Kapitulo 10

Doktrina ug mga Pakigsaad 23–25

Pasiuna ug Timeline

Sulod sa mga adlaw human sa pag-organisar sa Simbahan niadtong Abril 6, 1830, lima ka indibidwal ang miduol kang Propeta Joseph Smith nga nagtinguha nga masayud sa ilang mga katungdanan kalabut sa gipahiuli nga Simbahan. Usa ka personalize nga tubag ang gihatag sa matag usa kanila sa sunod-sunod nga lima ka pagpadayag nga sa kaulahian gihiusa ngadto sa Doktrina ug mga Pakigsaad 23.

Pagka-Hunyo ug Hulyo 1830, mitumaw ang pagpanggukod didto sa dapit sa Colesville, New York, batok kang Propeta Joseph Smith ug sa ubang mga miyembro sa Simbahan. Atol niining lisud nga panahon gilig-on sa Ginoo ang Propeta ug si Oliver Cowdery pinaagi sa paghatag kanila sa pagpadayag nga narekord sa Doktrina ug mga Pakigsaad 24, diin gitudloan sila nga magmapailubon diha sa kalisdanan ug magpadayon sa pagtudlo ug pagpahayag sa ebanghelyo.

Si Emma Smith, ang asawa sa Propeta, nabunyagan niadtong Hunyo 28, 1830. Ang pagpanggukod nianang panahona nakapugos sa iyang kumpirmasyon nga mauswag hapit duha ka bulan human niana, pagka-Agosto. Pagka-Hulyo 1830, gihatag sa Ginoo ang pagpadayag diha sa Doktrina ug mga Pakigsaad 25 ngadto kang Emma. Niini nga pagpadayag gisultihan sa Ginoo si Emma nga usa siya ka pinili nga babaye ug mihatag kaniya og mga instruksyon kalabut sa iyang mga responsibilidad sa pamilya ug sa Simbahan.

Abril 6, 1830Ang gipahuli nga Simbahan ni Jesukristo giorganisar.

Abril 1830Ang Doktrina ug mga Pakigsaad 23 nadawat.

Hunyo 9, 1830Ang unang komperensya sa Simbahan gipahigayon didto sa panimalay ni Peter Whitmer Sr.

Hunyo 28, 1830Si Emma Smith gibunyagan.

Hunyo 28–Hulyo 2, 1830Si Joseph Smith giaresto ug gibuhian sa pagkahimong usa ka tawo nga nagdala og kasamok didto sa South Bainbridge, New York, ug didto usab sa Colesville, New York.

Hulyo 1830Ang Doktrina ug mga Pakigsaad 24 nadawat.

Hulyo 1830Ang Doktrina ug mga Pakigsaad 25 nadawat.

Agosto 1830Si Emma Smith gikumpirmahan isip usa ka miyembro sa Simbahan.

Makasugat kita og personal nga mga hagit ug mga pangutana sa tibuok natong kinabuhi. Maayo na lang, ang Ginoo mihatag kanato og tabang nga atong gikinahanglan pinaagi sa gasa sa pagpadayag. Ang Doktrina ug mga Pakigsaad 23–25 nagpakita sa abilidad sa Ginoo nga personal nga makigsulti sa matag usa Niya ka anak ug mihatag og talagsaong tambag sumala sa ilang mga kahimtang ug mga panginahanglan. Samtang magtuon ka niining mga pagpadayag, ikonsiderar ang personal nga mga mensahe nga gihatag sa Ginoo nimo ug sa imong mga paningkamot sa pagtuman sa mga pag-aghat nga imong nadawat.

Doktrina ug mga Pakigsaad 23: Dugang nga Makasaysayanong Background

Niadtong Abril 1830, wala madugay human naorganisar ang Simbahan, nakadawat sila si Oliver Cowdery, Hyrum Smith, Samuel H. Smith, Joseph Smith Sr., ug Joseph Knight Sr. og indibidwal nga mga pagpadayag gikan sa Ginoo pinaagi kang Propeta Joseph Smith. Sa dihang kining balaanong mga instruksyon unang namantala diha sa Basahon sa Kasugoan pagka-1833, gilista kini isip lima ka managlahing mga pagpadayag. Hinoon, sukad namantala ang Doktrina ug mga Pakigsaad niadtong 1835, gihiusa kini sa usa ka seksyon.

Doktrina ug mga Pakigsaad 23

Agig tubag sa ilang mga tinguha, gipadayag sa Ginoo ang Iyang kabubut-on ngadto sa lima ka tawo

Basaha ang Doktrina ug mga Pakigsaad 23, nga mangita sa tambag sa Ginoo nga gihatag ngadto sa lima ka indibidwal ug ikonsiderar kon sa unsa kaha nga paagi kini nakaimpluwensya sa dagan sa matag usa sa ilang kinabuhi.

Doktrina ug mga Pakigsaad 23:1–2. “Pagbantay sa garbo, tingali unya og ikaw masulod ngadto sa pagtintal”

Si Oliver Cowdery nahimong instrumento sa paghubad ug pagmantala sa Basahon ni Mormon, ug bag-ohay lang siya nga naordinahan isip ang ikaduhang elder sa Simbahan (tan-awa sa D&P 20:3) sa dihang ang pagpadayag nga narekord sa Doktrina ug mga Pakigsaad 23 nadawat. Hinoon, ang Ginoo, kay nasayud sa mga kalig-on ug mga kahuyang ni Oliver, mitambag kaniya nga magbantay sa garbo. Kalabut niini nga tambag, si Presidente James E. Faust (1920–2007) sa Unang Kapangulohan miingon: “Si Oliver dunay dako nga salabutan ug nakatagamtam og talagsaong espiritwal nga mga panalangin. Hinoon, paglabay sa panahon nakalimot siya sa pasidaan sa Ginoo, ug ang garbo misulod sa iyang kasingkasing. Si Brigham Young sa wala madugay miingon bahin niini nga garbo: ‘Nakakita ko og mga tawo nga nahisakop niini nga gingharian, ug kinsa naghunahuna gayud nga kon wala na sila niini, dili kini mouswag. Ilabi na ang usa ka tawo, kinsa ako karong gihunahuna, … nagasahan gayud sa talagsaong paagi sa pagbarug sa kaugalingon ug sa kinatibuk-ang abilidad. Misulti siya kang Propeta Joseph sa dili direkta nga paagi sa daghan nga higayon nga kon mobiya siya niini nga gingharian, dili na kini mouswag pa. Naghisgot ko mahitungod ni Oliver Cowdery. Iya kining gibiyaan, ug nagpadayon gihapon kini, ug nagmadaugon gihapon batok sa matag misupak nga kaaway, ug mipatunhay sa luwas nga paagi sa tanan niadtong nagpabiling matinud-anon niini’ [sa Journal of Discourses, 11:252]” (“The Prophetic Voice,” Ensign, Mayo 1996, 5–6).

Sa dihang ang mga kalisdanan mitumaw taliwala sa mga Santos didto sa Kirtland, Ohio, niadtong 1837, si Oliver Cowdery misupak kang Propeta Joseph Smith ug sa ubang mga lider sa Simbahan ug mibalhin ngadto sa Missouri. Niadtong 1838, ang mga lider sa Simbahan didto sa Missouri mipasangil kang Oliver Cowdery nga “nanggukod sa mga lider sa Simbahan pinaagi sa makapabalaka nga mga pagkiha, nga nagtinguha sa pagguba sa pagkatawo ni Joseph Smith, wala modawat sa eklesyastikanhong awtoridad sa temporal nga mga kalihokan, mibaligya sa mga yuta didto sa Jackson County [nga supak sa tambag nga gihatag sa Ginoo], ug mibiya sa iyang calling isip Assistant President sa Simbahan ug mihangup sa buhat sa abogasya. Mibalibad si Oliver sa pagpakita atubangan sa council, apan mitubag siya pinaagi sa sulat. Wala niya dawata ang katungod sa Simbahan sa pagdiktar kon unsaon niya pagpadagan sa iyang kinabuhi ug mihangyo nga ang iyang pakigdait sa Simbahan tapuson” (Church History in the Fulness of Times Student Manual, 2nd ed. [manwal sa Church Educational System, 2003], 186–87). Gi-excommunicate si Oliver niadtong Abril 12, 1838. Nagpadayon siya nga walay kalabutan sa Simbahan sulod sa 10 ka tuig apan nabunyagan pag-usab niadtong Nobyembre 12, 1848 didto sa Kanesville, Iowa. Sa wala pa makahimo si Oliver sa paghan-ay nga makig-uban sa mga Santos didto sa Salt Lake Valley, grabe siya nga nasakit didto sa Richmond, Missouri, diin siya namatay niadtong Marso 3, 1850.

Doktrina ug mga Pakigsaad 23:3. “Ang imong katungdanan anaa nganha sa simbahan sa kahangturan … tungod sa imong banay”

Isip magulang ni Propeta Joseph Smith, si Hyrum usa ka saksi sa nag-unang mga panghitabo bahin sa Pagpahiuli. Mitabang siya sa pagmantala sa Basahon ni Mormon pinaagi sa direktang pakig-uban og trabaho sa tig-imprinta. Nagserbisyo siya isip presidente sa unang branch sa Simbahan didto sa Colesville, New York. Sa tibuok niyang kinabuhi matinud-anon siya nga tigsuporta sa iyang igsoon ug dunay lig-ong pagpamatuod nga si Joseph usa ka propeta sa Dios.

Niadtong Mayo 1829 gisultihan sa Ginoo si Hyrum nga magtuon sa Biblia ug sa Basahon ni Mormon usab sa dihang nahuman na ang paghubad ug maghulat sa pagdeklarar sa ebanghelyo hangtud maorganisar ang Simbahan ug mabatunan niya ang pulong (tan-awa sa D&P 11:21–22). Pagka-Abril 1830 sa dihang ang pagpadayag sa Doktrina ug mga Pakigsaad 23 gihatag, human namantala ang Basahon ni Mormon ug naorganisar ang Simbahan, gisultihan siya nga ang iyang calling mao ang pag-awhag—pag-aghat ug pagdasig—“ug pagpalig-on sa simbahan kanunay” (D&P 23:3). Si Elder M. Russell Ballard sa Korum sa Napulog Duha ka mga Apostoles, kinsa apo sa tuhod ni Hyrum Smith, mipasabut kon giunsa paglig-on ni Hyrum ang Simbahan ug sa pagpaluyo sa iyang igsoon nga Propeta:

“Sa tibuok kinabuhi ni Hyrum, ang mga pwersa sa dautan nagkahiusa batok niya sa pagsulay nga mabuntog siya o bisan ang pag-aghat niya nga mahisalaag.

“Human sa kamatayon sa iyang magulang nga si Alvin niadtong 1823, gipas-an ni Hyrum ang dakong responsibilidad sa pamilyang Smith. Sa samang higayon, gitabangan ug giserbisyuhan niya ang iyang igsoon, si Joseph ang Propeta, sa tibuok taas ug lisud nga proseso sa Pagpahiuli. Sa katapusan, miapil siya kang Joseph ug sa ubang mga martir sa miaging mga dispensasyon sa ebanghelyo. Ang iyang dugo gipaagas isip iyang katapusang pagpamatuod sa kalibutan.

“Taliwala niining tanan, lig-ong nagbarug si Hyrum. Nahibalo siya sa agian sa iyang kinabuhi, ug mahunahunaon siyang mipili nga sundon kini. Ngadto ni Joseph, si Hyrum nahimong kauban, tigpanalipod, tigsangkap, kasumbungan, ug sa katapusan miapil kaniya isip usa ka martir. Ang dili makiangayon nga pagpanggukod milukop kanila sa tibuok nilang kinabuhi. Bisan kon mas magulang siya, giila ni Hyrum ang balaanong katungdanan sa iyang igsoon. Samtang mihatag siya ni Joseph og kusganong tambag panagsa, kanunayng modangup si Hyrum ngadto sa iyang manghud.

“Namulong ngadto sa iyang igsoon, si Joseph kausa miingon, ‘Brother Hyrum, pagkamatinud-anon sa imong kasingkasing! O unta ang Mahangturong Jehova mokorona kanimo og mahangturong mga panalangin sa imong ulo, isip ganti alang sa imong pag-atiman sa akong kalag! O unsa kadaghang kasubo ang atong gisaw-an’ [sa History of the Church, 5:107–8]. …

“Mihatag si Hyrum og walay pagkapakyas nga pagserbisyo ngadto sa Simbahan” (“Hyrum Smith: ‘Firm as the Pillars of Heaven,’” Ensign, Nob. 1995, 6–7).

Doktrina ug mga Pakigsaad 23:4. “Ikaw wala pa matawag sa pagsangyaw ngadto sa atubangan sa kalibutan”

Si Samuel Smith, ang manghud sa Propeta, mao ang ikatulong tawo nga nabunyagan human sa pagpahiuli sa Aaronic Priesthood niadtong Mayo 1829. Bisan kon dili siya ingon ka inila sa iyang mga igsoon nga sila si Joseph ug Hyrum, si Samuel mao ang usa sa Walo ka mga Saksi nga nakakita sa bulawang mga palid. Sa panahon nga ang pagpadayag narekord diha sa Doktrina ug mga Pakigsaad 23, ang Ginoo wala mosugo kang Samuel sa pagsangyaw sa ebanghelyo. Hinoon, human siya maordinahi nga elder niadtong Hunyo 9, 1830, si Samuel gitawag isip ang unang misyonaryo sa Simbahan ug nagsugod sa pagbisita sa kasilinganang mga lungsod libut sa Palmyra aron sa pagbaligya og mga kopya sa Basahon ni Mormon ug sa pagsangyaw sa ebanghelyo. Sa usa sa maong biyahe mibaligya siya og kopya sa Basahon ni Mormon nga sa katapusan miresulta sa pagkakabig nila ni Brigham Young ug Heber C. Kimball ug sa daghang sakop sa ilang pamilya.

Doktrina ug mga Pakigsaad 23:5. “Ang imong balaan nga tawag usab mao ang pag-awhag, ug pagpalig-on sa simbahan”

Ang Doktrina ug mga Pakigsaad 23 mao ang ikaduhang narekord nga pagpadayag nga gipamulong ngadto kang Joseph Smith Sr. Ang amahan sa Propeta mihatag og gikinahanglan nga suporta ug pag-awhag ngadto sa iyang anak. Nahimo siyang miyembro sa Simbahan sa adlaw nga naorganisar kini. Mituman siya og usa ka misyon, nga nagsugod niadtong Agosto 1830, kauban sa iyang anak nga si Don Carlos ngadto sa upstate New York aron dad-on ang mensahe sa ebanghelyo ngadto sa mga paryente. Sa iyang calling sa kaulahian isip unang patriarch sa Simbahan, siya adunay oportunidad sa pagpanalangin, pag-awhag, ug pagtambag sa daghang nag-una nga mga sakop sa Simbahan.

Doktrina ug mga Pakigsaad 23:6–7. “Kini mao ang imong katungdanan sa paghiusa uban sa tinuod nga simbahan”

Sa panahon nga ang pagpadayag nga narekord diha sa Doktrina ug mga Pakigsaad 23 nadawat, si Joseph Knight Sr. wala pa mabunyagi isip miyembro sa Simbahan. Suod siya nga higala ni Propeta Joseph Smith ug mipakita kaniya og dakong kamabination. Gihatagan niya og mga suplay ang Propeta samtang nagtrabaho siya sa paghubad sa Basahon ni Mormon. Mibati siya og tinguha nga magpabunyag kauban ang ubang mga tawo sa adlaw nga naorganisar ang Simbahan, apan wala siya magpadayon tungod kay gusto niya nga tun-an pa ang Basahon ni Mormon. Siya lamang ang usa sa lima ka indibidwal niini nga pagpadayag nga sa piho nga paagi wala ingna nga siya “dili ubos sa panghimaraut” (D&P 23:1, 3, 4, 5). Sa wala madugay human nadawat kini nga pagpadayag, nabunyagan si Joseph Knight Sr., ug human niana gihulagway siya ni Joseph Smith isip “maunungon ug matinud-anon, ug makiangayon ug sulundon, ug mahiyason ug mabination, walay pagtipas sa tuo nga kamot o sa wala” (Mga Pagtulun-an sa mga Presidente sa Simbahan: Joseph Smith [2007], 560).

Ang matag usa sa lima ka indibidwal nga miduol kang Propeta Joseph Smith aron masayud sa hunahuna ug sa kabubut-on sa Ginoo alang kanila nakadawat og gi-personalize nga tambag. Unsa nga mga kamatuoran mahitungod sa pagdawat og personal nga pagpadayag ang imong makat-unan gikan sa Doktrina ug mga Pakigsaad 23? Unsay imong mahimo aron matinguha ang indibidwal nga direksyon gikan sa Ginoo?

Doktrina ug mga Pakigsaad 24: Dugang nga Makasaysayanong Background

Sa hinapus nga bahin sa Hunyo 1830, sila si Joseph Smith, Emma Smith, Oliver Cowdery, David Whitmer, ug John Whitmer mibiyahe gikan sa Harmony, Pennsylvania, aron bisitahan ang mga miyembro sa Simbahan ug ubang mga tumutuo didto sa Colesville, New York. Pagka-Sabado, Hunyo 26, usa ka sapa ang gihimoan og dam aron maandam alang sa mga bunyag pagkasunod adlaw (Dominggo), apan usa ka mapintas nga manggugubot nga panon ang miguba sa dam panahon sa gabii. Sa sayo sa buntag pagka-Lunes, gitukod pag-usab ang dam ug 13 ka tawo ang nabunyagan, lakip na ni Emma Smith. Hinoon, sa dihang nahuman na ang mga bunyag, usa ka manggugubot nga panon nga dul-an sa 50 ka lalaki ang nagpundok, miinsulto ug mihulga nga pasakitan ang mga Santos. Nianang pagkagabii, nagpundok ang mga Santos aron kumpirmahan kadtong nabunyagan na sa sayong bahin nianang adlawa, apan sa wala pa mapahigayon ang mga kumpirmasyon, gidakop si Joseph sa pasangil nga “usa siya ka tawo nga nagdala og kasamok, sa pagdala og kagubot sa nasud pinaagi sa pagsangyaw sa Basahon ni Mormon” (sa The Joseph Smith Papers, Histories, Volume 1: Joseph Smith Histories, 1832–1844, ed. Karen Lynn Davidson ug uban pa [2012], 396).

Ang orihinal nga panimalay ni Joseph Knight Sr. didto sa Nineveh (Colesville), New York

Diha sa dalan paingon sa iyang husay, nakaeskapo si Joseph sa manggugubot nga panon pinaagi sa tabang sa naluoy nga konstable nga mi-eskort kaniya. Human sa pag-atubang sa husay ug paghukom nga dili sad-an sa mga pasangil, si Joseph daling gidakop pag-usab pinaagi sa usa ka konstable gikan sa laing lalawigan. Nianang gabhiona gibiay-biay ug giabuso si Joseph sa “daghang kalalakin-an” (sa The Joseph Smith Papers, Histories, Volume 1: Joseph Smith Histories, 1832–1844, 402), ug pagkasunod buntag miatubang siya sa husay. Gihukman si Joseph nga dili sad-an sa mga pasangil ug nakaeskapo og laing manggugubot nga panon samtang nagbiyahe pauli.

Sila si Joseph Smith ug Oliver Cowdery mihimo og laing pagsulay nga makighiusa sa bag-ohay pa lang nabunyagan nga mga miyembro sa Colesville, apan ang manggugubot nga panon nagpundok sa wala madugay human sila miabut. Napugos sila si Joseph ug Oliver sa pagpahawa, nga igo ra gayung nakaeskapo samtang ang manggugubot nga panon migukod kanila sa tibuok gabii (tan-awa sa The Joseph Smith Papers, Histories, Volume 1: Joseph Smith Histories, 1832–1844, 414). Mga Hulyo, human sila nakabalik ngadto sa Harmony, nakadawat sila si Joseph ug Oliver sa pagpadayag nga narekord diha sa Doktrina ug mga Pakigsaad 24.

Doktrina ug mga Pakigsaad 24

Nakadawat sila si Joseph Smith ug Oliver Cowdery og direksyon alang sa ilang mga calling

Basaha ang Doktrina ug mga Pakigsaad 24:1–9, nga mangita sa unsay gitudlo sa Ginoo kang Propeta Joseph Smith mahitungod sa iyang tahas isip propeta sa Dios.

Doktrina ug mga Pakigsaad 24:3. “Ipalambo ang imong katungdanan”

Niadtong Marso 1829, nahibaloan ni Propeta Joseph Smith nga kon mahuman na ang buhat sa paghubad sa Basahon ni Mormon, siya “i-orden ug molakaw ug mosangyaw sa mga pulong [sa Ginoo] ngadto sa mga katawhan” (D&P 5:6). Sa dihang ang Simbahan naorganisar usa ka tuig human niana, giordinahan si Joseph isip unang elder. Ang balaanong mga instruksyon nga gihatag diha sa Doktrina ug mga Pakigsaad 24 nagsilbi nga pagpahinumdom kang Joseph nga ang iyang panahon ug pagtagad ipahinungod na karon sa iyang katungdanan isip propeta sa Ginoo imbis nga sa temporal nga mga kabalaka. Gipasabut sa Ginoo nga ang mga miyembro sa Simbahan mosuporta kang Joseph Smith sa temporal nga paagi, diin tungod niana sila pagapanalanginan (tan-awa usab sa D&P 41:7; 43:12–14). Samtang nakasinati og pagpanggukod si Joseph ug ang nag-unang mga miyembro sa Simbahan, ang natural nga tinguha sa uban mao unta ang pagpaminus sa ilang mga paningkamot sa pagtukod sa Simbahan aron makalikay sa dugang nga pagpanggukod. Hinoon, gitambagan sa Ginoo ang Propeta sa pagpalambo sa iyang katungdanan, nga ang buot ipasabut mao ang pagpalambo sa iyang panahon ug debosyon ngadto sa iyang calling. Namulong ngadto sa mga naghupot sa priesthood, si Presidente Gordon B. Hinckley (1910–2008) miingon:

“Kanang pulong nga palamboa makapainteresado. Sa akong pag-interpretar niini, nagpasabut kini nga mopadako, nga mas mopaklaro, nga mas mopaduol, ug mopalig-on. …

“Kamong tanan, siyempre, pamilyar sa binoculars. Kon itaud nimo ang mga lente sa imong mga mata ug mo-focus niini, imo kining padak-on ug isip epekto mas mapaduol ang tanan nga imong makita. Apan kon imo kining balihon ug motan-aw sa laing bahin, imong mapaminusan ug mas mapalayo ang unsay imong makita.

“Mao usab kini sa atong mga aksyon isip mga naghupot sa priesthood. Kon motuman kita sa atong halangdon ug balaan nga calling, kon mopakita kita og gugma alang sa Dios pinaagi sa pagserbisyo sa isigkatawo, kon atong gamiton ang atong kusog ug mga talento sa pag-ugmad og pagtuo ug pagpakatap sa kamatuoran, atong gipalambo ang atong priesthood. Sa laing bahin, kon magpakabuhi kita sa kahakog, kon magpakasala kita, kon motan-aw kita diha lamang sa mga butang sa kalibutan imbis nga sa mga butang bahin sa Dios, atong gipakaubos ang atong priesthood” (“Magnify Your Calling,” Ensign, Mayo 1989, 46–47).

Gisugo si Joseph Smith sa pagtanom og mga lagutmon ug dayon moadto dayon aron magtudlo ug mangalagad sa katawhan sa Colesville, New York (tan-awa sa D&P 24:3–4).

Doktrina ug mga Pakigsaad 24:4. “Kon sila dili modawat kanimo”

Ang mga Santos kinahanglang modawat, o mopaluyo, kang Propeta Joseph Smith sa espiritwal nga paagi ug sa pagtabang kaniya sa temporal nga paagi. Kadtong modawat sa propeta karon ug motuman sa iyang mga pulong makadawat og mga panalangin, ug kadtong dili modawat makasinati og mga sangputanan. Si Sister Carol F. McConkie, Unang Magtatambag sa Kinatibuk-ang Kapangulohan sa Young Women, miingon:

“Aron mahiuyon sa balaang mga katuyoan sa langit, mopaluyo kita sa propeta ug mopili sa pagpuyo sumala sa iyang mga pulong. …

“Sa kalibutan nga gihulga sa kanihit sa pagkamatarung ug espirituhanong kagutom, gisugo kita sa pagpaluyo sa propeta. Samtang mosunod, mosuporta, ug manghimatuod kita sa mapanagnaong pulong, nagsaksi kita nga kita dunay pagtuo nga mapainubsanong monunot sa kabubut-on, kaalam, ug panahon sa Ginoo.

“Mosunod kita sa mapanagnaong pulong bisan kon kini ingon og dili resonable, hasol ug lisud. Sumala sa mga sumbanan sa kalibutan, ang pagsunod sa propeta mahimong dili popular, sayop ug dili madawat sa politikanhon ug sosyal nga paagi. Apan ang pagsunod sa propeta kanunayng husto. …

“Ang Ginoo motahud ug mopabor niadtong mopatalinghug sa propetikanhong direksyon” (“Pagpuyo sumala sa mga Pulong sa mga Propeta,” Liahona, Nob. 2014, 77–79).

Doktrina ug mga Pakigsaad 24:8. “Ako anaa uban kanimo”

Si Propeta Joseph Smith 24 anyos sa dihang ang pagpadayag nga narekord diha sa Doktrina ug mga Pakigsaad 24 nadawat. Hangtud nianang higayuna sa iyang kinabuhi, giantus ni Joseph ang daghang hagit ug mga pagsulay, sama sa sakit nga operasyon sa bitiis, ang kamatayon sa minahal nga igsoong lalaki, ang pagbiay-biay ug pagpanggukod sa iyang komunidad tungod sa Unang Panan-awon ug sa bulawang mga palid, ang kamatayon sa iyang unang anak, ang pagkawala sa 116 ka pahina nga manuskrito sa Basahon ni Mormon, ug bag-ohay lang, ang pagpanggukod sa manggugubot nga panon didto sa Colesville, New York, ug ang mga pagdakop ug mga paghusay base sa sayop nga mga pasangil. Sigurado nga nahupay si Joseph sa dihang giingnan siya sa Ginoo, “Ako mipataas kanimo gikan sa imong mga kasakit, ug mitambag kanimo, nga ikaw giluwas gikan sa imong tanan nga mga kaaway, ug … gikan sa mga gahum ni Satanas ug gikan sa kangitngit” (D&P 24:1). Apan nakat-unan sa Propeta nga kinahanglan siya nga “[m]agpailub sa mga kasakit, kay ikaw makabaton og daghan” (D&P 24:8). Bisan pa man niana, gipasaligan siya sa Ginoo uban sa saad nga “Ako anaa uban kanimo, gani ngadto sa katapusan sa imong mga adlaw” (D&P 24:8).

Sa unsang mga paagi nga ang tambag ug saad ug diha sa Doktrina ug mga Pakigsaad 24:8 magamit sa imong kinabuhi?

Doktrina ug mga Pakigsaad 24:9. “Sa temporal nga mga paghago ikaw dili makabaton og kusog”

Ang mga miyembro ug mga lider sa Simbahan dili makadawat og dugang nga abilidad sa pagtigum og katigayunan. Ang tanan makasinati sa mga hagit ug mga risgo sa pagkamortal. Bisan pa man niana, ang uban mahimong mapanalanginan og mga talento alang sa negosyo, pinansyal, ug uban pang mga butang. Dili kini ang mga gasa ni Joseph Smith. Si Elder Dallin H. Oaks sa Korum sa Napulog Duha ka mga Apostoles mipasabut: “Si [Joseph Smith] halos kanunay naglisud sa pinansyal. Samtang misulay sa pagtuman sa bug-at nga mga responsibilidad sa iyang sagradong tawag, kinahanglan siyang motrabaho isip mag-uuma o negosyante aron makasangkap og panginabuhian alang sa iyang pamilya. Gibuhat niya kini nga walay talagsaong espiritwal nga mga gasa nga nakapatunhay kaniya sa iyang propetikanhong tawag. Gitambagan siya sa Ginoo nga ‘sa temporal nga mga paghago ikaw dili makabaton og kusog, kay kini dili imong balaan nga tawag’ (D&P 24:9)” (“Joseph, the Man and the Prophet,” Ensign, Mayo 1996, 71).

Basaha ang Doktrina ug mga Pakigsaad 24:10–19, nga mangita sa espesyal nga tabang nga gisaad sa Ginoo ngadto kang Oliver Cowdery samtang gituman niya ang iyang tawag.

Doktrina ug mga Pakigsaad 24:13–14. “Ayaw paghimo og mga milagro”

Ang mga sulugoon sa Ginoo makapapahawa og mga yawa ug makapangalagad sa mga panalangin ngadto sa mga masakiton, apan ang mga milagro mahitabo sumala sa kabubut-on sa Ginoo ug kon ang hugot nga pagtuo gamiton. Ang mga milagro wala gihatag aron pagkabig sa mga tawo ngadto sa kamatuoran apan aron paglig-on niadtong nagpakita sa ilang hugot nga pagtuo diha sa Ginoo. (Tan-awa usab sa Marcos 16:16–18, 20; Mormon 9:23–25; D&P 84:64–73.)

Doktrina ug mga Pakigsaad 24:15. “Pagtaktak sa mga abug gikan sa imong mga tiil”

Gihatagan sa Ginoo og pagtugot sila si Propeta Joseph Smith ug Oliver Cowdery sa “pagtaktak sa mga abug gikan sa [ilang] tiil” isip pagpamatuod batok niadtong dili modawat kanila (D&P 24:15). Kalabut niini, si Elder James E. Talmage (1862–1933) sa Korum sa Napulog Duha ka mga Apostoles nagtudlo: “Ang ingon og seremonyas nga pagpanaktak sa abug gikan sa tiil sa usa ka tawo isip pagpamatuod batok sa lain gisabut sa mga Judeo nga simbolo sa pagputol sa panaghigalaay ug ang pagbiya sa tanang responsibilidad alang sa mga sangputanan nga mahimong mosunod. Nahimo kining usa ka ordinansa sa pag-akusar ug pagpamatuod pinaagi sa mga instruksyon sa Ginoo ngadto sa Iyang mga apostoles [tan-awa sa Mateo 10:12–14; Marcos 6:10–11; Lucas 9:4–5]. … Sa dispensasyon karon, ang Ginoo susama nga misugo sa Iyang awtorisado nga mga sulugoon sa pagpamatuod gayud batok niadtong kinsa sa kabubut-on ug madumtanon nga paagi mibatok sa kamatuoran nga gipaila sa paagi nga dunay awtoridad (tan-awa sa Dok. ug mga Pakig. 24:15; 60:15; 75:20; 84:92; 99:4). Ang responsibilidad sa pagpamatuod sa atubangan sa Ginoo pinaagi niining simbolo sa pag-akusar hilabihan gayud nga ang mga paagi mahimong magamit lamang ubos sa dili kasarangan ug grabe nga mga kahimtang, sigun sa imando sa Espiritu sa Ginoo” (Jesus the Christ, 3rd ed. [1916], 345). Ang full-time nga mga misyonaryo wala hatagi og katungod sa pagbuhat niini karon.

Doktrina ug mga Pakigsaad 24:18. “Dili modala og puntil ni puyô”

Sila si Propeta Joseph Smith ug Oliver Cowdery gisugo usab nga “dili modala og puntil ni puyô” (D&P 24:18), buot ipasabut nga mibiyahe sila nga walay kwarta ug nagsalig sa kaayo ug kamabination sa uban, ilabi na sa mga miyembro sa Simbahan (tan-awa sa D&P 24:3), sa pagsangkap og pagkaon ug kapuy-an. Nasayud ang Ginoo nga ang kabug-at sa pagpangulo sa Simbahan magkinahanglan sa tanang panahon ug kusog sa Propeta, ug sa ingon Siya misugo nga ang Simbahan mosangkap sa gikinahanglan nga temporal nga suporta alang sa Propeta ug sa iyang pamilya aron maggahin niya ang iyang panahon ug pagtagad ngadto sa buhat sa Ginoo. Sa mga pagpadayag human niana gipasabut og usab sa Ginoo nga ang Simbahan kinahanglang mosangkap og temporal nga abag alang sa Propeta aron matuman niya ang buhat nga gitawag siya sa paghimo (tan-awa sa D&P 41:7; 43:13). Samtang ang Simbahan walay gisweldohan nga nagserbisyo, ang Simbahan nagsunod karon niining samang mga baruganan pinaagi sa pagsangkap og igo-igo ra nga allowance alang sa mga lider sa Simbahan nga gitawag sa full-time nga pagserbisyo sa Simbahan, nagtugot kanila sa paggahin sa ilang tibuok kusog, panahon, ug pagtagad ngadto sa buhat sa Ginoo.

Doktrina ug mga Pakigsaad 25: Dugang nga Makasaysayanong Background

Si Emma Smith lakip sa 13 ka mga Santos nga nabunyagan didto sa Colesville, New York, niadtong Hunyo 28, 1830. Isip sangputanan sa aksyon sa manggugubot nga panon ug sa pagkadakop ni Propeta Joseph Smith base sa sayop nga mga pasangil, kining bag-ong nabunyagan nga mga indibidwal wala makumpirmahi isip mga miyembro sa Simbahan nianang gabhiona. Tali sa bunyag ni Emma pagka-Hunyo ug sa katapusan niyang kumpirmasyon pagka-Agosto, ang Ginoo mihatag sa pagpadayag nga narekord diha sa Doktrina ug mga Pakigsaad 25 ngadto kang Emma pinaagi sa iyang bana, nga si Joseph. Sa tanang pagpadayag nga nadawat ni Joseph Smith alang sa mga indibidwal hangtud sa Hulyo 1830, kini ang una nga gihatag ngadto sa usa ka babaye. Kini nga pagpadayag nagpakita sa mahinungdanong tahas nga tumanon ni Emma diha sa Pagpahiuli. Gipili siya isip unang presidente sa Relief Society niadtong Marso 1842 didto sa Nauvoo, Illinois. (Tan-awa sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban pa [2013], 162).

Ang gitukod pag-usab nga panimalay nila ni Isaac ug Elizabeth Hale, mga ginikanan ni Emma Hale Smith, sa unsay gitawag kaniadto nga Harmony Township, Pennsylvania

Doktrina ug mga Pakigsaad 25

Ang Ginoo mihatag ni Emma Smith og gi-personalize nga tambag ug instruksyon

Basaha ang Doktrina ug mga Pakigsaad 25:1–9, nga mangita sa tambag sa Ginoo ngadto ni Emma Smith nga magamit usab ni bisan kinsa nga nagtinguha nga mahimong mas maayo nga disipulo ni Jesukristo.

Doktrina ug mga Pakigsaad 25:1. “Mga anak nga lalaki ug mga anak nga babaye sa akong gingharian”

Ang tanang tawo nga mianhi sa yuta espiritung mga anak sa atong Langitnong Amahan. Ang Basahon ni Mormon ug ang Doktrina ug mga Pakigsaad parehong nagtudlo nga kadtong nakadawat sa gipahiuli nga ebangheyo ug sa nag-uban niining mga pakigsaad ug mga ordinansa, ug tinuod nga natawo pag-usab, gisagop ngadto sa pamilya ni Ginoong Jesukristo. Nahimo Siya nga Amahan sa ilang espirituhanong bag-ong pagkatawo ug ang Amahan sa ilang kaluwasan. Mao kini ang gipasabut ni Haring Benjamin sa dihang, naghisgot niadtong napaubos sa dakong kausaban sa kasingkasing ug nagtinguha nga mosulod sa pakigsaad nga motuman sa mga sugo sa Dios, siya namahayag: “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga anak nga mga lalaki ug iyang anak nga mga babaye” (Mosiah 5:7; tan-awa usab sa Ether 3:14; D&P 35:2; 39:4–6; 45:8). Si Emma Smith bag-o lang nabunyagan sa Simbahan, ug, busa, ang Manluluwas mipasabut ngadto kaniya isip Iyang anak diha sa Doktrina ug mga Pakigsaad 25.

Doktrina ug mga Pakigsaad 25:2–3. “Maglakaw sa mga agianan nga maligdong diha sa akong atubangan”

Ang Kristohanong kinaiya nga hiyas [kaligdong] “usa ka pattern sa hunahuna ug kinaiya nga gibase sa taas nga moral nga mga sumbanan … [ug] maoy gikinahanglan gayud sa pagdawat sa giya sa Espiritu” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 143). Nagkomento bahin sa direksyon sa Ginoo ngadto ni Emma Smith nga “maglakaw sa mga agianan nga maligdong” (D&P 25:2), si Presidente Gordon B. Hinckley miingon:

“Akong gibati nga kadtong mga pulonga gihatag ngadto kang Emma Smith, ug mao usab sa tanan kanato, isip usa ka kahimtang nga angayang buhaton kon gusto kitang makapanunod sa gingharian sa Dios. Ang kakulang sa kaligdong wala gayud mahiuyon sa pagkamasulundon sa mga sugo sa Dios. Wala nay laing matahum pa kay sa kaligdong. Walay kalig-on nga mas labaw pa kay sa kalig-on sa pagkaligdong. …

“Makapainteresado nga niining pagpadayag, sa dihang gihatag sa Ginoo kanang mahinungdanong saad nga dunay kondisyon ngadto kang Emma, mipadayon siya sa pag-ingon, ‘Ang imong mga sala gipasaylo diha kanimo, ug ikaw ang pinili nga babaye.’ [D&P 25:3.] Mapasalamaton kaayo ko alang sa gasa sa pagpasaylo nga gipadangat sa usa ka maloloy-ong Amahan. Miingon ang Ginoo pinaagi kang propeta Isaias kalabut niadtong naghinulsol ug gipasaylo, ‘Bisan pa ang inyong mga sala mapula, sila pagapution ingon sa nieve, bisan pa sila lubos mapula, sila mahimong sama sa maputing balhibo sa karnero.’ (Isa. 1:18.)

“Niadtong makadungog sa akong tingog kinsa tingali nagbangutan tungod sa grabe nga mga sayop sa ilang kinabuhi, ihatag nako ang kasiguroan, nga gihatag sa karaang panahon ug sa modernong pagpadayag, nga kon diin dunay paghinulsol mahimong dunay pagpasaylo. Ayaw pabilin sa makalilisang nga mga sayop sa nangagi. Hinoon, ‘mohangad ngadto sa Dios ug magpakabuhi.’ (Alma 37:47.)” (“If Thou Art Faithful,” Ensign, Nob. 1984, 91).

Doktrina ug mga Pakigsaad 25:3. Sa unsang paagi nga si Emma “pinili nga babaye”?

Miingon ang Ginoo nga si Emma Smith “pinili nga babaye” (D&P 25:3), nga buot ipasabut nga gipili siya tungod sa iyang pagkamatinud-anon sa pag-abag sa buhat sa Dios. Si Propeta Joseph Smith (1805–1844) sa kaulahian mipasabut sa kahulugan niining tawag sa dihang iyang giorganisar ang Relief Society niadtong Marso 17, 1842: “Miabag ko sa pagsugod sa pag-organisar sa ‘The Female Relief Society of Nauvoo [Ang Kapunongan sa Kahupayan sa Kababayen-an sa Nauvoo]’ didto sa Lodge Room. Si Sister Emma Smith, Presidente, ug sila si Sister Elizabeth Ann Whitney ug Sarah M. Cleveland, mga Magtatambag. Mihatag ko og daghang instruksyon, mibasa sa Bag-ong Tugon, ug sa Basahon sa Doktrina ug mga Pakigsaad, kalabut sa Pinili nga Babaye, ug mipakita nga ang pinili nagpasabut nga mapili sa usa ka piho nga buhat … ug nga ang pagpadayag natuman nianang higayuna pinaagi sa pagkapili ni Sister Emma ngadto sa Kapangulohan sa Kapunongan [Society], nga siya gi-orden nang daan sa pagpatin-aw sa mga Kasulatan” (sa History of the Church, 4:552–53).

Doktrina ug mga Pakigsaad 25:4. Unsa kaha ang wala makita ni Emma nga mao untay hinungdan nga magbagulbol siya?

Ang Ginoo nakaila ug nahigugma kang Emma Smith. Ang Iyang instruksyon alang kaniya nga “ayaw pagmulo” (D&P 25:4) miabut tungod kay wala siya makakita sa mga palid sa Basahon ni Mormon. Diha siya atol sa pipila ka paghubad sa bulawang mga palid ug miapil pa gani sa makadiyot isip tigsulat. Tingali lisud alang kaniya sa dihang ang Tulo ka mga Saksi ug ang Walo ka mga Saksi gitugutan nga makakita niini ug siya wala. Bisan tuod nga si Emma walay oportunidad nga makakita sa mga palid, sa kaulahian iyang gipasabut nga atol sa proseso sa paghubad, “ang mga palid kasagaran diha ra sa lamesa nga walay tuyo nga itago, giputos sa gamay nga lino nga panapton alang sa lamesa, nga akong gihatag kaniya [Joseph Smith] aron pil-on nga anaa kini sa sulod. Kausa akong nahikap ang mga palid, samtang anaa kini sa lamesa, nga misubay sa outline ug porma niini. Morag mabawog kini sama sa baga nga papel, ug dunay tingog nga sama sa metal kon ang mga tumoy paklion gamit ang kumagko, sama sa buhaton usahay sa usa ka tawo nga mopakli sa mga palid sa libro gamit ang kumagko. …

“Wala ko mosulay sa paghikap sa mga palid, gawas lang [pinaagi sa lino nga panapton]. … Natagbaw ko nga buhat kadto sa Dios, ug busa wala mobati nga kinahanglan pa kining buhaton” (“Last Testimony of Sister Emma,” Saints’ Herald, Okt. 1, 1879, 290; ang spelling gi-standardize).

Doktrina ug mga Pakigsaad 25:5–9. “Ang buhatan sa imong katungdanan”

Nag-antus si Emma Smith og daghang kalisud ug kasub-anan samtang nag-antus usab siya og kalisdanan, pag-abuso, ug pagpanggukod nga gipahamtang ngadto sa iyang bana. Ang Ginoo mitawag kang Emma sa paghupay ug pagsuporta sa iyang bana sa iyang talagsaon nga kapasidad isip ang Propeta sa Pagpahiuli. Dugang pa, nakadawat si Emma og mahinungdanong mga buluhaton sa pagpangulo ug pagtudlo diha sa Simbahan. Si Sister Julie B. Beck, kanhi Kinatibuk-ang Presidente sa Relief Society, nagtudlo sa mosunod kalabut sa tahas ni Emma diha sa Pagpahiuli:

“Samtang ang Ginoo misugod sa pagpahiuli sa Iyang Simbahan pinaagi ni Propeta Joseph Smith, Iyang gibalik [sama sa Iyang gibuhat sa karaang panahon] pag-apil ang mga babaye diha sa sumbanan sa pagkadisipulo. Pipila ka bulan human ang Simbahan pormal nga natukod, gipadayag sa Ginoo nga si Emma Smith kinahanglang i-set apart isip usa ka lider ug magtutudlo diha sa Simbahan ug isip opisyal nga tigtabang sa iyang bana, ang Propeta [tan-awa sa D&P 25]. Sa iyang calling nga motabang sa Ginoo sa pagtukod sa Iyang gingharian, gihatagan siya og mga panudlo kalabut kon unsaon pagpatubo sa iyang pagtuo ug personal nga pagkamatarung, unsaon paglig-on sa iyang pamilya ug sa iyang panimalay, ug unsaon pagserbisyo sa uban.

“Nanghinaut ako nga ang akong apo nga mga babaye makasabut nga sukad sa adlaw nga ang ebanghelyo gisugdan sa pagpahiuli niini nga dispensasyon, ang Ginoo nagkinahanglan sa matinud-anong mga babaye sa pag-apil isip Iyang mga disipulo” (“Unsay Akong Gipanghinaut nga Masabtan sa Akong Apo nga mga Babaye (ug Apo nga mga Lalaki) mahitungod sa Relief Society,” Liahona, Nob. 2011, 110).

Ang Ginoo mitawag kang Emma Smith nga “mao ang paghupay” ngadto sa iyang bana, si Joseph, diha sa iyang mga kalisdanan (D&P 25:5).

Namulong bahin sa importante nga mga kontribusyon nga gihimo sa kababayen-an ngadto sa Simbahan, si Presidente Russell M. Nelson sa Unang Kapangulohan miingon:

“Ang mga kababayen-an niini nga dispensasyon lahi kay sa mga kababayen-an sa bisan unsa pa tungod kay kini nga dispensasyon lahi kay sa uban. Kini nga kalainan nagdala og mga kahigayunan ug responsibilidad.

“… Niadtong 1979, si Presidente Spencer W. Kimball mihimo og usa ka tulukibon nga panagna mahitungod sa epekto sa mga babaye nga nagtuman sa pakigsaad diha sa kaugmaon sa Simbahan sa Ginoo. Nanagna siya: ‘Ang dakong pagtubo nga moabut sa Simbahan sa katapusang mga adlaw moabut tungod kay daghang buotang mga babaye sa kalibutan … mapaduol sa Simbahan sa tumang kadaghan. Kini mahitabo sa kahimtang nga ang mga babaye sa Simbahan moaninaw sa pagkamatarung ug sa ilang pagkamaayo og abilidad sa pagpahayag sa ilang mga kaugalingon ug sa kahimtang nga ang mga babaye sa Simbahan makita nga talagsaon ug lahi––sa malipayong paagi––gikan sa mga babaye sa kalibutan’ [Mga Pagtulun-an sa mga Presidente sa Simbahan: Spencer W. Kimball (2006), 279].

“Minahal kong mga sister, kamo nga maoy among mahinungdanong mga kauban niining katapusang mga adlaw, ang panahon nga nakita daan ni Presidente Kimball mao karon. Kamo ang mga babaye nga iyang nakita! Ang inyong hiyas, kahayag, gugma, kahibalo, kaisug, kinaiya, hugot nga pagtuo ug matarung nga kinabuhi mopaduol sa maayo nga mga babaye sa kalibutan, uban sa ilang mga banay, ngadto sa Simbahan sa dili ordinaryong gidaghanon!

“Kami, ang inyong mga kaigsoonan, nagkinahanglan sa inyong kalig-on, sa inyong pagkakabig, sa inyong konbiksyon, sa inyong abilidad sa pagpangulo, sa inyong kaalam, ug sa inyong mga tingog. Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahum ug awtoridad sa Dios!

“Si Presidente [Boyd K.] Packer namahayag:

“‘Gikinahanglan nato ang mga babaye kinsa giorganisar ug mga babaye kinsa makaorganisar. Kita nagkinahanglan og mga babaye nga adunay abilidad sa pagpangulo kinsa makaplano ug makadumala ug makapangalagad; mga babaye kinsa makatudlo, mga babaye kinsa makasulti. …

“Kita nagkinahanglan og mga babaye nga adunay gasa sa pag-ila kinsa makatan-aw sa mga uso sa kalibutan ug makamatikod niadtong, bisan unsa ka sikat, mga mabaw o kuyaw’ [“The Relief Society,” Ensign, Nob. 1978, 8].

“Karon, tuguti ko nga modugang nga kita nagkinahanglan og mga babaye kinsa kamao nga mopahinabo sa importante nga mga butang pinaagi sa ilang hugot nga pagtuo ug kinsa maisugon nga mga tigpanalipod sa moralidad ug mga pamilya sa usa ka makasasala nga kalibutan. Kita nagkinahanglan og mga babaye kinsa mapahinunguron sa pagbantay sa mga anak sa Dios diha sa dalan sa pakigsaad padulong sa kahimayaan; mga babaye nga nakahibalo unsaon pagdawat og personal nga pagpadayag, nga nakasabut sa gahum ug kalinaw sa endowment sa templo; mga babaye nga nakahibalo unsaon pagsangpit sa mga gahum sa langit aron sa pagpanalipod ug paglig-on sa mga bata ug mga pamilya; mga babaye nga nagtudlo nga walay kahadlok” (“Usa ka Hangyo ngadto sa Akong mga Sister,” Liahona, Nob. 2015, 96).

Doktrina ug mga Pakigsaad 25:7. Ang kahulugan sa pulong nga gi-orden

Atol sa Marso 17, 1842, nga miting sa pag-organisar sa Female Relief Society of Nauvoo, si Emma Smith napili nga presidente, ug sila si Sarah M. Cleveland ug Elizabeth Ann Whitney napili isip mga magtatambag ni Emma diha sa kapangulohan. Gi-orden ni John Taylor sila si Sarah ug Elizabeth ngadto sa ilang mga calling. Hinoon, sa dihang “iyang gipatong ang iyang mga kamot sa ulo ni Mrs. Smith,” siya “mipanalangin niya, ug mikumpirmar diha kaniya sa tanang panalangin nga natugyan ngadto kaniya” (The First Fifty Years of Relief Society: Key Documents in Latter-day Saint Women’s History, ed. Jill Mulvay Derr, Carol Cornwall Madsen, Kate Holbrook, ug Matthew J. Grow [2016], 32; ang spelling gi-standardize). Giklaro ni Propeta Joseph Smith nga si Emma wala gi-orden atol sa miting tungod kay “gi-orden siya atol sa panahon, nga ang Pagpadayag [D&P 25] nahatag” (The First Fifty Years of Relief Society, 32; ang spelling gi-standardize; tan-awa usab sa The Joseph Smith Papers, Journals: Volume 2: December 1841–April 1843, ed. Andrew H. Hedges ug uban pa [2011], 45, note 163).

Gitawag sa Ginoo si Emma Smith “sa pagpatin-aw sa mga kasulatan, ug pag-awhag sa simbahan” (D&P 25:7).

Gipasabut ni Presidente Joseph Fielding Smith (1876–1972) kon unsay buot ipasabut sa dihang ang Ginoo miingon nga si Emma Smith “i-orden pinaagi sa kamot [ni Propeta Joseph Smith] (D&P 25:7): “Ang termino nga ‘orden’ kasagaran gigamit sa unang mga adlaw sa Simbahan agig pagpasabut sa parehong ordinasyon ug pag-set apart. … Ang kalalakin-an nga naghupot sa Priesthood giingon nga ‘gi-orden’ sa pagpangulo sa mga branch ug sa pagpahigayon sa espesyal nga buhat. Ang mga sister usab giingon nga ‘gi-orden’ sa dihang gitawag sila sa pipila ka espesyal nga katungdanan o responsibilidad. Sa kaulahiang mga tuig nakapalambo kita og kalainan tali sa orden ug pag-set apart. Ang kalalakin-an i-orden ngadto sa mga katungdanan sa Priesthood ug i-set apart sa pagpangulo sa mga stake, mga ward, mga branch, mga misyon, ug mga organisasyon sa auxiliary. Ang mga sister i-set apart—dili i-orden—isip mga presidente sa organisasyon sa mga auxiliary, sa mga misyon, ubp. Kining panultihon nga si Emma Smith ‘gi-orden’ sa pagpatin-aw sa kasulatan, wala magpasabut nga iyang gitugyan ngadto kaniya ang Priesthood, apan siya gi-set apart ngadto niining calling, nga maoy katumanan niini diha sa Relief Society sa Simbahan” (Church History and Modern Revelation, [1953], 1:126).

Basaha ang Doktrina ug mga Pakigsaad 25:10–16, nga mangita kon unsay gipabuhat kang Emma Smith aron pag-andam sa pagdawat og korona sa pagkamatarung.

Doktrina ug mga Pakigsaad 25:10. “Mosalikway sa mga butang niini nga kalibutan”

Si Presidente Gordon B. Hinckley, nga nagkomento bahin sa mga instruksyon sa Ginoo ngadto ni Emma Smith diha sa Doktrina ug mga Pakigsaad 25:10, miingon: “Gibati nako nga wala siya magsulti kang Emma nga dili siya mabalaka kalabut sa dapit nga kapuy-an, sa pagkaon diha sa iyang lamesa, ug sa ikasul-ob. Nag-ingon Siya kaniya nga kinahanglan dili palabihan ang pagkahingawa bahin niining mga butanga, nga mao usab ang gikinahanglan sa kadaghanan kanato. Nag-ingon Siya kaniya nga hunahunaon ang mas taas nga mga butang sa kinabuhi, mga butang sa pagkamatarung ug kamaayo, mga butang kabahin sa gugmang putli ug gugma ngadto sa uban, mga butang sa kahangturan” (“If Thou Art Faithful,” 91).

Doktrina ug mga Pakigsaad 25:11–12. “Ang akong kalag mahimuot sa awit sa kasingkasing”

Ang mga kasulatan naghatag og ebidensya nga ang musika kanunay na nga nahimong importante nga bahin sa pagsimba sa mga anak sa Dios (tan-awa sa 1 Mga Cronicas 15:27; Mateo 26:30; Mga Taga-Colosas 3:16; Alma 26:8; Mormon 7:7; Moroni 6:9; D&P 136:28). Ang Ginoo namahayag nga “ang awit sa mga matarung mao ang usa ka pag-ampo ngari kanako” (D&P 25:12). Gisangunan sa Ginoo si Emma Smith sa “paghimo og pagpili sa sagrado nga mga himno” (D&P 25:11). Niadtong 1835, ang unang libro sa mga himno [hymnal] sa Simbahan namantala didto sa Kirtland, Ohio, ug ang ulohan nga pahina miila kang Emma Smith nga maoy nagpili sa mga himno. Gitigum niya ang mga teksto sa 90 ka himno nga kasagaran gikan sa Protestante nga mga tinubdan, kauban sa bag-ong mga himno nga gisulat sa mga miyembro sa Simbahan, sama ni W. W. Phelps.

Ang ulohan nga pahina sa orihinal nga kopya sa 1835 nga libro sa mga himno nga giandam ni Emma Smith

Unsa nga mga panalangin ang imong nadawat isip resulta sa pagsimba sa Ginoo pinaagi sa angay nga musika? Ikonsiderar kon sa unsang paagi nga ang pagpili nga maminaw sa angay nga musika makatabang kanimo nga mas mapaduol sa Ginoo.

Doktrina ug mga Pakigsaad 25:16. “Kini ang akong tingog ngadto sa tanan”

Samtang ang ubang mga pagpadayag nga makita diha sa Doktrina ug mga Pakigsaad orihinal nga nahatag ngadto sa piho nga mga indibidwal, angay ug importante alang sa mga magbabasa nga makita ang doktrinal nga mga kamatuoran ug mga baruganan nga anaa diha sa mga tudling sa kasulatan nga ingon og personal nila kining nadawat gikan sa Ginoo. Ang makugihong pagtuon sa mga kasulatan makatabang sa mga magbabasa nga makaila niining importante nga mga kamatuoran. Si Presidente Marion G. Romney (1897–1988) sa Unang Kapangulohan mipasabut, “Ang usa ka tawo dili matinuorong makatuon sa mga kasulatan nga dili makakat-on sa mga baruganan sa ebanghelyo tungod kay ang mga kasulatan gisulat aron mapreserbar ang mga baruganan alang sa atong kaayohan” (“The Message of the Old Testament,” [pakigpulong ngadto sa mga religious educator sa Church Educational System, Ago. 17, 1979], 3). Kon ang mga kamatuoran ug mga baruganan sa ebanghelyo mailhan ug mahatagan og bili, mahimo kining magamit sa inadlaw nga pagpakabuhi.

Basaha pag-usab ang Doktrina ug mga Pakigsaad 25:13, ug ikonsiderar kon sa unsang paagi nga ang pagkamatinud-anon sa mga pakigsaad nakapanalangin kanimo. Hunahunaa ang mahitungod sa unsay imong mahimo aron mahinumduman ug matuman ang mga pakigsaad nga imong gihimo ngadto sa Dios aron imong mabayaw ang imong kasingkasing ug magmaya.

Dugang nga Kapanguhaan

• “Joseph Smith’s Teachings about Priesthood, Temple, and Women,” Gospel Topics, topics.lds.org.