Digital Lamang
Balaanon nga Pagpanton—Ebidensya sa Gugma sa Dios alang Kanato
Kinahanglan dili kita masorpresa kon ang usa ka mahigugmaon nga Amahan modapit kanato nga mouswag pinaagi sa paghatag kanato og mga higayon sa balaanon nga pagdisiplina.
Mga ginikanan kami sa unom ka kiat kaayo nga batang lalaki. Sa miaging 17 ka tuig, among nakat-onan nga ang Espiritu sa kasagaran mogamit sa among kaugalingon nga kasinatian isip mga ginikanan sa pagtudlo kanamo kon sa unsang paagi ang Langitnong Amahan molihok uban sa Iyang mga anak.
Pipila ka tuig ang milabay, nadunggan ni Jessica nga nagdula sa taas ang among mga batang lalaki. Samtang mas naminaw siya og maayo, nakadungog siya og klaro nga tingog sa usa ka gamit sa pagsulat nga nagwiriswiris sa bungbong.
Mitawag siya, “Mga anak …duna bay nagkolor-kolor sa bungbong?”
Human sa tulo ka segundo nga kahilom, ang sad-an mitubag, “Walaaaaaaa.” Siya dayon mihangyo kaniya nga ikanaog ang gamit sa pagsulat.
“OK, Mama,” miingon siya, naglukso-lukso nga miduol kaniya ug andam, gani malipayon, nga mihatag kaniya og usa ka lapis.
Gitagoan niya ang iyang pikas kamot, nga naggunit og pentel pen [permanent marker] ug klaro nga makita ni Jess, nga nakatago sa iyang luyo.
Human nga milingkod uban niining gamay nga batang lalaki, naminaw kaniya, mikorehir kaniya, ug misulay sa pagtabang kaniya, nakabaton siya niining klaro nga impresyon:
“Nganong usahay sulayan man nako sa pagtago ang akong kaugalingon nga mga sala ug mga kalapasan gikan sa usa ka nasayod sa tanan, mahigugmaon nga Langitnong Amahan?”
Tulo ka Katuyoan sa Balaanon nga Pagpanton
Sa pagkaginikanan, adunay sukaranang kalainan tali sa pagsilot ug pagdisiplina. Sama sa gitudlo ni Presidente James E. Faust (1920–2007), “Ang pulong nga disipulo ug ang pulong nga disiplina naggikan sa samang Latin nga gigikanan—discipulus.” Samtang maningkamot kita nga mahimong mas mapasaligon nga mga disipulo ni Jesukristo, kinahanglan dili kita masorpresa kon ang usa ka mahigugmaon nga Amahan modapit kanato nga mouswag subay sa dalan sa pagkadisipulo pinaagi sa paghatag niini nga mga higayon sa balaanon nga pagdisiplina.
Si Elder D. Todd Christofferson sa Korum sa Napulog Duha ka Apostoles mitudlo nga kini nga “balaanon nga pagpanton adunay labing minos tulo ka katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan.”
Gipadala sa Ginoo si Samuel nga Lamanita aron sa pagsangyaw ngadto sa mga Nephita niadtong mga 6 BC. Sa iyang pagsangyaw, hanas siyang mipakita ug mihatag og gibug-aton sa tulo ka katuyoan sa balaanon nga pagpanton nga gitudlo ni Elder Christofferson. Tingali labing importante, naningkamot si Samuel sa pagtudlo niining nanglimbasog nga mga Nephita nga ang direkta nga pagpanton nga ilang nadawat dili usa ka timailhan nga ang Dios wala nagpakabana kanila. Dili, kini nga pagpanton tukma gayod nga tungod sa Iyang gugma alang kanila.
Giklaro kini ni Samuel sa dihang siya mitudlo, “Ang katawhan ni Nephi nga iyang gihigugma, ug usab siya mipanton kanila; oo, sa mga adlaw sa ilang pagkadaotan siya mipanton kanila tungod kay siya nahigugma kanila” (Helaman 15:3). Kay, sama sa gisulti sa Ginoo, “Gibadlong ug gikastigo nako ang tanan nga akong gihigugma” (Gipadayag 3:19).
Aron sa Pag-awhag Kanato sa Paghinulsol
Ang unang katuyoan sa balaanon nga pagpanton nga gihisgotan ni Elder Christofferson mao ang pag-awhag kanato sa paghinulsol. Sa iyang pangbukas nga mga linya, giklaro ni Samuel nga, tungod sa kadaotan sa mga Nephita, walay makaluwas kanila “gawas sa paghinulsol ug hugot nga pagtuo diha ni Ginoong Jesukristo,” (Helaman 13:6). Kini nga mensahe sa paghinulsol, siya miingon, mao kon ngano nga siya gipadala ngadto kanila: “aron kamo makabaton sa malipayong mga balita” (Helaman 13:7).
Ilha ang koneksiyon nga gihimo ni Samuel tali sa paghinulsol ug sa malipayong mga balita. Si Elder Neil L. Andersen mitudlo, “Ang pagdapit sa paghinulsol … usa ka mahigugmaon nga hangyo sa pagbalik ug sa ‘pagduol og usab’ ngadto sa Dios [tan-awa sa Helaman 7:17]. Kini mao ang tawag sa usa ka mahigugmaon nga Amahan ug sa Iyang Bugtong Anak nga kita mahimong mas molabaw pa, nga mokab-ot sa mas taas nga matang sa kinabuhi, nga mag-usab, ug nga mobati og kalipay sa pagsunod sa mga sugo.”
Si Samuel makanunayon nga mipahayag sa iyang katuyoan sa pagsangyaw: “Kay, mao kini ang katuyoan sa akong pag-anhi sa mga paril niini nga siyudad, … nga unta kamo masayod sa mga kinahanglanon sa paghinulsol” (Helaman 14:11). Ang iyang mga panagna mahitungod ni Kristo gihatag “sa tuyo nga kamo motuo sa iyang ngalan. Kay kon motuo kamo sa iyang ngalan kamo maghinulsol sa tanan ninyong mga sala” (Helaman 14:12–13).
Ang mensahe ni Samuel klaro: “[Paghinulsol] kamo ug [balik] sa Ginoo nga inyong Dios,” (Helaman 13:11).
Aron sa Paglimpyo ug sa Pagbalaan Kanato
Usa ka labing importante nga katuyoan sa paghinulsol mao ang paglunsay ug sa pag-usab sa tawhanon nga kasingkasing. Sa iyang pagdapit nga maghinulsol, gitutokan ni Samuel ang kondisyon sa kasingkasing sa katawhan. Naghisgot siya mahitungod “sa katig-a sa mga kasingkasing sa katawhang mga Nephita” (Helaman 13:8). Nagpasidaan siya batok sa pagbutang sa “ilang kasingkasing sa ilang mga katigayonan” (bersikulo 20). Nagsulti siya kanila nga ang ilang “mga kasingkasing wala mangamuyo sa Ginoo” (bersikulo 22) ug nga sila “[nag]lakaw subay sa garbo sa [ilang] kaugalingong mga kasingkasing” (bersikulo 27).
Ang balaanon nga mga pagpanton makatabang kanato nga makakita sa atong naglatagaw nga mga kasingkasing ug, pinaagi sa “pagtuo ug paghinulsol,” makapahinabo sa unsay gitawag ni Samuel nga “kausaban sa kasingkasing” (Helaman 15:7). Kini nga kausaban, mitudlo si Samuel, mohimo kanato nga “lig-on ug makanunayon sa pagtuo” (bersikulo 8), mobugkos sa atong naglatagaw nga mga kasingkasing ngadto sa Manluluwas nga si Jesukristo.
Aron sa Pagpasubay og Balik sa Atong Dalan sa Kinabuhi
Si Elder Neal A. Maxwell kausa mitawag niini nga mga higayon sa pagpanton nga “balaan nga pagkawala matagbaw.” Naggamit niini nga ideya, si Sister Michelle D. Craig mipasabot, “Ang balaan nga pagkawala matagbaw moabot kon atong itandi ‘kon unsa kita [ngadto] sa unsay atong gahom nga mamahimo.’ Matag usa kanato, kon kita matinuoron, mobati og gintang tali sa asa ug kinsa kita, ug asa ug kinsa ang gusto nato nga mamahimo. Nangandoy kita alang sa mas dakong personal nga kapasidad. … Kining mga pagbati nagagikan sa Dios ug nagmugna og usa ka dinalian nga paglihok.”
Namulong bahin niining ikatulo ug kataposan nga katuyoan sa balaanon nga pagpanton, si Samuel mainiton nga nagdapit sa mga Nephita sa paggamit sa ilang kabubut-on aron sa pagpili nga mosunod “sa dalan sa ilang katungdanan” (Helaman 15:5) o, sama sa gisulti ni Elder Christofferson, “unsay nahibaloan sa Dios nga mas maayo nga dalan.”
“Kamo gawasnon,” mitudlo si Samuel. “Gitugotan kamo sa paglihok alang sa inyong kaugalingon; kay tan-awa, ang Dios naghatag kaninyo og kahibalo ug siya naghimo kaninyo nga gawasnon” (Helaman 14:30). Siya mitabang kanila nga makakita nga samtang gawasnon sila sa paglihok, sila dili gawasnon sa pagpili sa mga sangpotanan sa ilang mga aksiyon. Siya mipasidaan, “Nagtinguha kamo sa tanang adlaw sa inyong kinabuhi nianang dili ninyo maangkon; ug kamo nangita sa kalipay pinaagi sa pagbuhat og kadaotan, mga butang nga sukwahi sa kinaiya niana nga pagkamatarong” (Helaman 13:38).
Ang maayo nga kinabuhi—ang buhong nga kinabuhi, ang malipayon nga kinabuhi—makita diha sa unsay gitawag ni Samuel nga naglakaw nga “nagmatngon sa atubangan sa Dios,” nagtuman “sa pagsunod sa iyang mga sugo ug sa iyang mga balaod” ug nga “naningkamot uban sa walay kaluya nga kakugi” sa pagtabang sa uban sa pagbuhat sa susama (Helaman 15:5–6).
Pagkahimong ang Gusto sa Ginoo nga Kita Mamahimo
Si John Newton sayis anyos sa dihang mitaliwan ang iyang inahan. Siya [inahan] mipadako kaniya nga usa ka tumutuo, nagtudlo ug nagbasa sa kasulatan uban kaniya. Sa 11 nga pangedaron, ang iyang amahan, usa ka manlalayag, midala kaniya ngadto sa dagat. Napalibotan og pagpamalikas, pagpasipala, ug sekswal nga kalapasan, wala ra magdugay nga si John wala na magsunod sa iyang pagtuo. Siya moingon, “Dayag ug gituyo nako nga nagpakasala ug naningkamot nga ang uban magpakasala usab.”
Sa usa ka biyahe kalit nga miabot ang unos kanila. Ang iyang mga tripolante nagsugod sa pagtawag sa Dios aron sa pagluwas kanila. Sa sinugdanan, siya mibiaybiay ug mikasaba kanila, apan sa dihang nahimong klaro kini nga ang ilang kapalaran dili na kalikayan, nag-ampo og kusog si John ngadto sa Dios nga gitudlo kaniya sa iyang inahan.
Miampo siya og susama sa, “Dios, kon Ikaw anaa dinha, palihog luwasa kami. Ug kon buhaton Nimo, ipahinungod nako ang nahibilin sa akong kinabuhi sa pagserbisyo Kanimo.” Mihunong ang unos, mikalma ang mga balod, ug naluwas ang ilang mga kinabuhi. Nagmatinuoron sa iyang gisulti, gipahinungod ni John ang nahibilin sa iyang kinabuhi sa pagserbisyo sa Ginoo. Nahimo siyang usa ka tigsangyaw, ug isip kabahin sa iyang pangalagad, misulat siya og mga balak. Daghan niini nga mga balak mamahimo nga mga himno, sama sa iyang labing inila nga balak:
Ang himno mao ang istorya ni John Newton, apan kini mao usab ang atong istorya, ug kini lagmit inyong istorya. Matag usa kanato, sa atong kaugalingon nga paagi ug sa atong kaugalingon nga mga higayon sa panglimbasog, nakita sa usa ka nasayod sa tanan nga Ginoo kinsa, sa tukmang higayon gayod, manginlabot. Siya mopanton kanato. Siya moluwas kanato. Siya mousab kanato. Ug Siya mohimo dinhi kanato og dili matagbaw nga tinguha nga magpakabuhi sa unsay gitawag kaniadto ni Nephi nga “kinabuhi nga anaa tungod kang Kristo” (2 Nephi 25:27).
Samtang kita mosalig sa balaanon nga pagdisiplina sa Ginoo, mamahimo kita sa gusto kaayo Niya nga kinsa kita mamahimo: mga lalaki ug mga babaye ni Kristo ug mga disipulo ni Jesukristo.