ngadto sa ebanghelyo aron sa pagkaplag og hingpit nga kalipay bisan samtang gipanggukod sa uban:
“Bisan pa niana sila nagpuasa ug nag-ampo sa kanunay, ug nag-anam sa pagkalig-on ug pagkalig-on diha sa ilang pagpaubos, ug nagkalig-on ug nagkalig-on diha sa hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan, oo, ngadto sa paglimpyo ug pagbalaan sa ilang mga kasingkasing, diin nga pagbalaan moabot tungod sa ilang pagtugyan sa ilang mga kasingkasing ngadto sa Dios” (Helaman 3:35).
Kon kita motan-aw ngadto sa Manluluwas diha sa atong mga pagsulay, ang atong mga kalag mapuno sa hingpit nga kalipay ug kahupay. Sa pagbuhat sa ingon, atong makat-onan nga mas ipahiuyon ang atong mga kasingkasing ngadto sa Ginoo.
Samtang ako nagpadayon sa pagbuhat sa pagmaya, ako nakakaplag og usa ka mas dakong pagbati sa kalig-on diha sa atubangan sa mga kalisdanan. Bag-ohay lang ako nakaharong og usa ka kasagmuyo nga maoy hingungdan sa pagbati og dakong kagul-anan. Apan samtang ako namalandong sa akong gibati, akong nakita kon unsa kadako ang akong paglambo sukad sa panahon nga ako isip usa ka misyonaryo.
Ang akong kagul-anan wala na makahatag nako og kawalay paglaom, tungod kay ako nakaamgo na nga ang tinuod nga kalipay mao ang pagsunod sa ebanghelyo ni Jesukristo. Kini wala nagpasabot nga dili gayod kita makasinati og mga kalisdanan o nga mag-atubang kita sa matag hagit uban sa hingpit nga grasya.
Si Elder Neil L. Andersen sa Korum sa Napulog Duha ka Apostoles mitudlo:
“Nangita kita og kalipay. Naghandom kita og kalinaw. Nangandoy kita og gugma. Ug ang Ginoo nagbubo kanato sa makapatingalang kaabunda sa mga panalangin. Apan sagol niana nga kamaya ug kalipay, usa ka butang ang sigurado: dunay mga gutlo, mga oras, mga adlaw, usahay mga tuig nga ang inyong kalag masamdan.
“Ang mga kasulatan nagtudlo nga makatilaw kita sa pait ug sa tam-is ug nga adunay “katugbang sa tanan nga mga butang’ [2 Nephita 2:11].”
Ang kasub-anan ug hingpit nga kalipay mahimong magkauban. Pagbangotan ug kamapasalamaton. Kasakit ug kapositibo. Sa pagkatinuod, ang akong mga kasinatian uban sa mga negatibo sa kinabuhi nakapadako sa akong abilidad sa pagbati ug nagtugot kanako sa pag-ugmad og usa ka mas dakong kapasidad nga matagamtam ang kaayo. Ang matahom nga mga kamatuoran sa ebanghelyo mihupay sa akong mga kasakit. Nagsakit gihapon kini apan naputos sa lawom nga gugma sa Manluluwas, usa ka pagpasalamat alang sa maanindot nga mga milagro nga mipuno sa akong kinabuhi, usa ka pagsalig nga ang tanan mamaayo ra alang sa akong kaayohan, ug usa ka lawom nga pagbati sa hingpit nga kalipay.