“Ang Dios Adunay Giandam nga Mas Maayo alang Kanato,” Liahona, 2024.
Mga Tingog sa mga Santos sa Ulahing mga Adlaw
Ang Dios Adunay Giandam nga Mas Maayo alang Kanato
Sa dihang gitudloan ko sa mga misyonaryo nga ako anak sa Dios, nasayod ko nga nag-andam Siya og mas daghang mga panalangin alang sa akong pamilya ug kanako.
Litrato gikan sa tigsulat
Nagtubo ko sa gamay, bukirang baranggay sa Pilipinas. Kabos ang akong pamilya. Sa Pilipinas, kon wala kay kwarta, dili ka makaeskwela. Bisan pa niana nga babag, ambisyoso ko nga pagkabatan-on.
Gisultihan nako ang akong mga ginikanan nga gusto kong mahimong doktor o maestro o bisan unsang matang sa propesyonal, apan kanunay ko nilang sultihan nga mohunong sa pagdamgo. Wala mi kwarta aron makaeskwela ko sa unibersidad. Gusto sa akong mga ginikanan nga makontento ko ug dili masagmuyo sa akong kinabuhi.
“Ang pagkapropesyonal dili para nato,” miingon sila. Wala sila motuo nga aduna pay mas maayong butang nga giandam alang sa among pamilya kay sa unsay anaa na kanamo.
Apan kaniadto pa kana sa wala pa kami mopasakop sa Ang Simbahan ni Jesukristo sa mga Santos sa Ulahing mga Adlaw.
Nagpuyo mi nga layo kaayo sa mga siyudad, apan nakaplagan mi sa mga misyonaryo ug nagsige sila og balik. Mihimo sila og daghang mga sakripisyo aron tudloan ang akong pamilya, apan giusab nila ang among kinabuhi sa hangtod.
Mipasakop mi sa Simbahan, nakat-onan nako nga anak ako sa Dios nga adunay potensiyal sa pag-uswag ug pagkat-on ug pagkab-ot (tan-awa sa Moises 1:39; “Ang Pamilya: Usa ka Pamahayag ngadto sa Kalibotan,” Librarya sa Ebanghelyo). Inubanan sa kahibalo sa ebanghelyo, nahibalo ko nga panahon na kadto nga mapauswag ang kahimtang sa akong pamilya. Dili na kami ingon nga mga kabos nga mga tawo sa among gamay nga baranggay—mga takos kami nga mga anak sa Dios nga angayan sa mga panalangin nga Iyang gisaad ngadto sa Iyang matinud-anon nga mga sumusunod.
Ang mga misyonaryo ang nagdala sa ebanghelyo sa akong kinabuhi, ang ebanghelyo ang nagdala sa musika sa akong kinabuhi, ug ang musika ang nakapaeskolar nako aron makaeskwela sa unibersidad. Naangkon nako ang bachelor nga kurso sa sekondarya nga edukasyon ug dayon kurso sa musika, nga nag-major sa pagpangulo og choir. Karon nagtudlo ko og musika sa Liceo de Cagayan University ug nangulo sa Liceo U High School Glee Club. Nangulo usab ako og choir sa mga miyembro sa Simbahan. Ang among misyon mao ang papakigbahin sa kamatuoran sa Dios pinaagi sa musika.
Ang paggradwar sa unibersidad nakahatag kanako og bag-ong kinabuhi. Wala ko masayod kon asa ako karon kon wala pa ang ebanghelyo ni Jesukristo.
Ang tanan angayan nga makaangkon og kahigayonan nga makakat-on, sama nako, nga sila adunay Langitnong Amahan ug nga Siya mipanalangin kanila og mga potensiyal sa pag-uswag ug pagkat-on ug pagkab-ot.